Guera A Haya un Otro Cara

GUERA semper tawata cruel. Semper e tawatin un efecto devastador riba bida di soldanan y semper el a pone civilnan sufri. Pero den añanan resiente, guera a haya un otro cara. Den ki sentido?

Gueranan di awendia pa un gran parti ta gueranan civil, gueranan entre gruponan di ciudadano di e mesun pais. Y gueranan civil hopi bes ta dura mas largo, ta laga e poblacion keda mas traumatisa y ta destrosa paisnan mas hopi cu gueranan cu ta ser bringa entre nacionnan. Historiado Spaño Julián Casanova ta bisa: “Gueranan civil ta actividadnan militar cruel y sangriento cu ta resulta den miles di morto, violacion sexual, exilio forsa y, den casonan mas extremo, masacre.” No cabe duda cu ora atrocidadnan a ser cometi entre gruponan cu ta den cercania di otro, por dura siglonan pa e heridanan cura.

Desde e dia cu e Guera Friu a termina, tawatin masha poco guera entre ehersitonan di e nacionnan. Instituto pa Investigacion pa Pas Internacional di Stockholm (SIPRI) ta informa: “Cu excepcion di tres conflicto arma grandi registra pa aña 1990-2000, tur e otronan tawata interno.”

Ta berdad, conflictonan interno por parce menos peligroso y kisas noticia internacional no ta bisa nada tocante nan, pero toch e dolor y destruccion causa door di tal hostilidad ta devastador. Miyones di hende a muri den conflictonan interno. De echo, durante e ultimo dos decadanan, casi cinco miyon hende a perde nan bida den djis tres pais asota pa guera: Afganistan, Republica Democratico di Congo y Sudan. Den e paisnan di Balkan, combatenan etnico violento a mata casi 250.000 hende, y guera prolonga di gueriyeronan na Colombia a mata 100.000 hende.

E brutalidad di guera civil ta particularmente bisto den e efecto cu e tin riba mucha. Durante e ultimo decada, mas cu dos miyon mucha a perde nan bida den conflictonan civil, segun Alto Comisario di Nacionnan Uni pa Refugiadonan. Ademas, seis miyon a keda herida. Un cantidad creciente di mucha a wordo entrena pa bira solda. Un mucha cu a bira solda ta bisa: “Nan a train mi. Nan a duna mi un arma. Mi a tuma droga. Mi a mata masha hopi civil. Ya, tawata tempo di guera ... Mi tawata djis sigui ordo. Mi tawata sa cu esei ta malo. No tawata mi deseo.”

Hopi mucha den paisnan caminda guera civil a bira un parti di bida ta lanta sin cu nunca nan a conoce pas. Nan ta biba den un mundo caminda scolnan a wordo destrui y caminda en bes di comunica cu otro e partidonan cu ta contra otro ta uza arma di candela. Dunja, cu tin 14 aña di edad, ta bisa: “Asina hopi hende a wordo mata ... Bo no por tende parha canta mas, solamente e zonido di muchanan cu ta yora pasobra nan a perde nan mama of tata, un ruman homber of ruman mohe.”

 Kico Ta e Causanan?

Den caso di tal gueranan civil cruel asina, ta kico ta basha gasolin riba e candela? Odio etnico y di tribu, diferencianan religioso, inhusticia y disturbio politico ta factornan significativo. Un otro raiz di e problema ta golosidad—golosidad pa poder y pa placa. Lidernan politico, hopi bes motiva pa golosidad, ta pusha palo bou di candela y pone e combatenan sigui of bira mas piyo. Un raport publica door di SIPRI ta bisa cu hopi participante den conflictonan arma “ta motiva pa ganashi personal.” E raport ta sigui bisa: “Golosidad ta ser manifesta den diferente forma, for di lidernan militar y politico cu ta negosha djamanta na gran escala te na hobennan arma cu ta plunder pueblonan.”

Debi cu ta masha facil pa haya arma barata pero cu a la bes ta mortal, hopi mas hende ta ser mata. Alrededor di 500.000 morto pa aña—principalmente hende mohe y mucha—ta wordo causa door di e asina yama armanan chikito. Den un pais Africano, un hende por cumpra un rifle automatico AK-47 pa e prijs di un galiña. Lamentablemente, den algun luga e cantidad di rifle ta birando mes hopi cu e cantidad di parhanan domestico aki. Awor tin alrededor di 500 miyon armanan chikito y armanan leve mundialmente, 1 pa cada 12 persona.

Conflictonan civil amargo lo bira un caracteristica distintivo di siglo 21? Ta posibel pa controla gueranan civil? Finalmente, hende lo logra pone un fin na matamento? E siguiente articulo lo contesta e preguntanan aki.

[Plachi na pagina 4]

E Prijs Tragico di Guera Civil

Den gueranan civil cu no ta uza armanan sofistica pero cu toch ta cruel, 90 porshento di e victimanan ta civil y no solda. “Ta mas y mas bisto cu den conflictonan arma, muchanan ta e blanco y no simplemente victimanan di guera”, segun Graça Machel, e Experto di Impacto di Conflictonan Arma Riba Mucha di e Secretario General di Nacionnan Uni.

Violacion sexual a para bira un tactica militar. Den algun areanan asota pa guera, rebeldenan ta viola casi tur mucha mohe adolecente cu nan topa den e pueblonan cu nan invadi. E meta di tal violado ta pa crea panico of kibra lasonan di famia.

Guera ta causa hamber y malesa. Guera civil ta nifica cu hende lo planta y cosecha menos, y si tin mes, lo tin masha tiki cuido medico disponibel y masha poco ausilio internacional lo yega serca esnan cu ta den necesidad. Un estudio di un guera civil Africano a revela cu 20 porshento di victima a muri di malesa y 78 porshento di hamber. Solamente 2 porshento a muri como consecuencia direct di e combate.

Cada 22 minuut un promedio di un persona ta perde un brasa of un pia, of su bida door di trapa riba un mina di tera. Nan ta calcula cu tin 60 pa 70 miyon mina di tera plama den mas cu 60 pais.

Hende a haya nan mes obliga di hui for di nan casnan. Awor tin 50 miyon refugiado rond mundo, y mitar di nan ta mucha.

 [Reconocemento pa Potret na pagina 2]

COVER: Mucha homber: Potret di Chris Hondros/Getty Images

[Plachi na pagina 3]

Potret di Chris Hondros/Getty Images