Siña for di Hesus Su Famia Riba Tera

KICO bo sa di Hesus su famia di cas, e hendenan cu el biba hunto cu ne durante e prome 30 añanan di su bida riba tera te ora cu el a batisa? Kico e relatonan di Evangelio ta conta nos? Kico nos por siña for di un analisis di su famia? Bo por beneficia di e contestanan.

Hesus a nace cu un cuchara di plata den su boca, esta, den un famia rico? Su tata di criansa, Hose, tawata un carpinte. Esaki a nifica trabou duro cu hopi bes a encera kap palo for di den mondi pa traha cu ne. Ora Hesus su mayornan humano a bai Herusalem mas o menos 40 dia despues cu el a nace, nan a ofrece un ofrenda di sacrificio cu e Lei a prescribi. Nan a ofrece un lamchi hunto cu un pichon of tortelduif manera e Lei a stipula? No. Ta parce cu nan no por a afford e ofrendanan ei. Sinembargo, e Lei tawatin areglo pa hende pober. Cumpliendo cu e areglo aki, Hose cu Maria a ofrece “dos tortelduif of dos pichon.” E echo cu nan a scohe e animalnan di mas barata a mustra cu nan tawata un famia pober.—Lucas 2:22-24; Levitico 12:6, 8.

Bo por mira cu Hesucristo, e futuro Gobernante di humanidad completo, a nace den un famia pober, entre hendenan cu mester a traha duro pa cumpli cu e necesidadnan basico.  Ora el a bira grandi el a bira carpinte mescos cu su tata di criansa. (Mateo 13:55; Marco 6:3) “Aunke [Hesus] tawata rico” como un criatura spiritual poderoso den shelo, Bijbel ta bisa cu el a “bira pober” pa nos bienestar. El a acepta un posicion mas humilde como hende y a crece den un famia di hende comun y coriente. (2 Corintionan 8:9; Filipensenan 2:5-9; Hebreonan 2:9) Hesus no a nace den un famia bon para, y esaki kisas a pone cu algun hende por a identifica nan mes cu ne. Su status of posicion no a stroba nan. Nan por a apreci’e pa su siñansa, su cualidadnan atractivo y su obranan maraviyoso. (Mateo 7:28, 29; 9:19-33; 11:28, 29) Nos por mira Yehova Dios su sabiduria den e echo cu el a laga Hesus nace den un famia comun.

Laga nos considera e miembronan di Hesus su famia y wak kico nos por siña for di nan.

Hose—Un Homber Husto

Ora Hose a haya sa cu su comprometida tawata na estado “prome cu nan a casa”, lo e mester a sintie hopi angustia pasobra e mester a scohe entre su amor pa Maria y su asco pa e supuesto inmoralidad. Henter e situacion a parce di ta un violacion di su derecho como futuro esposo di Maria. Den su tempo, nan tawata considera un mohe comprometi igual cu esposa di e homber. Despues di a pensa basta riba e asunto, Hose a dicidi di diborcia Maria den secreto pa evita cu Maria lo a ser piedra como adultero.—Mateo 1:18, Beibel na papiamentu koriente; Deuteronomio 22:23, 24.

Despues un angel a aparece den un soño na Hose y a bis’e: “No tene miedo di tuma Maria como bo esposa; pasobra loke a wordo consebi den dje ta di spirito santo. Y e lo haya un yiu homber; y lo bo dun’e e nomber Hesus, pasobra ta e ta esun cu lo salba su pueblo di nan picanan.” Despues cu Hose a ricibi e instruccion aki for di Dios, el a actua conforme cu esaki y a bai cas cu Maria.—Mateo 1:20-24.

Debi na e decision aki e homber husto y fiel ei a bira parti di e cumplimento di loke Yehova a papia mediante profeta Isaias: “Mira, un birgen lo sali na estado y lo haya un yiu homber, y e lo dun’e e nomber Emanuel.” (Isaias 7:14) Hose sigur tawata un homber spiritual cu a aprecia e privilegio di por a bira e tata di criansa di e Mesias, aunke Maria su primogenito lo no tawata su propio yiu.

Hose no a tene relacion sexual cu Maria prome cu su yiu homber a nace. (Mateo 1:25) Pa e pareha cu awor a caba di casa, abstinencia di relacion sexual lo por tawata un desafio, pero aparentemente nan kier a evita tur malcomprendemento tocante ken tawata Tata di e baby. Esta un maraviyoso ehempel di dominio propio! Hose a pone balornan spiritual prome cu su deseonan natural.

Na cuater ocasion, Hose a ricibi instruccion angelical tocante con pa lanta su yiu di criansa. Tres di esakinan tawata relaciona cu e sitio pa cria e mucha. Obediencia inmediato tawata vital pa e yiu por a keda na bida. Na tur e ocasionnan aki, Hose a actua mesora. Prome el a bai Egipto cu e mucha y despues a hib’e bek Israel. Esaki a proteha e chikitin Hesus for di Herodes su masacre contra yiu hombernan chikito. Hose su obediencia a resulta tambe den cumplimento di profecianan relaciona cu e Mesias.—Mateo 2:13-23.

Hose a siña Hesus un ofishi di manera cu e por a percura pa su mes. Pues, Hesus no tawata conoci solamente como “yiu di e carpinte” sino tambe como “e carpinte.” (Mateo 13:55; Marco 6:3) Apostel Pablo a skirbi cu Hesus “a wordo tenta den tur cos mescos cu nos.” Ta logico cu esaki a encera traha duro pa yuda sostene e famia.—Hebreonan 4:15.

 Finalmente nos ta mira evidencia di Hose su debocion na adoracion berdadero den e ultimo relato den cua e ta aparece den Scritura Griego Cristian. Hose a hiba su famia Herusalem pa celebra Pasco Hudiu. Segun e Lei ta e hende hombernan so tawatin e obligacion di asisti, pero Hose tawatin e custumber di bai “tur aña” cu su famia completo Herusalem pa celebra Pasco. El a haci hopi sacrificio pa nan por a cana mas o menos 100 kilometer for di Nazaret te na Herusalem. Sinembargo, e ocasion ei cu Bijbel ta papia di dje, Hesus a aleha for di e grupo. Nan a hay’e den tempel ta scucha y haci e maestronan di Lei pregunta. Aunke Hesus tawatin 12 aña so, el a manifesta gran sabiduria y conocemento di e Palabra di Dios. E incidente aki ta laga nos compronde cu Hesus su mayornan mester a educ’e bon, lant’e di tal manera cu e por a bira un mucha homber spiritual. (Lucas 2:41-50) Ta parce cu Hose a muri algun tempo despues di e incidente aki pasobra e relatonan mas despues den e Scritura no ta haci mencion di dje.

Si, Hose tawata un homber husto cu a percura bon pa su famia, tanto spiritualmente como fisicamente. Abo tambe ta haci manera Hose, bo ta pone interesnan spiritual na prome luga den bo bida ora bo discerni loke ta Dios su boluntad pa nos awe? (1 Timoteo 2:4, 5) Bo ta cla pa obedece Dios su bos expresa den Su Palabra door di mustra sumision manera esun di Hose? Bo ta siña bo yiunan pa nan por combersa riba topiconan spiritual cu otro hende?

Maria—Un Sirbido di Dios sin Egoismo

Maria mama di Hesus tawata un excelente sirbido di Dios. Ora angel Gabriel a bisa Maria cu lo e duna lus, el a keda sorprendi. E tawata “un birgen”, e no a yega di tene relacion cu hende homber. Ora cu el a haya sa cu e nacemento di e yiu lo a tuma luga mediante e spirito santo, el a acepta e mensahe humildemente bisando: “Ata e sirbido di Señor; laga sosode cu mi segun bo palabra.” (Lucas 1:30-38) El a balora e privilegio spiritual ei asina tanto cu e tawata dispuesto pa soporta cualkier dificultad cu su decision lo por a trece cu ne.

Si, door di acepta e tarea aki, henter su bida como hende mohe a cambia. Ora cu Maria a bai Herusalem pa e wordo purifica, un homber deboto cu yama Simeon a bis’e: “Un spada lo traspasa asta bo mes alma.” (Lucas 2:25-35) Evidentemente e tawata referi na e manera cu Maria lo a sinti ora e mira con hopi hende ta rechasa Hesus y finalmente clab’e na un staca di  tormento.

Segun cu Hesus tawata crece, Maria tawata sigui retene den su mente loke a tuma luga den bida di Hesus, el a “keda pensa riba nan den su curason.” (Lucas 2:19, 51) Mescos cu Hose, e tawata un persona spiritual y el a atesora e suseso- y dichonan cu a cumpli cu profecia. Loke angel Gabriel a bis’e mester a keda hancra den su mente: “E lo ta grandi y lo wordo yama Yiu di e Haltisimo; y Señor Dios lo dun’e e trono di su tata David; y e lo reina riba e cas di Yacob pa semper, y su reino lo no tin fin.” (Lucas 1:32, 33) Si, el a tuma su privilegio di por bira mama humano di e Mesias masha na ­serio.

Maria su spiritualidad tawata bisto tambe ora el a topa cu Elisabet, un famia di dje cu tambe a sali na estado milagrosamente. Ora cu Maria a mir’e, Maria a glorifica Yehova y a revela su amor pa e Palabra di Dios. El a referi na Ana su oracion cu nos ta haya den 1 Samuel capitulo 2 y a inclui pensamentonan di otro bukinan di e Scritura Hebreo. E conocemento ei di e Scritura a mustra cu e tawata cualifica pa bira un mama deboto y temeroso di Dios. Lo el a coopera cu Hose pa educa nan yiu homber spiritualmente.—Genesis 30:13; 1 Samuel 2:1-10; Malakias 3:12; Lucas 1:46-55.

Maria tawatin fe fuerte den su yiu homber como e Mesias, y esaki no a mengua ni despues di Hesus su morto. Un poco despues di Hesus su resureccion, e tawata entre e fiel disipelnan di Hesus cu a reuni pa haci oracion hunto cu e apostelnan. (Echonan 1:13, 14) El a mantene su fieldad, aunke e tawatin cu soporta e agonia di mira su yiu stima muri na un staca di tormento.

Con bo por beneficia di loke nos ta siña for di e bida di Maria? Bo ta acepta e privilegio di sirbi Dios sin importa e sacrificionan cu esaki ta envolve? E seriedad di e privilegio aki tin bo pleno atencion awe? Bo ta tene na mente loke Hesus a predeci y ta compar’e cu loke ta sosode awe, esta, ‘pensa riba nan den bo curason’? (Mateo, capitulo 24 y 25; Marco, capitulo 13; Lucas, capitulo 21) Bo ta imita Maria door di familiarisa bo mes bon cu e Palabra di Dios, y uz’e libremente ora bo ta combersa? Abo lo mantene bo fe den Hesus apesar di angustia mental cu lo bo por haya bo cu ne pa motibo cu bo ta su siguido?

Hesus Su Rumannan—Hende Por Cambia

Ta parce cu ta despues di Hesus su morto su  rumannan a cuminsa eherce fe den dje. Probablemente ta pesei nan no tawata presente ora Hesus a muri na e staca di tormento, y e mester a encarga apostel Huan pa cuida su mama. Hesus su famianan a mustra cu nan no tawatin respet p’e, y na un ocasion nan a asta bisa cu Hesus “su cabes no ta bon.” (Marco 3:21) Ya cu Hesus tawatin miembronan di famia cu no tawata creyente, rumannan awe cu tin famianan di cas cu no ta creyente por tin confiansa cu Hesus ta compronde con nan ta sinti ora nan miembronan di famia ta tene mofa di nan pa motibo di nan fe.

Sinembargo, ta parce cu Hesus su rumannan a cuminsa eherce fe den dje despues di su resureccion. Nan tawata entre e grupo cu a reuni na Herusalem prome cu Pentecoste di aña 33 di nos era y a haci oracion ferviente hunto cu e apostelnan. (Echonan 1:14) Ta obvio cu e resureccion di nan mitar ruman a motiva nan pa cambia nan curason te na e punto cu nan a bira su disipel. Nunca nos mester perde speransa relaciona cu nos famianan cu no tin e mesun religion cu nos.

E Scritura ta mustra cu Santiago, Hesus su mitar ruman, na ken El aparece personalmente, a hunga un papel sobresaliente den e congregacion cristian. El a skirbi un carta inspira door di Dios na su compañeronan cristian, encurashando nan pa mantene nan fe. (Echonan 15:6-29; 1 Corintionan 15:7; Galationan 1:18, 19; 2:9; Santiago 1:1) Hudas, un otro mitar ruman di Hesus, a skirbi un carta inspira pa anima compañeronan creyente pa hiba un lucha fuerte pa e fe. (Hudas 1) Ta bon pa remarca cu den nan cartanan, ni Santiago ni Hudas no a uza e laso familiar cu nan tawatin cu Hesus pa combence nan compañeronan cristian. Esta un maraviyoso les di modestia nos por siña for di nan!

Pues, kico ta algun di e cosnan cu nos por siña for di Hesus su famia? Siguramente nos por siña lesnan relaciona cu debocion cu por ser manifesta den e siguiente maneranan: (1) Somete bo mes fielmente na e boluntad expresa di Dios y enfrenta tur prueba cu esaki ta trece cu ne. (2) Pone cosnan spiritual na prome luga asta si esaki ta nifica cu nos mester haci sacrificio. (3) Cria bo yiunan na harmonia cu e Scritura. (4) No perde speransa relaciona cu miembronan di famia cu no tin e mesun religion cu bo. (5) No gaba pasobra bo tin famia cu ta prominente den e congregacion cristian. Si, siña di Hesus su famia riba tera, ta hala nos mas serca dje, y aumenta nos aprecio pa e echo cu Yehova a scohe un famia comun y coriente pa cria Hesus durante su hubentud.

[Plachinan na pagina 4, 5]

Hose a tuma Maria como su esposa y a bira parti di e cumplimento di e profecianan Mesianico

[Plachinan na pagina 6]

Hose y Maria a siña nan yiunan balornan spiritual y e importancia di trabou

[Plachinan na pagina 7]

Aunke Hesus su rumannan a lanta den un famia spiritual, ta despues di su morto nan a pone fe den dje

[Plachinan na pagina 8]

Hesus su mitar rumannan, Santiago y Hudas a anima nan compañeronan cristian