Pregunta di Lector

Despues di Dilubio, Noe a laga un paloma sali for di e arca. E paloma a bolbe bek cu “un blachi di oleifi.” Na unda e paloma a haya e blachi aki?

Bijbel ta conta nos cu “e awa tawata aumenta mas y mas riba tera, asina cu tur e seronan halto tur caminda bou di e shelonan a keda tapa.” (Genesis 7:19) Segun cu e awa a baha of mengua, un bes pa siman Noe tawata laga un paloma bula bai. El a haci esaki na tres ocasion. E di dos bes, e paloma a bolbe cu ‘un blachi di oleifi kita fresco asina den su pik. Asina Noe a haya sa cu e awa a mengua for di riba tera.’—Genesis 8:8-11.

Ta claro cu awor no tin ningun manera pa haya sa pa cuanto tempo un cierto parti di tera a keda bou di awa, pasobra no tin duda cu e Dilubio a cambia e structura di tera. Pero probablemente e awa a tapa mayoria area pa un periodo suficientemente largo cu hopi palo por a muri. Sinembargo, ta parce cu algun palo a retene nan vitalidad, anto esaki a yuda nan saca spruit ora e awa a baha.

The New Bible Dictionary ta bisa tocante e palo di oleifi: “Ora cu cort’e te na troncon, mata chikito nobo ta sali for di e raiz, anto e por saca te cu cinco mata chikito nobo. Palo di oleifi moribundo [casi morto] hopi bes ta saca spruit di e manera aki tambe.” The New Schaff-Herzog Encyclopedia of Religious Knowledge ta bisa cu ta “como si fuera cu e vitalidad di e palo di oleifi ta indestructibel.” Ningun hende awe ta na haltura di e detayenan, manera por ehempel cuanto e consentracion di salo of temperatura di e awa di e Dilubio tawata. Pues, nos no tin sigur ta ki efecto e awa tawatin riba e palonan di oleifi ni riba otro vegetacion.

Sinembargo, palo di oleifi di mondi no por biba den frialdad cu bo ta haya den e montañanan mas halto. Generalmente e ta crece den areanan cu ta keda bou di 1.000 meter, caminda e temperatura ta mas o menos 10 grado Celsius. E buki The Flood Reconsidered (Reconsideracion di e Dilubio), ta bisa: “Pues, Noe por a deduci for di e blachi fresco cu e awa den e vayenan mas abou tawata secando.” Ora Noe a laga e paloma bula bai un siman despues, e no a bolbe bek, indicando cu e mester a haya mas vegetacion y un posibel luga pa descansa.—Genesis 8:12.