Un Consenshi Honrado

CORIENDO un dia riba caminda di trabou pa cas, Charles, un empleado di un universidad na Kenia, a perde su telefon cellular. Na Kenia, ainda esaki ta un aparato costoso y di luho.

Charles di: “Mi no a spera di hay’e bek.” Sinembargo, un par di dia despues, un yamada di telefon for di e sucursal di Testigonan di Yehova na Kenia a coh’e di sorpresa. Casi e no por a kere loke e tawata tende ora nan a bis’e pa e pasa tuma su telefon cellular! A resulta cu un Testigo di Yehova cu ta traha tempo completo den sirbishi a core den e mesun vehiculo cu Charles y a haya e telefon. Den su afan pa haya e doño, e Testigo a hiba e telefon na e sucursal. Anto a base di e number cu ta aparece riba e telefon, e trahadonan boluntario einan a busca pa sa ken ta su doño te cu nan a logra localis’e.

Charles a skirbi den un carta cu el a manda pa e sucursal: “Mi ta aprecia masha hopi e esfuersonan cu boso a haci pa tuma contacto cu mi, apesar cu esei no tawata facil. Mi gradicimento sinsero ta bai na e miembronan di boso organisacion cu a haya e telefon, busca pa sa ta di ken e ta, y percura pa mi hay’e. No ta facil pa haya hende honrado awe, pero ta algo hopi positivo cu nos tin algun hende cu ta resalta como berdadero Testigonan di Yehova Dios.”

Tur caminda Testigonan di Yehova ta conoci pa nan honrades. Nan ta imita apostel Pablo, kende a bisa: “Nos ta sigur cu nos tin un bon consenshi, cu deseo pa comporta nos mes den tur cos na un manera honorabel [“honrado”, NW].” (Hebreonan 13:18; 1 Corintionan 11:1) Nan ta compronde cu e conducta ei ta duna gloria na Yehova Dios, ya cu Hesus a bisa: “Laga boso lus briya dilanti di hende di tal manera cu nan por mira boso bon obranan y glorifica boso Tata cu ta den shelo.”—Mateo 5:16.