Bo Ta Cultiva un Sintimento di Admiracion?

BO A ripara cu escritornan di Bijbel bes tras bes ta stimula un sintimento di admiracion ora nan ta reconoce e obra- y atributonan di Dios? ‘Mi ta traha na un manera maraviyoso’, e salmista a declara. (Salmo 139:14) Profeta Isa­ias a skirbi: “O SEÑOR, bo ta mi Dios; lo mi halsa bo; lo mi duna gradicimento na bo nomber; pasobra bo a haci cosnan maraviyoso.” (Isaias 25:1) Of pensa riba e admiracion y respet profundo cu apostel Pablo a expresa den su palabranan: “O profundidad di e rikesanan, tanto di e sabiduria como di e conocemento di Dios!”—Romanonan 11:33.

Un cos maraviyoso ta algo cu ta stimula emocion door cu e ta inespera, desconoci of inexplicabel, y specialmente ta lanta e sintimento di sorpresa mescla cu admiracion of curiosidad.

No ta un goso pa mira con mucha chikito ta habri nan wowonan hancho hancho di admiracion ora nan mira, sinti of tende algo cu ta nobo pa nan? Lamentablemente, e admiracion ei basa riba curiosidad of riba e echo cu un cos ta nobo pa nan, hopi bes ta mengua segun cu añanan ta pasa.

Sinembargo, serca e escritornan di Bijbel cu nos a caba di cita, e sintimento di admiracion y respet tawata algo hopi profundo den nan. E tawata un sintimento duradero. Con bin? Pasobra nan a cultiva nan sintimento di admiracion door di medita cu aprecio riba e obranan di Dios. E salmista a resa: “Mi ta medita riba e añanan di hopi tempo pasa, riba tur loke bo a haci; e maraviyanan di bo creacion ta yena mi mente.”—Salmo 143:5, The New English Bible.

Ta di elogia cu ainda bo por haya e sintimento di admiracion ei entre e adoradonan di Dios di tempo moderno! Abo tin e sintimento ei? Bo ta cultivand’e?