‘Dios No Ta Biba den Tempel Traha cu Man’

SIN duda, apostel Pablo tawata conoce e tempelnan di Atenea, pasobra bo por a haya nan den hopi di e stadnan cu el a bishita durante su biahenan como misionero. Segun The Encyclopædia Britannica, Atenea no tawata famoso solamente como e diosa di guera y sabiduria, sino tambe como e diosa “di arte y actividadnan di ofishi en general.”

E tempel di mas famoso di Atenea tawata Partenon, construi na Atenas, e stad cu a haya nomber di e diosa. Partenon ta ser considera como un di e gran tempelnan di e mundo di antiguedad y den dje tawatin un estatua di Atenea traha di oro y ivor di 12 meter. Ora Pablo a bishita Atenas, e tempel di marmer blanco aki ya tawatin 500 aña como esun mas prominente den e stad.

Na un distancia cu Pablo por a mira Partenon, el a predica na un grupo di hende di Atenas tocante e ‘dios cu no ta biba den tempel traha cu man.’ (Echonan 17:23, 24) Podise pa algun di Pablo su oyentenan, e echo cu e tempelnan di Atenea tawata mahestuoso y su idolonan tawata grandioso a pone cu Atenea a parce mas impresionante cu un Dios invisibel cu nan no a conoce. Sinembargo, manera Pablo a indica, hende no mester pensa cu e Creador di humanidad “ta manera oro of plata of piedra, un imagen forma door . . . di hende.”—Echonan 17:29.

Dios- y diosanan manera Atenea—kende nan gloria a depende di tempel y estatua—a bin y a bai. E estatua di Atenea a disparce for di e Partenon den siglo 5 di nos era, y actualmente ta resto di algun di su tempelnan so a keda. Ta ken awe ta busca sabiduria y guia serca Atenea?

Esaki ta hopi distinto den e caso di Yehova, “e Dios eterno”, kende ningun hende no a yega di mira. (Romanonan 16:26; 1 Huan 4:12) E yiunan di Core a skirbi: “E Dios aki ta nos Dios, pa semper y semper; E lo guia nos.” (Salmo 48:14) Un manera pa nos haya Yehova Dios su guia ta door di studia su Palabra, Bijbel, y aplica su consehonan den nos bida.