Nan A Busca e Caminda Smal

CASI 550 aña pasa, gruponan chikito di hende cu a declara di ta cristian y cu tawata biba na Praga, Chelčice, Vilémov, Klatovy y otro stadnan cu awe ta keda den Republica Checo, a bandona nan cas. Nan a establece nan mes serca di e pueblito Kunwald, den un vaye den parti nortost di Bohemia. Ei nan a construi nan casita, a cultiva e tera, a lesa nan Bijbel y a yama nan mes Union di Ruman, of Unitas Fratrum na Latin.

E pobladonan aki a consisti di hende di varios antecedente. Nan tawata campesino, hende di noblesa, studiante di universidad, rico y pober, homber y mohe, biuda y huerfano, y tur tawatin e mesun deseo. Nan a skirbi: “Nos a acudi na Dios mes den oracion y a rog’e pa E revela su gran boluntad na nos den tur cos. Nos kier a cana den Su caminda.” Si, e Union di Ruman aki, of e Rumannan Checo manera despues nan a yama e comunidad aki di creyente, tawata busca e ‘caminda smal cu ta hiba na bida.’ (Mateo 7:13, 14) Cua ta e berdadnan biblico cu nan buskeda a revela? Con nan creencianan a diferencia for di esnan acepta den e era ei, y kico nos por siña for di nan?

Nan A Rechasa Violencia y A Nenga di Compromete Nan Siñansanan

Varios movemento religioso a contribui na formacion di Union di Ruman meimei di siglo 15. Un di nan tawata e waldensenan, un movemento cu tawata data for di siglo 12. Inicialmente, e waldensenan a separa  nan mes for di catolicismo Romano, cu tawata e religion di estado na Europa Central. Sinembargo, despues nan a regresa parcialmente na siñansanan catolico. Un otro grupo cu hopi influencia tawata e husitanan, siguidonan di Jan Hus. Nan a representa e religion di un gran parti di e poblacion Checo, pero nan no tawata ningun tiki uni. Un faccion tawata bringa tocante cuestionnan social, mientras cu un otro a uza religion pa promove causanan politico. E Union di Ruman a ser influencia tambe door di gruponan cu a kere den e Reinado di Mil Aña y door di expertonan local y stranhero riba tereno biblico.

Peter Chelčický (un reformador y experto di Bijbel cu a biba alrededor di aña 1390 pa 1460), tawata conoci cu e siñansanan di e waldensenan y e husitanan. El a rechasa e husitanan pasobra nan movemento a cuminsa uza violencia, y el a kita for di e waldensenan debi cu nan tawata compromete nan siñansanan. Chelčický a condena guera como algo cu no ta cristian. E tawata di opinion cu “e lei di Cristo” mester dirigi un cristian, sin importa ki consecuencianan esei lo tawatin. (Galationan 6:2; Mateo 22:37-39) Na aña 1440, Chelčický a skirbi su siñansanan den e buki Net of the Faith (Reda di e Fe).

Gregory di Praga, un contemporaneo mas hoben di Chelčický, tawata asina encanta cu e siñansanan di Chelčický cu el a bandona e movemento husita. Na 1458, Gregory a combence gruponan chikito di exhusita pa bandona nan cas den diferente parti di Chekia. Nan  tawata entre esnan cu a siguie te na e pueblito Kunwald, caminda nan a establece un comunidad religioso nobo. Despues, gruponan di waldense Checo y Aleman a join nan ei.

Un Bista den Pasado

Di aña 1464 pa 1467, e grupo nobo pero creciente aki a tene varios asamblea religioso den e region di Kunwald y a acepta varios resolucion cu a defini nan movemento religioso nobo. Nan a registra tur resolucion cuidadosamente den un serie di buki, conoci awe como Acta Unitatis Fratrum (Acta di e Union di Ruman) cu ainda ta existi. E Acta ta sirbi como un bentana cu ta laga nos mira den pasado, dunando un cuadro bibo di loke e Union di Ruman a kere. E bukinan ta contene carta, copia di discurso, y asta detayenan di nan disputanan.

Relaciona cu e creencianan di e Union di Ruman, e Acta ta declara: “Nos ta determina pa establece nos administracion exclusivamente a base di lesamento di Bijbel y a base di e ehempelnan di nos Señor y e apostelnan santo den meditacion, humildad y pasenshi, stimando nos enemigonan, haciendo bon na nan y deseando bon pa nan, y resando pa  nan.” E obranan skirbi ta mustra tambe cu na comienso e Union di Ruman tawata haci e trabou di predica. Nan tawata cana dos dos, y hende mohe a resulta di tin hopi exito como misionero local. E Union di Ruman a abstene di puestonan politico, nan no a hura, no a participa den actividadnan militar, ni a carga arma.

Di Union pa Desunion

Pero despues di algun decada, e Union di Ruman no tawata cumpli mas cu e nificacion di su nomber. Disputa tocante con literal mester pega na nan creencianan a hiba na division. Na aña 1494 e Union di Ruman a parti den dos grupo: Partido Mayor y Partido Menor. Mientras cu Partido Mayor a suavisa su creencianan original, Partido Menor a predica cu e Rumannan mester keda firme den nan posicion contra politica y mundo.—Wak e cuadro “Kico A Para di Partido Mayor?”

Por ehempel, un miembro di Partido Menor a skirbi: “Hende cu ta cana den dos caminda muy probablemente lo no keda cu Dios, ya cu  masha poco bes y solamente den cosnan chikito nan ta dispuesto pa sacrifica nan mes y somete na Dje, mientras cu den cosnan grandi nan ta sigui nan propio caminda. . . . Nos kier ser conta entre esnan cu tin mente firme y bon consenshi, cu tur dia ta sigui Señor Cristo riba e caminda smal cu nan crus.”

Miembronan di Partido Menor a considera spirito santo como Dios su forsa activo, e “dede” di Dios. Nan comprondemento di e rescate di Hesus tawata cu e homber perfecto Hesus, a paga cu su bida pa loke e pecado Adam a perde. Nan no tawata venera Maria, mama di Hesus. Nan a restaura e doctrina cu tur creyente por actua como sacerdote y cu no tin cu haci voto di celibato. Nan a curasha tur miembro di e congregacion pa participa den predicacion publico y nan a expulsa pecado cu no a repenti. Nan a keda strictamente separa di actividadnan militar y politico. (Wak e cuadro “Loke e Rumannan di Partido Menor A Kere.”) Como cu Partido Menor a pega estrechamente na e resolucionnan di e Acta, e partido a considera su mes e berdadero heredero di e Union di Ruman original.

Franco y Persigui

E Partido Menor na un manera franco y abierto a critica otro religionnan, incluso Partido Mayor. Tocante e religionnan ei nan a skirbi: “Boso ta siña hende pa batisa mucha chikito cu no tin nan propio fe, y den esaki boso ta sigui e institucion di un obispo cu yama Dionisio, kende riba instigacion di algun hende imprudente a enfatisa bautismo di mucha . . . Casi tur maestro y doctor ta haci mescos, Luther, Melanchthon, Bucerus, Korvín, Jiles̆, Bullinger, . . . e Partido Mayor, tur ta hala serca otro.”

Nada straño cu nan a persigui Partido Menor. Na aña 1524 nan a suta un di su lidernan, Jan Kalenec, cu bara y a kima parti di su curpa. Despues nan a kima tres miembro di Partido Menor na staca. Parce cu Partido Menor a pasa pa olvido rond di aña 1550, despues di morto di nan ultimo lider.

Pero asina mes, e creyentenan di Partido Menor a laga nan marca riba e situacion religioso di Europa di Edad Media. Ta cierto cu como cu ainda e berdadero “conocemento” no a aumenta den tempo di Partido Menor, nan no a logra core cu e scuridad spiritual cu tawat’ei pa hopi tempo. (Daniel 12:4) No obstante, nan deseo fuerte pa busca e caminda smal y pa siguie apesar di oposicion ta algo cu cristiannan djawe por tuma nota di dje.

[Comentario na pagina 13]

Expertonan ta bisa cu 50 di e 60 bukinan Bohemio (Checo) imprimi entre aña 1500 pa 1510 a ser skirbi door di miembronan di Union di Ruman

[Cuadro na pagina 11]

Kico A Para di Partido Mayor?

Kico a para di Partido Mayor? Despues cu Partido Menor a stop di existi, Partido Mayor a sigui como un movemento religioso, conoci te awe como Union di Ruman. Cu tempo, e grupo aki a ahusta su creencianan original. Na fin di siglo 16, e Union di Ruman a forma un confederacion cu e utrakistanan Checo, * kendenan basicamente tawata luterano. Sinembargo, e Union di Ruman a keda activo, traduciendo y publicando Bijbel y tambe otro bukinan religioso. Un cos interesante ta cu e pagina di titulo di nan prome publicacionnan tawata contene e Tetragramaton, manera nan ta yama e cuater letternan Hebreo di Dios su nomber personal.

Na aña 1620, e reino Checo a ser forsa pa bai bek bou di dominio catolico Romano. Consecuentemente, hopi di e Rumannan di Partido Mayor a bandona e pais y a sigui cu nan actividadnan den exterior. Den exterior, e grupo a bira conoci despues como Iglesia di Moravia cu ta existi te ainda (Moravia tawata un parti di e paisnan Checo).

[Nota]

[Cuadro na pagina 12]

Loke e Rumannan di Partido Menor A Kere

E siguiente citanan saca for di e Acta Unitatis Fratrum di siglo 15 y 16, ta mustra algun di e creencianan di Partido Menor. E declaracionnan, skirbi door di lidernan di Partido Menor, ta ser dirigi principalmente na Partido Mayor.

Trinidad: “Si boso pasa door di Bijbel di dilanti te patras, boso lo no haya cu Dios ta parti den un tipo di Trinidad, tres persona cu nan nomber, manera hende a inventa den nan imaginacion.”

Spirito santo: “Spirito santo ta e dede di Dios y un don di Dios, of un consolador, of e Poder di Dios, cu e Tata ta duna na creyentenan a base di e meritonan di Cristo. Nos no ta haya den e Scritura Santo cu mester yama spirito santo un Dios of un Persona; e siñansanan apostolico tampoco no ta mustra esei.”

Sacerdocio: “Eroneamente nan ta duna boso e titulo “sacerdote”; sin boso corona di cabes feita y boso enguente di dede, boso ta den mesun posicion cu e laico di mas comun. San Pedro a rekeri di tur cristian pa ta sacerdote, bisando: Boso ta e sacerdocio santo cu ta ofrece sacrificio spiritual. (1 Pedro 2)”

Bautismo: “Señor Cristo a bisa su apostelnan: Bai den henter mundo, predica e Evangelio na tur criatura, na esnan cu lo kere. (Marco, capitulo 16) Y ta despues di e palabranan ei numa: y [nan] wordo batisa, nan lo ta salba. Y boso ta siña hende pa batisa mucha chikito cu no tin nan propio fe.”

Neutralidad: “Loke boso rumannan di prome a considera como malo y impuro, drenta ehersito y mata hende of cana riba caminda cu arma, tur esei boso ta considera bon . . . Pesei nos ta sinti cu boso, hunto cu otro maestronan, ta wak solamente cu boso wowo robes na loke e palabranan profetico ta señala: Pues el a kibra e poder di boog, e escudo y e spada y e guera. (Salmo 75 [Salmo 76, Beibel Santu]) Y atrobe: Nan lo no causa daño ni destruccion den henter mi sero santo, pasobra e tera di Señor lo ta yen di conocemento dibino, etcetera. (Isaias, capitulo 11).”

Predicacion: “Nos sa bon cu, inicialmente, mohenan a yuda mas hende bin na arepentimento cu tur e sacerdotenan hunto cu obispo. Y awor e sacerdotenan a establece nan mes na nan luga y na nan pastori asigna. Ki un eror! Bai den henter mundo. Predica . . . na tur criatura.”

[Mapanan na pagina 10]

(Pa e texto den su formato completo , wak e publicacion)

ALEMANIA

POLONIA

REPUBLICA CHECO

BOHEMIA

Riu Elba

PRAGA

Riu Vltava

Klatovy

Chelčice

Kunwald

Vilémov

MORAVIA

Riu Danube

[Plachinan na pagina 10, 11]

Banda robes: Peter Chelčický; abou: un pagina di “Net of the Faith”

[Plachi na pagina 11]

Gregory di Praga

[Reconocemento pa Potret na pagina 13]

Tur plachi: S laskavým svolením knihovny Národního muzea v Praze, C̆esko