Pregunta di Lector

Ki circunstancianan a pone cu Huda a tene relacion sexual cu un mohe cu el a pensa ta un prostituta, manera Genesis 38:15 y 16 ta mustra?

Aunke Huda a tene relacion sexual cu un mohe cu el a kere tawata un prostituta, en realidad e mohe no tawata un prostituta. Segun Genesis capitulo 38, loke a sosode ta lo siguiente:

Prome cu Huda su primogenito a haya yiu cu su casa, Tamar, el a perde su bida pasobra e “tawata malbado den bista di SEÑOR.” (Genesis 38:7) E tempo ei hende tawata sigui e custumber di casamento di sua. Esaki a nifica cu ora un homber a muri sin un heredero, su ruman homber mester a casa cu e biuda y tene relacion cu ne pa asina percura un heredero. Pero Onan, e segundo yiu homber di Huda a nenga di cumpli cu su obligacion. Pesei el a muri como resultado di huicio dibino. Huda a manda su suegra bai bek serca su mayornan te ora cu Huda su di tres yiu homber, Sela, bira suficiente grandi pa casa cu ne. Sinembargo, añanan a pasa sin cu Huda a laga Sela casa cu Tamar. Pesei ora cu Huda su casa a muri, Tamar a traha un plan pa e haya un heredero via Huda, e Israelita cu tawata su suegro. El a disfrasa su mes como un prostituta di tempel y a bai sinta canto di e caya, caminda e tawata sa cu Huda lo a pasa.

Huda no a reconoce Tamar, y el a tene relacion cu ne. Pa su servicio sexual, Tamar astutamente a obtene algun obheto personal for di Huda, y despues el a uza esakinan pa proba cu ta Huda a sac’e na estado. Ora e berdad a sali na cla, Huda no a acus’e, ma humildemente el a bisa: “E ta mas husto cu mi, pasobra mi no a dun’e na mi yiu Sela.” Y apropiadamente, Huda “no a tene relacion mas cu ne.”—Genesis 38:26.

Huda a actua robes door di a keda sin duna su yiu homber Sela na Tamar manera el a priminti. Tambe el a tene relacion cu un mohe cu el kere ta un prostituta di tempel. Esaki tawata contrario cu Dios su proposito, cu ta rekeri pa hende tene relacion sexual solamente den matrimonio. (Genesis 2:24) Sinembargo, en realidad, Huda no a tene relacion cu un prostituta. Mas bien, inconcientemente el a substitui su yiu homber Sela den e areglo di sua y asina a bira tata di un desendiente legitimo.

Pa loke ta Tamar, e echo cu el a tene relacion cu Huda no tawata un acto di inmoralidad. No mester a considera su yiunan morocho como yiunan di fornicacion. Ora Boaz di Betlehem a casa cu Rut e mohe Moabita di acuerdo cu e areglo di matrimonio di sua, e ancianonan di Betlehem a papia bon di Tamar su yiu homber Perez (Fares), bisando Boaz: “Cu bo cas ta manera e cas di Perez, kende Tamar a haya pa Huda, pa medio di e desendencia cu SEÑOR lo duna bo door di e mohe hoben aki.” (Rut 4:12) Tambe Perez ta ser menciona entre e antepasadonan di Hesucristo.—Mateo 1:1-3; Lucas 3:23-33.