Yehova Su Grandesa Ta Inscudriñabel
Yehova Su Grandesa Ta Inscudriñabel
“SEÑOR ta grandi, y digno di ser alaba na gran manera; y su grandesa ta inscudriñabel.”—SALMO 145:3.
1, 2. Ki tipo di hende David tawata, y con el a mira su mes compara cu Dios?
ECOMPOSITOR di Salmo 145 ta un di e hombernan bon conoci di historia. Na mucha, el a enfrenta un gigante arma y a mat’e. Y como rei y guerero, e salmista aki a derota hopi enemigo. Su nomber ta David, y e tawata e di dos rei di Israel di pasado. Su fama a keda existi pa hopi tempo despues di su morto, y te awe ainda miyones di hende sa algo di dje.
2 Apesar di David su logronan, e tawata un homber humilde. Den un cantica el a bisa di Yehova: “Ora mi contempla bo shelonan, e obra di bo dedenan, e luna y e streyanan cu abo a establece, ta kico hende ta, cu bo ta corda di dje? Y e yiu di hende, cu bo ta haci caso di dje?” (Salmo 8:3, 4) En bes di pensa cu e tawata un gran homber, David a duna Yehova e merito pa a libr’e for di man di tur su enemigonan. El a bisa di Dios: “Bo a duna mi e escudo di bo salbacion, y bo gentilesa [“humildad”, NW] ta haci mi grandi.” (2 Samuel 22:1, 2, 36) Yehova ta manifesta humildad door di tene misericordia cu pecado, y David tawata masha gradicido pa e bondad inmereci di Dios.
‘Lo Mi Halsa Dios e Rei’
3. (a) Con David a mira e gobernacion di Israel? (b) Te na ki grado David a desea di alaba Yehova?
3 Aunke David tawata e rei nombra pa Dios, el a mira Yehova como e berdadero Rei di Israel. David a bisa: “E dominio ta di bo, o SEÑOR, y Abo ta halsa bo mes como cabes riba tur cos.” (1 Cronicanan 29:11) Y di berdad David a respeta Dios como Gobernante! El a canta: “Lo mi halsa bo, mi Dios, o Rei, y lo mi bendiciona bo nomber pa semper y semper. Tur dia lo mi bendiciona bo, y lo mi alaba bo nomber pa semper y semper.” (Salmo 145:1, 2) David a desea di alaba Yehova Dios henter dia y pa tur eternidad.
4. Ki insinuacionnan falso Salmo 145 ta desbarata?
4 Salmo 145 ta un contesta combencente riba Satanas su insinuacion di cu Dios ta un gobernante egoista cu no ta duna su criaturanan libertad. (Genesis 3:1-5) Tambe e salmo aki ta desbarata e mentira di Satanas cu hende cu ta obedece Dios ta hacie unicamente pa motibo cu esei ta cumbini nan, y no pasobra nan stima Dios. (Job 1:9-11; 2:4, 5) Mescos cu David, awe cristiannan berdadero ta suministrando un contesta riba e acusacionnan falso di Diabel. Tur nan speransa ta pa biba pa semper bou di e gobernacion di Reino pasobra nan ta desea di agrada Yehova pa tur eternidad. Ya caba, miyones di nan a cuminsa haci esei door di eherce fe den Hesus su sacrificio di rescate y door di sirbi Yehova obedientemente motiva pa nan amor p’e como su adoradonan dedica y batisa.—Romanonan 5:8; 1 Huan 5:3.
5, 6. Ki oportunidadnan tin pa bendiciona y alaba Yehova?
5 Pensa riba e tantisimo oportunidadnan cu nos tin pa bendiciona y alaba Yehova como su sirbidonan. Nos por haci esei den oracion ora nos lesa algo den su Palabra, Bijbel, cu ta touch nos curason. Nos por expresa alabansa y gradicimento ora nos sinti nos conmovi pa e manera cu Dios ta trata su pueblo of ora cierto aspecto di su creacion maraviyoso emociona nos. Tambe nos ta bendiciona Yehova Dios ora nos ta papia tocante su propositonan cu nos rumannan den fe na reunionnan cristian of den nos combersacionnan otro ora. En realidad, cada ‘bon obra’ cu nos haci na interes di e Reino di Dios ta trece alabansa pa Yehova.—Mateo 5:16.
6 Ehempelnan resien di e bon obranan ei ta e cantidad di luganan di adoracion cu Yehova su sirbidonan a construi den paisnan pober. Hopi di esakinan a wordo realisa cu sosten financiero di rumannan di otro pais. Algun cristian a duna un man door di bai como boluntario na e luganan ei pa yuda construi Salon di Reino. Y e bon obra di mas importante ta pa alaba Yehova door di predica e bon noticia di su Reino. (Mateo 24:14) Manera e versiculonan mas despues den Salmo 145 ta mustra, David tawata masha gradicido pa e gobernacion di Dios y a reconoce e grandesa di Su mahestad. (Salmo 145:11, 12) Abo tambe ta gradicido pa Yehova su gobernacion amoroso? Y bo ta papia regularmente cu otro hende tocante su Reino?
Ehempelnan di e Grandesa di Dios
7. Duna un motibo principal pa alaba Yehova.
7 Salmo 145:3 ta duna un motibo principal pa alaba Yehova. David a canta: “SEÑOR ta grandi, y digno di ser alaba na gran manera; y su grandesa ta inscudriñabel.” E grandesa di Yehova ta sin limite. Hende no por caba di scudriñ’e, ni comprond’e, y pa no papia mes di midie. Ban wak algun ehempel di Yehova su grandesa inscudriñabel. Esei lo beneficia nos sigur.
8. Kico universo ta revela pa loke ta e grandesa y poder di Yehova?
8 Purba corda un anochi cu no tawatin nubia ni claridad di luna y cu bo a hisa cara wak shelo. E gran cantidad di streyanan cu bo por a mira den e scuridad di espacio no a laga bo keda asombra? Bo no a sinti bo impulsa pa alaba Yehova pa su grandesa manifesta den e creacion di tur e cuerponan celestial ei? Ma loke bo a mira ta un fraccion masha chikito di e cantidad di streyanan den e galaxia na cua nos planeta ta pertenece. Ademas, segun calculonan tin mas cu shen mil miyon galaxia, di cua tres di nan so bo por mira sin telescop. En berdad, e universo inmenso cu su streyanan y galaxianan incontabel ta evidencia di Yehova su poder pa crea y su grandesa inscudriñabel.—Isaias 40:26.
9, 10. (a) Ki aspectonan di Yehova su grandesa a ser manifesta en conexion cu Hesucristo? (b) Ki efecto Hesus su resureccion mester tin riba nos fe?
9 Considera otro aspectonan di Yehova su grandesa—esnan cu tin di aber cu Hesucristo. Dios a demostra su grandesa ora el a crea su Yiu y uz’e pa un tempo masha largo como Su “trahado experto.” (Proverbionan 8:22-31) E grandesa di Yehova su amor a ser manifesta ora el a duna su Yiu unigenito como un sacrificio di rescate pa humanidad. (Mateo 20:28; Huan 3:16; 1 Huan 2:1, 2) Y loke sigur nos como hende no por caba di compronde ta e curpa spiritual glorioso y inmortal cu Yehova a duna Hesus ora El a resusit’e.—1 Pedro 3:18.
10 Hesus su resureccion a encera hopi aspecto impresionante di Yehova su grandesa inscudriñabel. Siguramente Dios a restaura e memoria di Hesus relaciona cu e trabounan di creacion di tanto e cosnan invisibel como esnan visibel. (Colosensenan 1:15, 16) Esakinan ta inclui otro criaturanan spiritual, e universo, tera productivo y tur e formanan di bida material riba nos planeta. Ademas di restaura e conocemento cu su Yiu tawatin di e historia completo di bida den shelo y riba tera cu e Yiu aki a presencia prome cu el a bira hende, Yehova a agrega loke Hesus a pasa aden como un ser humano perfecto. Si, Yehova su grandesa inscudriñabel ta bisto den Hesus su resureccion. Ademas, e gran acto ei ta un garantia cu e resureccion di otro hende ta posibel. E mester fortalece nos fe cu Dios por lanta for di morto e miyones di hendenan cu ta den su memoria perfecto.—Huan 5:28, 29; Echonan 17:31.
Obranan Maraviyoso y Poderoso
11. Ki gran obra Yehova a cuminsa na Pentecoste di aña 33 di nos era?
11 Desde Hesus su resureccion, Yehova a efectua hopi otro obranan grandi y maraviyoso. (Salmo 40:5) Na Pentecoste di aña 33 di nos era, Yehova a forma un nacion nobo, “e Israel di Dios”, cu ta consisti di e disipelnan di Cristo cu a wordo ungi cu spirito santo. (Galationan 6:16) Den un manera poderoso, e nacion spiritual nobo aki a extende den e mundo conoci e tempo ei. Apesar di e apostasia cu a habri caminda pa cristiandad desaroya despues di morto di e apostelnan di Hesus, Yehova a sigui efectua obranan maraviyoso pa garantisa e cumplimento di su proposito.
12. E echo cu Bijbel ta disponibel den tur e idiomanan principal riba tera ta un prueba di kico?
12 Por ehempel, Bijbel completo a ser conserva y, cu tempo, traduci den tur e idiomanan principal riba tera awe. Hopi bes e traduccion di Bijbel a tuma luga bou di circunstancianan dificil y cu menasa di morto di parti di agentenan di Satanas. Si no tawata pa e boluntad di Yehova, e Dios cu un grandesa inscudriñabel, Bijbel lo no tawata traduci den mas cu 2.000 idioma!
13. For di 1914 padilanti, con e grandesa di Yehova a wordo manifesta en conexion cu su propositonan di Reino?
13 E grandesa di Yehova a wordo manifesta tambe en conexion cu su propositonan di Reino. Por ehempel, na aña 1914 el a instala su Yiu, Hesucristo, como Rei celestial. Un poco despues di esei, Hesus a tuma accion contra Satanas y su demoñonan door di saca nan for di shelo y limita nan den bicindario di tera, caminda nan ta warda awor pa wordo tira den abismo. (Revelacion 12:9-12; 20:1-3) For di e momento ei padilanti, Hesus su siguidonan ungi a haya nan cu persecucion mas intenso. Ma Yehova a sostene nan durante e tempo aki di e presencia invisibel di Cristo.—Mateo 24:3; Revelacion 12:17.
14. Ki obra maraviyoso Yehova a efectua na 1919, y kico esaki a logra?
Revelacion 11:3-11) Den e añanan cu a sigui, e unginan yen di celo a predica e bon noticia tocante e Reino celestial estableci. Mas rumannan ungi a ser recohi pa completa e cantidad di 144.000. (Revelacion 14:1-3) Y pa medio di e siguidonan ungi di Cristo, Yehova a pone e fundeshi di “un tera nobo”, esta, un sosiedad humano husto. (Revelacion 21:1) Pero kico lo sosode cu e “tera nobo” despues cu tur e fiel rumannan ungi bai shelo?
14 Na 1919, Yehova a percura pa otro obra maraviyoso cu a demostra su grandesa. El a rebiba Hesus su siguidonan ungi cu a cai den un condicion di inactividad spiritual. (15. Ki obra cristiannan ungi a encabesa, y cu ki resultado?
15 Na 1935, e Toren di Vigilancia [na Ingles] di 1 y 15 di augustus a contene articulonan clave cu a papia di e “multitud grandi” menciona den Revelacion capitulo 7. Yen di celo, cristiannan ungi a cuminsa busca e rumannan den fe aki for di tur nacion, tribu, pueblo y lenga y trece nan pa asocia cu nan. E “multitud grandi” aki lo sobrevivi e benidero “gran tribulacion”, cu e speransa di bida eterno den Paradijs como miembro permanente di e “tera nobo.” (Revelacion 7:9-14) Pa motibo di e obra di predica e Reino y haci disipel, encabesa pa e cristiannan ungi, awor mas cu seis miyon hende ta carga e speransa di bida eterno den un paradijs riba tera. Ken mester haya e merito pa tal aumento apesar di e oposicion di Satanas y su mundo corumpi? (1 Huan 5:19) Ta Yehova so por a logra tur esaki pa medio di su spirito santo.—Isaias 60:22; Zacarias 4:6.
Yehova Su Splendor Glorioso y Su Mahestad
16. Pakico hende no por mira literalmente ‘e splendor glorioso di Yehova su mahestad’?
16 Sea cual sea e “obranan maraviyoso” y “echonan poderoso” di Yehova, hamas nan lo wordo lubida. David a skirbi: “Generacion pa generacion lo alaba bo obranan, y lo declara bo echonan poderoso. Lo mi medita den e splendor glorioso di bo mahestad, y den bo obranan maraviyoso. Hende lo papia di e poder di bo echonan temibel; y lo mi conta di bo grandesa.” (Salmo 145:4-6) Pero cuanto cos David por tawata sa di e splendor glorioso di Yehova, ya cu “Dios ta [un] Spirito” y pesei invisibel pa wowo humano?—Huan 1:18; 4:24.
17, 18. Kico lo por a duna David mas admiracion ainda pa ‘e splendor glorioso di Yehova su mahestad’?
17 Aunke David no por a mira Dios, tawatin cosnan si cu por a dun’e mas admiracion ainda pa e mahestad di Yehova. Por ehempel, e por a lesa e registro biblico di Dios su actonan poderoso, manera e destruccion di un mundo malbado pa medio di un Dilubio mundial. Muy probablemente, David a haya sa con e diosnan falso di Egipto a ser humiya ora Dios a libra e Israelitanan for di sclabitud na Egipto. E susesonan ei ta duna testimonio di Yehova su mahestad y grandesa.
18 Sin duda, David a haya mas aprecio ainda pa e mahestad di Dios door di no solamente lesa e Scritura sino tambe medita riba dje. Por ehempel, kisas el a medita riba loke a sosode ora Yehova a duna Israel e Lei. Tawatin strena cu lamper, un nubia diki y un zonido di trompet hopi fuerte. Sero Sinai a sagudi y saca huma. Ora e Israelitanan tawata reuni na pia di sero, nan a asta tende “e Dies Mandamentonan” for di meimei di e candela y e nubia segun cu Yehova tawata papia cu nan pa medio di un angel. (Deuteronomio 4:32-36; 5:22-24; 10:4; Exodo 19:16-20; Echonan 7:38, 53) Esta un manifestacion di e grandesa di Yehova! Amantenan di e Palabra di Dios cu ta medita riba e relatonan aki sigur lo sinti nan conmovi pa ‘e splendor glorioso di Yehova su mahestad.’ Claro cu awe nos tin Bijbel completo, cu su varios visionnan glorioso di e grandesa di Yehova cu ta impresiona nos profundamente.—Ezekiel 1:26-28; Daniel 7:9, 10; Revelacion, capitulo 4.
19. Kico lo duna nos mas admiracion pa e mahestad di Yehova?
19 Otro cos cu por a laga David keda impresiona cu e mahestad di Dios tawata door di studia e leinan cu Dios a duna e Israelitanan. (Deuteronomio 17:18-20; Salmo 19:7-11) Obediencia na e leinan di Yehova a dignifica e nacion di Israel y a separ’e for di tur otro pueblo. (Deuteronomio 4:6-8) Mescos cu tawata e caso cu David, si nos lesa e Scritura regularmente, medita riba dje profundamente, y studi’e diligentemente, nos lo haya mas admiracion pa e mahestad di Yehova.
E Cualidadnan di Dios Ta Manifesta Su Grandesa
20, 21. (a) Salmo 145:7-9 ta halsa e grandesa di Yehova en conexion cu ki cualidadnan? (b) Ki efecto e cualidadnan di Dios menciona aki tin riba tur hende cu ta stim’e?
20 Manera nos a ripara, e prome seis versiculonan di Salmo 145 ta duna nos motibonan valido pa alaba Yehova pa e cosnan cu ta relaciona cu su grandesa inscudriñabel. Versiculo 7 pa 9 ta halsa e grandesa di Dios door di referi na su cualidadnan. David a canta: “Cu animo nan lo papia di e recuerdo di bo gran bondad, y lo canta cu goso di bo husticia. SEÑOR ta yen di gracia y compasion, kende no ta rabia lihe, y ta grandi den misericordia. SEÑOR ta bon pa tur, y su misericordianan ta riba tur su obranan.”
21 Aki David ta resalta na prome luga e bondad y husticia di Yehova—hustamente e cualidadnan cu Satanas e Diabel a cuestiona. Ki efecto e cualidadnan aki tin riba tur hende cu ta stima Dios y cu ta somete nan mes na su gobernacion? Wel, Yehova su bondad y su gobernacion husto ta trece asina tanto goso pa su adoradonan cu nan no por laga di papia di su alabansa. Ademas, Yehova ta extende su Echonan 14:15-17.
bondad na “tur” hende. Ohala esaki yuda hopi hende mas repenti y bira adorado di e Dios berdadero prome cu ta mucho laat.—22. Con Yehova ta trata su sirbidonan?
22 Tambe David a balora e cualidadnan cu Dios mes a enfatisa ora El a “pasa [Moises] su dilanti y a proclama: ‘SEÑOR, SEÑOR Dios, yen di compasion y gracia, kende no ta rabia lihe y kende ta abunda den misericordia y berdad.’” (Exodo 34:6) Pues, David por a declara: “SEÑOR ta yen di gracia y compasion, kende no ta rabia lihe, y ta grandi den misericordia.” Aunke Yehova su grandesa ta inscudriñabel, e ta dignifica su sirbidonan humano door di trata nan cu compasion. E ta yen di gracia, dispuesto pa pordona pecadonan repenti a base di e sacrificio di rescate di Hesus. Yehova no ta rabia lihe pasobra e ta duna su sirbidonan oportunidad pa vence e debilidadnan cu por stroba nan di drenta su mundo nobo di husticia.—2 Pedro 3:9, 13, 14.
23. Ki cualidad precioso nos lo analisa den e siguiente articulo?
23 David ta halsa e misericordia [of bondad amoroso] di Dios. Por cierto, e resto di Salmo 145 ta mustra con Yehova ta desplega e cualidad aki y con su sirbidonan leal ta responde na su bondad amoroso. Nos lo analisa e topico aki den e siguiente articulo.
Con Lo Bo Contesta?
• Ki oportunidad nos tin pa alaba Yehova “henter dia”?
• Ki ehempelnan ta mustra cu e grandesa di Yehova ta inscudriñabel?
• Con nos por haya mas admiracion pa e mahestad glorioso di Yehova?
[Preguntanan di Estudio]
[Plachi na pagina 10]
E galaxianan di universo ta duna evidencia di e grandesa di Yehova
[Reconocemento]
Pa cortesia di Anglo-Australian Observatory, potret di David Malin
[Plachi na pagina 12]
Con Yehova su grandesa a wordo manifesta en conexion cu Hesucristo?
[Plachi na pagina 13]
Ora e Israelitanan a ricibi e Lei na Sero Sinai, nan a haya evidencia di Yehova su mahestad glorioso