Bo Ta Corda?

Bo a disfruta di e edicionnan resien di E Toren di Vigilancia? Wel, wak si bo por contesta e siguiente preguntanan:

• Cuanto capitulo e buki di Mikeas tin, na ki tempo el a ser skirbi y con e situacion tawata e tempo ei?

E buki di Mikeas tin shete capitulo. Profeta Mikeas a skirbi e buki den siglo 8 prome cu nos era. Y e tempo ei e pueblo cu Dios tawatin un pacto cu ne tawata dividi den dos nacion: Israel y Huda.—15/8, pagina 9.

• Di acuerdo cu Mikeas 6:8 [NW], kico Dios ta rekeri di nos?

Nos tin cu “eherce husticia.” Dios su manera di haci cosnan ta e norma di husticia, pues nos tin cu mantene su principionan di honestidad y integridad na halto. E ta manda nos “stima bondad.” Cristiannan ta mustra bondad amoroso door di reacciona riba necesidad di otronan tal como ora surgi un desaster. Pa nos “sea modesto canando cu” Yehova, nos tin cu reconoce nos limitacionnan y depende riba dje.—15/8, pagina 20-2.

• Kico un cristian lo por haci si e perde trabou?

Lo ta sabi pa e reexamina su estilo di bida. Podise lo por ta posibel pa e simplifica su bida door di bai biba den un cas mas chikito of door di elimina pocesionnan innecesario. Siguramente ta masha importante pa e stop di precupa demasiado pa e necesidadnan diario, confiando cu Dios lo percura pa nos haya nan. (Mateo 6:33, 34)—1/9, pagina 14-15.

• Kico nos mester corda ora nos ta duna of ricibi regalo di casamento?

No ta necesario pa duna regalonan costoso ni nos no mester spera di haya nan tampoco. Loke ta mas balioso ta e actitud di curason di e dunado. (Lucas 21:1-4) No ta bondadoso pa anuncia nomber di esun cu a duna regalo. Esei por pone hende sinti berguensa. (Mateo 6:3)—1/9, pagina 29.

• Dicon nos mester haci oracion sin stop?

Oracion riba un base regular por yuda fortifica nos relacion cu Dios y ekipa nos pa enfrenta pruebanan severo. Nos oracionnan por ta cortico of largo, segun e necesidad y circunstancianan. Oracion ta edifica fe y ta yuda nos trata cu problema.—15/9, pagina 15-18.

• Con nos tin cu compronde 1 Corintionan 15:29 cu den algun version ta ser traduci, “batisa pa e mortonan”?

Apostel Pablo tawata kiermen cu cristiannan ungi ta ser batisa of ta drenta un estilo di bida cu lo hiba na un morto pa motibo di integridad mescos cu esun di Cristo. Despues di esei, nan ta ser resusita na bida spiritual mescos cu Cristo.—1/10, pagina 29.

• Con nos por sa cu bira un cristian ta encera mas cu evita e mal echonan menciona na 1 Corintionan 6:9-11?

Apostel Pablo no a menciona cu ta malechonan manera fornicacion, idolatria y buracheria so cristiannan mester evita. Mustrando cu mas cambionan lo ta necesario, el a sigui den e siguiente versiculo: “Tur cos ta permiti pa mi, ma tur cos no ta cumbini.”—15/10, pagina 18-19.

• Ken tawata algun di e hende mohenan di antiguedad cu a haci Dios su curason contento?

Nan tawata entre otro e parteranan Cifra y Pua, kendenan no kier a obedece Farao y mata e yiu hombernan Israelita resien naci. (Exodo 1:15-20) E prostituta Cananeo, Rahab, a proteha dos spion Israelita. (Hosue 2:1-13; 6:22, 23) Door cu Abigail a desplega discernimento, el a yuda salba bida di hende y proteha David di culpa di sanger. (1 Samuel 25:2-35) Nan ta sirbi como ehempel pa hende mohenan djawe.—1/11, pagina 8-11.

• Den ki sentido ‘e streyanan tawata bringa for di shelo’ contra Sisara manera Huesnan 5:20 ta bisa?

Tin hende ta pensa cu e declaracion aki ta referi na yudansa di Dios. Otronan ta di opinion cu e ta referi na yudansa angelical, yobida di meteorit of Sisara su confiansa den pronosticonan astrologico. Siendo cu Bijbel no ta duna detaye, nos por compronde cu e declaracion aki ta indica cu tawatin un of otro forma di intervencion dibino na fabor di e ehersito di Israel.—15/11, pagina 30.

• Dicon asina hopi hende ainda ta bisa cu nan ta kere den Dios siendo cu na tur parti di mundo tin indiferencia religioso?

Tin hende ta bai misa en busca di pas mental. Otronan tin speransa di haya salu, rikesa, exito, of bida eterno despues di morto. Den algun area hende ta busca algo pa yena e bashi spiritual cu a surgi debi na e echo cu metanan capitalista a remplasa ideologia comunista. E echo cu un cristian ta conciente di e motibonan aki, por yud’e hiba combersacionnan significativo.—1/12, pagina 3.