Pregunta di Lector

Siendo cu e Levitanan no tawatin herencia den Israel antiguo, con bin e Levita Hanameel por a bende un tereno cu su primo Levita Yeremias, manera Yeremias 32:7 ta trece dilanti?

En conexion cu e Levitanan, Yehova a bisa Aron: “Lo bo no tin herencia den nan tera, ni posee ningun porcion meimei di nan [Israel].” (Numbernan 18:20) No obstante, e Levitanan a haya 48 stad hunto cu nan terenonan di yerba, plama na tur parti di e Tera Priminti. Un di e stadnan asigna na “e yiu hombernan di sacerdote Aron” tawata Anatot, stad natal di Yeremias.—Hosue 21:13-19; Numbernan 35:1-8; 1 Cronicanan 6:54, 60.

Na Levitico 25:32-34, nos ta lesa di instruccionnan spesifico cu Yehova a duna relaciona cu e “derecho permanente di redencion” di tereno (esta, e derecho di cumpra tereno bek) cu e Levitanan a posee. Aparentemente, cada famia Levita tawatin derecho di herencia pa posee, uza y negosha cierto terenonan asigna na nan. Di mes esei lo a encera cu nan por a bende y cumpra bek cierto tereno. * Den hopi sentido, e Levitanan a posee y uza nan propiedadnan mescos cu e Israelitanan di otro tribu.

Probablemente, e terenonan Levita a pasa den man di mayor pa yiu pa medio di herencia di famia. Sinembargo, pa loke ta e derecho di cumpra tereno bek, ta Levita cu Levita so por a haci transaccion di benta y compra. Ademas, ta parce cu bendemento y cumpramento bek di tereno a conta solamente pa terenonan den e stad, ya cu e Levitanan no tawatin mag di bende “luganan di yerba berde di nan stadnan” pasobra esakinan tawata “nan propiedad perpetuo.”—Levitico 25:32, 34.

Pues, aparentemente e tereno cu Yeremias a cumpra bek for di Hanameel tawata e tipo di tereno cu por a pasa den man di otro hende pa medio di e areglo di cumpra bek. Cu tur probabilidad e tawata situa paden di e fronteranan di e stad. Yehova mes a confirma cu “e cunucu” en cuestion tawata pertenece na Hanameel y cu Yeremias tawatin “e derecho di redencion pa cumpr’e.” (Yeremias 32:6, 7) Yehova a uza e transaccion aki simbolicamente pa reforsa su promesa cu e Israelitanan lo a bini bek pa reclama nan herencia di tera despues di a pasa un periodo di exilio na Babilonia.—Yeremias 32:13-15.

No tin ningun indicacion cu Hanameel a bira doño di e tereno na Anatot na un manera ilegal. Tampoco no tin ningun indicacion cu el a kibra cu e lei di Yehova ora el a invita Yeremias pa cumpra e tereno aki na Anatot, ni cu Yeremias a eherce su derecho di cumpra bek na un manera incorecto ora el a cumpra e cunucu.—Yeremias 32:8-15.

[Nota]