Storia Di Bida

Mi A Wordo Sosteni door di Keda Contento cu Loke Yehova Ta Percura

SEGUN E RELATO DI BENJAMIN IKECHUKWU OSUEKE

Poco despues cu mi a cuminsa traha tempo completo den e sirbishi cristian, mi a bishita cas di mi mayornan. Ora mi tata a mira mi, el a cohe mi tene na mi camisa y cuminsa grita: “Ladron!” El a cohe su machete y a dal mi cu e banda plat. E bochincha a pone biciñanan core bin wak ta kico ta pasa na nos cas. Ta kico m’a horta? Laga mi splica bo.

MI A nace na aña 1930 den e pueblito Umuariam den parti suitost di Nigeria, y mi tawata e mayo di shete yiu. Mi ruman mohe mayo a muri cu 13 aña. Mi mayornan tawata miembro di Iglesia Anglicano. Tata tawata un cunukero, y Mama tawatin un negoshi chikito. E tawata cana bai plasanan cu a keda mas o menos 30 kilometer for di nos pueblito pa cumpra un bleki di azeta di palma y tawata bolbe bek laat riba e mesun dia. Anto su siguiente mainta tempran, el a cana 40 kilometer pa yega un pueblo canto di un stacion di trein pa bende e azeta. Si el a haci ganashi—normalmente no mas cu 27 cen—e tawata cumpra cuminda pa nos famia y bin cas bek e mesun dia. Esei tawata su rutina pa mas o menos 15 aña te na su morto na 1950.

Mi a cuminsa mi educacion den mi pueblito na un scol dirigi door di Iglesia Anglicano, pero pa mi por a caba scol basico mi mester a bai biba na un pension cu a keda un 35 kilometer leu. Ya cu mi mayornan no tawatin placa pa paga pa mi educacion, mi a cuminsa busca trabou. Prome mi a traha como cria di cas pa un conducteur di trein na Lagos, den west di Nigeria, y despues pa un ambtenaar na Kaduna, den nort di Nigeria. Na Benin City, parti centralwest di Nigeria, mi a haya trabou como oficinista pa  un abogado, y despues mi a traha como pion na un fabrica di zag palo. Djeinan mi a biaha pa Camerun na 1953 pa keda cu un omo cu a yuda mi haya trabou na un plantacion di mata di rubber. Mi salario mensual tawata rond di 16 florin. Mi tawata haci solamente trabou humilde, sinembargo mi tawata keda contento basta mi tawatin suficiente pa come.

Un Homber Pober Ta Parti Rikesa

Silvanus Okemiri, un colega, tawata Testigo di Yehova. E tawata uza tur chens cu e haya pa comparti su conocemento di Bijbel cu mi mientras nos tawata corta yerba y pone un capa protectivo di sas rond di e matanan di rubber. E tempo ei mi no a haci nada mas cu scuch’e. No obstante, ora mi omo a haya sa cu mi tawata den contacto cu e Testigonan, el a haci su best pa desanima mi. El a spierta mi: “Benji, no bishita Sr. Okemiri. E ta un homber di Yehova y un hende pober pober. Ken cu asocia cu ne lo bira mescos cu ne.”

Na principio di 1954, ora cu mi no por a soporta e condicionnan pisa di trabou di e compania mas, mi a regresa cas. E temponan ei Iglesia Anglicano tawata hopi stricto tocante moralidad. Mi a lanta cu rabia riba inmoralidad. Sinembargo, no a tarda hopi cu e hipocresia di otro baidonan di misa a desgusta mi. Aunke nan tawata declara cu masha fervor cu nan ta sigui normanan di Bijbel, nan estilo di bida a contradeci loke nan a bisa. (Mateo 15:8) Cada bes ami cu mi tata tawata pleita, y esei a crea hopi tension den nos relacion. Un anochi mi a gewoon bai for di cas.

Mi a muda pa Omoba, un pueblo chikito a lo largo di un ruta di trein. Einan mi a bolbe bin den contacto cu Testigonan di Yehova. Priscilla Isiocha, cu mi tawata conoce di mi pueblito, a duna mi e foyetonan chikito “E Bon Nobo Aki di e Reino” y Despues di Armagedon—Dios Su Mundo Nobo. * Mi a lesa nan cu smak, combenci cu mi a haya e berdad. Den mi misa nos no tawata studia Bijbel; nos a consentra riba tradicion di hende. Sinembargo, e literatura di e Testigonan tawata cita masha hopi for di Bijbel.

Menos cu un luna despues, mi a puntra Ruman Isiocha cu su casa ki dia nan ta bai nan misa. Ora mi a asisti pa prome bes na un reunion di Testigonan di Yehova, mi no a compronde ni un pataca. E articulo di Toren di Vigilancia tawata tocante e atake di ‘Gog di Magog’, menciona den e buki profetico di Ezekiel. (Ezekiel 38:1, 2) Hopi palabra cu nan a uza tawata straño pa mi, pero mi a keda asina impresiona cu e bonbini caloroso cu mi a ricibi cu mi a dicidi di bolbe e siguiente diadomingo. Durante e di dos reunion, mi a tende tocante predicacion. Pues mi a puntra Priscilla ki dia nan tawata bai predica. E di tres diadomingo mi a compaña nan, cu un Bijbel chikito den man. Mi no tawatin tas di predica ni ningun literatura biblico. Asina mes mi a bira un publicado di Reino y a raporta mi sirbishi di veld na fin di luna!

Ningun hende no a studia cu mi, pero ki ora cu mi a bishita e famia Isiocha, mi tawata siña palabranan di fe y animacion for di e Scritura y a haya algun literatura biblico. Dia 11 di december 1954, na un congreso di districto na e pueblo Aba, mi a simbolisa mi dedicacion na Yehova mediante bautismo den awa. Mi tawata biba serca un pariente y a traha serca dje pa siña un ofishi, ma el a stop di duna mi cuminda y di siña mi y no a paga mi ni un cen preto pa e trabounan cu mi a haci p’e. Pero toch, mi no a ten’e na curason; simplemente mi tawata gradicido cu mi tawatin un relacion personal cu  Dios. Esaki a duna mi consuelo y pas mental. E Testigonan local a yuda mi. Famia Isiocha a duna mi cuminda, y otronan a fia mi placa pa cuminsa un negoshi chikito. Meimei di aña 1955, mi a cumpra un bais segunda mano, y na maart 1956 mi a cuminsa den e trabou di pionero regular. Djis despues, mi a logra paga mi debenan. E ganashi cu mi tawata haci di mi bendemento di cos tawata masha tiki, pero awor mi por a percura pa mi mes. Loke Yehova a percura tawata suficiente pa mi.

Mi Ta “Horta” Mi Rumannan

Mi prome precupacion, asina cu mi tawata riba mi mes, tawata pa yuda mi rumannan di cas spiritualmente. Debi na prehuicio y hopi desconfiansa, mi tata tawata masha contra cu mi a bira Testigo di Yehova. Pues, con lo mi por a yuda mi rumannan di cas siña tocante Bijbel? Mi a ofrece pa mantene mi ruman homber mas jong Ernest, y asina Tata a lag’e bin keda serca mi. Den poco tempo Ernest a acepta e berdad y a batisa na 1956. Esei a haci mi tata su oposicion mas fuerte. No obstante, mi ruman mohe cu ya caba tawata casa tambe a bin den e berdad hunto cu su casa. Ora mi a haci areglo pa mi di dos ruman mohe, Felicia, pasa facansi di scol serca mi, Tata a bai di acuerdo pero di mala gana. No a tarda hopi cu Felicia tambe a batisa como Testigo di Yehova.

Na 1959, mi a bai cas pa busca Bernice, mi di tres ruman mohe, pa e bai keda cu Ernest. Ta na e ocasion ei mi tata a ataca mi, y acusa mi di ta horta su yiunan for di dje. E no a compronde cu ta nan a tuma nan decision personal di sirbi Yehova. Tata a hura cu nunca lo e no laga Bernice bai cu mi. Pero Yehova su poder no ta limita, pasobra e siguiente aña, Bernice a bin pasa facansi di scol serca Ernest. Anto mescos cu su otro ruman mohenan, e tambe a acepta e berdad y a batisa.

‘Siñando e Secreto’

Na september 1957, mi a cuminsa sirbi como pionero special, dedicando tur luna alrededor di 150 ora na e trabou di predica. Ami cu mi partner, Sunday Irogbelachi, a sirbi den e inmenso teritorio di e stad Akpu-na-abuo, na Etche. Na e prome asamblea di sircuito cu nos a asisti tempo cu nos tawata einan, 13 persona di nos grupo a batisa. Nos ta masha emociona awor pa mira cu tin 20 congregacion den e area ei!

Na 1958, mi a conoce Christiana Azuike, un pionero regular cu tawata asocia cu Congregacion Aba Oost. Mi a admira su celo, y na december di e aña ei nos a casa. Na principio di 1959, mi a ser nombra como superintendente biahero pa bishita y fortalece congregacionnan di nos rumannan spiritual. For di e aña ei te 1972, ami cu mi casa a bishita casi tur e congregacionnan di e pueblo di Yehova den parti oost y centralwest di Nigeria.

Congregacionnan tawata keda leu for di otro, y nos medio principal di transporte tawata bais. Ora nos a sirbi congregacionnan den stadnan grandi, nos rumannan a paga un taxi pa hiba nos na e siguiente congregacion. Den algun caso e cuartonan caminda nos a keda tawatin flur di tera y nan no tawatin blafon. Nos a drumi riba cama traha di palo di palma di raffia. Algun di e camanan tawatin un matras di yerba tapa cu un mat; otronan no tawatin matras mes. E cantidad y cualidad di cuminda no tawata un problema pa nos. Como cu nos a siña den pasado pa keda contento cu e necesidadnan di mas basico, nos a disfruta di loke sea nos anfitrionnan a sirbi nos, y nan tawata aprecia esei. Den e tempo ei algun stad no tawatin coriente, pesei semper nos tawata biaha cu nos lampi di kerosin. Sinembargo, apesar di e condicionnan dificil, nos a pasa dushi cu e congregacionnan.

Durante e añanan ei, nos a bin realisa e balor di Pablo su conseho: “Si nos tin cuminda y paña pa bisti, cu esakinan nos mester ta contento.” (1 Timoteo 6:8) Pablo door di pasa den contratiempo a siña un secreto cu a yud’e keda contento. Kico tawata e secreto? El a splica: “Mi sa di biba humilde, y mi sa tambe di biba den prosperidad; den cualkier y den tur circunstancia mi a siña e secreto di ta bariga yen y di pasa  hamber, tanto di tin abundancia como di pasa necesidad.” Nos tambe a siña e secreto ei. Pablo a bisa tambe: “Tur cos mi por den [“Dios”, NW], kende ta duna mi fortalesa.” (Filipensenan 4:12, 13) Esei a resulta hopi cierto den nos caso! Nos a disfruta di contentamento, hopi actividad cristian edificante y pas mental.

Sirbiendo e Congregacionnan Como Famia

Na fin di 1959 nos prome yiu homber, Joel, a nace, y na 1962, nos di dos yiu homber, Samuel. Ami cu Christiana a sigui den e trabou biahero, bishitando e congregacionnan cu e muchanan. Na 1967, e guera civil di Nigeria a cuminsa diripiente. Scolnan a sera como cu constantemente tawatin atakenan aereo. Mi casa tawata juffrouw di scol prome cu el a join mi den e trabou biahero, pesei durante e guera, el a siña nos yiunan na cas. Pa ora Samuel tawatin seis aña ya e por a lesa y skirbi. Despues di guera, ora cu el a bai scol e tawata dos klas mas avansa cu otro muchanan di su pareu.

Na e tempo ei, mientras cu nos tawata den e trabou biahero, nos no a realisa plenamente ta kico ta e dificultadnan relaciona cu criamento di yiu. Sinembargo, e echo cu na 1972 nos a haya e asignacion pa sirbi como pionero special a resulta probechoso pa nos. Esaki a permiti nos keda na un solo sitio y asina nos por a duna atencion adecua na e spiritualidad di nos famia. For di infancia nos a siña nos yiu hombernan e balor di keda contento cu loke Yehova ta percura. Na 1973, Samuel a batisa, y Joel a cuminsa traha como pionero regular den e mesun aña ei. Ambos yiu ta casa cu excelente mohenan cristian y awor ta lanta nan mes famia den e berdad.

E Miseria di Guera Civil

Ora cu e guera civil a cuminsa, mi tawata sirbiendo un congregacion na Onitsha como superintendente di sircuito, compaña pa mi famia. E guera ei a caba di combence nos di e banidad di acumula cosnan material of di confia den nan. Mi a mira hende core pa scapa nan bida, lagando nan pocesionnan balioso bandona riba caya.

Segun cu e guera a escala, nan a manda yama tur homber fisicamente fuerte pa drenta servicio militar. Nan a tortura hopi ruman homber cu a nenga di haci esei. Nos no por a cana rond libremente. Scarsedad di cuminda a causa hopi confusion y caos den e pais. Prijs di un liber di yuca a subi di 13 cen pa 25 florin, y un cup di salo a subi di 14 florin pa 75 florin. No tawatin lechi, manteca ni sucu. Pa sobrevivi, nos tawata mula papaya berde anto mescl’e cu un tiki hariña di yuca. Tambe nos a come tiracochi, casca di yuca, blachi di cayena, i un tipo di caña ku yama yerba di olifanti, si, cualkier blachi cu nos por a haya. Carni tawata un luho, pesei mi tawata coi lagadishi pa e muchanan come. Pero toch, sin importa con malo e situacion a bira, Yehova semper a percura pa nos.

Sinembargo, loke tawata asta mas peligroso ta e berans spiritual cu e guera a causa. Mayoria di e rumannan a hui for di e zona di guera bai biba den mondi of na otro pueblito, y den nan huida nan a perde mayoria, y tin biaha tur nan publicacionnan biblico. Fuera di esei, e blokeo di trupanan di gobierno a stroba literatura  biblico nobo di drenta den e area di Biafra. Aunke mayoria congregacion a purba tene e reunionnan, e spiritualidad di e rumannan a bai atras como cu instruccion for di sucursal no por a yega serca nan.

Luchando Contra Hamber Spiritual

Superintendentenan biahero a haci nan best pa sigui cu e areglo di bishita cada congregacion. Como cu hopi ruman a hui for di e pueblonan, mi tawata busca nan na unda cu mi por a haya nan. Na un ocasion mi a laga mi casa cu mi yiunan na un luga safe, y mi so a biaha durante seis siman, bishitando diferente pueblito y partinan di selva en busca di e rumannan.

Durante mi bishita na un congregacion na Ogbunka, mi a tende cu tawatin un grupo grandi di Testigo serca di e stad Isuochi den districto Okigwe. Pesei mi a manda un mensahe pa e rumannan den e area ei pa nan reuni na un plantacion di casho situa na e pueblito Umuaku. Ami cu un ruman homber di edad a bai riba bais na e plantacion cu a keda un 15 kilometer leu, caminda rond di 200 Testigo, incluso hende mohe y mucha, a reuni. Cu yudansa di un ruman mohe pionero mi a logra localisa un otro grupo di mas o menos shen Testigo, kendenan a busca refugio den e mondinan di Lomara.

Lawrence Ugwuegbu tawata un di e rumannan di un grupo di ruman cu curashi cu a biba na Owerri, un pueblo destrosa pa guera. El a informa mi cu tawatin cantidad di Testigo den e area di Ohaji. Nan no por a cana rond libremente, ya cu soldanan tawata ocupa e area. Nos dos a bai cu bais den e scuridad di anochi y a topa cu alrededor di 120 Testigo den un cura sera di un ruman caminda tawatin varios cas. Tambe nos a uza e oportunidad ei pa bishita otro Testigonan na nan luga di sconde.

Ruman Isaac Nwagwu a risca su bida pa yuda mi localisa mas ruman cu a haya nan obliga ta hui for di nan luga. El a hiba mi cu canoa na e otro banda di Riu Otamiri pa nos topa mas cu 150 Testigo cu a reuni na e pueblito Egbu-Etche. Un ruman homber a declara: “Esaki ta e miho dia di mi bida! Mi no a pensa nunca cu lo mi ta na bida pa mira un superintendente di sircuito atrobe. Si mi muri awor den e furia di e guera aki, mi ta muri satisfecho.”

Mi tawata core e riesgo di ser recluta pa servicio militar, pero bes tras bes mi a sinti Yehova su proteccion. Un atardi ora cu mi tawata regresa na e cas caminda mi tawata keda, despues di a reuni cu alrededor di 250 ruman, un grupo di comando militar a para mi na un baricada riba caminda. Nan a puntra: “Dicon bo no ta den ehersito?” Mi a splica nan cu mi tawata un misionero cu a predica e Reino di Dios. Mi a ripara cu nan tawata dicidido pa aresta mi. Despues di un oracion cortico y silencioso, mi a bisa nan capitan: “Por fabor, libra mi.” Sorprendi el a contesta: “Bo kiermen cu nos tin cu laga bo bai?” Mi a contest’e: “Si, libra mi.” E di: “Bo ta liber pa bai.” Ni un di e soldanan no a bisa un pia di palabra.—Salmo 65:1, 2.

Contentamento Ta Trece Mas Bendicion

Despues cu e guera a termina na aña 1970, mi a sigui sirbi den e trabou di sircuito.  Tawata un privilegio di por yuda reorganisa e congregacionnan. Despues, ami cu Christiana a sirbi como pionero special te na 1976, ora cu un biaha mas mi a wordo nombra como superintendente di sircuito. Meimei di aña 1976, mi a wordo asigna pa e trabou di districto. Shete aña despues, ami cu mi casa a haya e invitacion pa sirbi na e sucursal di Nigeria di Testigonan di Yehova, nos cas actual. Aki na e sucursal, semper nos ta sinti nos masha contento mes ora nos bolbe mira nos rumannan cu nos a topa durante e guera civil y na otro ocasion y kendenan ainda ta sirbi Yehova fielmente.

Atrabes di añanan, Christiana tawata un fiel compañera y un sosten maraviyoso pa mi. Su actitud positivo y determina, apesar cu desde 1978 e ta sufri di problemanan persistente di salu, a haci posibel cu mi por a sigui cumpli cu mi responsabilidadnan. Nos a experencia e berdad di e palabranan di e salmista: “SEÑOR lo sosten’e riba su cama di malesa.”—Salmo 41:3.

Ora mi wak bek riba e añanan aki di actividad teocratico, mi no por keda sin gradici Yehova pa su bendicionnan maraviyoso. Door di keda contento cu loke e ta percura, mi por bisa di berdad cu mi a haya gran felicidad. E goso di mira mi rumannan carnal, mi yiunan y nan famia, tur hunto sirbiendo Yehova hunto cu mi y mi casa ta un bendicion incomparabel. Yehova a satisface mi cu un bida rico y yen di proposito. Ningun di mi deseonan a keda sin cumpli.

[Nota]

[Cuadro na pagina 27]

Un Areglo Oportuno Ta Yuda Sostene e Hermandad

Meimei di e decada di 1960, enemistad entre gruponan etnico den parti nort y oost di Nigeria a hiba na disturbio, rebelion, kibramento di lei y violencia etnico. E desaroyonan aki a pone un presion grandi riba Testigonan di Yehova, kendenan tawata determina pa keda strictamente neutral den e conflicto. Nan a asesina rond di 20 Testigo. Mayoria Testigo a perde tur nan pertenencianan.

Dia 30 di mei 1967, e estadonan oost di Nigeria a sali for di e federacion, y a forma e Republica di Biafra. E ehersito federal a mobilisa y nan a impone un blokeo total contra Biafra. Esei a hiba na un guera civil violento y sangriento.

E posicion neutral di e Testigonan di Yehova den e area di Biafra a haci nan e blanco di atake. Corantnan tawata publica editorialnan masha pica y asina a instiga opinion publico contra nan. Sinembargo, Yehova a haci sigur cu su sirbidonan por a ricibi alimento spiritual. Con?

Na principio di 1968, autoridadnan a asigna un ambtenaar na un post na Europa y un otro ambtenaar na e pista di aterisahe di Biafra. Ambos persona tawata Testigo di Yehova. Nan asignacion a pone cada un na un punta di e unico conexion entre Biafra y e mundo exterior. E dos Testigonan aki a ofrece pa yuda cu e tarea peligroso di trece alimento spiritual den Biafra. Tambe nan a yuda suministra productonan di ausilio pa nos rumannan cu tawata den miseria. E dos rumannan aki a logra mantene e areglo sumamente importante aki durante henter e guera, cu a termina na 1970. Un di nan a bisa despues: “E areglo aki a bai mas aya di loke cualkier hende lo por a plania.”

[Plachi na pagina 23]

Na 1956

[Plachi na pagina 25]

Na 1965, hunto cu nos yiu hombernan, Joel y Samuel

[Plachi na pagina 26]

Ta un gran bendicion di por sirbi Yehova como famia!

[Plachi na pagina 27]

Awe, ami cu Christiana ta sirbi na e sucursal di Nigeria