E Splendor di Yehova Su Creacion

“E Palonan di Yehova Ta Satisfecho”

B O A yega di para den un selva ora e rayonan di solo ta briya entre e palonan gigante? Bo por a tende e zonido di biento cu ta supla entre e blachinan?—Isaias 7:2.

Den algun area riba tera tin temporada di aña cu e blachinan di varios palo practicamente tin un briyo cora, oraño, geel y otro colonan. Si, ta como si fuera e selva ta na candela! Esaki ta cuadra bon cu e pensamento aki: “Seronan, dal un grito di goso, o mondi sera y tur palo cu tin den dje.”—Isaias 44:23. *

Casi un tercera parti di planeta Tera ta cubri cu selva. Den un manera magnifico, e selvanan y e abundancia di criatura bibo den nan ta glorifica nan Diseñador y Creador, Yehova Dios. E salmista inspira a canta: ‘Alaba Yehova palo di fruta y tur palo di seda.’—Salmo 148:7-9.

Segun e buki The Trees Around Us (E Palonan Rond di Nos): “Palo ta vital pa existencia di hende, e ta satisface tanto nan necesidadnan fisico como nan deseo di mira cosnan bunita.” Selva ta proteha, sostene y mehora hende su suministro di awa fresco. Palo ta purifica aire tambe. Mediante e maraviyoso proceso di fotosintesis, celnan di blachi ta cambia kooldioxide, awa, mineral y lus di solo den nutricion y oxigeno.

Selva ta un obra di arte den bunitesa y diseño. Por lo general, e palonan inmenso ta e miembronan di mas impresionante di e selva. Hunto cu nan ta crece un cantidad incontabel di varen, mos, mata di wendruif y otro mata y yerba. E matanan ei ta depende di e ambiente cu e palonan ta crea y ta crece den nan sombra absorbando e humedad cu e selva ta percura.

Den algun selva caminda e blachinan ta cai tur aña, te cu dies miyon blachi por cai riba un solo hectar di e suela di e selva durante e ultimo parti di aña. Kico ta sosode cu nan? Cu tempo insecto, schimmel, bichi y otro organismonan ta cambia e materia organico aki y hacie humus, un ingrediente vital pa un tera fertil. Si, nada no ta bai perdi segun cu e trahadonan silencioso aki ta prepara e tera pa otro cos por nace.

Den e tera bou di e blachinan morto den selva tin un cantidad di criatura ta biba. Di acuerdo cu e buki The Forest (Selva), ‘den un area di 30 centimeter cuadra y 2,5 centimeter hundo, bo por haya casi 1.350 criatura. Y esaki ta sin conta e miles di miyones di organismonan microscopico den cada man di tera.’ Ademas e selvanan ta yen di reptiel, parha, insecto y mamifero. Ken mester ricibi credito pa e bunitesa y variedad aki? Corectamente nan Creador ta declara: “Tur bestia di mondi ta di mi, e bacanan riba mil sero.”—Salmo 50:10.

Algun bestia a ser crea cu e habilidad remarcabel di drumi durante henter winter y asina sobrevivi e friu severo di e temporada aki y periodonan largo cu no tin hopi cuminda. Sinembargo, no ta tur bestia tin e habilidad aki. Asta meimei di winter lo bo por mira un tou di bina ta bula den cunucu. Bina no ta drumi durante henter winter ni e no ta warda cuminda, pero e ta alimenta su mes door di cou riba takinan jong y conopi di flor manera bo por mira riba e plachi adhunto for di Alemania.

 E Scritura ta papia hopi di vegetacion. Segun un conteo, Bijbel ta menciona casi 130 mata distinto incluso 30 sorto di palo. Comentando riba e nificacion di e referencianan ei, e botanico Michael Zohary ta remarca: “Ni den literatura comun cu no ta contene cosnan tecnico bo no ta haya asina tanto referencia na matanan cu tin di aber cu varios aspecto di bida, manera tin den Bijbel.”

Palo y selva ta regalonan exkisito cu ta bin di un Creador amoroso. Si nos a yega di pasa un rato den selva, siguramente nos ta di acuerdo cu e palabranan di e salmista: “E palonan di Yehova ta satisfecho, ceder di Libanon cu el a planta. Ayanan e parhanan ta traha nan neishi.”—Salmo 104:16, 17, NW.

[Nota]

[Cuadro/​Plachi na pagina 9]

Un di e palonan di fruta mas impresionante di Medio Oriente ta e palo di almendra. Na principio di aña—hopi mas prome cu mayoria otro palo—e ta lanta for di soño. Referiendo na e echo cu e palo di almendra ta floria tempran, e Hebreonan di antiguedad a yam’e esun cu ta spierta. E palo ta lanta, practicamente bisti cu un mantel di flornan fragil ros of blanco.—Eclesiastes 12:5.

Di e rond di 9.000 sorto di parha cu hende conoce, mas o menos 5.000 ta ser clasifica como parha cu ta canta. Nan cantamento ta kibra e silencio di e selvanan sera. (Salmo 104:12) Por ehempel, e tipo di mofi cu nan ta yama song sparrow tin un repertorio masha agradabel. Y esun cu nan ta yama mourning warbler, cu bo ta mira riba e plachi, ta un cantante chikito dorna cu un combinacion dramatico di colo shinishi, geel y berde oleifi.—Salmo 148:1, 10.

[Plachi na pagina 9]

Selva na Normandia, Francia