Ken Su Promesanan Bo Por Confia?
Ken Su Promesanan Bo Por Confia?
“E TEMPO ei, su promesanan tawata mes poderoso cu ne; pero su echonan tawata mescos cu e ta awor, nulo.”—Rei Henry Ocho, di William Shakespeare.
Shakespeare a referi na e promesanan di e cardinal Ingles Thomas Wolsey, kende tawatin hopi poder na Inglatera durante siglo 16. Algun hende lo bisa cu e descripcion di Shakespeare ta pas cu mayoria promesa cu nan ta tende awe. Bes tras bes hende ta ricibi hopi promesa pero masha tiki ta cumpli. Pesei, no ta dificil pa compronde pakico nan a cuminsa duda den tur promesa.
Desilusion Ta Abunda
Por ehempel, durante e conflicto teribel na Balkan den e decada di 1990, Conseho di Siguridad di Nacionnan Uni a declara cu e stad Bosnia na Srebrenica ta un “area safe.” E declaracion ei a parce un garantia confiabel cu a bin di un organisacion internacional. Miles di refugiado musulman na Srebrenica a kere den e declaracion ei. Sinembargo, finalmente e promesa di un luga di refugio safe a resulta di ta un promesa bashi. (Salmo 146:3) Na juli 1995, forsanan enemigo a djis hala e forsanan arma di Nacionnan Uni un banda y a podera di e stad. Mas cu 6.000 musulman a disparce y por lo menos 1.200 civil musulman a ser asesina.
Den tur area di bida tin cantidad di promesa cu no ta cumpli. Hende ta sinti cu awendia nan ta ser bombardia cu “un gran cantidad di propaganda falso y engañoso” cu ta nek nan. Nan ta keda desilusiona door di “promesanan cu miles di politico ta haci durante campaña pero cu nan no ta cumpli cu ne.” (The New Encyclopædia Britannica, Volumen 15, pagina 37) Lidernan religioso den cua hende ta pone nan confiansa y cu ta priminti di percura pa nan tou, ta abusa di nan den e manera di mas horendo. Asta riba e terenonan manera esun di educacion y medicina—caminda supuestamente e profesionalnan ta ser dirigi door di compasion y interes den hende—algun a traiciona e confiansa cu hende a pone den nan y a explota of asta asesina esnan cu nan mester a cuida. Pesei no ta nada straño cu Bijbel ta spierta nos pa no kere tur cos!—Proverbionan 14:15.
Promesanan Cu Ta Cumpli
Claro cu tin hopi hende cu ta cumpli cu nan palabra, asta ora cu esaki ta nifica cu nan tin cu haci hopi sacrificio. (Salmo 15:4) Nan ta hende di palabra y nan ta cumpli cu ne. Tin otronan cu ta priminti cu e miho intencion y cu sinseramente kier cumpli cu nan. Nan ta cla y dispuesto pa cumpli cu loke nan a priminti, pero simplemente nan no por. Circunstancia por stroba asta e plannan di mas noble.—Eclesiastes 9:11.
Sea cual sea e motibo, realidad ta cu hopi hende tin problema pa pone confiansa den promesa di cualkier persona. Pesei ta surgi e pregunta: Tin promesa cu nos por confia? Si. Nos por confia e promesanan cu nos ta haya den e Palabra di Dios cu ta Bijbel. Pakico no analisa loke e siguiente articulo tin di bisa di e topico aki? Podise lo bo yega na e mesun conclusion cu miyones di otro hende a yega caba, esta, cu nos por confia e promesanan di Dios.
[Reconocemento pa Potret na pagina 3]
AP Photo/Amel Emric