Bo Por Trata cu Insiguridad cu Exito

“SIGUR SIGUR!” “Definitivamente!” “Garantisa!” Muy probablemente bo a tende e tipo di expresionnan ei hopi biaha. Sinembargo, den nos bida diario tin masha tiki cos cu nos por ta sigur di dje. Bida ta asina impredecibel cu hopi bes nos ta puntra nos mes si no tin un cos cu nos por ta absolutamente sigur di dje. Duda y insiguridad ta parce di ta un parti di bida.

Ta di compronde cu mayoria hende ta desea siguridad y felicidad pa nan mes y pa nan famia. Nan ta traha hopi duro pa obtene e cosnan cu nan ta kere lo haci nan felis y sigur, loke por lo general ta placa y pocesionnan material. Sinembargo, un temblor, un horcan, un accidente of un crimen violento por destrui nan pocesionnan den un instante. Malesa grave, diborcio of desempleo por cambia bida di hende di un dia pa otro. Ta berdad cu kisas e cosnan ei lo no sosode cu abo. Sinembargo, e solo echo cu nos sa cu algo teribel por sosode un ora pa otro, por molestia nos y angustia nos. Pero esei no ta tur.

E palabra “insigur” ta sinonimo di duda. Y duda ta nifica cu bo no ta sigur di un creencia of opinion, di tal grado cu hopi bes esei ta stroba tumamento di decision. Ademas, segun e buki Managing Your Mind (Con pa Maneha Bo Mente), “ser insigur di algo importante ta un causa principal di ansiedad y precupacion.” Duda cu no ser resolvi por hiba na ansiedad, frustracion y rabia. Si, precupacion pa loke lo por of lo no por sosode, por causa daño na nos salu fisico y mental.

Como resultado, tin hende ta bai na e otro extremo. Nan ta manera e hoben di Brazil cu a bisa: “Pakico precupa tocante loke ta bai sosode? Awe ta awe, mañan ta mañan.” Tal actitud fatalista, cu ta ser describi bon pa e palabranan “laga nos come y bebe, pasobra mañan nos ta muri”, por hiba solamente na decepcion, angustia y finalmente morto. (1 Corintionan 15:32) Ta mas miho pa nos acudi na e Creador Yehova Dios, serca ken, segun Bijbel, “no tin variacion ni sombra di cambio.” (Santiago 1:17) Si nos analisa Bijbel, e Palabra di Dios, nos lo haya conseho y guia sano tocante con pa trata cu exito cu e insiguridadnan di bida. Tambe e por yuda nos compronde dicon tin asina tanto inkietud tocante cosnan cu no ta sigur.

Motibo Cu Cosnan No Ta Sigur

E Scritura ta duna un punto di bista realistico di bida y ta yuda nos cultiva e debido actitud pa cu cambio y cosnan insigur. Relacionnan  familiar, posicion social, inteligencia, bon salu, etcetera, por percura un cierto grado di siguridad. Pero Bijbel ta mustra cu nos no por asumi cu e cosnan ei lo sigui asina sin cambia of spera cu nos bida lo ta sin problema, como si fuera proteha pa podernan sobrenatural. E Rei sabi Salomon a bisa: “E careda no ta pa esun mas lihe, y e bataya no ta pa e guereronan, ni pan no ta pa e sabinan, ni rikesa pa esnan cu tin discernimento, ni fabor pa e hendenan cu habilidad.” Dicon no? “Pasobra tempo y [“suseso imprevisto”, NW] ta alcansa nan tur.” Pesei Salomon a spierta: “Manera pisca cohi den un reda traicionero, y parha cohi den un trampa, asina e yiunan di hende ta cai den trampa den un tempo malo, ora esaki bini diripiente riba nan.”—Eclesiastes 9:11, 12.

Hesucristo tambe a papia di un tempo di ansiedad y insiguridad extremo cu lo a bin riba henter un generacion di hende. Cu palabranan hopi descriptivo el a bisa: “Lo tin señalnan den solo y luna y streyanan, y riba tera angustia entre e nacionnan, y desesperacion pa motibo di e roncamento di lama y olanan; hendenan ta desmaya di miedo y den e expectativa di e cosnan cu ta bini riba mundo, pasobra e podernan di e shelonan lo wordo sagudi.” Sinembargo, Hesus a indica un cos positivo pa hende djawe di curason honrado: “Ora boso mira e cosnan aki ta sosode, sabi cu e reino di Dios ta serca.” (Lucas 21:25, 26, 31) Pues nos tambe, en bes di tin miedo di un futuro insigur, tin fe den Dios, locual ta yuda nos mira mas aya di e insiguridadnan na un futuro sigur y maraviyoso.

‘Tene e Siguransa Completo di e Speransa’

Aunke nos no por ta sigur di tur cos cu nos ta tende, lesa of mira, nos tin bon motibo pa confia e Creador. No solamente e ta Esun Supremo, sino tambe e ta un Tata amoroso cu ta percura pa su yiunan riba tera. Dios a bisa tocante su propio palabra: “E lo no bolbe bashi serca mi, sin cumpli cu loke mi ta desea, y sin alcansa e proposito cu cual mi a mand’e.”—Isaias 55:11.

Hesucristo a siña hende e berdad cu ta bin di Dios, y hopi cu a scuch’e a acepta e berdad ei cu un conviccion y siguransa. Por ehempel, un grupo di Samaritano di curason honrado a bisa e mohe cu a scucha Hesus prome: “Awor nos no ta kere mas pa motibo di loke abo a bisa, pasobra nos mes a tende y nos sa cu esun aki di berdad ta e salbado di mundo.” (Huan 4:42) Awe tambe, apesar cu nos ta biba den tempo di insiguridad, no tin nodi pa nos ta den duda di loke nos mester kere.

Relaciona cu creencianan religioso, hopi hende ta di opinion cu en bes di purba compronde e creencianan, nos mester simplemente kere nan. Sinembargo, e escritor biblico Lucas, no a pensa asina. El a haci investigacion y a percura informacion exacto di manera cu otro hende lo por “sa e berdad exacto tocante di e cosnan” cu el a skirbi. (Lucas 1:4) Ya cu famia y amigonan cu no ta comparti nos fe kisas tin miedo cu nos como creyente lo resulta desilusiona y decepciona, ta importante pa nos por defende nos fe. (1 Pedro 3:15) Ta solamente door di sa exactamente pakico nos ta kere cierto cosnan nos por yuda otro hende confia den Dios. Bijbel ta describi Yehova cu e palabranan aki: “E Baranca! Su obra ta perfecto, pasobra tur su camindanan ta husto; un Dios di fieldad y sin inhusticia, husto y recto e ta.”—Deuteronomio 32:4.

 Considera e ultimo declaracion ei: “Husto y recto e ta.” Ki evidencia nos tin cu nos por ta sigur di esaki? Apostel Pedro tawata plenamente combenci di e echo ei. El a bisa un oficial Romano cu su famia: “Di berdad mi ta compronde awor cu Dios no ta haci distincion di persona, ma den tur nacion e hende cu ta tem’e y cu ta haci husticia ta aceptabel p’e.” (Echonan 10:34, 35) Pedro a bisa e palabranan aki pasobra el a caba di mira con Dios su propio man a dirigi asunto pa asina un famia no Hudiu, cu anteriormente nan a considera impuro y inaceptabel, por a bira aceptabel pa Dios. Nos tambe, mescos cu Pedro, por ta combenci cu Dios no ta haci distincion di persona y cu e ta husto. Dicon? Pasobra nos ta mira cu nos propio wowonan “un multitud grandi” di hende—mas cu seis miyon—for di mas cu 230 pais rond mundo cu a bandona nan bida di antes y awor ta cana den e caminda di husticia.—Revelacion 7:9; Isaias 2:2-4.

Como cristiannan berdadero, nos no kier ta fanatico ni arbitrario, sino humilde y rasonabel. Pero toch nos no ta duda di loke nos ta kere ni di loke nos ta spera den futuro. Apostel Pablo a skirbi na cristiannan di prome siglo: “Nos ta desea cu cada un di boso lo mustra e mesun diligencia pa asina realisa e siguransa completo di speransa te na fin.” (Hebreonan 6:11) E bon nobo di e Bijbel a duna nos tambe “e siguransa completo di speransa.” Manera Pablo a splica, e speransa ei cu ta firmemente basa riba e Palabra di Dios, ‘no ta laga nos keda desapunta.’—Romanonan 5:5.

Ademas, nos ta plenamente combenci cu door di siña otro hende e bon nobo di e Bijbel, esei por duna nan un conviccion firme den nan relacion cu Dios, y asta laga nan sinti mas sigur emocionalmente y fisicamente. Nos por bisa mescos cu Pablo: “Nos evangelio no a yega serca boso den palabra so, sino tambe den poder y den spirito santo y cu pleno conviccion.”—1 Tesalonicensenan 1:5.

Bendicionnan Actual Como Resultado di Siguridad Spiritual

Aunke awe nos no por spera siguridad completo den bida, tin cosnan cu nos por haci cu lo yuda nos hiba un bida relativamente stabil y sigur. Por ehempel, asociacion regular cu e congregacion cristian na e reunionnan ta contribui na stabilidad pasobra einan nos ta siña principionan y balornan corecto y sano. Pablo a skirbi: “Instrui esnan cu ta rico den e mundo actual pa nan no ta soberbe y pa nan no fiha nan speransa riba e insiguridad di rikesa, ma riba Dios, kende ta provee pa nos tur cos na abundancia pa nos disfruta di nan.” (1 Timoteo 6:17) Door di siña pone nan confiansa den Yehova y no den cosnan material y placer pasahero, hopi hende a logra core cu e ansiedad y frustracion cu nan tawata sinti na antes.—Mateo 6:19-21.

Den e congregacion, nos ta disfruta tambe di un hermandad caloroso cu ta percura yudansa y apoyo den varios manera. Apostel Pablo y su compañeronan di biahe na dado momento den nan sirbishi a sinti “un carga masha pisa mes” y nan ‘asta tawata desespera di nan bida.’ Unda Pablo a haya apoyo y alivio? Claro cu su confiansa den Dios no a tambalia nunca. Pero fuera di esei, el a ricibi animacion y consuelo serca compañeronan cristian cu a yud’e. (2 Corintionan 1:8, 9; 7:5-7) Awe ora tin un desaster natural of cualkier otro calamidad, nos rumannan cristian bes tras bes ta e promenan cu ta yega pa duna yudansa material y spiritual na compañeronan cristian y tambe na otro hende den necesidad.

Un otro yudansa pa trata cu e insiguridadnan di bida ta oracion. Nos por acudi semper na nos amoroso Tata celestial ora nos ta bou di presion inespera. “SEÑOR lo ta un refugio pa e  opriminan, un refugio den temponan di angustia.” (Salmo 9:9) Mayornan humano kisas por keda sin proteha nan yiunan. Di otro banda, Dios ta dispuesto pa yuda nos trata cu exito cu nos temornan y sintimentonan di ta insigur. Ora nos benta nos ansiedadnan riba Yehova mediante oracion, nos por tin sigur cu e por “haci tur cos mucho mas abundantemente di loke nos ta pidi of pensa.”—Efesionan 3:20.

Abo ta acudi na Dios regularmente den oracion? Bo ta combenci cu Dios ta tende bo oracion? Un hobensita na São Paulo a bisa: “Mi mama tawata bisa mi cu mi mester haci oracion na Dios. Pero mi tawata puntra mi mes: ‘Dicon mi mester papia cu un persona cu ni sikiera mi conoce?’ Sinembargo, Proverbionan 18:10 a yuda mi compronde cu nos tin mester di Dios su yudansa y cu nos tin cu papia cu ne den oracion.” E scritura ei ta bisa: “E nomber di [Yehova] ta un toren fuerte; e husto ta core drenta den dje y ta sigur.” En realidad, con nos por desaroya confiansa den Yehova si nos no hacie un custumber pa papia cu ne? Pa disfruta di e bendicionnan di siguridad spiritual, nos tin cu cultiva e custumber di haci oracion sinsero tur dia. Hesus a bisa: “Ma sea alerta tur ora bai, haciendo oracion pa boso por tin forsa pa scapa di tur e cosnan aki cu ta bai tuma luga, y pa para dilanti di e Yiu di hende.”—Lucas 21:36.

Un otro cos cu nos por ta sigur di dje ta nos speransa den e Reino di Dios. Tuma nota di e palabranan na Daniel 2:44: “E Dios di shelo lo lanta un reino cu nunca lo no wordo destrui, y e reino ei lo no pasa pa ningun otro pueblo; e lo garna y pone un fin na tur e reinonan aki, ma e mes lo dura pa semper.” E speransa ei ta solido y e ta algo cu nos por ta sigur di dje. Promesanan humano hopi bes ta fracasa, pero semper nos por confia e palabra di Yehova. En bes di ta inconfiabel, Dios ta manera un baranca cu nos por steun ariba. Nos por sinti mescos cu David, kende a bisa: “Mi Dios, mi baranca, den kende mi ta tuma refugio; mi escudo y e cacho di mi salbacion, mi toren halto y mi refugio; mi Salbador, abo ta salba mi di violencia.”—2 Samuel 22:3.

E buki menciona anteriormente Managing Your Mind a comenta mas aleu: “Mas un hende pensa riba e cosnan malo cu lo por sosode, mas probabel nan lo parce, y mas dificil ta pa mira con pa trata cu nan cu exito.” Pesei anto, pakico laga e ansiedad- y dudanan di e mundo aki bira un carga pa nos? Na luga di esei, laga nos pone confiansa den e promesanan sigur cu Dios ta duna y no den e insiguridadnan di e mundo aki. Door di tin un fe firme den Yehova su promesanan infalibel, nos tin e siguransa aki: “Ken cu kere den dje lo no keda brongosa.”—Romanonan 10:11.

[Comentario na pagina 29]

E Palabra di Dios ta garantisa bendicion den futuro pa humanidad

[Comentario na pagina 30]

“Ken cu kere den dje lo no keda brongosa”

[Plachi na pagina 31]

E bon nobo di Reino ta duna hende siguridad