Sirbidonan di Dios Ta Manera Palo Con Asina?

E SALMISTA, papiando di un persona cu tin delicia den principionan biblico y cu ta aplica nan den su bida, a remarca: “E lo ta manera un palo, planta canto di coridanan di awa, cu ta duna su fruta na su tempo, y su blachi no ta marchita; y tur loke cu e haci ta prospera.” (Salmo 1:1-3) Dicon esaki ta un bon comparacion?

Palo por biba masha largo mes. Por ehempel, tin algun palo di oleifi den region di Mediteraneo cu hende ta kere ta un mil pa dos mil aña bieu. Asina tambe e palonan di baobab di Africa central ta bira hopi bieu, y tin un palo di pino aristata na California cu nan ta kere tin rond di 4.600 aña. Den un selva, palonan madura hopi bes ta probechoso pa nan medioambiente. Por ehempel, palonan halto ta percura un sombra protectivo pa matanan jong, y e foyonan cu ta cai for di e palonan ta gorda e tera.

Normalmente bo ta haya cu e palonan mas halto na mundo ta crece hunto na boshi den selva, caminda palonan individual ta sostene otro. Como cu nan raiz kisas ta mara den otro, varios palo hunto tin mas chens di resisti un tormenta cu un palo solitario meimei di un sabana. Tambe ora un palo tin hopi raiz cu ta plama bai leu, esei ta yud’e saca suficiente awa y nutricion for di suela. Den algun caso e raiznan kisas ta penetra bai mas hundo den tera cu e haltura di e palo, of e raiznan kisas ta plama horizontalmente y ta bai mas leu cu caminda e ramanan di e palo ta yega.

Apostel Pablo kisas tawata referi indirectamente na un palo ora el a splica cu cristiannan mester sigui ‘cana den Cristo, siendo firmemente araiga [of, hancra cu raiz] y edifica den dje y estableci den e fe.’ (Colosensenan 2:6, 7) Si, cristiannan por keda firme den nan fe solamente si nan tene firmemente na Cristo mescos cu un palo ta tene firmemente na tera cu su raiznan fuerte.—1 Pedro 2:21.

Den ki maneranan mas por compara e sirbidonan di Dios cu palo? Wel, mescos cu palonan den un mondi ta haya sosten di otro palonan den bicindario, asina tur esnan cu keda serca di e congregacion cristian ta haya sosten di rumannan den fe. (Galationan 6:2) Cristiannan fiel y madura, cu na moda di papia tin raiznan spiritual hundo, ta yuda creyentenan mas nobo pa keda firme den fe, asta ora esakinan ta confronta oposicion fuerte manera tormenta. (Romanonan 1:11, 12) Cristiannan mas nobo por “bona” den e “sombra” protectivo di e sirbidonan di Dios mas experencia. (Romanonan 15:1) Y tur miembro di e congregacion cristian mundial ta beneficia di e nutricion spiritual fortificante cu e resto ungi—e palonan grandi of “eiknan di husticia”—ta percura.—Isaias 61:3.

Ta masha excitante cu tur sirbido di Dios tin e prospecto di experencia cumplimento di e promesa cu nos ta haya na Isaias 65:22, cu ta bisa: “Manera e dianan di un palo, asina e dianan di mi pueblo lo ta.”

[Reconocemento pa Potret na pagina 28]

Godo-Foto