Pakico Testigonan di Yehova Ta Yama Cada Bes na Bo Cas?

ROND mundo e persistencia di Testigonan di Yehova den nan trabou di cas pa cas ta bon conoci. Algun hende ta puntra nan mes pakico e Testigonan ta yama cada bes na nan cas, specialmente si anteriormente nan no a mustra mucho interes den e mensahe di e Testigonan. Dos carta di Rusia ta yuda splica e motibo.

Masha, un mucha mohe di 19 aña na Khabarovsk, a admiti: “Pa ta franco, den pasado mi tawata purba tur manera pa evita Testigonan di Yehova.” Ma despues cu el a lesa algun di e revistanan cu e Testigonan ta publica, el a cambia su actitud. Masha a skirbi: “E revistanan ta masha interesante y informativo, pero mas importante ainda, nan ta laga bo mira mundo for di un otro punto di bista. Pocopoco mi a cuminsa compronde cu bida tin un proposito.”

For di e stad di Ussuriysk, mas o menos 80 kilometer panort di Vladivostok, Svetlana a skirbi: “Resientemente, mi a cuminsa lesa E Toren di Vigilancia y Spierta! Nos tin hopi mester di e revistanan aki den nos tempo. Mi ta gusta tur e articulonan. Nan ta hopi interesante, informativo y instructivo. Danki! Masha masha danki pa boso presencia den e mundo aki y pa e trabou asina bon y asina esencial cu boso ta haciendo.”

Rond mundo Testigonan di Yehova ta pensa seriamente riba apostel Pablo su pregunta: “Con nan [esta, hende] lo tende sin un predicado?” (Romanonan 10:14) Pakico no tuma un par di minuut pa scucha e Testigonan e siguiente biaha cu nan bati na bo porta? Abo tambe lo por beneficia di e mensahe di consuelo di Bijbel, e Palabra di Dios.