Promesanan Cu Bo Por Confia

MIKEAS, e profeta di Dios, tawata sa cu hopi promesanan ta resulta inconfiabel. Den su tempo, ni e palabra di compañeronan di mas intimo bo no por a confia tur biaha. Pesei Mikeas a spierta: “No confia biciña; no tene confiansa den un amigo. Warda e portanan di bo boca for di esun cu ta drumi na bo pecho.”—Mikeas 7:5.

Mikeas a permiti e situacion lamentabel aki pon’e duda den tur promesa? No! El a expresa pleno confiansa den e promesanan cu su Dios, Yehova, a haci. Mikeas a skirbi: “Pa loke t’ami, lo mi warda cu speransa riba SEÑOR; lo mi spera riba e Dios di mi salbacion.”—Mikeas 7:7.

Con bin Mikeas tawatin e confiansa ei? Pasobra e tawata sa cu Yehova semper ta cumpli cu su palabra. Tur cos cu Yehova a hura na Mikeas su antepasadonan a cumpli sin falta. (Mikeas 7:20) Yehova su fieldad den pasado a duna Mikeas tur motibo pa kere cu lo E cumpli cu su palabra den futuro.

 “Ni Un Palabra . . . No A Faya”

Mikeas tawata sa, por ehempel, cu Yehova a libra e Israelitanan for di sclabitud na Egipto. (Mikeas 7:15) Hosue, kende a experencia e liberacion ei, a anima su compañeronan Israelita pa eherce fe den tur Dios su promesanan. Riba ki base? Hosue a recorda nan: “Boso sa di henter boso curason y di henter boso alma cu ni un palabra di tur e bon palabranan cu SEÑOR boso Dios a papia tocante di boso no a faya; tur a keda cumpli pa boso, ni un di nan no a faya.”—Hosue 23:14.

E Israelitanan tawata bon conciente cu Yehova a haci cosnan maraviyoso pa nan. El a cumpli cu e promesa cu el a haci na nan antepasado temeroso di Dios, Abraham, esta, cu su desendientenan lo a bira hopi manera streya y cu nan lo tuma posicion di e tera di Canan. Tambe Yehova a bisa Abraham cu su desendientenan lo sufri afliccion pa 400 aña, pero cu despues nan lo a regresa Canan “den e di cuater generacion.” Tur e cosnan aki a sosode.—Genesis 15:5-16; Exodo 3:6-8.

Den e tempo di Yosef (Hose), yiu homber di Yacob, e Israelitanan a wordo bon ricibi na Egipto. Despues e Egipcionan a somete nan na trabou di esclabo severo. Pero manera Dios a priminti, denter di un periodo di cuater generacion consecutivo desde e tempo cu nan a yega Egipto, e desendientenan aki di Abraham a ser libera for di sclabitud na Egipto. *

Atrabes di e siguiente 40 añanan e Israelitanan a haya mas prueba cu Yehova semper ta cumpli cu su promesanan. Ora e Amalekitanan a lansa un atake sin motibo contra e Israelitanan, Dios a bringa pa su pueblo y a proteha nan. El a satisface tur nan necesidadnan material durante nan biahe di 40 aña den desierto y cu tempo el a establece nan den e Tera Priminti. Ora Hosue a repasa e historia di Yehova su trato cu e desendientenan aki di Abraham, cu confiansa e por a bisa: “Ni un di e bon promesanan cu SEÑOR a haci na e cas di Israel no a faya; tur a keda cumpli.”—Hosue 21:45.

Edifica Confiansa den e Promesanan di Dios

Con bo por cultiva fe den e promesanan di Yehova mescos cu Mikeas y Hosue a haci? Wel, con bo ta cultiva confiansa den otro persona? Bo ta busca pa sa mas tanto posibel di e persona. Por ehempel, podise bo ta haya sa con confiabel nan ta door di observa si nan ta purba fielmente di cumpli cu tur nan promesanan. Mas bo conoce e personanan ei, mas confiansa bo ta haya den nan. Bo por haci mescos ora ta trata di cultiva fe den e promesanan di Dios.

Un manera cu bo por haci esaki ta door di reflexiona riba e creacion y e leinan cu ta gobern’e. Cientificonan ta pone nan confiansa den e leinan aki. Algun di e leinan aki ta goberna e manera cu un solo cel humano ta dividi y multiplica su mes pa produci miles di miyones di cel pa forma bo curpa. Si, e leinan cu ta goberna e proceder di energia y  asuntonan substancial den henter e universo mester a ser estableci door di un Trahador di lei cu ta plenamente confiabel. Definitivamente, e mesun confiansa cu bo tin den su leinan di creacion, bo por tin tambe den su promesanan.—Salmo 139:14-16; Isaias 40:26; Hebreonan 3:4.

Mediante profeta Isaias, un contemporaneo di Mikeas, Yehova a uza e regularidad di e temporadanan di aña y e ciclo asombroso di awa pa mustra con confiabel su palabra ta. Tur aña awa ta yobe. E ta muha suela y ta haci posibel pa hende sembra simiña y haya cosecha. Relaciona cu esaki Yehova a bisa: “Pasobra manera awasero y sneu ta cai for di shelo, y no ta bolbe ayanan sin muha tera, y ta haci tera produci y spruit, y ta duna simiña na e sembrado y pan na esun cu ta come, asina mi palabra cu ta sali for di mi boca lo ta; e lo no bolbe bashi serca mi, sin cumpli cu loke mi ta desea, y sin alcansa e proposito cu cual mi a mand’e.”—Isaias 55:10, 11.

Promesanan Sigur di Paradijs

Analisis di creacion por edifica confiansa den e Creador, pero bo mester di algo mas si bo kier siña tocante e promesanan cu ta forma parti di e ‘palabranan cu ta sali for di su boca.’ Pa siña di e promesanan aki pa asina bo por pone bo confiansa den nan, bo tin cu analisa e registro biblico inspira di e proposito di Dios y su trato cu humanidad.—2 Timoteo 3:14-17.

Profeta Mikeas tawatin confiansa den e promesanan di Yehova. Compara cu Mikeas, abo tin asta mas tanto di Dios su registro inspira na bo disposicion. Segun cu bo ta lesa Bijbel y ta medita riba dje, bo tambe por cultiva fe den cumplimento di e promesanan di Dios. E promesanan aki no ta envolve e desendientenan carnal so di Abraham, sino henter humanidad. Yehova a priminti e patriarca temeroso di Dios aki: “Den bo desendientenan tur e nacionnan di e tera lo ta bendiciona, pasobra bo a obedece mi bos.” (Genesis 22:18) E parti principal di e “simiña” of e desendientenan di Abraham ta e Mesias, Hesucristo.—Galationan 3:16.

Mediante Hesucristo, Yehova lo haci sigur cu e bendicionnan ta basha riba humanidad. Y kico Yehova a priminti di haci den nos tempo? Mikeas 4:1 y 2 ta contesta cu e palabranan profetico aki: “Lo sosode den e ultimo dianan cu e sero di e cas di SEÑOR lo wordo estableci como hefe di e seronan. E lo wordo halsa mas halto cu e seritonan, y e pueblonan lo basha bai na dje. Y hopi nacion lo bin bisa: ‘Ban laga nos subi bai na e sero di SEÑOR y na e cas di e Dios di Yacob, pa e siña nos di su camindanan y pa nos cana den su bereanan.’”

Esnan cu ta siña di Yehova su camindanan ‘ta bati nan spadanan traha ploeg cu nan, y nan lansanan traha sker-pa-snui cu nan.’ Tur tendencia pa guera lo disparce. Pronto e tera lo ta yen di hende recto y ningun hende lo no pone nan tembla di miedo. (Mikeas 4:3, 4) Si, e Palabra di Dios ta priminti cu bou di mandato di e Reino di Dios den man di Hesucristo, Yehova lo limpia e tera y kita tur opositor.—Isaias 11:6-9; Daniel 2:44; Revelacion 11:18.

Asta esnan cu a sufri y muri como resultado di hende su rebelion contra Dios lo haya resureccion cu e prospecto di biba pa semper riba tera. (Huan 5:28, 29) Satanas y su demoñonan, esnan cu ta fomenta maldad, lo no  t’ei mas y e efectonan di e pica di Adam lo ser elimina door di Hesus su sacrificio di rescate. (Mateo 20:28; Romanonan 3:23, 24; 5:12; 6:23; Revelacion 20:1-3) Y den ki situacion humanidad obediente lo ta? Sin duda, nan lo ser bendiciona cu bida eterno y salu perfecto den paradijs riba tera!—Salmo 37:10, 11; Lucas 23:43; Revelacion 21:3-5.

E promesanan aki si ta maraviyoso! Pero bo por kere nan? Claro cu si. Nan no ta promesa di hende cu podise tin bon intencion pero cu no tin poder pa cumpli cu nan. Nan ta promesa di Dios Todopoderoso, kende no por gaña y cu “no ta tarda cu su promesa.” (2 Pedro 3:9; Hebreonan 6:13-18) Bo por tin pleno confiansa den tur e promesanan cu bo ta haya den Bijbel, pasobra nan Fuente ta Yehova e “Dios di fieldad” of di e berdad.—Salmo 31:5.

[Nota]

[Comentario na pagina 6]

“Ni un palabra di tur e bon palabranan cu SEÑOR boso Dios a papia tocante di boso no a faya.”​—HOSUE 23:14

[Plachi na pagina 4, 5]

Yehova a cumpli cu su promesanan cu el a haci na e nacion di Israel, na Lama Cora y den e desierto

[Plachi na pagina 7]

Yehova a cumpli cu su promesa na Abraham. Su Simiña Hesucristo, lo trece bendicion pa humanidad