Berdadero Cristianismo Ta Floreciendo

HESUCRISTO su ministerio a causa un impacto den e mundo di prome siglo. Su mensahe refrescante, revelador y stimulante a asombra e hendenan. Hopi di esnan cu a tend’e papia pa prome bes a keda profundamente impresiona cu su palabranan.—Mateo 7:28, 29.

Sin miedo Hesus a nenga di envolve su mes den e sistemanan politico y religioso opresivo di su tempo; pero el a haci su mes un persona acercabel pa e hende comun. (Mateo 11:25-30) El a reconoce abiertamente cu riba tera a reina un influencia di mal spirito y a demostra cu Dios a dun’e poder riba nan. (Mateo 4:2-11, 24; Huan 14:30, Beibel na papiamentu koriente) Habilmente Hesus a mustra bon cla kico ta e conexion fundamental entre sufrimento y pica, y amorosamente el a splica cu ta e Reino di Dios lo trece alivio duradero. (Marco 2:1-12; Lucas 11:2, 17-23) Di unabes pa semper, el a kita e velo di scuridad cu pa hopi tempo a tapa e berdadero personalidad di su Tata. Cu esei, el a haci Dios su nomber conoci na tur hende cu tawata interesa den un relacion personal cu Dios.—Huan 17:6, 26.

Pesei, no ta un sorpresa cu apesar di e persecucion religioso y politico intenso, e disipelnan di Hesus a plama su mensahe dinamico rapidamente. Den apenas un 30 aña asina, congregacionnan cristian activo a wordo forma na Africa, Asia y Europa. (Colosensenan 1:23) E berdadnan simpel cu Hesus a siña a alcansa curason di hende humilde y honesto den henter e Imperio Romano.—Efesionan 1:17, 18.

Pero con tur e disipelnan nobo aki di varios background economico, cultural, linguistico y religioso lo por a bini hunto den “un [solo] fe” berdaderamente uni manera apostel Pablo a yam’e? (Efesionan 4:5) Kico lo a yuda nan “papia e mesun cos” y no drif bai for di otro? (1 Corintionan 1:10) En bista di e desunion serio cu tin awe entre e personanan cu ta bisa cu nan ta cristian, ta bon pa nos analisa loke Hesus mes a siña.

E Base pa Unidad Cristian

Ora Hesus tawata den un huicio dilanti Poncio Pilato, el a declara kico ta e base pa unidad cristian. El a bisa: “Pa esaki mi a nace y pa esaki mi a bin den mundo, pa duna testimonio di e berdad. Tur esnan cu ta di e berdad ta tende mi bos.” (Huan 18:37) Pesei, e siñansanan di Hesus hunto cu e resto di e Palabra inspira di Dios, Bijbel, tin un influencia unificador poderoso riba Cristo su berdadero  disipelnan.—1 Corintionan 4:6; 2 Timoteo 3:16, 17.

Claro cu lo tawatin momentonan cu Hesus su disipelnan lo a haya nan cu preguntanan sinsero of asta desacuerdonan entre nan cu nan. Kico lo a yuda nan? Hesus a splica: “Ora cu [esun ei], e spirito di berdad, bin, e lo guia boso den tur berdad; pasobra e lo no papia di su mes, ma tur loke e tende, e lo papia; y loke tin di bin, e lo revela na boso.” (Huan 16:12, 13) Pues, spirito santo di Dios lo a permiti Hesus su berdadero disipelnan compronde e berdad segun cu Dios a revel’e progresivamente. Ademas, e spirito ei lo a produci fruta, manera amor, goso y pas, cu na su turno lo a promove unidad entre e disipelnan.—Echonan 15:28; Galationan 5:22, 23.

Hesus no a laga espacio pa desacuerdo of desunion den su disipelnan; ni e no a autorisa nan pa reinterpreta e berdadnan di Dios pa acomoda e tradicionnan cultural of religioso di e hendenan cu nan lo a topa. Mas bien, riba e ultimo anochi cu e tawata hunto cu nan, el a pidi su Tata den un oracion ferviente: “Mi no ta pidi pa esakinan so, ma tambe pa esnan cu ta kere den mi pa medio di nan palabra, pa nan tur por ta un, mescos cu abo, o Tata, ta den [union cu] mi y ami den [union cu] bo, pa nan tambe por ta den [union cu] nos; pa mundo kere cu ta abo a manda mi.” (Huan 17:20, 21) Pesei anto, berdadero unidad den spirito y berdad mester ta un marca cu lo a distingui Cristo su disipelnan for di cuminsamento di cristianismo te den nos tempo. (Huan 4:23, 24) No obstante, e iglesianan djawe no ta uni, sino dividi. Kico ta e motibo?

Dicon e Iglesianan Ta Dividi

E splicacion franco pa e variedad inmenso di creencia- y practicanan di hende cu awe ta bisa cu nan ta cristian ta cu nan no a pega na e siñansanan di Hesus. Un escritor a remarca: “Mescos cu den pasado, e cristiannan nobo di awendia tin e tendencia di acepta for di Bijbel loke ta cuadra cu nan necesidadnan—y ignora loke no ta cuadra cu nan propio tradicionnan religioso nativo.” Esei ta exactamente loke Hesus y su apostelnan a predeci cu lo a tuma luga.

Por ehempel, bou di inspiracion apostel Pablo a skirbi Timoteo, su compañero superintendente: “E tempo lo bin cu nan lo no soporta doctrina sano mas; ma al contrario, pa satisface nan mes deseonan, nan lo acumula pa nan mes siñadonan pa bisa nan loke nan horea cu ta kishiki kier tende, y lo bira nan horea for di e berdad, y lo bolbe na fabula.” Tur cristian lo a ser engaña? No, pasobra Pablo a sigui bisa: “Ma abo, sea sobrio den tur cos, soporta afliccion, haci e trabou di un [“evangelisado”, NW], cumpli cu bo ministerio.” (2 Timoteo 4:3-5; Lucas 21:8; Echonan 20:29, 30; 2 Pedro 2:1-3) Timoteo y otro fiel cristiannan a sigui e conseho inspira ei.

Ainda Cristiannan Berdadero Ta Uni

Mescos cu Timoteo, awe tambe cristiannan berdadero ta sobrio, of huicioso, pasobra nan ta rechasa rasonamento humano y nan ta acepta solamente e autoridad di e Scritura pa nan creencianan. (Colosensenan 2:8; 1 Huan 4:1, BPK) Testigonan di Yehova ta imita e cristiannan di prome siglo door di cumpli cu nan ministerio den mas cu 230 pais, hibando Hesus su mensahe original, e bon noticia tocante e Reino, pa hende na tur parti di mundo. Ban wak cuater manera importante den cua nan ta imita Hesus y practica berdadero cristianismo na un manera uni, sin importa unda nan ta biba.

Nan creencianan ta basa riba e Palabra di Dios. (Huan 17:17) Un pasto di parokia na Belgica a skirbi tocante nan: “Un cos cu nos por siña di nan [Testigonan di Yehova] ta cu nan ta dispuesto pa scucha e Palabra di Dios y duna testimonio cu curashi tocante dje.”

Nan ta spera riba e Reino di Dios pa trece alivio for di problemanan di mundo. (Lucas  8:1) Na Barranquilla, Colombia, un Testigo a papia cu Antonio, un fuerte apoyado di un movemento politico. E Testigo no a tuma parti p’e, ni e no a boga pa un of otro ideologia politico. Mas bien, el a ofrece pa studia Bijbel gratis cu Antonio y su ruman mohenan. No a dura mucho cu Antonio a realisa cu e Reino di Dios realmente ta e unico speransa pa hende pober na Colombia y e resto di mundo.

Nan ta honra e nomber di Dios. (Mateo 6:9) Ora Testigonan di Yehova a topa Maria, un catolico sinsero cu ta biba na Australia, pa prome bes, el a permiti e Testigonan mustr’e e nomber di Dios den Bijbel. Con Maria a reacciona? “E prome bes cu mi a mira e nomber di Dios den Bijbel, mi a yora. Loke a conmove mi hopi ta cu mi por a echt conoce Dios y uza su nomber personal.” Maria a sigui studia Bijbel, y pa prome bes den su bida, e por a conoce Yehova como persona y cultiva un relacion duradero cu ne.

Nan ta uni den amor. (Huan 13:34, 35) Un editorial den e corant Ladysmith-Chemainus Chronicle di Canada, a comenta: “Sea bo tin of laga di tin un creencia religioso, bo tin cu duna merito na e 4.500 Testigonan di Yehova cu a traha dia y anochi e ultimo siman y mei pa construi un Salon di Asamblea di 2.300 meter cuadra na Cassidy [Canada] ... Pa haci esaki cu goso, sin discuti, pleita of busca gloria personal ta un marca di berdadero cristianismo.”

Pues, considera e evidencia. Mientras cu cristiandad su teologonan, misioneronan y baidonan di misa ta confrontando un crisis serio den nan iglesianan, berdadero cristianismo ta floreciendo rond mundo. Si, cristiannan berdadero ta cumpliendo cu nan ministerio asigna di predica y siña hende e Palabra di Dios. (Mateo 24:14; 28:19, 20) Si bo ta entre e hendenan cu ta “suspira y keha” pa motibo di e cosnan repugnante cu ta tumando luga awor y bo ta sinti bo molestia pa e desunion cu tin entre e religionnan di cristiandad, nos ta invita bo pa join Testigonan di Yehova den adoracion cristian uni di e unico Dios berdadero, Yehova.—Ezekiel 9:4; Isaias 2:2-4.