Keda Moralmente Puro door di Proteha Bo Curason

“Warda bo curason riba tur cos, pasobra e ta e fuente di bida.” —PROVERBIONAN 4:23.

1-3. (a) Con hende ta mustra hopi bes cu nan no ta balora nan puresa moral? Ilustra. (b) Pakico ta importante pa analisa e balor di puresa moral?

KISAS e cuadra tawata mustra bieu. Podise e no tawata pas cu resto di cosnan den e cas. Sea loke sea, aparentemente e doño no tawatin mucho interes den dje. E cuadra a bin resulta na un mercado di purga pa e prijs di 29 dollar. Sinembargo, un par di aña despues, su doño nobo a descubri cu e tawata bal casi un miyon dollar! Si, a resulta cu e cuadra ta un obra maestra extraordinario. Imagina bo con e doño anterior, cu a balota e tesoro aki, lo mester a sinti su mes!

² Hopi bes algo similar ta sosode cu e limpiesa of puresa moral di un persona. Awendia, masha poco hende ta duna balor na nan puresa moral. Algun ta mir’e como algo chapo cu no ta pas den e bida moderno aki. Pues, nan ta dispuesto di perd’e a cambio di un recompensa chikito. Algun ta intercambia nan puresa moral pa un ratico di placer sexual. Otronan ta sacrific’e cu e speransa di haya un miho posicion den bista di nan pareunan of di un persona di e otro sexo.—Proverbionan 13:20.

³ Hopi hende ta descubri demasiado laat ki balioso nan puresa moral realmente tawata. Mayoria biaha e consecuencianan ta masha lamentabel. Manera Bijbel ta bisa, e efectonan despues di inmoralidad por ta manera veneno, “marga manera absintio.” (Proverbionan 5:3, 4) En bista di e ambiente moralmente corumpi awe, con bo por balora y mantene bo puresa moral? Nos lo enfoca riba tres paso relaciona cu otro.

Proteha Bo Curason

4. Kico ta nos curason figurativo, y pakico nos tin cu proteh’e?

⁴ Pa bo keda moralmente puro bo tin cu proteha bo curason. Bijbel ta bisa: “Warda bo curason riba tur cos, pasobra e ta e fuente di bida.” (Proverbionan 4:23) Ta na cua “curason” Bijbel ta referi akinan? No ta e organo literal. Ta trata aki di bo curason figurativo. E ta referi na loke bo ta di paden, incluso bo pensamento-, sintimento- y motivacionnan. Bijbel ta bisa: “Stima SEÑOR bo Dios cu henter bo curason, cu henter bo alma y cu tur bo forsa.” (Deuteronomio 6:5) Hesus a referi na e mandamento aki como esun di mas importante. (Marco 12:29, 30) Ta bisto anto cu nos curason tin un balor enorme. Ta bale la pena pa nos proteh’e.

5. Con nos curason por ta algo balioso, y alabes peligroso?

⁵ Sinembargo, Bijbel ta bisa tambe cu “e curason ta mas engañoso cu tur cos y ta totalmente corupto.” (Yeremias 17:9) Con nos curason por bira engañoso—un peliger pa nos? Wel, tuma por ehempel un auto. E ta un obheto balioso cu asta por yuda bo salba bida di un hende den un caso di emergencia. Pero si como conductor bo no por controla e auto, y  si bo no maneh’e bon, e mesun auto ei por bira facilmente un arma mortal. Mescos tambe, si bo no proteha bo curason, lo bo bira esclabo di bo deseo- y impulsonan interno, y e consecuencianan lo por ta fatal. E Palabra di Dios ta bisa: “Esun cu confia den su mes curason ta un bobo, ma esun cu cana cu sabiduria lo wordo libra.” (Proverbionan 28:26) En berdad, si bo uza e Palabra di Dios pa e guia bo, mescos cu lo bo consulta un mapa di caminda prome cu bo cuminsa un biahe, bo por cana cu sabiduria y evita desaster.—Salmo 119:105.

6, 7. (a) Kico ta santidad, y pakico e ta importante pa Yehova su sirbidonan? (b) Con nos por sa cu hende imperfecto por refleha e santidad di Yehova?

⁶ Di naturalesa nos curason no ta inclina na puresa moral. Ta nos tin cu gui’e den e direccion ei. Un manera pa haci esei ta door di medita riba e berdadero balor di puresa moral. E cualidad aki ta estrechamente liga cu santidad, cu ta nifica limpiesa, separacion for di loke ta pecaminoso. Santidad ta un cualidad precioso cu ta un caracteristica fundamental di Yehova Dios. Centenares di pasashi di Bijbel ta asocia e cualidad ei cu Yehova. De echo, Bijbel ta bisa cu “santidad ta pertenece na Yehova.” (Exodo 28:36, NW) Pero kico e cualidad supremo ei tin di aber cu hende imperfecto manera nos?

⁷ Yehova ta bisa nos den su Palabra: “Boso lo ta santo, pasobra ami ta santo.” (1 Pedro 1:16) Si, nos por imita e santidad di Yehova; nos por ta limpi den su bista y keda moralmente puro. Pues ora nos keda leu for di actonan impuro y sushi, nos ta haciendo esfuerso pa alcansa un privilegio halto y emocionante—e privilegio di refleha un bunita caracteristica di e Dios Haltisimo! (Efesionan 5:1) Nos no mester asumi cu esei ta fuera di nos alcanse, pasobra Yehova ta un Doño sabi y rasonabel cu nunca ta exigi mas di nos di loke nos por haci. (Salmo 103:13, 14; Santiago 3:17) Ta berdad cu nos tin cu haci esfuerso pa keda spiritualmente y moralmente puro. Pero apostel Pablo a papia di e “debocion sinsero y puro pa cu Cristo.” (2 Corintionan 11:3, Beibel na papiamentu koriente) Cristo y su Tata no merece pa nos haci tur esfuerso pa keda moralmente puro? Al fin y al cabo, nan a mustra asina tanto amor na nos cu nos no por ni cuminsa paga bek. (Huan 3:16; 15:13) Nos tin e privilegio di por expresa nos gratitud door di hiba un bida moralmente limpi. Door di pensa riba nos puresa moral di e forma aki, nos lo balor’e y proteha nos curason.

8. (a) Con nos por nutri nos curason figurativo? (b) Kico nos combersacion por revela tocante nos?

⁸ Tambe nos ta proteha nos curason door di e manera cu nos ta alimenta nos mes. Nos tin cu nutri nos mente y curason regularmente cu bon alimento spiritual, manteniendo nos enfoke riba e bon nobo di e Reino di Dios. (Colosensenan 3:2) Asta nos combersacion mester refleha un enfoke asina. Si nos tin e fama di ta gusta papia di cosnan carnal y inmoral, nos ta revelando algo tocante e condicion di nos curason. (Lucas 6:45) Mas bien, laga nos tin e fama di ta papia tocante cosnan spiritual y edificante. (Efesionan 5:3) Pa proteha nos curason, tin peligernan serio cu  nos tin cu evita. Laga nos analisa dos di esakinan.

Hui di Inmoralidad

9-11. (a) Pakico esnan cu ta ignora e conseho di 1 Corintionan 6:18 tin mas chens di haya nan meti den inmoralidad serio? Ilustra. (b) Si nos ta huyendo di inmoralidad, kico nos ta evita? (c) Ki ehempel sobresaliente fiel Job a pone pa nos?

⁹ Yehova a inspira apostel Pablo pa skirbi algun conseho cu a yuda hopi persona proteha nan curason y mantene nan puresa moral. Pablo a bisa: “Hui for di inmoralidad.” (1 Corintionan 6:18) Ripara cu el a bai mas leu cu djis bisa “evita inmoralidad.” Cristiannan mester haci mas. Nan mester hui for di actonan inmoral, mescos cu nan lo hui for di un situacion cu ta pone nan bida na peliger. Si nos ignora e conseho ei, nos tin mas chens di cai den inmoralidad serio y perde e aprobacion di Dios.

¹⁰ Laga nos ilustra esaki: Un mama ta baña su yiu homber chikito y bistie pa un ocasion importante. E mucha ta puntr’e si e por hunga pafo prome cu e famia sali, y e mama ta permitie bou di e condicion cu e no ta bai hunga banda di un plas di awa cu lodo cu tin pafo. E ta bis’e: “Si bo susha bo paña na lodo, bo ta haya straf.” Pero, un par di minuut despues e ta mira e mucha tambaliando riba su tench’i pia net na rand di e plas di awa. Ainda e no a susha na lodo. Toch, e ta ignorando e mama su spiertamento pa no bai banda di e plas di awa, y e por conta cu su mama ta scual e. (Proverbionan 22:15) Hopi hoben y adulto cu mester sa miho ta comete e mesun fout. Con asina?

¹¹ Den e tempo aki cu asina tanto hende a entrega nan “na pasionnan bergonsoso”, a lanta henter un industria pa bende informacion riba tereno di relacion sexual ilicito. (Romanonan 1:26, 27) E plaga di pornografia a plama den revista, buki, video y riba Internet. E personanan cu ta scohe pa graba e imagennan ei den nan mente sigur no ta huyendo di inmoralidad. Nan ta hungando cu ne, na moda di papia tambaliando na rand di dje, desobedeciendo e spiertamento di Bijbel. En bes di proteha nan curason, nan ta venenand’e cu imagennan bibo cu lo por tuma hopi aña pa disparce for di nan memoria. (Proverbionan 6:27) Laga nos siña for di fiel Job, kende a sera un pacto—un combenio formal—cu su wowonan, pa no expone nan na loke solamente por a pon’e cai den tentacion pa haci malo. (Job 31:1) Esei sigur ta un ehempel cu nos por sigui!

12. Con parehanan cristian por “hui for di inmoralidad” durante enamoracion?

¹² Ta masha importante pa “hui for di inmoralidad” durante enamoracion. E periodo  ei mester ta un tempo di goso, yen di speransa y anticipacion, pero algun pareha hoben ta dañ’e door di hunga cu inmoralidad. Door di esei nan ta priva otro di e miho fundeshi pa un bon matrimonio, esta, un relacion basa riba amor sin egoismo, dominio propio y obediencia na Yehova Dios. Un pareha cristian a haya nan envolvi den conducta inmoral durante nan enamoracion. Despues cu nan a casa, e esposa a admiti cu su consenshi a torment’e y a asta ruina su goso di e dia di boda. El a confesa: “Mi a pidi Yehova pordon hopi biaha, pero aunke shete aña a pasa caba, ainda mi consenshi ta molestia mi.” Ta importante pa esnan cu comete e tipo di picanan ei busca yudansa di ancianonan cristian. (Santiago 5:14, 15) Sinembargo, hopi pareha cristian ta actua sabi y ta evita e peligernan aki durante enamoracion. (Proverbionan 22:3) Nan ta limita nan expresionnan di cariño. Nan ta sali cu chaperon y ta tene masha cuidou pa nan no ta nan so na luganan isola.

13. Pakico un cristian no mester enamora un persona cu no ta sirbi Yehova?

¹³ Un cristian cu ta cuminsa enamora un persona cu no ta sirbi Yehova tin hopi chens di haya su mes cu problemanan serio. Por ehempel, con bo por cuminsa un relacion cu un persona cu no ta stima Yehova Dios? Ta vital pa cristiannan uni nan mes solamente cu esnan cu ta stima Yehova y cu ta respeta su normanan di puresa moral. E Palabra di Dios ta bisa nos: “No uni boso mes den yugo desigual cu incredulonan, pasobra ki compañerismo husticia tin cu inhusticia, y ki comunion lus tin cu scuridad?”—2 Corintionan 6:14.

14, 15. (a) Ki punto di bista robes algun hende tin relaciona cu e nificacion di “inmoralidad”? (b) Ki tipo di actonan ta cai bou di “inmoralidad”, y con cristiannan por “hui for di inmoralidad”?

¹⁴ Conocemento tambe ta esencial. Nos no por echt hui for di inmoralidad si nos no sa realmente kico e ta. Algun hende den e mundo djawe a adopta un idea incorecto encuanto e nificacion di “inmoralidad.” Nan ta imagina nan cu nan por satisface nan impulsonan sexual sin casa basta nan no tene relacion sexual. Asta algun instituto respeta di salubridad cu ta boga pa reduci e cantidad di embaraso hubenil indeseabel a anima hobennan pa practica actonan sexual cu ta desvia for di loke ta normal pa nan no sali na estado. Lamentablemente e consehonan ei ta basa riba un guia robes. Evita embaraso pafo di matrimonio no ta mescos cu mantene puresa moral, y e berdadero definicion di “inmoralidad” no ta asina limita.

¹⁵ E palabra Griego por·neí·a, traduci como fornicacion of “inmoralidad”, tin un nificacion hopi amplio. E tin di aber cu relacion sexual entre personanan cu no ta casa di otro y ta enfoca riba e uzo incorecto di e organonan sexual. Por·neí·a ta encera actonan manera sex oral, sex anal y masturbacion di un otro persona—cosnan cu por lo general sa tuma luga den un cas di prostitucion. Hende cu ta kere cu e actonan ei no ta cai bou di “inmoralidad” ta gañando nan mes y a bira victima di un di e trampanan di Satanas. (2 Timoteo 2:26) Ademas, mantene puresa moral ta nifica mas cu  simplemente abstene di cualkier acto inmoral. Pa “hui for di inmoralidad”, nos tin cu evita tur forma di impuresa sexual y libertinahe cu lo por pone nos cai den e pica serio di por·neí·a. (Efesionan 4:19) Den e manera ei nos ta keda moralmente puro.

Evita e Peligernan di Flirtmento

16. Den ki circunstancia ta apropiado pa mustra amor romantico, y cua ehempel biblico ta ilustra esaki?

¹⁶ Si nos kier keda moralmente puro, un otro peliger cu nos tin cu tene cuidou cu ne ta flirtmento. Kisas algun hende ta insisti cu flirtmento ta algo inocente, dibirticion inofensivo entre miembronan di e sexo opuesto. Claro cu no tin nada malo pa un dado momento mustra amor romantico. Por ehempel, nan a mira Isaak “caricia” Rebeca, y tawata bisto pa esnan cu a wak cu nan no tawata ruman di otro. (Genesis 26:7-9) Sinembargo, nan tawata casa di otro. Pesei, expresion di cariño entre nan dos tawata na su luga. Flirtmento ta un otro asunto.

17. Kico ta flirtmento, y con e problema aki por ser controla?

¹⁷ Nos por defini flirtmento como lo siguiente: duna impresion di tin interes romantico den un persona sin berdadero intencion di casa cu ne. Hende ta un criatura complica, pues sin duda tin hopi manera cu e por flirt. Algun di nan ta masha sutil. (Proverbionan 30:18, 19) Pues, reglanan rigido realmente no ta e solucion. Mas bien, algo mas importante cu regla ta necesario: un autoanalisis honesto y aplicacion conciente di principionan biblico.

18. Kico ta impulsa algun hende pa flirt, y pakico flirtmento ta perhudicial?

¹⁸ Si nos ta honesto cu nos mes, probablemente mayoria di nos lo tin cu admiti cu ora nos sinti cu un persona di e otro sexo tin un interes romantico den nos, nos ta sinti nos gosa. Esei ta natural. Pero nos ta flirt pa lanta e interes ei—djis pa lanta nos ego of pa causa un reaccion asina den un otro persona? Si ta asina, nos a pensa riba e dolor cu nos por ta causando un otro hende? Por ehempel, Proverbionan 13:12 ta bisa: “Speransa pospone ta haci e curason sinti malo.” Si nos ta flirt deliberadamente cu un persona, probablemente nos no sa mes con esei ta afecta e persona ei. Kisas e ta crea speransa di cuminsa un enamoracion y asta casa despues. E decepcion cu e persona ei ta haya despues por ta devastador. (Proverbionan 18:14) Hunga cu sintimento di otro hende intencionalmente ta cruel.

19. Con flirtmento por pone matrimonionan cristian na peliger?

¹⁹ Ta particularmente importante pa tene cuidou cu flirtmento ora ta trata di hende casa. Ta masha malo pa mustra interes romantico den un persona casa, of pa un persona casa mustra e interes ei den un persona cu no ta su casa. Ta tristo pa bisa, pero algun cristian tawatin e pensamento ekiboca cu no tin nada malo pa un ruman cristian crea sintimento romantico pa un persona di e otro sexo cu no ta su casa. Algun ta revela nan precupacionnan di mas intimo na un “amigo” asina, asta confiand’e cosnan priva cu nan no ta papia ni cu nan casa. Door di esei e sintimentonan romantico entre e dos personanan aki ta bira mas fuerte, y esun ta bai pega emocionalmente na e otro, locual por debilita y asta caba cu un matrimonio. Cristiannan casa ta haci bon di corda Hesus su spiertamento sabi tocante adulterio: tur cos ta cuminsa den nos curason. (Mateo 5:28) Pesei, laga nos proteha nos curason  y evita situacionnan cu por hiba na resultadonan desastroso asina.

20. Con nos mester ta determina pa mira nos puresa moral?

²⁰ Ta berdad cu no ta facil pa keda decente den e mundo inmoral djawe. Pero corda cu ta mucho mas facil pa bo keda cu bo puresa moral cu pa bo hay’e bek unabes bo a perd’e. Claro cu Yehova por “pordona abundantemente” y ta capas pa purifica esnan cu ta berdaderamente repenti di nan picanan. (Isaias 55:7) Sinembargo, Yehova no ta proteha esnan cu ta comete inmoralidad di e consecuencianan di nan accionnan. E efectonan cu ta bin despues por dura pa hopi aña, asta pa e resto di nan bida. (2 Samuel 12:9-12) Haci tur bo posibel pa bo keda moralmente puro door di proteha bo curason. Mira bo posicion limpi y puro dilanti Yehova Dios como un tesoro precioso—y no perd’e nunca!

Con Lo Bo Contesta?

• Kico ta puresa moral, y pakico e ta asina importante?

• Con nos por proteha nos curason?

• Kico hui for di inmoralidad ta encera?

• Dicon nos mester evita flirtmento?

[Preguntanan di Estudio]

[Plachi na pagina 11]

Un auto cu no ta ser bon maneha por bira peligroso

[Plachi na pagina 12]

Kico por sosode si nos ignora spiertamento?

[Plachi na pagina 13]

Un enamoracion limpi ta algo gososo y ta honra Dios