Laga Nos Tur Proclama e Gloria di Yehova

“Atribui na SEÑOR gloria y poder. Atribui na SEÑOR e gloria debi na su nomber.”—SALMO 96:7, 8.

1, 2. For di ki fuente alabansa ta ser atribui na Yehova, y ken ta ser anima pa join den esei?

DAVID, yiu di Yese (Isai), a lanta como un mucha wardado di carne den bicindario di Betlehem. Hopi bes durante e silencio di anochi lo e tawatin su bista intensamente fiha riba e inmensidad di shelo yen di streya, mientras cu e tawata cuida e tounan di su tata den e sabananan solitario ei. Sin duda, e imagennan bibo ei a bin na su mente ora cu, inspira pa Dios su spirito santo, el a compone y canta e bunita palabranan di Salmo 19: “E shelonan ta conta di e gloria di Dios; y e firmamento ta proclama e obra di su mannan. Nan liña ta sali bai riba henter tera, y nan palabranan te na e finnan di mundo.”—Salmo 19:1, 4.

² E shelonan impresionante cu Yehova a crea ta proclama su gloria ‘sin papia, sin palabra, sin bos’, dia tras dia, nochi tras nochi. (Salmo 19:2, 3) Creacion nunca no ta stop di proclama e gloria di Dios. Y ora nos contempla e testimonio silencioso aki cu ta manifesta su mes na “henter tera” pa tur habitante mira, nos ta realisa con insignificante nos ta. Sinembargo, e testimonio silencioso aki di creacion no ta basta. Hende fiel ta ser anima pa join e dunamento di testimonio cu nan stem. Un salmista kende su nomber no ta ser menciona, a dirigi su mes na adoradonan fiel cu e palabranan inspira aki: “Atribui na [Yehova] gloria y poder. Atribui na [Yehova] e gloria debi na su nomber.” (Salmo 96:7, 8) Hende cu tin un relacion sera cu Yehova ta hopi contento cu nan por responde na e yamada ei. Pero kico atribui gloria na Dios ta encera?

3. Dicon hende ta atribui gloria na Dios?

³ Glorifica Dios ta rekeri mas cu simplemente palabra. E Israelitanan den tempo di Isaias a glorifica Dios cu nan lipnan, pero mayoria tawata falta sinseridad. Mediante Isaias, Yehova a bisa: “E hendenan aki ta acerca mi cu nan boca y ta honra mi cu nan lipnan, ma nan curason ta leu for di mi.” (Isaias 29:13) Alabansa cu personanan asina a expresa no tawatin balor. Pa alabansa tin balor, e mester sali for di un curason yen di amor pa Yehova y  cu sinseramente ta reconoce Yehova su gloria unico. Ta Yehova so ta e Creador. E ta e Todopoderoso, e persona mas husto den universo, e personificacion di amor. E ta e fuente di nos salbacion y e Soberano legitimo na ken tur cu ta biba den shelo y riba tera debe sumision. (Revelacion 4:11; 19:1) Si di berdad nos ta kere e cosnan aki, anto laga nos glorific’e di henter nos curason.

4. Ki instruccion Hesus a duna relaciona cu e manera pa glorifica Dios, y con nos por cumpli cu nan?

⁴ Hesucristo a conta nos con pa glorifica Dios. El a bisa: “Den esaki mi Tata ta wordo glorifica, cu boso ta carga hopi fruta y asina ta demostra di ta mi disipelnan.” (Huan 15:8) Con nos ta carga hopi fruta? Na prome luga, door di participa di henter alma den e predicacion di e ‘evangelio di e reino’ y di e manera ei nos ta join tur cos crea cu ta “proclama” Dios su “atributonan invisibel.” (Mateo 24:14; Romanonan 1:20) Ademas, den e manera aki nos tur—directamente of indirectamente—ta yuda haci disipelnan nobo cu ta aumenta e coro di alabansa na Yehova Dios. Na di dos luga, nos ta cultiva e fruta cu spirito santo ta produci den nos y nos ta haci esfuerso pa imita Yehova Dios su cualidadnan extraordinario. (Galationan 5:22, 23; Efesionan 5:1; Colosensenan 3:10) Como resultado, nos conducta diario ta glorifica Dios.

“Den Henter e Tera”

5. Splica con Pablo a enfatisa e responsabilidad cu cristiannan tin di glorifica Dios door di comparti nan fe cu otro hende.

⁵ Pablo, den su carta na e Romanonan, a enfatisa e responsabilidad cu cristiannan tin di glorifica Dios door di comparti nan fe cu otro hende. Un mensahe principal di e buki di Romanonan ta, cu ta solamente esnan cu eherce fe den Hesucristo por haya salbacion. Den Ro capitulo 10 di su carta, Pablo a mustra cu e Hudiunan di su tempo ainda tawata purba haya un posicion husto door di sigui e Lei di Moises, aunke cu “Cristo [tawata] fin di lei.” Pesei Pablo a bisa: “Si bo confesa cu bo boca [“declara publicamente”, NW] Hesus como Señor, y kere den bo curason cu Dios a lant’e for di e mortonan, lo bo ta salba.” For di e tempo ei padilanti, “no [tawatin] distincion entre Hudiu y Griego; pasobra e mes Señor ta Señor di tur, cu rikesa abundante pa tur cu ta invoc’e; pasobra: ‘Ken cu invoca e nomber di [Yehova] lo ta salba.’”—Romanonan 10:4, 9-13.

6. Con Pablo a aplica Salmo 19:4?

⁶ Anto Pablo a puntra logicamente: “Con anto nan lo invoca esun, den kende nan no a kere? Y con nan lo kere den esun, di kende nan no a tende? Y con nan lo tende sin un predicado?” (Romanonan 10:14) Pablo a bisa di Israel: “No ta tur a obedece e evangelio.” Dicon Israel no a obedece? Debi na falta di fe, no debi na falta di oportunidad. Pablo a mustra esaki door di cita Salmo 19:4 y a aplic’e na e trabou cristian di predica en bes di na e testimonio silencioso di creacion. El a bisa: “Nan bos a sali bai den henter e tera, y nan palabranan te na e finnan di mundo.” (Romanonan 10:16, 18) Si, mescos cu e creacion sin bida ta glorifica Yehova, cristiannan di prome siglo a predica e bon nobo di salbacion tur caminda y di e manera ei a alaba Dios den “henter e tera.” Den su carta na e Colosensenan, Pablo a describi tambe te con leu e bon nobo a yega. El a bisa cu e bon nobo a ser proclama “den henter creacion bou di shelo.”—Colosensenan 1:23.

 Testigonan Celoso

7. Segun Hesus, ki responsabilidad cristiannan tin?

⁷ Pablo probablemente a skirbi su carta na e Colosensenan rond di 27 aña despues di e morto di Hesucristo. Con bin e trabou di predica por a yega te na Colosas den un tempo relativamente cortico asina? Esei a sosode pasobra e cristiannan di prome siglo tawata celoso, y Yehova a bendiciona nan celo. Hesus a profetisa cu su siguidonan lo ta predicadonan activo ora el a bisa: “E evangelio mester wordo predica prome na tur nacion.” (Marco 13:10) Ta na e profecia ei Hesus a agrega e mandamento cu ta para skirbi den e ultimo versiculonan di e Evangelio di Mateo: “Pesei, bai y haci tur e nacionnan disipel di mi, y batisa nan den nomber di e Tata y di e Yiu y di e spirito santo, y siña nan pa cumpli cu tur loke mi a ordena boso.” (Mateo 28:19, 20) Un poco despues cu Hesus a subi na shelo, su siguidonan a cuminsa cumpli cu e palabranan ei.

8, 9. Segun e buki di Echonan, con cristiannan a reacciona riba loke Hesus a ordena?

⁸ Despues cu spirito santo a wordo drama riba e siguidonan fiel di Hesus na Pentecoste di aña 33, e prome cos cu nan a haci ta di sali pafo y predica, contando e multitudnan di hende na Herusalem “di e echonan poderoso di Dios.” Nan predicacion tawata sumamente efectivo, y “mas o menos tres mil alma” a ser batisa. E disipelnan a sigui alaba Dios publicamente y celosamente, anto cu bon resultado.—Echonan 2:4, 11, 41, 46, 47.

⁹ No a tarda hopi cu e actividadnan di e cristiannan ei a capta atencion di e lidernan religioso. Molestia pa e manera franco y cu confiansa cu Pedro y Huan tawata papia, nan a ordena e dos apostelnan pa stop di predica. E apostelnan a responde: “Nos no por laga di papia loke nos a mira y tende.” Despues di a wordo menasa y libra, Pedro cu Huan a bai bek serca nan rumannan, y nan tur hunto a haci oracion na Yehova. Cu curashi nan a pidi Yehova: “Laga bo sirbidonan papia bo palabra cu tur confiansa.”—Echonan 4:13, 20, 29.

10. Ki oposicion a presenta, y con cristiannan berdadero a reacciona?

¹⁰ Manera a bira bisto un poco despues, e oracion ei tawata na harmonia cu e boluntad di Yehova. E apostelnan a ser aresta, anto un angel a libra nan milagrosamente. E angel a bisa nan: “Boso bai para den tempel y papia cu e pueblo tur e palabranan di e bida aki.” (Echonan 5:18-20) Como cu e apostelnan a obedece, Yehova a sigui bendiciona nan. Pesei, “tur dia, den tempel y di cas pa cas, nan tawata sigui siña hende y predica Hesus como e Cristo.” (Echonan 5:42) Claramente, oposicion severo no por a stop e siguidonan di Hesus di atribui gloria na Dios publicamente.

11. Kico tawata e actitud di e prome cristiannan pa cu e trabou di predica?

 ¹¹ Poco despues nan a aresta Esteban y a piedr’e mata. Su asesinato a start un persecucion feros den Herusalem, y tur e disipelnan a haya nan forsa ta sali for di Herusalem, cu excepcion di e apostelnan. E persecucion a desanima e disipelnan? Di ningun manera. Nos ta lesa: “Esnan anto cu a wordo plama a bai tur caminda, predicando e palabra.” (Echonan 8:1, 4) Anto bes tras bes nos por a mira nan celo pa proclama e gloria di Dios. Den Echonan capitulo 9, nos ta lesa cu e Farizeo Saul di Tarso, bayendo rumbo pa Damasco pa cuminsa persigui e disipelnan di Hesus einan, a mira un vision di Hesus y bira ciego. Na Damasco, Ananias a cura Saul su bista milagrosamente. Kico tawata e prome cos cu Saul—conoci despues como apostel Pablo—a haci? Bijbel ta bisa: “Mesora el a cuminsa proclama Hesus den e snoanan [sinagoganan], bisando: ‘E ta e Yiu di Dios.’”—Echonan 9:20.

Tur Hende A Participa den e Predicacion

12, 13. (a) Segun historiadonan, kico tawata remarcabel di e congregacion cristian di prome? (b) Con e buki di Echonan y e palabranan di Pablo ta cuadra cu e declaracion di historiadonan?

¹² En general ta ser reconoci cu tur hende den e congregacion cristian di prome a participa den e trabou di predica. Philip Schaff a skirbi di e cristiannan di e tempo ei: “Tur congregacion tawata un sosiedad di misionero, y tur creyente cristian tawata un misionero.” (History of the Christian Church [Historia di e Iglesia Cristian]) W. S. Williams a declara: “E testimonio general ta cu tur cristian den e Iglesia di prome, specialmente esnan cu tawatin e donnan carismatico [donnan di spirito], a predica e evangelio.” (The Glorious Ministry of the Laity [E Sirbishi Glorioso di Laico]) Tambe el a bisa cu conviccion: “Nunca no tawata Hesucristo su intencion pa e predicacion ta un privilegio exclusivo di cierto rangonan di e ministerio.” Asta Celso, un enemigo di cristianismo di antiguedad, a skirbi: “Obreronan di lana, sapatenan, curtidonan di cuero, e hendenan mas comun y sin educacion, tawata predicado celoso di e evangelio.”

¹³ E registro historico di Echonan ta confirma e exactitud di e declaracionnan ei. Na Pentecoste di aña 33, despues cu spirito santo a wordo drama, tur disipel, homber y mohe, a proclama e echonan poderoso di Dios publicamente. Despues di e persecucion cu a lanta ora nan a asesina Esteban, tur cristian cu a haya nan forsa ta hui pa exterior, a plama e bon nobo tur caminda. Un 28 aña despues, Pablo a skirbi un carta cu tawata dirigi na tur cristian Hebreo, no simplemente na un grupo chikito di clero, ora el a bisa: “Door di dje anto, laga nos ofrece continuamente un sacrificio di alabansa na Dios, esta, e fruta di lipnan cu ta duna gradicimento [of, “haci declaracion publico”, NW] na su nomber.” (Hebreonan 13:15) Describiendo su propio punto di bista di e trabou di predica, Pablo a bisa: “Pasobra si mi ta predica evangelio, mi no tin nada pa gaba di dje, pasobra ta mi obligacion; pasobra ai di mi si mi no predica evangelio!” (1 Corintionan 9:16) Ta bisto cu den prome siglo tur cristian fiel a pensa mescos.

14. Kico ta e relacion entre fe y predicacion?

¹⁴ Si, un cristian berdadero tin cu participa den e trabou di predica pasobra esei ta inseparablemente liga cu fe. Pablo a bisa: “Cu curason hende ta kere pa haya husticia, y cu boca e ta confesa [“haci declaracion publico”, NW] pa haya salbacion.” (Romanonan 10:10) Ta solamente un grupo chikito den e congregacion—manera un grupo di clero—ta eherce fe y pesei tin e responsabilidad di predica? *  Claro cu no! Tur cristian berdadero ta cultiva un fe bibo den e Señor Hesucristo y ta ser motiva pa haci declaracion publico di e fe ei na otro hende. Di otro manera, nan fe ta morto. (Santiago 2:26) Como cu tur cristian fiel den e prome siglo di nos era a demostra nan fe di e manera aki, un gran grito di alabansa na e nomber di Yehova a ser tendi.

15, 16. Duna ehempelnan cu ta mustra cu e trabou di predica a bai dilanti apesar di problema.

¹⁵ Den prome siglo, Yehova a bendiciona su pueblo cu aumento apesar di problemanan paden y pafo di e congregacion. Por ehempel, Echonan capitulo 6 ta conta di un desacuerdo cu tawatin entre e disipelnan di abla Hebreo y esnan di abla Griego. E apostelnan a resolve e problema. Nos ta lesa loke tawata e resultado: “E palabra di Dios a sigui plama; y e cantidad di disipel a sigui aumenta masha hopi mes na Herusalem, y un cantidad grandi di e sacerdotenan tawata bira obedecido na e fe.”—Echonan 6:7.

¹⁶ Despues, tension politico a lanta entre Rei Herodes Agripa di Hudea y e pueblo di Tiro y Sidon. E habitantenan di e stadnan ei a labia e Rei cu suplicanan pa pas, y Herodes a reacciona cu un discurso. E multitud congrega a cuminsa grita: “Ta bos di un dios y no di un hende!” Mesora, un angel di Yehova a dal Herodes Agripa, y el a muri “pasobra e no a duna Dios e gloria.” (Echonan 12:20-23) Ki un shock pa esnan cu a pone nan speransa den gobernantenan humano! (Salmo 146:3, 4) Sinembargo, e cristiannan a sigui glorifica Yehova. Consecuentemente, “e palabra di Dios a sigui crece y a multiplica” apesar di tal instabilidad politico.—Echonan 12:24.

Antes y Awor

17. Den prome siglo, den ki obra un creciente cantidad di hende a join?

¹⁷ Si, e congregacion cristian mundial den prome siglo a consisti di alabadonan di Yehova Dios cu tawata celoso y activo. Tur cristian fiel a participa den e trabou di plama e bon nobo. Algun cristian a topa hende cu a reacciona faborabel, y manera Hesus a bisa, nan a siña e hendenan ei obedece tur loke el a ordena. (Mateo 28:19, 20) Como resultado e congregacion a crece, y mas y mas hende a join Rei David di antiguedad den atribui alabansa na Yehova. Nan tur a ripiti e palabranan inspira: “Lo mi alaba bo, o Señor mi Dios, cu henter mi curason, y lo mi glorifica bo nomber pa semper. Pasobra bo misericordia pa cu mi ta grandi.”—Salmo 86:12, 13.

18. (a) Ki diferencia hende a nota entre e congregacion cristian di prome siglo y cristiandad djawe? (b) Kico nos lo considera den e siguiente articulo?

¹⁸ En bista di esaki, e palabranan di e profesor di teologia Allison A. Trites ta pone nos pensa. Comparando cristiandad djawe cu cristianismo di prome siglo, el a bisa: “Iglesianan djawe ta aumenta generalmente door di crecemento biologico (ora cu yiunan den un famia di e iglesia local personalmente ta declara nan fe) of door di crecemento di transferencia (ora cu un hende ta muda bin di un otro iglesia local). Sinembargo, den Echonan e crecemento tawata door di combertimento, pasobra net e iglesia a cuminsa cu su trabou.” Esaki ta nifica cu cristianismo berdadero no ta creciendo mas den e manera cu Hesus a bisa cu lo e crece? Claro cu no. Cristiannan berdadero djawe ta mesun celoso cu cristiannan di prome siglo den atribui alabansa na Dios publicamente. Nos lo mira esaki den e siguiente articulo.

[Nota]

Bo Por Splica?

• Den ki maneranan nos ta glorifica Dios?

• Con Pablo a aplica Salmo 19:4?

• Kico ta e relacion entre fe y predicacion?

• Kico tawata remarcabel di e congregacion cristian di prome siglo?

[Preguntanan di Estudio]

[Plachi na pagina 8, 9]

Shelo constantemente ta duna testimonio di e gloria di Yehova

[Reconocemento]

Cortesia di Anglo-Australian Observatory, potret saca pa David Malin

[Plachinan na pagina 10]

E trabou di predica y oracion ta estrechamente liga