Pregunta di Lector

Hesus a indica den su oracion modelo cu Dios su boluntad tawata sosode den shelo aunke e angelnan malbado no a ser expulsa ainda?

Segun Mateo 6:10, Hesus a bisa: “Cu bo boluntad sosode na tera mescos cu den shelo.” Bo por compronde e peticion aki den dos manera. Prome, como un peticion pa Dios su boluntad sosode riba tera mescos cu e tawata sosode caba den shelo of, di dos, como un peticion pa e cumpli completamente tanto den shelo como riba tera. E nificacion di Hesus su palabranan mas prome, esta, “cu bo reino bini” ta indica cu e di dos punto di bista ta mas na harmonia cu e Scritura. Y e ta refleha e situacion cu a existi ora Hesus tawata riba tera y hopi tempo despues di esei. Con asina?

E buki di Revelacion ta señala na dos resultado distinto cu establecimento di e Reino di Dios den shelo tawatin. E prome tin influencia riba shelo mes, y esun di dos ta afecta e tera. Revelacion 12:7-9 y 12 ta bisa: “Tawatin guera den shelo, Miguel y su angelnan tawata haci guera contra e dragon. Y e dragon y su angelnan tawata haci guera, y nan no a prevalece, y no tawatin luga mas pa nan den shelo. Y e gran dragon a wordo tira abou, e colebra di antiguedad, kende ta wordo yama Diabel y Satanas, kende ta gaña henter mundo; el a wordo tira abou riba tera, y su angelnan a wordo tira abou hunto cu ne. Pa e motibo aki, regociha, o shelonan y boso cu ta biba den nan. Ai di tera y lama, pasobra diabel a baha bini serca boso cu gran furia, sabiendo cu ta ked’e solamente un poco tempo mas.”

Ora cu Satanas y e demoñonan a ser expulsa for di shelo despues di 1914, e region ei a keda liber di tur spirito rebelde, y esaki a trece hopi goso pa Yehova su yiunan angelical leal, kendenan ta forma e gran mayoria di su creacion spiritual. (Job 1:6-12; 2:1-7; Revelacion 12:10) Asina e peticion den Hesus su oracion modelo a keda cumpli pa loke ta shelo. Tur esnan cu a keda den e region celestial tawata angelnan leal na Yehova y completamente sumiso na su gobernacion supremo.

Mester enfatisa si cu asta prome cu esei, ora e angelnan malbado ainda tawatin acceso na shelo, nan tawata exclui for di e famia di Dios y tawata bou di cierto restriccionnan definitivo. Por ehempel, Hudas 6 ta revela cu for di den prome siglo caba di nos era, nan tawata “na cadena eterno den scuridad [spiritual] pa e huicio di e gran dia.” Segundo Pedro 2:4 tambe ta bisa: “Dios no a spar angelnan ora nan a peca, ma a tira nan den fierno [na Griego original, Tartaro cu ta representa un estado completamente degrada] y a condena nan na posnan di scuridad [spiritual], pa wordo reserva pa huicio.” *

Distinto for di e echo cu e angelnan malbado tawata exclui aunke nan tawata den shelo ainda, riba tera si nan tawatin hopi poder. De echo, e  Palabra di Dios ta yama Satanas “e prins di e mundo” y e demoñonan e ta yama “e forsanan mundial di e scuridad aki.” (Huan 12:31; Efesionan 6:11, 12; 1 Huan 5:19) Debi na su poder, e Diabel por a ofrece Hesus “tur e reinonan di mundo y nan gloria” a cambio di un solo acto di adoracion. (Mateo 4:8, 9) Ta claro anto cu lo tin cambionan drastico ora e Reino di Dios “bini”, pa loke ta toca e tera.

Aki riba tera, e ‘binimento’ di e Reino di Dios lo resulta den un sistema di cosnan completamente nobo. E reino di Dios lo destrui tur gobierno cu hende a forma y e lo bira e unico gobierno riba tera. Na mesun tempo, su subditonan humano temeroso di Dios lo forma “un tera nobo.” (2 Pedro 3:13; Daniel 2:44) Tambe e Reino lo elimina pica for di humanidad obediente y cu tempo lo e cambia henter e tera y hacie un paradijs mundial. Asina e ta elimina delaster un rastro di e gobernacion di Satanas.—Romanonan 8:20, 21; Revelacion 19:17-21.

Na conclusion di e Milenio, ora cu e Reino Mesianico a cumpli cu Dios su boluntad p’e, “e Yiu mes tambe lo wordo someti na Esun, kende a somete tur cos na dje, pa Dios por ta tur den tur.” (1 Corintionan 15:28) Anto lo tin un prueba final, despues di cua Satanas, su demoñonan y tur hende rebelde cu nan gaña lo ser elimina pa semper den “e di dos morto.” (Revelacion 20:7-15) Despues di esei, tur creacion inteligente den shelo y riba tera lo tin goso den keda sumiso na Yehova su soberania amoroso pa semper. Den tur sentido, esei lo ta e cumplimento completo di e palabranan den Hesus su oracion modelo.—1 Huan 4:8.

[Nota]