Storia di Bida

Mi A Experencia Yehova Su Cuido y Bondad Amoroso

SEGUN E RELATO DI FAY KING

Mi mayornan tawata hende bondadoso, pero mescos cu hopi otro hende, nan no tawatin ni un tiki lei cu religion. Mi mama tawatin custumber di bisa: “Mester tin un Dios, sino ta ken a traha e flornan, y ken a traha e palonan?” Pero ta te einan e tawata yega.

MI TATA a muri na 1939 ora cu mi tawatin 11 aña, y mi a biba cu mi mama na Stockport, un poco pasuit di Manchester, Inglatera. Semper mi tawatin e deseo di sa mas tocante mi Creador y mi a respeta Bijbel, maske mi no tawata sa nada di Bijbel. Pesei mi a dicidi di bai Iglesia Anglicano pa wak kico e iglesia ei tawatin di ofrece.

Nan sirbishinan no tawatin ningun efecto riba mi, pero ora nan tawata lesa e Evangelionan, e palabranan di Hesus di un manera of otro a combence mi cu Bijbel mester ta berdad. Awor cu mi ta pensa bek riba e tempo ei, mi ta keda straño cu nunca mi no a lesa Bijbel pa mi mes. Asta despues, ora cu un amiga di cas a duna mi un traduccion moderno di e “Testament Nobo”, mi no a tuma tempo nunca pa les’e.

Pero e inicio di e Guera di Corea na 1950 realmente a pone mi pensa. Acaso e conflicto lo a plama, manera a pasa cu Segundo Guera Mundial? Si esei sosode, con lo mi por a obedece Hesus su mandamento pa stima mi enemigonan? Pero di otro banda, lo mi por a para mira hende invadi mi pais y no haci nada pa stop nan? Si mi haci esei, siguramente lo mi ta bula pipa pa mi responsabilidad. Maske mi tawata tur confundi, mi a keda combenci cu  contesta riba tur mi preguntanan tawata den Bijbel, aunke mi no tawatin ningun idea con of unda pa haya e contestanan.

Buscando e Berdad na Australia

Na 1954 ami cu mi mama a dicidi di imigra pa Australia, caminda mi ruman mohe Jean tawata biba. Un par di aña despues, Jean a bisa mi cu el a pidi Testigonan di Yehova pa bishita mi pasobra e tawata sa cu mi ta interesa den Bijbel y tawata bai misa. Jean kier a sa kico mi ta pensa di nan. El a confia mi: “Mi no sa si nan splicacionnan ta corecto of no, pero por lo menos nan tin splicacion. Y esei ta mas cu loke e iglesianan ta haci.”

E pareha cu a bishita mi, Bill cu Linda Schneider, tawata masha dushi hende. Nan tawatin mas cu 65 aña y tawata Testigo di Yehova pa hopi aña. Nan a yega di traha na e emisora di radio cu Testigonan di Yehova tawatin na e stad Adelaide, anto ora cu e trabou di predica a keda prohibi na Australia durante Segundo Guera Mundial, nan a cuminsa sirbi como predicado di tempo completo. Bill cu Linda tawata yuda mi hopi, pero toch mi a sigui investiga diferente religion.

Un colega a hiba mi un reunion di e evangelista Billy Graham, y despues di e reunion varios di nos a reuni cu un pasto cu a puntra ken tin pregunta. Ami a haci e pregunta cu ainda tawata molestia mi: “Con bo por ta un cristian y stima bo enemigonan y na mesun tempo bo ta bai y mata nan den guera?” Mesora henter e grupo a reacciona tur excita, aparentemente e pregunta ei tawata molestia nan tur! Despues di un rato e pasto a bisa: “Mi no sa e contesta riba e pregunta ei. Ainda mi ta pensando riba dje.”

Mientrastanto, mi studio di Bijbel cu Bill cu Linda a sigui, y na september 1958 mi a batisa. Mi a dicidi di sigui e ehempel di esnan cu a siña mi, pesei pa augustus di e siguiente aña mi a cuminsa sirbi como pionero regular, un predicado di tempo completo. Ocho luna despues mi a haya e invitacion pa drenta e fila di pionero special. Mi a keda masha contento ora mi a tende cu mi ruman mohe Jean tambe a progresa den su studio y a batisa!

Un Porta di Oportunidad A Habri

Mi tawata sirbi hunto cu un di e congregacionnan di Sydney y tawata dirigi varios studio di Bijbel na cas. Un dia mi a topa un miembro di clero di Iglesia Anglicano cu a baha cu pension, y mi a puntr’e kico e iglesia ta bisa tocante fin di mundo. Aunke cu el a conta mi cu pa 50 aña largo el a duna les di doctrina di iglesia, su contesta a laga mi babuca: “Lo mi tin cu tuma tempo pa investiga esei pasobra mi no conoce Bijbel bon manera Testigonan di Yehova.”

Un poco despues di esaki, tawatin un yamada pa boluntario cu lo kier sirbi na Pakistan. Mi a yena un solicitud pa esei, sin realisa cu nan no tawata manda hende mohe soltero, sino solamente hende homber soltero of pareha casa. Evidentemente nan a manda mi solicitud na nos sede na Brooklyn, pasobra poco despues mi a haya un carta cu a bisa mi cu si mi kier bai, tin chens pa sirbi na Bombay (awor yama Mumbai), India. Tawata aña 1962. Mi a acepta e asignacion y a keda Bombay 18 luna, caba mi a muda pa un otro stad, Allahabad.

Despues di poco tempo mi a pone mi mes pa siña Hindi. E idioma aki di India por lo general tin un ortografia y pronunciacion consistente,  y pesei no ta masha dificil pa domin’e. Sinembargo, hopi bes mi tawata sinti un frustracion ora cu doñonan di cas tawata pidi mi papia Ingles numa en bes di para titubia cu nan idioma! Pero e pais nobo aki tawatin retonan interesante y stimulante, y mi a disfruta di e asociacion cu otro Testigonan di Australia.

Tempo mi tawata mas jong, mi a pensa riba casamento, pero despues cu mi a batisa mi tawata mucho ocupa ta sirbi Yehova pa pensa riba esei. Sinembargo, awor mi a bolbe sinti e necesidad di un compañero di bida. Pero claro cu mi no kier a laga mi asignacion, pesei mi a haci oracion na Yehova tocante e asunto y caba a sac’e for di mi mente.

Un Bendicion Inespera

E tempo ei Edwin Skinner tawata supervisa e trabou di predica di e sucursal di India. El a asisti na e di ocho klas di Scol Biblico di Galad di Watchtower na 1946 hunto cu hopi otro ruman fiel, entre nan Harold King y Stanley Jones, kendenan a wordo asigna na China. * Na 1958, autoridadnan a encarsela Harold cu Stanley cada un su so den un cel debi na nan actividad di predica na Shanghai. Ora cu nan a laga Harold liber na 1963, Edwin a skirbie. Harold a contesta despues cu el a regresa Hong Kong for di su biahe pa Merca y Inglatera, y a bisa den su carta cu e tin gana di casa. El a bisa Edwin cu el a haci oracion tocante e asunto aki tempo cu e tawata den prizon, y el a puntra Edwin si e no conoce un Testigo cu lo ta un bon casa p’e.

Na India mayoria matrimonio ta matrimonio regla, y constantemente nan tawata pidi Edwin pa haci e areglonan ei, pero semper el a scohe pa no hacie. Pesei el a entrega e carta na Ruth McKay, kende su casa, Homer, tawata un superintendente biahero. Cu tempo, Ruth a skirbi mi pa bisa cu un misionero cu tin hopi tempo den berdad ta busca un esposa, y Ruth a puntra mi si lo mi ta interesa pa skirbi e ruman. Ruth no a bisa mi ta ken e ruman ta ni e no a bisa nada otro di e ruman.

Niun hende no tawata sa di e oracion cu mi a haci pa haya un compaño, cu excepcion di Yehova, ta mas cu claro, y mi prome reaccion tawata pa rechasa e idea. Sinembargo, mas mi a pensa riba e asunto, mas combenci mi a bira cu Yehova rara bes ta contesta nos oracionnan den e manera cu nos kisas ta pensa cu lo e hacie. Pues mi a skirbi Ruth bek y bis’e cu basta cu no tawatin ningun obligacion, e por pidi e ruman skirbi atrobe. E di dos carta for di Harold King tawata dirigi na ami.

 Harold su potret y loke a pasa cu ne a sali den varios corant y revista despues cu nan a lag’e liber for di prizon na China. Pa ora cu el a skirbi mi ya e tawata bon conoci rond mundo, pero loke a impresiona mi tawata su registro di sirbishi teocratico fiel. Asina nos a coresponde cu otro pa cinco luna, y despues mi a bai Hong Kong. Nos a casa dia 5 di october 1965.

Nos tur dos kier a casa y keda den sirbishi di tempo completo, y segun cu nos tawata bira mas bieu, nos tawata sinti mas cu tur cos un gran necesidad di compaño. Mi a bin stima Harold, y segun cu mi tawata mira e manera bondadoso y cu consideracion cu e tawata trata cu hende y cu problemanan cu a surgi relaciona cu nos sirbishi, mi a haya un respet profundo p’e. Pa 27 aña nos a disfruta di un matrimonio masha felis y a ricibi hopi bendicion serca Yehova.

E pueblo Chines ta hende trahado, y mi ta gusta nan hopi. Na Hong Kong nan ta papia e idioma Cantones, un dialecto Chines cu tin hopi mas variacion di tono cu e idioma Mandarin, y pesei e ta basta dificil pa siña. Ami cu Harold a cuminsa nos bida casa den e cas di misionero na e sucursal di Testigonan di Yehova, y despues nos a sirbi den asignacionnan  den varios parti di e teritorio. Si, nos tawata masha felis, pero na 1976 a surgi un problema serio cu mi salu.

Enfrentando Problema cu Salu

Mi tawatin un par di luna ta sufri di derame di sanger, y mi sanger a baha drasticamente. Mi mester a opera, pero e docternan na hospital a bisa mi cu nan lo no haci e operacion sin sanger pasobra si nan hacie, probablemente lo mi drenta den shock y muri. Un dia ora cu e docternan tawata trata mi caso, e verpleegsternan a purba pone mi cambia di opinion, bisando cu mi no tawatin derecho di benta mi bida afo. E dia ei nan tawatin 12 operacion programa, 10 di nan tawata aborto, pero mi a nota cu ningun hende no a bisa e mohenan na estado nada pa e echo cu nan tawata bai kita bida di nan baby.

Finalmente, Harold a skirbi un carta cu a exonera e hospital di cualkier responsabilidad den caso cu mi muri, y e docternan a bai di acuerdo pa haci e operacion necesario. Nan a hiba mi sala di operacion y a prepara pa manda mi leu. Sinembargo, na ultimo momento, e anestesiologo a nenga di sigui cu e procedura, y e hospital mester a manda mi cas.

E ora ei nos a consulta un ginecologo cu no ta mara na e hospital. Ora el a mira con serio mi situacion ta, el a ofrece pa haci e operacion na un prijs abou, basta cu nos no conta ningun hende cuanto el a cobra nos. El a haci e operacion cu exito, y sin uza sanger. Yehova su cuido y bondad amoroso tawata masha bisto pa mi cu Harold na e ocasion ei.

Na 1992, Harold a haya un malesa incurabel. Nos a bai biba na sucursal y ei nan a cuida nos dos cu hopi amor. Mi kerido esposo a termina su bida riba tera na 1993 na edad di 81 aña.

Regreso na Inglatera

Mi tawata contento di por ta un miembro di e famia di Betel di Hong Kong, pero tawata bira mas y mas dificil pa mi soporta e cayente y humedad. Anto pa mi sorpresa mi a haya un carta for di e sede na Brooklyn, y den e carta nan a puntra si en bista di mi salu, lo mi kier bai biba na un sucursal cu tin mas facilidad pa cuido di salu. Asina a sosode cu na aña 2000, mi a muda bek pa Inglatera y a join e famia di Betel na Londen. Esaki a resulta di ta un percuracion masha amoroso! Nan a ricibi mi calorosamente, y mi ta disfruta masha hopi di e varios asignacionnan cu mi tin, entre otro, mi ta yuda cuida e biblioteca di e famia di Betel cu ta consisti di 2.000 buki.

Tambe mi ta asocia cu e congregacion Chines cu ta reuni na Londen, aunke cos a cambia einan si. Awendia, masha poco hende ta bin di Hong Kong, pero mas bien nan ta bin di e continente di China. Nan ta papia Mandarin, y esei ta presenta un reto nobo den e trabou di predica. Tin informenan for di tur parti di Inglatera tocante hopi studio di Bijbel interesante cu ta ser dirigi cu studiantenan universitario cu ta bin di China. Nan ta hende trahado y ta aprecia e berdad di Bijbel cu nan ta siña. Ta un goso di por yuda nan.

Den e silencio di mi cas nobo, mi sa reflexiona hopi bes riba mi bida felis, y Yehova su bondad amoroso ta sigui sorprende mi. Su bondad amoroso ta penetra den tur cos cu tin di aber cu su proposito, y su cuido pa su sirbidonan individual ta masha bisto. Mi tin tur motibo pa ta gradicido pa e manera amoroso cu el a percura y ta percura pa mi.—1 Pedro 5:6, 7.

[Nota]

[Plachi na pagina 24]

Sirbiendo na India

[Plachinan na pagina 25]

Harold King na 1963 y sirbiendo na China den decada di 1950

[Plachinan na pagina 26]

Nos dia di casamento na Hong Kong, 5 di october 1965

[Plachi na pagina 26]

Hunto cu miembronan di e Betel di Hong Kong, famia Liang ta meimei, famia Gannaway ta na banda drechi