Hesus Su Famia—Ken Nan Tawata?

NA varios parti di mundo durante e luna di december bo ta mira esenanan di pesebre cu e baby Hesus bou di cuido amoroso di su mama, Maria, y su tata di criansa cu ta Hose. E esenanan aki por hala atencion di asta hende cu no ta yama nan mes cristian. Siendo cu e figura principal den e esenanan aki ta Hesus, kico e Scritura ta conta nos di Hesus su famia humano?

Hesus tawatin un background masha interesante. E persona cu a duna lus na dje tawata un birgen cu yama Maria, y asina el a bira miembro di e famia humano. Segun Bijbel, Dios a uza spirito santo pa transferi Hesus su bida for di shelo pa e matris di Maria. (Lucas 1:30-35) Prome cu Hesus su concepcion milagroso a ser anuncia, Maria tawata comprometi cu un homber cu yama Hose. Pesei, el a bira e tata di criansa di Hesus.

Despues cu Hesus a nace, Hose cu Maria a haya otro yiunan, Hesus su mitar rumannan. Esaki ta bisto for di e pregunta cu e habitantenan di Nazaret a haci tocante Hesus despues: “No ta yiu di e carpinte esaki ta? No ta Maria su mama yama, y su rumannan: Santiago, Hose, Simon y Hudas? Y su ruman mohenan tur no ta aki cerca nos?” (Mateo 1:25; 13:55, 56; Marco 6:3) For di esaki nos por conclui cu Hesus su famia di cas a consisti di su mayornan, cuater ruman homber y por lo menos dos ruman mohe.

Sinembargo, awendia tin hende cu no ta kere cu e rumannan di Hesus tawata yiunan di Maria cu Hose. Dicon? Segun New Catholic Encyclopedia: “Desde su principio, iglesia a siña su hendenan cu Maria semper tawata birgen. En bista di esaki, hende a kere sigur cu Maria no tawatin otro yiu.” E mesun obra di referencia ta bisa cu e palabranan Griego pa ruman mohe y pa ruman homber por referi na “un persona of personanan cu tin e mesun religion of cu tin otro relacion comun cu otro” of na famia, kisas primo.

Esei ta berdad? Asta algun teologo catolico cu no ta di acuerdo cu e doctrina tradicional, ta apoya e pensamento cu Hesus tawatin ruman homber y ruman mohe carnal. John P. Meier, expresidente di e Asociacion Catolico di Bijbel na Merca, a skirbi: “Ora e T[estament] N[obo] uza e palabra adelphos [ruman] den un sentido cu no ta esun figurativo, ma pa indica un tipo di relacion carnal of legal, e ta nifica solamente un ruman di e mesun tata y mama of un mitar ruman y nada otro.” * Si, e Scritura ta indica cu Hesus tawatin ruman homber y ruman mohe, kendenan a nace di e matrimonio di Hose cu Maria.

E Evangelionan ta menciona otro famianan di Hesus tambe, pero laga nos consentra aworaki riba Hesus su famia di cas y wak kico nos por siña for di nan.

[Nota]