“E Esclabo Fiel” Ta Pasa e Test cu Exito!

“Ta tempo pa huicio cuminsa cu e hendenan di e cas di Dios.” —1 PEDRO 4:17.

1. Kico Hesus a haya ora el a inspecciona e “esclabo”?

NA Pentecoste di aña 33 di nos era, Hesus a nombra un “esclabo” pa percura cuminda na e debido tempo pa e “otro crianan” di su cas. Na 1914, Hesus a keda entronisa como Rei, y pronto tawata tempo pa inspecciona e “esclabo” ei. El a bin haya cu mayoria di e miembronan di e “esclabo” a duna prueba di ta “fiel y prudente.” Pesei el a pon’e na encargo di “tur su propiedadnan.” (Mateo 24:45-47) Sinembargo, tawatin tambe un esclabo malbado cu no tawata ni fiel ni prudente.

“E Esclabo Malbado Ei”

2, 3. Di unda “e esclabo malbado ei” a sali, y con el a desaroya?

² Hesus a papia di e esclabo malbado inmediatamente despues di a menciona “e esclabo fiel y prudente.” El a bisa: “Ma si e esclabo malbado ei bisa den su curason: ‘Mi shon lo no bin p’awor’, y e cuminsa bati su compañeronan-esclabo y come y bebe hunto cu burachenan, e shon di e esclabo ei lo bin riba un dia cu e no ta sper’e y na un ora cu e no sa, y lo cort’e na pida-pida y lo dun’e un luga hunto cu e hipocritanan; ayanan lo tin yoramento y mordemento riba djente.” (Mateo 24:48-51) E expresion “e esclabo malbado ei” ta hala nos atencion na e palabranan prome cu esei cu Hesus a bisa tocante e esclabo fiel y prudente. Si, e “esclabo malbado” ta sali for di fila di e esclabo fiel. * Con asina?

³ Prome cu 1914, hopi miembro di e esclabo fiel tawatin e speransa firme di topa cu e Bruidegom den shelo e aña ei, pero nan speransa no a keda realisa. Como resultado di esaki y otro desaroyonan, hopi di nan a keda desepciona y un par a bira amarga. Algun di esnan amarga aki a cuminsa “bati” nan exrumannan cu palabra y a bai anda cu “burachenan”, gruponan religioso di cristiandad.—Isaias 28:1-3; 32:6.

4. Con Hesus a trata cu e “esclabo malbado” y cu tur esnan cu a demostra e mesun actitud?

⁴ E excristiannan aki cu tempo a keda identifica como e “esclabo malbado”, y Hesus a “cort’e na pida-pida” es decir, a castig’e severamente. Con? El a rechasa nan, y nan a perde e speransa di bai shelo. Sinembargo, nan no a wordo destrui mesora. Prome nan tawatin cu soporta un periodo di yoramento y mordemento riba djente den “e scuridad pafo” di e congregacion cristian. (Mateo 8:12) Di e tempo ei padilanti, tawatin algun otro persona ungi cu a demostra e mesun actitud malbado, y asina nan a identifica nan mes cu e “esclabo malbado.” Tawatin tambe algun di e “otro carnenan” cu a imita nan infieldad. (Huan 10:16) Tur e enemigonan ei di Cristo lo bai termina den e mesun “scuridad pafo.”

5. Con e esclabo fiel y prudente a reacciona, na contraste cu e “esclabo malbado”?

⁵ Sinembargo, e esclabo fiel y prudente a pasa door di e mesun testnan cu “e esclabo malbado ei.” Pero en bes di bira amarga, nan a ser reahusta. (2 Corintionan 13:11, NW) Nan amor pa Yehova y pa nan rumannan a bira  mas fuerte. Y esei a haci nan un “pilar y sosten di e berdad” durante e “ultimo dianan” turbulento aki.—1 Timoteo 3:15; 2 Timoteo 3:1.

Birgennan Sabi y Bobo

6. (a) Con Hesus a ilustra e actitud prudente di e grupo di esclabo fiel? (b) Prome cu 1914, ki mensahe cristiannan ungi a proclama?

⁶ Despues cu Hesus a papia di “e esclabo malbado ei”, el a duna dos comparacion of parabola pa mustra dicon algun cristian ungi lo a resulta di ta fiel y prudente mientras cu otronan no. * Pa ilustra e cualidad di ta prudente of sabi, el a bisa: “E ora ei e reino di shelo lo ta di compara cu dies birgen cu a cohe nan lampi y a sali bai pa contra cu e bruidegom. Y cinco di nan tawata bobo y cinco tawata sabi. Pasobra e bobonan a hiba nan lampi, ma nan no a hiba azeta, ma e sabinan a hiba azeta den nan flasco, hunto cu nan lampi.” (Mateo 25:1-4) E dies birgennan ta pone nos corda riba cristiannan ungi prome cu 1914. Nan a calcula cu e bruidegom, Hesucristo, tawata serca di aparece. Pesei, nan “a sali bai” pa contra cu ne, predicando cu curashi cu “e temponan [stipula] di e paganonan” lo a termina na 1914.—Lucas 21:24.

7. Na ki tempo y dicon cristiannan ungi na moda di papia “a pega soño”?

⁷ Nan tawatin rason. E tempo stipula di e nacionnan a termina na 1914, y e Reino di Dios bou di Cristo Hesus a cuminsa funciona. Pero esei a tuma luga den shelo invisibel. Riba tera, hende a cuminsa sufri e “ai” profetisa. (Revelacion 12:10, 12) Esei a trece un tempo di test. Como cu e cristiannan ungi no tawata compronde e asunto mucho bon, nan a pensa cu “e bruidegom tawata tarda pa bin.” Nan a keda confundi y a confronta hostilidad di parti di mundo, y pesei en general nan a baha man na nan actividad y casi a stop cu e predicacion publico organisa. Manera e birgennan den e parabola, den sentido spiritual nan “a cuminsa cabisha y a pega soño.” Y ta mescos a pasa tambe despues di morto di e apostelnan di Hesus cu e personanan infiel cu tawata declara di ta cristian.—Mateo 25:5; Revelacion 11:7, 8; 12:17.

8. Kico a hiba na e grito: “At’e bruidegom!”, y tawata tempo pa cristiannan ungi haci kico?

⁸ Anto na 1919 un cos inespera a pasa. Nos ta lesa: “Ma meianochi por a tende un grito: ‘At’e bruidegom! Sali bai contr’e.’ E ora ei tur e birgennan ei a lanta y a prepara nan lampi.” (Mateo 25:6, 7) Net ora cu e situacion tawata parce sumamente scur, a sali un yamada pa bira activo! Na 1918, Hesus, “e mensahero di e aliansa”, a bini na Yehova su tempel spiritual pa inspecciona y limpia Dios su congregacion. (Malakias 3:1) Awor, cristiannan ungi tawatin cu sali bai contr’e den e patio terenal di e tempel ei. Tawata tempo pa nan laga nan lus “briya.”—Isaias 60:1; Filipensenan 2:14, 15.

9, 10. Na 1919, dicon algun cristian tawata “sabi” y algun tawata “bobo”?

⁹ Pero warda! Den e parabola, algun di e mucha mohenan tawatin un problema. Hesus a sigui bisa: “E bobonan a bisa e sabinan: ‘Duna nos poco di boso azeta, pasobra nos lampinan ta bai paga.’” (Mateo 25:8) Sin azeta, e lampinan lo no a duna lus. E azeta di lampi ta laga nos corda riba e Palabra di Dios cu ta contene e berdad y tambe riba Dios su spirito santo, dos cos cu ta permiti adoradonan berdadero ser cargadonan di lus. (Salmo 119:130; Daniel 5:14) Prome cu 1919 cristiannan  ungi prudente—apesar cu temporalmente nan tawata den un condicion debil—a busca diligentemente pa sa ta kico ta Dios su boluntad pa nan. Pesei ora e yamada a bini pa laga nan lus briya, nan tawata prepara.—2 Timoteo 4:2; Hebreonan 10:24, 25.

¹⁰ Sinembargo, tawatin cierto unginan cu no tawata prepara pa haci sacrificio ni pa haci esfuerso personal, aunke nan tawata desea sinseramente pa ta hunto cu e Bruidegom si. Pesei ora tawata tempo pa bira activo den e predicacion di e bon nobo, nan no tawata prepara. (Mateo 24:14) Asta nan a purba slow e actividad di nan compañeronan celoso, door di pidi nan, na moda di papia, pa un tiki di nan azeta. Den e parabola di Hesus, con e birgennan sabi of prudente a responde? Nan a bisa: “No ta bai tin suficiente pa nos y pa boso tambe; miho boso bai serca e bendedonan y cumpra pa boso mes.” (Mateo 25:9) Asina tambe cristiannan ungi fiel na 1919 a nenga di haci cualkier cos cu lo por a mengua nan capasidad di carga lus. Pues anto, nan a pasa e test cu exito.

11. Kico a pasa cu e birgennan bobo?

¹¹ Hesus a conclui: “Mientras cu [e birgennan bobo] a bai pa cumpra, e bruidegom a yega, y esnan cu tawata prepara a drenta bai hunto cu ne na e fiesta di casamento; y e porta a wordo sera. Y mas despues e otro birgennan tambe a bin, bisando: ‘Señor, señor habri pa nos.’ Ma el a contesta y a bisa: ‘Di berdad mi ta bisa boso, mi no conoce boso.’” (Mateo 25:10-12) Si, algun cristian no tawata prepara pa yegada di e Bruidegom. Pues, nan no a pasa e test cu exito y a perde e oportunidad di asisti na e fiesta di casamento celestial. Ki un tragedia!

E Parabola di e Talentonan

12. (a) Kico Hesus a uza pa ilustra fieldad? (b) Ken tawata e homber cu “a bai haci un biahe”?

¹² Despues di ilustra e actitud prudente, Hesus a duna un ilustracion di fieldad. El a bisa: “Ta manera un homber cu ta bai haci un biahe pa un tera leu, y kende a yama su esclabonan y a entrega nan su propiedad. Y na esun el a duna cinco talento, na e otro dos, y na e otro un, cada un segun su capasidad; y despues el a bai haci un biahe.” (Mateo 25:14, 15) E homber den e parabola ta Hesus mes, kende “a bai haci un biahe” ora el a subi na shelo na aña 33 di nos era. Pero prome cu Hesus a bai shelo el a encarga “su propiedad” na su disipelnan fiel. Con?

13. Con Hesus a prepara un campo grandi di actividad y autorisa su “esclabonan” pa haci negoshi?

¹³ Durante Hesus su sirbishi riba tera, el a cuminsa prepara un campo grandi di actividad door di predica e bon nobo di e Reino den henter e pais di Israel. (Mateo 9:35-38) Prome cu el “a bai haci un biahe”, el a encarga e campo di actividad na su disipelnan fiel, bisando: “Bai y haci tur e nacionnan disipel di mi, y batisa nan den nomber di e Tata y di e Yiu y di e spirito santo, y siña nan pa cumpli cu tur loke mi a ordena boso.” (Mateo 28:18-20) Cu e palabranan aki, Hesus a autorisa su “esclabonan” pa haci negoshi te ora e  regresa, “cada un segun su capasidad.”

14. Dicon Cristo no a spera di tur cristian pa nan haci e mesun cantidad di negoshi?

¹⁴ E expresion “cada un segun su capasidad” ta indica cu no ta tur cristian di prome siglo tawatin e mesun circunstancia of posibilidad. Algun di nan, manera Pablo y Timoteo, tawatin e libertad cu nan por a participa plenamente den e trabou di predica y siña otro hende. E circunstancianan di otro cristiannan kisas a limita nan libertad di actua masha hopi. Por ehempel, algun cristian tawata esclabo, y otronan tawata enfermo, di edad avansa of tawatin responsabilidad di famia. Claro cu cierto privilegionan di congregacion no tawata disponibel pa tur disipel. Hende mohe ungi y algun homber ungi no tawata siñado den e congregacion. (1 Corintionan 14:34; 1 Timoteo 3:1; Santiago 3:1) Sinembargo, sea cual sea nan situacion personal, tur disipel ungi di Cristo—homber y mohe—tawata asigna pa haci negoshi, es decir, haci bon uzo di nan oportunidadnan y circunstancianan den e sirbishi cristian. E disipelnan di Cristo di tempo moderno ta haci mescos.

Tempo di Inspeccion Ta Cuminsa!

15, 16. (a) Ki ora tawata tempo pa regla cuenta? (b) Ki oportunidadnan nobo pa ‘haci negoshi’ Cristo a duna esnan fiel?

¹⁵ E parabola ta sigui: “Awor despues di hopi tempo e shon di e esclabonan ei a bolbe y a regla cuenta cu nan.” (Mateo 25:19) Na 1914—anto berdad esei ta hopi tempo despues di aña 33—Cristo Hesus a cuminsa su presencia como rei. Tres aña y mei despues, na 1918, el a bin na Dios su tempel spiritual y a cumpli cu e palabranan di Pedro: “Ta tempo pa huicio cuminsa cu e hendenan di e cas di Dios.” (1 Pedro 4:17; Malakias 3:1) Tawata tempo pa regla cuenta.

¹⁶ Kico e esclabonan, Hesus su rumannan ungi, a haci cu e “talentonan” di e Rei? Di  aña 33 padilanti, incluso te cu e añanan cu a hiba na 1914, hopi di nan a traha duro den Hesus su ‘negoshi.’ (Mateo 25:16) Asta durante e prome guera mundial, nan a demostra un deseo fuerte pa sirbi nan Shon. Pesei awor tawata na su luga pa duna esnan fiel oportunidadnan nobo pa ‘haci negoshi.’ E tempo di fin di e sistema di cosnan aki a yega. Mester a predica e bon nobo rond mundo. Mester a cosecha “e cosecha di tera.” (Revelacion 14:6, 7, 14-16) Mester a localisa e miembronan final di e trigo colectivo y recohe “un multitud grandi” di otro carne.—Revelacion 7:9; Mateo 13:24-30.

17. Con cristiannan ungi fiel a ‘drenta den e goso di nan shon’?

¹⁷ Tempo di cosecha ta un tempo di alegria. (Salmo 126:6) Pesei tawata apropiado cu na 1919 ora cu Hesus a encarga su rumannan ungi fiel cu mas responsabilidad, el a bisa: “Bo tawata fiel den poco cos, lo mi encarga bo cu hopi cos; drenta, tuma parti den e goso di bo shon.” (Mateo 25:21, 23) Ademas, e goso di e Shon como Rei resien entronisa di e Reino di Dios ta surpasa nos imaginacion. (Salmo 45:1, 2, 6, 7) E grupo di esclabo fiel ta tuma parti den e goso ei door di representa e Rei y aumenta su interesnan riba tera. (2 Corintionan 5:20) E palabranan profetico di Isaias 61:10 ta expresa nan goso: “Lo mi gosa grandemente den SEÑOR; mi alma lo regociha den mi Dios, pasobra el a bisti mi cu e bistinan di salbacion.”

18. Dicon algun cristian ungi no a pasa e inspeccion cu exito, y cu ki resultado?

¹⁸ Lamentablemente, algun cristian no a pasa e inspeccion cu exito. Nos ta lesa: “Esun cu a ricibi un talento a bin y a bisa: ‘Señor, mi tawata sa cu bo ta un hende severo, cu ta cosecha caminda bo no a sembra, y cu ta recohe caminda bo no a stroi simiña. Y mi tawatin miedo, y mi a bai y a sconde bo talento bou di tera. Ata loke ta di bo aki.’” (Mateo 25:24, 25) Asina tambe algun cristian ungi no a haci ‘negoshi.’ Prome cu 1914 nan no a comparti nan speransa cu entusiasmo cu otro hende, y nan no kier a cuminsa na 1919. Con Hesus a reacciona riba nan actitud tribi? El a kita tur nan privilegionan. Nan a wordo ‘tira den e scuridad pafo, caminda lo tin yoramento y mordemento riba djente.’—Mateo 25:28, 30.

E Inspeccion Ta Sigui

19. Den ki manera e proceso di inspeccion ta sigui, y kico tur cristian ungi ta determina pa haci?

¹⁹ Claro cu mayoria di esnan cu lo a bira Cristo su esclabonan ungi durante e tempo di fin, no tawata sirbi Yehova ainda ora cu Hesus a cuminsa su inspeccion na 1918. Acaso nan a perde e chens di ser inspecciona? Absolutamente cu no. E proceso di inspeccion simplemente a cuminsa na 1918/1919 ora cu e esclabo fiel y prudente como grupo a pasa e test cu exito. Cristiannan ungi individual ta sigui bou di inspeccion te ora cu seya nan permanentemente. (Revelacion 7:1-3) Conciente di esaki, Cristo su rumannan ungi ta determina pa sigui ‘haci negoshi’ fielmente. Nan ta determina pa ta prudente, y pa keda cu un bon stock di azeta pa asina e lus sigui briya bon cla. Nan sa cu ora cada un di nan yega na final di su bida den fieldad, Hesus lo ricibie den su cas celestial.—Mateo 24:13; Huan 14:2-4; 1 Corintionan 15:50, 51.

20. (a) Kico e otro carnenan awe ta determina pa haci? (b) Cristiannan ungi ta conciente di kico?

 ²⁰ E multitud grandi di otro carne a imita nan rumannan ungi. Nan sa cu e echo cu nan conoce Dios su proposito ta trece gran responsabilidad. (Ezekiel 3:17-21) Pesei, cu yudansa di Yehova su Palabra y spirito santo, nan tambe ta percura pa nan tin un bon stock di azeta mediante studio y asistencia na reunionnan cristian. Y nan ta laga nan lus briya, door di participa den e trabou di predica y di siña hende y asina ta ‘haci negoshi’ hunto cu nan rumannan ungi. Sinembargo, cristiannan ungi ta bon conciente di e echo cu ta den nan man Cristo a pone e talentonan. Ta nan tin cu rindi cuenta pa e manera cu ta administra e propiedadnan di Señor riba tera. Aunke nan cantidad ta tiki, nan no por bula pipa pa nan responsabilidad y lag’e na encargo di e multitud grandi. Cu esaki na mente, e esclabo fiel y prudente ta sigui hiba delantera den maneha e negoshi di e Rei, gradicido pa e apoyo cu nan ta haya di miembronan dedica di e multitud grandi. Anto e multitud grandi aki ta reconoce e responsabilidad di nan rumannan ungi y ta sinti nan mes privilegia di por traha bou di nan supervision.

21. Ki spiertamento ta aplica na tur cristian for di prome cu 1919 te cu awe?

²¹ Pues anto, aunke e dos parabolanan aki a clarifica susesonan cu a tuma luga na 1919 y rond di e epoca ei, basicamente nan ta aplica na tur cristian berdadero durante e ultimo dianan. Di e manera aki, aunke e spiertamento cu Hesus a duna na final di e parabola di e dies birgennan ta aplica na prome luga na cristiannan ungi prome cu 1919, su principio ta aplica na tur cristian. Pesei laga nos tur tuma na pecho e palabranan di Hesus: “Sea alerta anto, pasobra boso no sa e dia ni e ora cu e Yiu di hende ta bin.”—Mateo 25:13.

[Nota]

Bo Por Splica?

• Na ki tempo Hesus a inspecciona su siguidonan, y kico el a haya?

• Dicon algun cristian ungi a desaroya e actitud di “e esclabo malbado ei”?

• Con nos por demostra cu nos ta spiritualmente prudente?

• Imitando Hesus su fiel rumannan ungi, den ki manera nos por sigui ‘haci negoshi’?

[Preguntanan di Estudio]

[Cuadro na pagina 16]

NA KI TEMPO HESUS TA BIN?

Den Mateo capitulo 24 y 25, Bijbel ta bisa cu Hesus ta “bin” den diferente sentido. E no tin cu move fisicamente for di caminda e ta pa e por “bin.” Mas bien, e ta “bin” den e sentido di dirigi su atencion na humanidad of na su siguidonan, hopi bes pa huicio. Pues, na 1914 el a “bin” pa cuminsa su presencia como Rei entronisa. (Mateo 16:28; 17:1; Echonan 1:11) Na 1918 el a “bin” como mensahero di e aliansa y a cuminsa husga esnan cu tawata declara cu nan ta sirbi Yehova. (Malakias 3:1-3; 1 Pedro 4:17) Na Armagedon, lo e “bin” pa ehecuta huicio riba Yehova su enemigonan.—Revelacion 19:11-16.

E binida (of, yegada) cu varios bes Bijbel ta referi na dje den Mateo 24:29-44 y 25:31-46 ta na “e gran tribulacion.” (Revelacion 7:14) Di otro banda, e binida cu Bijbel ta referi na dje varios biaha den Mateo 24:45 pa 25:30 tin di haci cu su husgamento desde 1918 padilanti di esnan cu ta declara cu nan ta su disipel. Lo no ta rasonabel pa bisa, por ehempel, cu e dunamento di recompensa na e esclabo fiel, e huicio di e birgennan bobo y e huicio di e esclabo floho cu a sconde e talento di e Shon, lo tuma luga ora Hesus “bin” na e gran tribulacion. Pasobra esei lo nifica cu hopi di e unginan lo ser haya infiel na e tempo ei y cu lo tin cu remplasa nan. Sinembargo, Revelacion 7:3 ta indica cu pa e tempo ei tur esclabo ungi di Cristo lo a ser ‘seya’ permanentemente caba.

[Plachi na pagina 14]

E “esclabo malbado” no a haya bendicion na 1919

[Plachi na pagina 15]

E birgennan sabi tawata cla prepara ora e bruidegom a yega

[Plachi na pagina 17]

E esclabonan fiel a haci ‘negoshi’

E esclabo floho no

[Plachinan na pagina 18]

E unginan y e “multitud grandi” ta sigui laga nan lus briya