Consuelo pa Hende Afligi

ORA homber- y mohenan fiel di pasado tawata pasa den nan afliccionnan, nan tawata haci oracion intenso pa Dios guia nan. Pero tambe nan a dal e pasonan necesario pa alivia nan afliccion, entre otro, door di uza maneranan ingenioso pa scapa di nan opresornan. Por ehempel, confiansa den Yehova combina cu esfuerso personal a permiti David wanta su dificultadnan. Kico di nos awe?

Ora bo ta pasando den un afliccion, probablemente bo ta dal cierto paso pa resolve bo problema. Por ehempel, si bo perde trabou, lo bo no haci esfuerso pa bo haya un trabou adecua cu por sostene abo y bo famia? (1 Timoteo 5:8) Of si bo ta sufri di un enfermedad, lo bo no busca un bon docter? Ta interesante pa nota cu Hesus mes, kende tawatin e poder di Dios pa cura tur sorto di enfermedad, a reconoce cu ‘esnan cu ta malo tin mester di docter.’ (Mateo 9:12) Pero kisas no ta semper bo ta logra sali for di circunstancianan desfaborabel; podise, te na cierto grado, lo bo tin cu keda soporta nan.

Pakico no menciona e asunto den oracion na Yehova Dios? Por ehempel, ora bo ta busca trabou, confiansa den Dios hunto cu oracion lo yuda nos resisti cualkier tentacion pa acepta un trabou cu ta na conflicto cu principionan di Bijbel. Tambe nos lo evita di laga golosidad of amor pa placa “desvia [nos] for di e fe.” (1 Timoteo 6:10) En berdad, ora nos tin cu tuma decisionnan importante relaciona cu trabou, famia of problema di salu, nos por sigui e animacion di David: “Tira bo carga riba SEÑOR, y e lo sostene bo; nunca e lo no permiti pa e husto wordo movi.”—Salmo 55:22.

Ademas, oracion sinsero lo yuda nos mantene nos ekilibrio mental; e ora ei nos afliccion lo no caba cu nos. Como un cristian berdadero, apostel Pablo a skirbi: “Den tur cos, pa medio di oracion y suplica cu gradicimento, laga boso peticionnan ta conoci dilanti di Dios.” Den ki manera oracion sinsero por consola nos? “E pas di Dios, cu ta surpasa tur comprondemento, lo warda boso curason  y boso mente den Cristo Hesus.” (Filipensenan 4:6, 7) E pas di Dios “ta surpasa tur comprondemento.” Pesei, e por stabilisa nos ora nos ta sinti nos angustia. Lo e ‘warda nos curason y nos mente’, yudando nos asina pa evita di reacciona na un manera descabeya y imprudente, net loke por haci nos afliccion piyo.

Oracion por asta haci un diferencia den con un situacion ta desaroya. Ora apostel Pablo a wordo encarsela na Roma, humildemente el a pidi su rumannan cristian haci oracion p’e. Pakico Pablo a haci e peticion aki? El a skirbi nan: “Mi ta roga boso mas ainda pa haci esaki, pa mi por wordo debolbe na boso mas lihe.” (Hebreonan 13:19) Cu otro palabra, Pablo tawata sa cu e echo cu Yehova lo a tende e oracionnan persistente di su rumannan den fe lo por a haci un diferencia pa loke ta e tempo di su liberacion.—Filemon 22.

Oracion por cambia e rumbo di nos afliccion? Si, pero toch nos mester realisa cu kisas Yehova Dios no ta contesta nos oracionnan den e manera cu nos lo a prefera. Pablo a haci oracion varios biaha tocante su “sumpiña den carni”, talbes un problema fisico. Pero en bes di kita e afliccion, Dios a bisa Pablo: “Mi gracia ta basta pa bo, pasobra mi poder ta wordo haci perfecto den debilidad.”—2 Corintionan 12:7-9.

Pues, anto, kisas un situacion cu ta causa nos verdriet no ta kita mesora. Sinembargo, nos lo haya e oportunidad pa demostra nos confiansa den nos Tata celestial. (Santiago 1:2-4) Y nos por ta sigur cu ni maske Yehova Dios no elimina e afliccion, e por ‘provee salida pa nos por soporta.’ (1 Corintionan 10:13) Ta bon pa remarca cu Yehova ta ser yama e “Dios di tur consuelo, kende ta consola nos den tur nos afliccion.” (2 Corintionan 1:3, 4) Dios por duna nos loke nos mester pa nos por wanta, y nos tin e speransa di bida eterno.

Bijbel, e Palabra di Dios, ta priminti cu Yehova “lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor.” (Revelacion 21:3, 4) Un mundo sin afliccion ta zona casi increibel pa bo? Kisas si, specialmente si bo a custumbra biba cu situacionnan desfaborabel. Toch, libertad for di miedo y calamidad ta net loke Dios a priminti, y su proposito lo cumpli sin falta.—Isaias 55:10, 11.

[Plachi na pagina 9]

Di desesperacion pa alivio