Duna Gloria na Dios No na Hende

DEN e ultimo lunanan, stimadonan di husticia rond mundo a siña con pa duna gloria na Dios segun cu nan a reuni hunto pa celebra e Congresonan di Districto di Testigonan di Yehova “Duna Gloria na Dios.” Laga nos repasa e programa di siñansa cu a ser presenta na e congresonan ei.

Pa mayoria persona cu a asisti, e programa basa riba Bijbel a dura tres dia sigui. Pa otronan cu por a bai un di e congresonan internacional, e programa a dura cuater dia. En total, esnan cu a asisti a tende mas cu 30 presentacion basa riba Bijbel, manera discursonan cu a profundisa nan aprecio pa cosnan spiritual, experencianan cu a fortalece nan fe, demostracionnan cu a resalta con practico principionan di Bijbel ta, y un drama den trahe y escenario antiguo cu a presenta e desafionan cu e cristiannan di prome siglo a haya nan confronta cu ne. Si bo a asisti na un di e congresonan aki, pakico no repasa bo notanan segun cu bo ta lesa e articulo aki? Esaki sigur lo duna bo grato recuerdo di un bankete spiritual rico y tambe instructivo.

Tema di e Prome Dia: ‘Digno Bo Ta Yehova, pa Ricibi Gloria’

Despues di e cantica y oracion di apertura, e prome orado a duna tur presente un caloroso bonbini cu un discurso cu a enfoca riba e motibo principal pa e congreso: “Reuni Hunto pa Duna Gloria na Dios.” Citando for di Revelacion 4:11, e orado a enfatisa e tema general di e congreso. Mesora el a pasa na splica kico kiermen duna gloria na Dios. Uzando e buki di Salmo, el a enfatisa cu glorifica Dios ta encera “adora”, ‘gradici’ y “alaba” Yehova.—Salmo 95:6; 100:4, 5; 111:1, 2.

E siguiente discurso tawatin e tema “Bendiciona Ta Esnan Cu Ta Duna Gloria na Dios.” E orado a haci un remarke interesante. Ya cu tin mas cu 6 miyon Testigo di Yehova den 234 pais rond mundo, nos por bisa cu solo no sa baha pa esnan cu ta duna gloria na Yehova. (Revelacion 7:15) E auditorio a keda masha encanta pa tende durante e discurso aki varios entrevista cu rumannan cristian cu ta den un of otro forma di sirbishi special di tempo completo.

Tema di e siguiente discurso tawata “Creacion Ta Declara e Gloria di Dios.” Aunke e cuerponan celestial ta testigonan silencioso, nan ta engrandece e mahestad di Dios y ta yuda nos bira mas gradicido pa su cuido  amoroso. Nos a haya un splicacion detaya di esaki.—Isaias 40:26.

Persecucion, oposicion, influencia mundano y tendencianan pecaminoso ta desafia e integridad di cristiannan berdadero. Pesei, e discurso “Cana den e Caminda di Integridad” a merece e sumo atencion di e auditorio. Despues a sigui un consideracion di versiculo pa versiculo di Salmo 26, hunto cu entrevistanan cu un hoben Testigo cu ta bai scol ainda y cu a para firme pa su normanan moral, y un otro cu tawata dedica demasiado tempo na dibirticion cuestionabel pero cu a dal e pasonan pa vence e problema.

E discurso clave, “Visionnan Profetico Glorioso Ta Stimula Nos!” a finalisa e programa di mainta. E orado a mustra con e fe di entre otro profeta Daniel y di apostel Huan y Pedro a bira mas fuerte ainda ora nan a mira glorioso visionnan profetico relaciona cu e establecimento y funcionamento di e Reino Mesianico di Dios. Papiando di esnan cu lo por a perde for di bista e evidencia cla cu en berdad nos ta den e tempo di fin, e orado a bisa: “Nos ta spera sinseramente cu nan lo enfoca atrobe riba e realidad di e presencia di Cristo den gloria di Reino y haya yudansa pa recupera nan fortalesa spiritual.”

E programa di atardi a cuminsa cu un discurso cu e tema “Yehova Ta Revela Su Gloria na e Humildenan.” E orado a mustra cu aunke Yehova ta e Persona mas halto den universo, e ta esun cu ta pone e ehempel di humildad. (Salmo 18:35) Yehova ta faborece personanan cu ta berdaderamente humilde. Esnan cu ta parce humilde solamente ora nan ta trata cu nan pareunan of nan superiornan, ma ta trata e personanan cu ta cai bou di nan supervision na un manera severo, si e ta opone.—Salmo 138:6.

Despues a bin un simposio di profecia di Bijbel cu a resalta diferente aspecto di e tema central: “E Profecia di Amos—Su Mensahe pa Nos Tempo.” Mustrando riba e ehempel di Amos, e prome orado a hala atencion na e responsabilidad cu nos tin pa spierta hende di Yehova su benidero huicio. E tema di su discurso tawata “Papia e Palabra di Dios cu Curashi.” E di dos orado a lansa e pregunta: “Yehova lo pone fin un dia na maldad y sufrimento riba e tera aki?” Su discurso, “E Huicio di Dios Contra e Malbadonan”, a mustra cu semper Dios su huicionan tawata hustifica, selectivo y sin scapatorio pa e malbadonan. E ultimo orado den e simposio a duna atencion na e tema “Yehova Ta Examina Curason.” Esnan cu ta anhela pa agrada Yehova lo haci caso di e palabranan na Amos 5:15: “Odia maldad, stima bondad.”

Bebida alcoholico, manera biña cu ta haci curason alegra, ta algo cu hende por haci mal uzo di dje. Den su discurso, “Evita e Trampa di Bebe di Mas”, e orado a menciona e peligernan fisico y spiritual di uzo inmodera di alcohol, asta ora bo no bira burachi. El a duna e siguiente principio como guia: Ya cu cada ken tin su mes grado di tolerancia pa alcohol, ta e cantidad cu ta stroba abo di mustra “sabiduria sano y discrecion” ta demasiado pa bo personalmente.—Proverbionan 3:21, 22.

Ya cu nos ta biba den un tempo critico, e siguiente topico, “Yehova, Nos ‘Fortalesa den Tempo di Angustia’,” a duna nos hopi consuelo. Oracion, spirito santo y nos rumannan cristian por yuda nos persevera.

E discurso final di e dia, “‘E Tera Bunita’—Un Bista Delanta di Paradijs”, a sera e atardi cu un sorpresa agradabel pa tur presente—un publicacion nobo cu hopi mapa di Bijbel! Su titulo ta Mira e Tera Bunita.

Tema di e di Dos Dia: “Conta di Su Gloria Meimei di e Nacionnan”

Despues di un consideracion di e texto di dia, e di dos simposio di e congreso a ser presenta, cu e tema “Refleha Manera Spiel e Gloria di Yehova.” E prome parti a elabora riba e tema “Plamando e Evangelio Tur Caminda” y a inclui demostracion di experencianan di sirbishi di veld. E di dos discurso cu e tema “Kitando e Velo for di Esnan Ciega” a inclui un  demostracion di un rebishita. Den e ultimo parti, “Haciendo Esei Mas Plenamente den Nos Ministerio”, tawatin tambe algun entrevista interesante relaciona cu sirbishi di veld.

E siguiente parti di e programa tawatin como tema “Odia sin Motibo.” Den dje tawatin entrevistanan hopi animante di personanan fiel kendenan, cu e forsa di Dios, a mantene integridad durante oposicion.

Un caracteristica di congresonan pa cua semper tin gran expectativa ta e discurso di bautismo, sigui pa e bautismo mes di tur e candidatonan cu ta cumpli cu e rekisitonan. Bautismo bou di awa ta simbolisa un persona su dedicacion total na Yehova. Pesei, e tema tawata masha al caso: “Cumpli cu Nos Dedicacion Ta Glorifica Dios.”

 E programa di atardi a cuminsa cu un discurso cu a anima tur presente pa examina nan mes. Su tema tawata “Cultiva Cristo Su Punto di Bista di Grandesa.” E orado a menciona e punto interesante aki: Grandesa ta e resultado di imita e humildad di Cristo. Pues, un cristian no mester busca pa haya un responsabilidad djis pa satisface un ambicion personal. E mester puntra su mes: ‘Mi ta dispuesto pa cumpli cu tareanan util cu otro hende lo no tuma nota di dje facilmente?’

Bo sa sinti bo cansa? Esei casi no ta cos di puntra mes. Tur presente a gusta e discurso “Cansa, Pero Nos No Ta Entrega.” E entrevistanan cu algun Testigo di hopi aña a mustra cu Yehova por ‘fortalece nos pa medio di su spirito.’—Efesionan 3:16.

Generosidad no ta un cualidad cu nos a nace cu ne, sino uno cu nos tin cu siña. Esei ta e punto clave cu e discurso “Sea ‘Generoso y Dispuesto pa Comparti’” a trece dilanti. Y e orado a laga nos tur pensa seriamente riba e siguiente pregunta: “Nos ta dispuesto pa comparti algun minuut di nos dia cu nos rumannan di edad, esnan malo, deprimi of cu esnan cu ta sinti nan so?”

E tema “Tene Cuidou cu ‘Bos di Hende Straño’” a capta atencion di e auditorio. E discurso aki a compara siguidonan di Hesus cu carne cu ta scucha solamente su bos como “e bon wardado” y no “bos di hende straño” atrabes di e tantisimo fuentenan humano bou di influencia di Diabel.—Huan 10:5, 14, 27.

Un coro mester canta na harmonia pa e palabranan sali comprendibel. Pa glorifica Dios, adoradonan berdadero rond mundo mester ta uni. Pesei, e tema “Glorifica Dios ‘den Un Solo Bos’” a duna instruccion beneficioso riba con nos tur por papia e unico “idioma puro” y sirbi Yehova “scouder cu scouder.”—Zacarias 3:9, NW.

Mayornan, specialmente esnan cu tin yiu chikito, a keda masha encanta cu e ultimo discurso pa e dia ei, “Nos Yiunan—Un Herencia Precioso.” Como un sorpresa masha agradabel pa e auditorio, a presenta un publicacion nobo di 256 pagina. Siña for di e Gran Maestro ta un buki cu lo yuda mayornan dedica tempo spiritualmente beneficioso na nan yiunan, ya cu yiu ta un regalo di Dios.

Tema di e di Tres Dia: ‘Haci Tur Cos pa e Gloria di Dios’

E recordatorionan di e texto di dia a cuminsa e ultimo dia di congreso cu pensamentonan spiritual. E prome sesion di e programa pa e dia aki a duna extra atencion na e areglo di famia. E prome discurso, “Mayornan, Fortalece Boso Famia”, a prepara e auditorio. Despues cu e orado a repasa e responsabilidad cu mayornan tin pa percura den sentido material pa nan famia, el a splica cu e responsabilidad primario  di mayornan ta pa percura pa e necesidadnan spiritual di nan yiunan.

E siguiente orado a dirigi su mes na e muchanan y a analisa e topico “Con Hobennan Ta Alabando Yehova.” El a bisa cu hobennan ta manera “serena” den sentido cu nan ta hopi na cantidad y tambe pa motibo cu nan celo hubenil ta refrescante. Hende grandi ta contento pa traha hunto cu nan den e sirbishi di Yehova. (Salmo 110:3) E parti aki a inclui entrevistanan masha agradabel cu hobennan ehemplar.

Dramanan den trahe y escenario antiguo semper tawata un caracteristica emocionante di congresonan di districto, y e congreso aki no tawata un excepcion. E drama “Nan A Duna Testimonio cu Curashi Apesar di Oposicion” a bai over di e disipelnan di Hesus di prome siglo. E no tawata djis un entretenimento, sino algo hopi mas importante: instruccion. E discurso cu a sigui despues di e drama, “Declara e Bon Nobo sin Stop”, a resalta e puntonan importante di e drama.

A reina gran expectativa pa e parti culminante di e programa di diadomingo atardi, e discurso publico, “Ken Awe Ta Duna Gloria na Dios?” E orado a bin cu varios punto pa mustra cu por lo general e comunidadnan cientifico y religioso no a glorifica Dios. Ta unicamente e pueblo cu ta carga su nomber, esnan cu ta predica y siña e berdad tocante Yehova, ta esnan cu sin duda ta glorificando su nomber awe.

Despues di e discurso publico a sigui un resumen di e les di e revista Toren di Vigilancia pa e siman ei. Despues a bin e discurso final, “Sigui ‘Duna Hopi Fruta’ pa e Gloria di Yehova.” E orado a presenta un resolucion di dies punto pa tur persona den auditorio adopta. El a enfoca riba varios manera cu hende por duna gloria na e Creador, Yehova. Un “Si” unanime a resona den tur e congresonan for di tur skina di e planeta aki.

Asina e congreso a caba cu e tema “Duna Gloria na Dios” zonando den horea di cada persona cu a asisti. Y cu yudansa di Yehova su spirito y e parti visibel di su organisacion, laga nos semper haci esfuerso pa duna gloria na Dios y no na hende.

[Cuadro/​Plachi na pagina 23]

Congresonan Internacional

Tawatin congresonan internacional di cuater dia na Africa, Asia, Australia, Europa y Nort y Sur America. Testigonan di rond mundo a ser invita pa asisti como delegadonan na e reunionnan aki. Di e manera aki tanto e bishitantenan como nan huespetnan por a “curasha” otro. (Romanonan 1:12) Amigonan di hopi aña por a topa otro atrobe y sigui amplia nan circulo di amistad. Un rasgo special di e congresonan internacional tawata e parti di e programa titula “Informe di Otro Paisnan.”

[Cuadro/​Plachi na pagina 25]

Publicacionnan Nobo Cu Ta Duna Gloria na Dios

Na e Congresonan di Districto “Duna Gloria na Dios” a presenta dos publicacion nobo. E prome ta e atlas di Bijbel Mira e Tera Bunita cu su kaft duradero y 36 pagina tur na mapa y potret di sitionan di Bijbel. Cada pagina ta na colo y tin mapanan di e imperionan di Asiria, Babilonia, Medopersia, Grecia y Roma. Tambe tin mapa cu ta cubri e ministerio di Hesus y e expansion di cristianismo.

E di dos, Siña for di e Gran Maestro, ta un buki di 256 pagina cu rond di 230 plachi. Bo por pasa hopi rato agradabel cu bo yiunan simplemente door di wak e plachinan y contesta e preguntanan cu ta stimula nan mente. E publicacion nobo aki ta diseña pa contraresta e atakenan cu Satanas ta lansa contra nos hobensitonan cu e meta di corumpi nan den sentido moral.

[Plachi na pagina 23]

Misioneronan a fortalece fe di e presentenan cu nan experencianan

[Plachi na pagina 24]

Bautismo tawata un rasgo importante di e congresonan “Duna Gloria na Dios”

[Plachi na pagina 24]

Grandi y chikito ta disfruta di drama biblico