Religion​—Un Bon Influencia of un Mal Influencia?

“MI TA sinti cu mi debe cristianismo, y mi ta kere cu e mesun cos ta conta pa hende cu a biba durante e ultimo 2000 aña.”—Prologo, Two Thousand Years—The First Millennium: The Birth of Christianity to the Crusades.

E declaracion publico ei di aprobacion dirigi na “cristianismo” ta bin di Melvyn Bragg, un locutor y escritor Ingles. Su palabranan ta refleha e pensamento di miyones di otro hende riba tera cu ta sinti e mesun tipo di gratitud profundo y lealtad pa cu un of otro religion. Nan ta combenci cu religion tawatin un excelente influencia den nan bida. Por ehempel, un escritor a bisa cu islam “a motiva un gran civilisacion . . . [cu a] enrikece henter mundo.”

Papel di Religion—Bon of Malo?

Pero e siguiente palabranan di Bragg ta lanta un pregunta serio, esta si en berdad religion en general a eherce un bon influencia. El a añadi: “Cristianismo tambe debe mi un splicacion.” Ta pa kico asina e kier haya un splicacion? “Pa e intolerancia, maldad, crueldad y ignorancia intencional cu tambe a caracterisa gran parti di su ‘historia’”, e ta bisa.

Hopi hende lo bisa cu atrabes di historia, intolerancia, maldad, crueldad y ignorancia intencional a duna mayoria religion na mundo mala fama. Nan ta opina cu religion simplemente ta aparenta di ta un bendicion pa humanidad, pero cu tras di e supuesto birtud y santidad en realidad tin yen di hipocresia y engaño. (Mateo 23:27, 28) A Rationalist Encyclopædia ta bisa: “Den nos literatura e pensamento cu ta wordo ripiti mas tanto bes ta cu religion tin un balor special pa loke ta trata civilisacion, pero echonan di historia ta desacredit’e masalmente.”

Den cualkier corant cu bo lesa awe lo bo haya masha hopi ehempel di lidernan religioso cu ta papia tocante amor, pas y compasion pero cu ta instiga odio y ta uza e nomber di Dios pa hustifica nan conflictonan cruel. No ta nada straño anto cu hopi hende ta sinti cu hopi bes religion tin un influencia destructivo den bida.

Sin Religion Ta Miho?

Algun hende a asta yega na e mesun conclusion cu Bertrand Russell, un filosofo Ingles, cu lo ta bon si algun dia “tur tipo di creencia  religioso [lo] no existi mas.” Segun nan opinion, e unico solucion duradero pa tur e problemanan di humanidad ta, si elimina religion. Sinembargo, podise nan ta lubida cu esnan cu ta rechasa religion por instiga mes tanto odio y intolerancia cu esnan cu ta sosten’e lealmente. Karen Armstrong, un autor riba topiconan di religion, ta recorda nos: “A lo menos, e Holocaust a mustra cu un ideologia mundano [por] ta mes peligroso cu cualkier crusada religioso.”—The Battle for God—Fundamentalism in Judaism, Christianity and Islam.

Pues religion tin un bon influencia, of e ta realmente e raiz di tur e problemanan di humanidad? E solucion pa tur e problemanan ei ta pa deshaci di tur religion? Ban wak kico Bijbel tin di bisa tocante esaki den e siguiente articulo. Kisas e contesta lo sorprende bo.