“Lucha e Bon Lucha di Fe”

BO POR imagina bo cu un solda den tempo di guera ta keda malcontento pasobra nan a mand’e bai cas pa e pasa un tempo cu su casa y yiunan?

Un solda den e tempo di Rei David di Israel a ricibi un instruccion asina. Tawata Urias e Heteo kende a haya e ordo ei di Rei cu a anim’e pa bai cas. Pero Urias a nenga di bai cas. Ora a puntr’e pakico e ta actua straño asina, el a contesta cu e arca di pacto, cu ta representa e presencia di Dios, y e ehersito Israelita tawata riba campo di bataya. Anto el a puntra: “Ami mester bai mi cas pa come y bebe, y pa drumi cu mi esposa?” Pa Urias, esaki tawata impensabel na un momento asina critico.—2 Samuel 11:8-11.

E reaccion di Urias ta lanta preguntanan importante, pasobra nos tambe ta biba den tempo di guera. Actualmente tin un guera hopi diferente for di tur e gueranan cu e nacionnan a yega di bringa. E dos gueranan mundial ta nada na comparacion, y abo tambe ta envolvi den e guera aki. E riesgonan ta grandi, y e enemigo ta spantoso. Den e guera aki no tin uzamento di scopet ni tiramento di bom. Loke si ta necesario ta tactica di guera.

Prome cu bo bringa den e guera aki, bo mester sa kico bo ta  bringa p’e y tambe si e guera ta moralmente husto. E bataya ta bal e sacrificio? Den un carta cu apostel Pablo a skirbi Timoteo, el a mustra kico ta e proposito di e lucha unico aki: “Lucha e bon lucha di fe.” Si, den e guera aki bo tin cu defende, no un baluarte, sino e “fe”, esta, henter e berdad cristian manera Bijbel ta revel’e. Claramente, bo tin cu kere tur loke e “fe” aki ta encera pa bo por lucha p’e y gana.—1 Timoteo 6:12.

Un guerero prudente ta haci esfuerso pa sa ken ta su enemigo. Den e lucha aki, e enemigo tin hopi aña di experencia den strategia di guera, y e ta dispone di hopi recurso y arma di guera. Tambe e ta sobrehumano. E ta malicioso, violento y sin escrupulo; ta trata aki di Satanas. (1 Pedro 5:8) Armanan literal y tambe astucia y triki humano ta inutil contra e adversario aki. (2 Corintionan 10:4) Kico bo por uza pa bringa e guera aki?

Nos arma principal ta “e spada di e spirito, cual ta e Palabra di Dios.” (Efesionan 6:17) Apostel Pablo ta mustra con eficas e ta: “E palabra di Dios ta bibo y activo y mas skerpi cu cualkier spada di dos filo, y ta penetra te na e division di alma y spirito, y di scarnir y tuti, y ta capas pa husga e pensamentonan y intencionnan di curason.” (Hebreonan 4:12) Un arma asina skerpi, asina exacto, cu por penetra te den e pensamento- y motivacionnan interno di un persona sigur merece pa nos uz’e bon y cu hopi cuidou.

Probablemente bo sa cu un ehersito por tin e armanan di mas sofistica, pero si e soldanan no sa con pa uza nan bon, ta tanto bal. Abo tambe tin mester di instruccion pa sa con pa uza bo spada na un manera eficas. Afortunadamente, e soldanan di mas versa por train bo. Hesus a yama e grupo di solda y maestro aki un “esclabo fiel y prudente”, encarga cu e responsabilidad di percura alimento spiritual, of instruccion, na su debido tempo pa su siguidonan. (Mateo 24:45) Bo por reconoce e esclabo aki door di analisa e siñansanan y spiertamentonan oportuno cu e ta duna cu hopi empeño tocante tacticanan enemigo. Echonan ta mustra cu e clase di esclabo aki ta consisti di miembronan ungi cu spirito di e congregacion cristian di Testigonan di Yehova.—Revelacion 14:1.

No ta instruccion so e esclabo colectivo aki ta duna. El a demostra e spirito di apostel Pablo, kende a skirbi na e congregacion na Tesalonica: “Nos tawata cariñoso meimei di boso, manera un menchi ta cuida su mes yiunan cu ternura. Teniendo pues un amor grandi pa boso, a agrada nos pa no solamente comparti e evangelio di Dios cu boso, ma tambe nos mes bida, pasobra boso a bira masha stima pa nos.” (1 Tesalonicensenan 2:7, 8) Ta keda na cada solda cristian pa haci bon uzo di e entrenamento amoroso cu nan ta ricibi.

E Armadura Completo

Un armadura simbolico completo ta disponibel pa bo proteccion. Bo por haya un idea di kico e armadura aki ta consisti na Efesionan 6:13-18. Un solda cauteloso lo no risca bai guera si e falta un parti di su armadura spiritual of si e ta kibra.

Un cristian tin mester di henter su armadura di proteccion, pero e escudo grandi di fe ta particularmente balioso. Pesei Pablo a skirbi: “Riba tur cos, [tuma] e escudo di fe, cu cua boso lo por paga tur e flechanan sendi di e malbado.”—Efesionan 6:16.

E escudo grandi, cu por cubri henter e curpa, ta representa e cualidad di fe. Bo mester tin fe fuerte den e guia di Yehova y acepta sin e menor duda cu tur su promesanan lo ser realisa. Bo mester sinti como si fuera e  promesanan ei a cumpli caba. No duda ni un momento so cu henter e sistema mundial di Satanas lo wordo destrui pronto, cu tera lo ser transforma den un paradijs, y cu hende leal na Dios lo bira perfecto atrobe.—Isaias 33:24; 35:1, 2; Revelacion 19:17-21.

Sinembargo, den e lucha extraordinario di actualidad, bo mester di algo mas: un amigo. Den tempo di guera, lasonan estrecho di amistad ta forma segun cu e soldanan ta duna otro animacion y proteccion, tin biaha asta salbando otro for di morto. Aunke nos ta balora nos compañeronan hopi, pa sobrevivi den e lucha aki, nos mester di e amistad di Yehova mes. Pesei Pablo a conclui su lista di loke ta forma e armadura cu e palabranan: “Cu tur oracion y suplica pidi tur ora bai den spirito.”—Efesionan 6:18.

Nos ta keda encanta pa ta hunto cu un bon amigo. Nos ta busca su compania. Mescos tambe, door di papia regularmente cu Yehova den oracion, e ta bira real pa nos, un amigo di confiansa. Disipel Santiago ta anima nos: “Hala serca Dios y e lo hala serca boso.”—Santiago 4:8.

Tacticanan Enemigo

Tin biaha bo lucha den e mundo aki ta manera ora bo ta cana riba un tereno yen di mina. Un atake por bin for di cualkier direccion, y e enemigo ta purba gara bo completamente for di base. Pero bo por ta sigur cu Yehova a suministra tur e proteccion cu bo tin mester.—1 Corintionan 10:13.

Kisas e enemigo por consentra tur su esfuersonan pa ataca berdadnan di Bijbel cu ta fundamental pa bo fe. Apostatanan por labia bo, uza palabra dushi y rasonamento troci pa purba derota bo. Pero e apostata no tin bo bienestar na pecho. Proverbionan 11:9 ta bisa: “Un hipocrita [“apostata”, NW] ta destrui su prohimo cu su boca, ma pa medio di sabiduria e husto lo wordo libra.”

Lo ta un ekibocacion pa pensa cu bo tin cu scucha apostatanan of lesa loke nan ta skirbi pa refuta nan argumentonan. Nan rasonamento troci y venenoso por perhudica bo spiritualmente y contamina bo fe mescos cu gangrena cu ta plama rapidamente. (2 Timoteo 2:16, 17) Mas bien, imita Dios su reaccion na e apostatanan. Job a bisa di Yehova: “Un hende sin Dios [of, un apostata] no mag bini den su presencia.”—Job 13:16.

Kisas e enemigo ta purba un otro tactica, uno cu e tawatin cierto exito cu ne. Ora soldanan cu ta den estado di alerta ser tenta pa sali for di nan formacion militar pa bai busca placer inmoral, esaki por hiba na caos.

E enemigo ta atrae hende cu entretenimento mundano, manera pelicula y programanan inmoral na television, y musica fo’i sla. Algun hende ta pretende cu nan por wak esenanan inmoral of lesa literatura inmoral sin wordo afecta. Pero un persona cu tawata wak pelicula cu contenido sexual fuerte a admiti francamente: “Hamas bo ta lubida e esenanan ei. Y mas bo pensa riba nan, mas gana bo  ta haya di haci loke bo a mira . . . E pelicula ta pone bo pensa cu bo a perde algo.” Ta bale la pena core e riesgo di wordo herida door di e atake sutil aki?

Un otro misil den e arsenal di arma di e enemigo ta e trampa di materialismo. E peliger por ta dificil pa discerni pasobra nos tur tin necesidad material. Nos mester di cuminda, paña y un dak riba nos cabes; y no tin nada malo tampoco den e echo cu nos tin algo bunita. E peliger ta sinta den con nos ta mira cosnan. Placa por bira mas importante cu cos spiritual. Nos por bira amante di placa. Ta bon pa corda cu rikesa material tin su limitenan. E ta pasahero; en cambio, rikesa spiritual ta dura pa semper.—Mateo 6:19, 20.

Si e moral di un ehersito ta abou, e chensnan di victoria ta mengua. “Si bo desmaya den e dia di angustia, bo forsa ta keda limita.” (Proverbionan 24:10) Desanimacion ta un arma cu Satanas a uza den un forma hopi eficas. Ora bo tin “como helm e speransa di salbacion” bisti, esei lo yuda bo combati desanimacion. (1 Tesalonicensenan 5:8) Purba tene bo speransa mes fuerte cu esun di Abraham. Ora Dios a pidie ofrece su unico yiu, Isaak, como sacrificio, Abraham no a duda. E tawata combenci cu Dios lo a cumpli cu Su promesa di bendiciona tur nacion pa medio di su desendencia y cu, si tawata necesario, Dios por a lanta Isaak for di morto pa cumpli cu e promesa ei.—Hebreonan 11:17-19.

No Entrega den e Lucha

Algun persona cu a lucha balentemente pa hopi tempo lo por ta cansando y pesei no ta luchando cu e mesun cautela. E ehempel di Urias, menciona den e introduccion di e articulo aki, por yuda tur cristian cu ta envolvi den e lucha pa mantene e perspectiva corecto. Hopi di nos compañeronan di lucha ta biba sin cierto necesidadnan basico di bida, ta ser exponi na peliger, of ta sufri di hamber y friu. Mescos cu Urias, nos no kier pensa mes riba tur e comodidadnan cu nos lo por disfruta di dje awor of cede na e deseo pa hiba un bida facil. Nos kier keda hunto cu Yehova su ehersito global di luchadonan leal y sigui lucha te ora nos por disfruta di e bendicionnan maraviyoso cu ta warda nos.—Hebreonan 10:32-34.

Lo ta peligroso pa baha nos vigilancia, podise pensando cu e atake final ta leu den futuro ainda. E ehempel di Rei David ta resalta e peliger. Pa un motibo of otro e no tawata cu su trupanan den bataya. Como resultado, David a comete pica serio cu a caus’e angustia y sufrimento pa e resto di su bida.—2 Samuel 12:10-14.

 Ta bale la pena hiba e lucha aki, enfrenta e contratiemponan di bataya, wanta mofa y keda leu for di e placernan cuestionabel di e mundo aki? Esnan cu ta hibando e lucha cu exito ta di acuerdo cu loke e mundo tin di ofrece por parce atractivo, manera glitter cu ta briya, pero cu mira mas djacerca tin masha poco balor. (Filipensenan 3:8) Ademas, hopi bes e placernan ei ta resulta den dolor y decepcion.

E cristian den e lucha spiritual aki ta disfruta di un compañerismo estrecho cu berdadero amigo, un consenshi limpi y un speransa maraviyoso. Cristiannan ungi cu spirito tin e speransa di haya bida inmortal den shelo hunto cu Cristo Hesus. (1 Corintionan 15:54) Mayoria luchado cristian ta spera di haya bida humano perfecto den un paradijs aki riba tera. E premionan ei sigur ta bal cualkier sacrificio. Y distinto di gueranan mundial, tanten cu nos keda fiel, e resultado pa nos den e bataya aki ta garantisa. (Hebreonan 11:1) Ma e resultado pa e sistema aki bou di control di Satanas si ta destruccion total.—2 Pedro 3:10.

Segun cu bo ta hiba e lucha aki, corda e palabranan di Hesus: “Tene curashi, mi a vence mundo.” (Huan 16:33) El a vence door di keda vigila y warda su integridad bou di prueba. Nos tambe por.

[Comentario na pagina 27]

No tin uzamento di scopet ni tiramento di bom. Loke si ta necesario ta tactica di guera

[Comentario na pagina 30]

Tanten cu nos keda fiel, e resultado pa nos den e bataya aki ta garantisa

[Plachi na pagina 26]

E helm di salbacion lo yuda nos combati desanimacion

Uza e escudo grandi di fe pa desvia e “flechanan sendi” di Satanas

[Plachi na pagina 28]

“Hala serca Dios y e lo hala serca boso”

[Plachi na pagina 29]

Nos mester tin fe cu e promesanan di Dios lo cumpli