Con Bo Por Satisface Bo Necesidadnan Spiritual

“DEN e ultimo decada, mas cu 300 buki tocante spiritualidad y su influencia riba trabou—for di e obra Jesus CEO te na The Tao of Leadership—a bira obtenibel den librerianan”, segun U.S.News & World Report. E tendencia aki ta djis un refleho di e echo cu den hopi pais rico, tin un hamber creciente pa orientacion spiritual den bida. Comentando riba esaki, e revista empresarial Training & Development a remarca: “Den e tempo aki den cua tecnologia ta dirigi tur otro aspecto di nos bida, nos ta buscando un nificacion mas profundo, un proposito den bida y mas satisfaccion personal.”

 Pero unda bo por haya guia spiritual satisfactorio? Den pasado, hende tawata acudi na religionnan tradicional pa yuda nan haya “un nificacion mas profundo” y “un proposito” den bida. Awe, hopi hende a bira lomba pa religion tradicional. Un encuesta cu 90 gerente y ehecutivo halto a revela cu “hende ta haci un distincion cla entre religion y interes den cosnan spiritual”, segun Training & Development. Esnan cu a participa den e encuesta a mira religion como “intolerante y causante di desunion”, mientras cu nan a mira interes den cosnan spiritual como algo “universal y habri pa tur hende.”

Mescos tambe hopi hoben den e sosiedadnan caminda religion casi no tin influencia mas, manera Australia, Nueva Zelandia, Reino Uni y Europa ta mira un distincion entre religion y interes den cosnan spiritual. Profesor Ruth Webber a declara den Youth Studies Australia: “Mayoria hoben ta kere den Dios, of den un of otro forsa sobrehumano, pero nan no ta duna iglesia mes tanto importancia ni no ta mir’e como un medio pa yuda nan expresa nan interes den cosnan spiritual.”

Religion Berdadero Ta Promove Interes den Cosnan Spiritual

E duda aki pa cu religion ta comprendibel. Hopi organisacion religioso ta profundamente meti den intriga politico y hipocresia moral, y nan ta papa muha cu e sanger inocente cu nan a drama den cantidad di gueranan religioso. Sinembargo, algun hende, den nan asco contra organisacionnan religioso mancha pa hipocresia y falsedad, a comete e eror di rechasa Bijbel tambe, pensando cu Bijbel ta tolera e practicanan ei.

Pero, Bijbel mas bien ta condena hipocresia y maldad. Hesus a bisa e lidernan religioso di su tempo: “Ai di boso, escribanan y Farizeonan, hipocritanan! Pasobra boso ta manera tumbanan blancha cu di pafo ta mustra bunita, ma di paden nan ta yen di weso di hende morto y di tur sorto di sushedad. Asina boso tambe di pafo ta parce husto na hende, ma di paden boso ta yen di hipocresia y inikidad.”—Mateo 23:27, 28.

Ademas, Bijbel ta anima cristiannan pa nan ta neutral den tur asunto politico. En bes di manda hende creyente mata otro, e ta bisa cu nan mester ta dispuesto pa muri pa otro. (Huan 15:12, 13; 18:36; 1 Huan 3:10-12) Na luga di ta “intolerante y causante di desunion”, religion berdadero, basa riba Bijbel, ta “habri pa tur hende.” Apostel Pedro a bisa: “Dios no ta haci distincion di persona, ma den tur nacion e hende cu ta tem’e y cu ta haci husticia ta aceptabel p’e.”—Echonan 10:34, 35.

Bijbel—Un Guia Confiabel pa Nos Salu Spiritual

Bijbel ta bisa nos cu hende a wordo crea den imagen di Dios. (Genesis 1:26, 27) Claro cu esei no ta nifica si cu hende parce Dios fisicamente. Mas bien, hende tin e capasidad pa refleha e caracteristicanan di Dios su personalidad, manera e capasidad pa compronde cosnan spiritual y desaroya un relacion spiritual cu Dios.

Siendo cu esei ta e caso, ta logico pa asumi cu Dios lo duna nos tambe e medionan pa cumpli cu nos necesidadnan spiritual, y tambe e guia apropiado cu por yuda nos distingui entre loke ta beneficia nos y loke ta perhudica nos den sentido spiritual. Mescos cu Dios a crea nos curpa cu un sistema di inmunidad asina maraviyoso, cu ta combati enfermedad y yuda nos keda salu, asina tambe el a ekipa nos cu un consenshi, of bos interno, cu por yuda nos tuma decisionnan corecto y evita practicanan cu ta perhudicial tanto den sentido fisico como spiritual. (Romanonan 2:14, 15) Manera nos sa, pa nos sistema di inmunidad funciona, mester aliment’e na un manera adecua. Mescos tambe, pa nos consenshi traha, nos tin cu aliment’e cu bon nutricion spiritual.

Papiando di e clase di alimento cu por mantene nos spiritualmente saludabel, Hesus a  bisa: “Hende lo no biba di pan so, ma di tur palabra cu ta sali for di boca di Dios.” (Mateo 4:4) E palabranan di Yehova ta skirbi den su Palabra, Bijbel, y nan ta “util pa siñansa, pa reprendemento, pa coreccion, pa educa den husticia.” (2 Timoteo 3:16) Ta keda na nos anto pa haci esfuerso pa haya e nutricion spiritual ei. Na e grado cu nos siña conoce Bijbel y haci esfuerso pa aplica su principionan den nos bida, na e mesun grado ei nos lo beneficia tanto den sentido fisico como spiritual.—Isaias 48:17, 18.

E Esfuerso Ta Bale La Pena?

Ta berdad cu tempo ta necesario pa mehora nos salu spiritual door di studia Bijbel; y ta parce cu tempo ta birando mas y mas scars. Pero e recompensanan ta bal e esfuerso! Scucha pakico algun profesional druk ta haya cu dedica tempo na nan salu spiritual ta importante pa nan.

Marina (docter) ta bisa: “Ami nunca no a echt interesa den cosnan spiritual sino te ora mi a cuminsa traha den un hospital y a cuminsa sinti e sufrimento di otro hende profundamente. E ora ei mi a realisa cu mi mester a reconoce y satisface mi necesidad spiritual pa mi por ta felis y trankil, ya cu e tantisimo ocupacionnan di bida y e atencion constante cu bo tin cu duna na precupacion di hende por bira demasiado pa un hende di mi profesion.

Awor mi ta studia Bijbel cu Testigonan di Yehova. E estudio aki ta yuda mi analisa mi accionnan y motivacionnan den un manera constructivo y entrena mi manera di pensa pa ta mas positivo. Esei ta yuda mi mantene mi balansa den bida. Mi carera ta duna mi un gran satisfaccion. Pero ta mi estudio di Bijbel a mehora mi salu emocional y yuda mi controla sintimentonan negativo, reduci tension y tene mas pasenshi y compasion cu hende. Ademas, aplicacion di principio biblico a beneficia mi matrimonio. Pero mas importante cu tur cos, mi a conoce Yehova y mi ta sinti na cierto grado e fluho liber di su spirito, locual a duna mi bida mas nificacion.”

Nicholas (arkitecto) ta bisa: “Prome cu mi a studia Bijbel cu Testigonan di Yehova, mi no tawata interesa mes den cosnan spiritual. Mi unico meta den bida tawata pa logra exito den e profesion cu mi a scohe. Mi estudio di Bijbel a siña mi cu bida ta encera mas cu esei, y cu ta esnan cu ta haci e boluntad di Yehova lo haya felicidad berdadero y duradero.

En berdad mi carera a duna mi un sentido di satisfaccion, pero ta Bijbel a siña mi e importancia di hiba un bida simpel door di enfoca riba cosnan spiritual. Door di haci esei, ami cu mi casa a evita hopi tension cu un estilo di bida materialista ta trece cu ne. Tambe nos a haya hopi berdadero amigo pa medio di nos asociacion cu personanan cu ta mira bida mescos cu nos ta mir’e.”

Vincent (abogado) ta bisa: “Un bon carera por duna bo cierto satisfaccion. Pero, mi a ripara cu hopi mas ta necesario pa haya felicidad  y goso den bida. Prome cu mi a bira conciente di e siñansa di Bijbel riba e topico aki, mi ta corda con diripiente mi a bin realisa cu eigenlijk bida no tin mucho sentido. Tur loke bo ta haci ta: nace, crece y bira grandi, casa, traha pa cria yiu, educa nan pa sigui precis e mesun ciclo di bida, pa finalmente bira bieu y muri.

Ta despues cu mi a studia Bijbel cu Testigonan di Yehova mi a bin ricibi contestanan satisfactorio riba mi preguntanan tocante e proposito di bida. Mi estudio di Bijbel a permiti mi conoce Yehova como persona y desaroya un amor profundo p’e. Esaki ta duna mi e base pa mi keda semper cu un punto di bista spiritual saludabel segun cu mi ta haci esfuerso pa biba na harmonia cu loke mi sa ta su proposito. Awor, tanto ami como mi casa tin e satisfaccion di sa cu nos ta uzando nos bida den e manera mas significativo posibel.”

Abo tambe por haya un sentido di proposito den bida door di studia Bijbel. Testigonan di Yehova ta cla pa yuda bo. Mescos cu Marina, Nicholas y Vincent, bo por haya e satisfaccion cu ta bin for di siña tocante Yehova y su proposito pa humanidad en general y pa abo personalmente. Lo bo haya no solamente e goso di satisface bo necesidadnan spiritual awor sino tambe lo bo haya e speransa di gosa di bida pa semper den perfecto salu fisico—un speransa cu ta disponibel solamente pa esnan cu ta “reconoce cu nan tin mester di Dios.”—Mateo 5:3, BPK.

Un manera pa bo busca Dios, of mustra interes den cosnan spiritual, ta mediante oracion. Hesus a tuma tempo pa siña su disipelnan con pa haci oracion, dunando nan loke ta conoci como e Oracion di Nos Tata. Kico e oracion ei ta nifica pa bo awe? Con bo por beneficia for di dje? E siguiente dos articulonan lo contesta e preguntanan ei.

[Plachinan na pagina 6]

Marina

[Plachinan na pagina 7]

Nicholas

[Plachinan na pagina 7]

Vincent