Religion Ta e Raiz di e Problemanan di Humanidad?

“ORA no ta instiga religion ta instiga conflicto, e ta fungi como un droga cu ta doof consenshi di hende y ta yena mente di hende cu fantasianan cu ta pone nan hui for di realidad. . . . [E] ta pone hende bira intolerante, supersticioso, y yena cu odio y miedo.” E exmisionero metodista cu a skirbi e comentario ei a sigui bisa: “E acusacionnan ei ta berdad. Tin religion bon y malo.”—Start Your Own Religion.

Kisas algun hende ta bisa: ‘Eigenlijk e critica ei ta inhusto.’ Sinembargo, ken por nenga loke echonan di historia ta indica? Por lo general, religion—defini como “e sirbishi y adoracion rindi na Dios of algo sobrenatural”—tin un historia spantoso. Loke e mester haci ta ilumina nos y eherce un bon influencia riba nos. Pero hopi bes loke e ta haci ta crea conflicto, intolerancia y odio. Dicon e ta crea e problemanan aki?

Un Supuesto “Angel di Lus”

Segun Bijbel tin un contesta masha simpel mes. Presentando “su mes como un angel di  lus” Satanas e Diabel a gaña miyones di hende pa sigui su siñansanan en bes di esnan di Dios. (2 Corintionan 11:14) Apostel Huan a mustra cu Satanas su influencia ta asina extenso cu “henter mundo ta bou di control di e malbado.” (1 Huan 5:19) Huan tawata sa cu Satanas tawata “gaña henter mundo.”—Revelacion 12:9.

Ki consecuencianan esaki tawatin? Satanas a introduci sistemanan religioso cu ta aparenta di ta santo. Nan tin “aparencia di ta religioso”, pero e mal frutanan cu nan ta produci ta indica ken nan realmente ta. (2 Timoteo 3:5; Mateo 7:15-20) En bes di yuda soluciona e problemanan di humanidad, religion de echo ta bira parti di e problema.

No pensa mesora cu esei no ta asina of cu esei ta irasonabel. Corda, nos por papia di engaño ora e persona cu ta ser engaña no ta na haltura di esei. Apostel Pablo a duna un ehempel di esaki ora el a skirbi: “E cosnan cu e paganonan ta sacrifica, nan ta sacrifica na demoño y no na Dios.” (1 Corintionan 10:20) Probablemente e idea so cu nan tawata adora demoño lo a shock e hendenan ei. Nan a kere cu nan tawata adora un of otro bon dios of diosnan. Pero en realidad nan a wordo engaña door di “forsanan spiritual di maldad den e luganan celestial” cu ta sostene Satanas den su intento pa gaña humanidad.—Efesionan 6:12.

Laga nos wak por ehempel con Satanas a logra gaña hopi hende cu ta bisa cu nan ta cristian y cu a dicidi di ignora apostel Huan su spiertamento tocante e mal influencia di e demoñonan.—1 Corintionan 10:12.

Loke Hesus A Siña A Bin di Dios

Hesucristo a bisa: “Mi siñansa no ta di mi, ma di esun cu a manda mi.” (Huan 7:16) Si, loke el a siña a bin di e Dios Todopoderoso. Pues Hesus su siñansanan tawatin un efecto poderoso y iluminador riba esnan cu tawata scuch’e. E siñansanan aki no tawata ‘doof consenshi di hende of yena mente di hende cu fantasianan cu ta yuda nan hui for di realidad.’ Al contrario, Hesus su siñansanan ta libra hende di siñansanan religioso falso y di filosofianan humano produci door di un mundo cu pa motibo di e engaño di Diabel ta “tapa cu scuridad den nan comprondemento.”—Efesionan 4:18; Mateo 15:14; Huan 8:31, 32.

Por a identifica cristiannan berdadero, no pa e echo cu nan tawata simplemente declara nan debocion abiertamente, sino mediante nan fe cu a refleha e cualidadnan precioso cu e spirito santo di Dios a produci den nan. (Galationan 5:22, 23; Santiago 1:22; 2:26) E cualidad mas sobresaliente di nan tur ta e cualidad sublime di amor cu na mes momento ta loke ta identifica cristianismo berdadero.—Huan 13:34, 35.

Sinembargo, tuma nota di e siguiente punto importante: Ni Hesus ni su apostelnan no a spera cu e congregacion cristian lo keda manera e tawata ora el a wordo estableci. Nan tawata sa cu apostasia lo a desaroya y cu pa un tempo religion berdadero lo no tawata bisto.

Religion Berdadero Scondi pa un Tempo

Den un ilustracion tocante trigo y yerba shimaron, Hesus a predeci cu pa un tempo religion berdadero lo wordo tapa casi completamente. Lesa e relato pa bo mes na Mateo 13:24-30 y 36-43. Hesus a sembra un cunucu cu trigo, e “bon simiña”, cu ta representa su disipelnan fiel kende lo forma parti di e congregacion cristian original. El a spierta cu “un enemigo”, es decir, Satanas e Diabel, cu  tempo lo bin planta den e cunucu “yerba shimaron”, es decir, hende cu ta bisa cu nan ta siguido di Hesucristo pero cu eigenlijk ta rechasa su siñansanan.

No mucho tempo despues di e morto di e apostelnan di Hesus, personanan a aparece cu a resulta di ta “yerba shimaron”, cu a prefera siñansanan humano troci en bes di “e palabra di SEÑOR.” (Yeremias 8:8, 9; Echonan 20:29, 30) Como consecuencia, un cristianismo corumpi y falso a aparece riba escenario di mundo. E tawata domina pa loke Bijbel ta yama “e malbado”, es decir, un clase di clero corupto cu a envolve su mes profundamente den “tur e engaño di inikidad.” (2 Tesalonicensenan 2:6-10) Hesus a predeci cu e situacion aki lo cambia na “fin di mundo.” E cristiannan semehante di trigo lo wordo recohi den unidad y e “yerba shimaron” finalmente lo wordo destrui.

Ta e cristianismo falso ei ta carga responsabilidad pa e “siglonan di barbarismo total” y pa e scuridad spiritual cu a plama den cristiandad durante e siglonan cu a sigui. Distinguiendo e asunto aki di antemano y tur e otro actonan baho y violento cu a ser cometi desde e tempo ei en adelante den nomber di religion, apostel Pedro corectamente a predeci cu ‘pa motibo di nan [esnan cu a yama nan mes cristian] e caminda di berdad lo [a] wordo blasfema.’—2 Pedro 2:1, 2.

“Un Teologia di Rabia y Odio”

No cabe duda cu no ta cristiandad so a duna religion un mal reputacion. Por ehempel, pensa un rato riba e punto di bista fundamentalista di “debocion agresivo.” Exsoeur Karen Armstrong a bisa cu esei ta loke “tradicion di tur religion principal” a percura p’e. Segun Armstrong, un test crucial cu cualkier religion mester pasa ta “compasion den accion.” Kico historia di religion fundamentalista ta indica den e aspecto aki? Armstrong a skirbi: “Religion fundamentalista, sea cu ta hudiu, cristian of moslem no ta logra pasa e test crucial aki cu exito si e ta bira un teologia di rabia y odio.” (The Battle for God—Fundamentalism in Judaism, Christianity and Islam) Pero ta solamente religion “fundamentalista” no a logra pasa e test aki bon y a bira “un teologia di rabia y odio”? Historia ta indica lo contrario.

De echo, Satanas a forma un imperio mundial di religion falso, identifica pa rabia, odio y dramamento di sanger casi interminabel. Bijbel ta yama e imperio aki “Gran Babilonia, [“Babilonia e Grandi”, NW] mama . . . di e abominacionnan di tera”, y e ta ser describi como un prostituta cu ta sinta riba lomba di un sistema politico cu caracteristicanan di bestia. Tuma nota cu e ta ser considera responsabel pa “e sanger . . . di tur esnan cu a wordo mata riba tera.”—Revelacion 17:4-6; 18:24.

No Ta Tur Hende A Wordo Gaña

Sinembargo, historia ta duna prueba cu no ta tur hende a wordo gaña. Melvyn Bragg ta remarca cu asta den e temponan di mas scur den historia, “hopi alma cu merece elogio a haci bon maske mayoria hende rond di nan tawata malbado.” Cristiannan berdadero a sigui “adora [Dios] den spirito y berdad.” (Huan 4:21-24) Nan a separa nan mes for di un sistema religioso mundial cu na moda di papia a comete prostitucion door di a fungi como “un sostenedo di podernan militar.” Nan a nenga di mete nan den e relacion estrecho entre Religion y Estado, cu historia ta revela como “un pacto satanico, for di cua Hesus di Nazaret lo a keda hopi leu.”—Two Thousand Years—The Second Millennium: From Medieval Christendom to Global Christianity.

Den añanan mas resiente, Testigonan di Yehova a bira conoci pa e bon influencia cu nan ta eherce riba otro hende. Pa nan no wordo influencia door di religion falso, nan a basa nan creencianan y accionnan solamente riba e Palabra inspira di Dios, esta, Bijbel. (2 Timoteo 3:16, 17) Y mescos cu cristiannan di prome siglo, nan a sigui e mandamento di Hesus pa “no ta di mundo.” (Huan 15:17-19; 17:14-16) Na Alemania Nazi, por ehempel, nan a nenga di compromete principionan cristian y pesei nan  no tawata aceptabel segun ideologia Nazi. Hitler tawata odia nan pa motibo di nan posicion. Un buki di scol ta bisa: “Testigonan di Yehova . . . a sigui e siñansa di Bijbel pa no carga arma bou di ningun circunstancia. Pues nan a nenga di sirbi den ehersito of di tin algo di aber cu Nazinan. Como represaya, S.S. a encarsela famianan completo cu ta Testigo di Yehova.” (Germany—1918-45) Si, cientos di Testigo di Yehova na Alemania a muri a consecuencia di persecucion Nazi.

Claro cu individuonan cu curashi di varios otro religion a sufri pa motibo di nan creencianan. Pero Testigonan di Yehova a haci esei como un grupo religioso uni. No cabe duda cu mayoria Testigo a keda fiel na e principio basico di e Scritura: “Obedece Dios mas cu hende.”—Echonan 5:29; Marco 12:17.

E Raiz di e Problema

Pues no ta completamente berdad cu religion ta e raiz di tur humanidad su problemanan. Ta religion falso ta e raiz di e problemanan. Sinembargo, ta Dios su intencion pa muy pronto elimina tur religion falso. (Revelacion 17:16, 17; 18:21) Su mandato na ken cu stima rectitud y husticia ta: “Sali for di dje [Babilonia e Grandi, e imperio mundial di religion falso], mi pueblo, pa bo no participa den su picanan y pa bo no ricibi di su plaganan; pasobra su picanan a montona yega te na shelo, y Dios a corda su inikidadnan.” (Revelacion 18:4, 5) Si, Dios ta sintie sumamente ofendi pa motibo di religion cu ta ‘instiga conflicto, ta doof consenshi di hende, ta yena mente di hende cu fantasianan cu ta pone nan hui for di realidad, y ta pone hende bira intolerante, supersticioso, y yena cu odio y miedo’!

Mientrastanto, Dios ta reuniendo esnan cu ta stima berdad den e religion puro. Esaki ta e religion cu ta pega na principionan y siñansanan di un Creador amoroso, husto y compasivo. (Mikeas 4:1, 2; Sofonias 3:8, 9; Mateo 13:30) Abo tambe por forma parti di dje. Si bo ta desea di haya mas informacion tocante con pa identifica religion puro, skirbi e editornan di e revista aki libremente of pidi cualkier Testigo di Yehova pa yudansa.

[Plachi na pagina 7]

Hende di tur tipo di background a haya goso den e religion puro