“Un di e Mayor Obranan di Construccion”

TEMPO nan a traha e tempel di Yehova den Herusalem durante e reinado di Salomon rond di 3.000 aña pasa, nan a traha un bunita tank’i awa di coper pafo di e entrada di e tempel. E tawata pisa mas cu 30 ton y por a contene mas o menos 40.000 liter di awa. Nan a yama e tanki grandisimo aki “lama di metal basha.” (1 Reinan 7:23-26) Albert Zuidhof, exfuncionario tecnico na e Conseho Nacional di Investigacion di Canada a bisa den e revista Biblical Archeologist: “Esaki sigur tawata un di e mayor obranan di construccion cu a yega di wordo realisa den e nacion Hebreo.”

Con nan a construi e lama di metal basha aki? Bijbel ta bisa: ‘Rei tawata laga basha artefactonan di coper den forma di klei den region di Yordan entre Sucot y Sartan.’ (1 Reinan 7:45, 46, Beibel na papiamentu koriente) “Den e proceso di basha metal nan lo a uza e mesun metodo cu hende ta uza te ainda pa traha bel grandi di brons”, segun Zuidhof. E ta splica cu basicamente esaki lo a encera pone un forma di e tanki traha di klei boca abou den un di dos forma di klei (un tiki mas grandi cu esun prome). Meimei di e dos formanan aki nan lo a basha e brons na likido y lag’e seca. Despues nan lo a kibra e dos formanan di klei.

Pa e hendenan por a traha un tanki di metal basha dje grandi ei y dje pisa ei nan mester tawatin hopi saber di construccion. E structura parti paden y e forma parti pafo mester a soporta e presion di 30 ton di coper gesmelt, y mester a basha e coper den un solo basha pa evita scheur of areanan debil. Cu tur probabilidad, ora di basha e metal gesmelt lo mester tawatin un careda di forno conecta na otro. Un trabou tremendo!

Den su oracion di inauguracion di e tempel, Rei Salomon a duna Yehova Dios e merito pa tur e trabou di e tempel, bisando: “Bo a papia cu bo boca y a cumpli cu esaki cu bo man.”—1 Reinan 8:24.