Un “Esclabo” Cu Ta Fiel y Tambe Prudente
Un “Esclabo” Cu Ta Fiel y Tambe Prudente
“Ken anto ta e esclabo fiel y prudente cu su shon a laga encarga cu su cas?” —MATEO 24:45.
1, 2. Dicon ta masha importante awe pa nos ricibi un suministro regular di cuminda spiritual?
RIBA diamars atardi 11 di nisan di aña 33 di nos era, Hesus su disipelnan a hacie un pregunta cu tin nificacion profundo pa nos awe. Nan a puntr’e: “Kico lo ta e señal di bo binida y di e fin di tempo?” Como contesta Hesus a duna un profecia remarcabel. El a papia di un periodo turbulento di guera, hamber, temblor y malesa. Y esei simplemente lo tawata manera “e principio di dolornan di parto.” E situacion lo a bira piyo. Ki un prospecto spantoso!—Mateo 24:3, 7, 8, 15-22; Lucas 21:10, 11.
2 Desde aña 1914, mayoria aspecto di e profecia di Hesus a cumpli. Humanidad ta sintiendo plenamente e ‘dolornan manera di parto.’ Sinembargo, cristiannan berdadero no tin nodi sinti miedo. Hesus a priminti cu lo e sostene nan cu cuminda spiritual nutritivo. Siendo cu awor Hesus ta den shelo, ki areglo el a haci pa nos aki riba tera ricibi nos suministro di cuminda spiritual?
3. Ki areglo Hesus a haci pa nos ricibi “cuminda na su debido tempo”?
3 Hesus mes a indica e contesta riba e pregunta ei. Durante su profecia remarcabel el a puntra: “Ken anto ta e esclabo fiel y prudente cu su shon a laga encarga cu su cas pa duna nan [“e otro crianan”, BPK] nan cuminda na su debido tempo?” Anto el a sigui bisa: “Bendiciona ta e esclabo ei, cu su shon ta haya ta haci asina ora cu e bin. Di berdad mi ta bisa boso cu e lo lag’e keda na encargo di tur su propiedadnan.” (Mateo 24:45-47) Si, lo tin un “esclabo” cu e Shon a asigna pa percura cuminda spiritual, un “esclabo” cu ta fiel y tambe prudente. E esclabo ei tawata un cierto persona, un grupo di persona ku ta sigui otro of algo otro? Ya cu e esclabo fiel ta suministra e cuminda spiritual tan necesario, ta cumbini nos pa haya e contesta.
Un Persona Individual of un Grupo?
4. Con bin nos sa cu “e esclabo fiel y prudente” no por ta un solo persona?
4 “E esclabo fiel y prudente” no por ta un persona. Dicon no? Pasobra e esclabo a cuminsa sirbi cuminda spiritual for di den prome siglo, y segun Hesus, e esclabo lo ta haci esei ainda ora cu e Shon yega na 1914. Esei lo a abarca alrededor di 1.900 aña di sirbishi fiel pa un solo persona. Ni sikiera Matusalen no a biba dje largo ei!—Genesis 5:27.
5. Splica dicon e expresion “esclabo fiel y prudente” no ta aplica na cada cristian individual.
5 Wel, acaso e expresion “esclabo fiel y prudente” ta aplica den un sentido general na cada cristian individual? Ta berdad cu tur cristian mester ta fiel y prudente; sinembargo, Hesus claramente tawatin mas cu esei na mente ora cu el a papia di “e esclabo fiel y prudente.” Con nos por sa? Pasobra el a bisa cu ‘ora e shon bin’ lo e pone e esclabo “na encargo di tur su propiedadnan.” Con lo por ta posibel pa pone cada cristian individual na encargo di tur cos, riba “tur” e propiedadnan di Señor? Ta imposibel!
6. Con e nacion di Israel lo mester a funciona como Dios su “sirbido” of “esclabo”?
6 E unico conclusion rasonabel ta anto cu Hesus tawata referi na un grupo di cristian como “e esclabo fiel y prudente.” Ta posibel cu por tin un esclabo colectivo? Si. Sheteshen aña prome cu Cristo, Yehova a referi na henter e nacion di Israel como “mi testigonan” y “mi sirbido cu mi a scohe.” (Isaias 43:10) Tur miembro di e nacion di Israel for di aña 1513 prome cu nos era—tempo cu e Lei di Moises a wordo duna—te na Pentecoste di aña 33 di nos era, tawata parti di e sirbido colectivo aki. Mayoria Israelita no a participa directamente den administracion di asuntonan di e nacion of den cordina su programa di percura cuminda spiritual. Yehova a uza rei, hues, profeta, sacerdote y Levita pa cumpli cu e tareanan ei. Sinembargo, como nacion, Israel mester a representa Yehova su soberania y proclama su alabansa entre e nacionnan. Cada Israelita mester tawata un testigo di Yehova.—Deuteronomio 26:19; Isaias 43:21; Malakias 2:7; Romanonan 3:1, 2.
Un “Sirbido” Ta Wordo Despedi
7. Dicon e nacion di Israel di antiguedad a ser descualifica como Dios su “sirbido”?
7 Siendo cu siglonan pasa Israel tawata Dios su “sirbido”, ta e mes tambe ta e esclabo cu Hesus a papia di dje? No, pasobra lamentablemente Israel di antiguedad no a resulta di ta fiel ni prudente. Pablo a resumi e situacion ora el a cita Yehova su palabranan dirigi na e nacion: “E nomber di Dios ta wordo blasfema meimei di e paganonan pa boso motibo.” (Romanonan 2:24) En berdad, Israel a culmina un historia largo di rebelion door di rechasa Hesus, y na e punto ei Yehova a rechasa nan.—Mateo 21:42, 43.
8. Na ki tempo a nombra un “sirbido” pa remplasa Israel, y bou di ki circunstancia?
8 E infieldad aki di parti di e “sirbido”, Israel, no a nifica cu nunca mas adoradonan fiel lo ricibi cuminda spiritual. Na Pentecoste di aña 33, 50 dia despues di Hesus su resureccion, spirito santo a wordo drama riba mas o menos 120 di su disipelnan den un sala ariba den Herusalem. Na e momento ei, un nacion nobo a nace. Apropiadamente, su nacemento a keda anuncia publicamente ora cu su miembronan cu curashi a cuminsa conta e habitantenan di Herusalem tocante “e echonan poderoso di Dios.” (Echonan 2:11) Pues, e nacion nobo ei, un nacion spiritual, a bira e “sirbido” cu lo a proclama Yehova su gloria na e nacionnan y percura cuminda na e debido tempo. (1 Pedro 2:9) Ta na su luga cu despues el a wordo yama “e Israel di Dios.”—Galationan 6:16.
9. (a) Ken ta forma “e esclabo fiel y prudente”? (b) Ken ta e “otro crianan” di e cas?
9 Tur miembro di “e Israel di Dios” ta un cristian dedica y batisa, ungi cu spirito santo y cu un speransa celestial. Pesei, mescos cu tur Israelita na bida na cualkier momento durante e periodo di 1513 prome cu nos era te cu Pentecoste 33 di nos era tawata parti di e sirbido colectivo precristian, asina tambe e expresion “esclabo fiel y prudente” ta referi na tur miembro di e nacion spiritual ungi ei como grupo riba tera na cualkier momento en particular for di aña 33 te cu awor. Pero ken ta e “otro crianan” di e cas cu ta ricibi nutricion spiritual for di e esclabo? Den e prome siglo di nos era, tur cristian tawatin e speransa celestial. Consecuentemente, e otro crianan tambe tawata cristiannan ungi, pero no mira como un grupo, sino como personanan individual. Nan tur, incluso esnan cu puesto di responsabilidad den e congregacion, tawatin mester di cuminda spiritual for di e esclabo.—1 Corintionan 12:12, 19-27; Hebreonan 5:11-13; 2 Pedro 3:15, 16.
“Cada Un Su Tarea”
10, 11. Con bin nos sa cu no ta tur miembro di e grupo di esclabo tin e mesun asignacion di trabou?
10 Aunke “e Israel di Dios” ta e grupo di esclabo fiel y prudente cu tin un asignacion di trabou, cada miembro tambe tin responsabilidadnan personal. E palabranan di Hesus cu ta para skirbi na Marco 13:34 ta mustra esaki bon cla. El a bisa: “Ta manera un hende cu a bai haci un biahe, kende a laga su cas y a pon’e na encargo di su esclabonan, a duna cada un su tarea y tambe a ordena e wardado di porta pa keda alerta.” Pues cada miembro di e grupo di esclabo a ricibi un asignacion: aumenta Cristo su propiedadnan riba tera. Cada miembro ta cumpli cu su tarea segun su capasidad y oportunidad.—Mateo 25:14, 15.
11 Ademas, apostel Pedro a bisa cristiannan ungi di su tempo: “Como cu cada un a ricibi un don special, uz’e pa sirbi otro como bon mayordomonan di e gracia multiforme di Dios.” (1 Pedro 4:10) Pues anto, e unginan ei tin e responsabilidad di sirbi otro uzando e donnan cu Dios a duna nan. Mas aleu, Pedro su palabranan ta indica cu no ta tur cristian lo tawatin e mesun capasidad, responsabilidad of privilegio. Sinembargo, cada miembro di e grupo di esclabo lo por a contribui den un manera of otro na e crecemento di e nacion spiritual. Con asina?
12. Con cada miembro di e grupo di esclabo, sea homber of mohe, a contribui na e crecemento di e esclabo?
12 Na prome luga, cada un tawatin e responsabilidad di ta un testigo di Yehova, door di predica e bon nobo di e Reino. (Isaias 43:10-12; Mateo 24:14) Djis prome cu Hesus a subi na shelo el a ordena tur su disipelnan fiel, tanto homber como mohe, pa nan ta maestro. El a bisa: “Bai y haci tur e nacionnan disipel di mi, y batisa nan den nomber di e Tata y di e Yiu y di e spirito santo, y siña nan pa cumpli cu tur loke mi a ordena boso; y mira, mi ta cu boso semper, te na fin di mundo.”—Mateo 28:19, 20.
13. Ki privilegio tur ungi tawatin?
13 Ora nan a haya disipelnan nobo, mester a siña nan cuidadosamente pa cumpli cu tur loke Cristo a manda su disipelnan haci. Cu tempo, personanan cu a reacciona faborabel a bira cualifica pa siña otro hende. Cuminda spiritual nutritivo a wordo percura pa prospectivo miembronan di e grupo di esclabo den hopi nacion. Tur cristian ungi, homber y mohe, a cumpli cu e tarea di haci disipel. (Echonan 2:17, 18) E trabou aki lo mester a sigui for di tempo cu e esclabo a cuminsa nobo nobo cu su trabou te na fin di e sistema di cosnan aki.
14. E privilegio di siña hende den congregacion tawata limita na ken, y kico fiel mohenan ungi a pensa di esei?
14 Unginan resien batisa a bira parti di e esclabo, y sin importa ken a siña nan inicialmente, nan tambe a ricibi instruccion for di miembronan di e congregacion cu tawatin e cualificacionnan biblico pa sirbi como anciano. (1 Timoteo 3:1-7; Tito 1:6-9) Pues, e hombernan nombra aki tawatin e privilegio di contribui na e crecemento di e nacion den un manera special. Fiel mohenan cristian ungi no tawata rabia pasobra ta solamente hende homber cristian a wordo asigna pa siña den e congregacion. (1 Corintionan 14:34, 35) Al contrario, nan tawata contento di por beneficia di e trabou duro di e miembronan masculino di e congregacion y tawata gradicido pa e privilegionan cu tawatin disponibel pa hende mohe, entre otro e privilegio di hiba bon noticia na otro hende. Awe rumannan mohe ungi yen di celo ta desplega e mesun actitud humilde, sea cu e ancianonan nombra ta ungi of no.
15. Kico tawata un di e fuentenan principal di cuminda spiritual den prome siglo, y ken a hiba delantera den partie?
15 E cuminda spiritual basico duna den prome siglo a bini directamente for di pen di e apostelnan y otro disipelnan cu tawata hiba delantera. E cartanan cu nan a skirbi—specialmente esnan cu nos ta haya entre e 27 bukinan inspira cu ta forma e Scritura Griego Cristian—tawata circula entre e congregacionnan y sin duda a forma e base di loke e ancianonan local tawata siña e congregacion. Den e manera aki representantenan di e esclabo fielmente a distribui cuminda spiritual nutritivo pa cristiannan sinsero. E grupo di esclabo di prome siglo a cumpli fielmente cu su tarea.
E “Esclabo” 19 Siglo Despues
16, 17. Con e grupo di esclabo a duna prueba di ta fiel den cumpli cu su asignacion durante e añanan prome cu 1914?
16 Ke tal djawe? Ora Hesus su presencia a cuminsa na aña 1914, el a haya un grupo di cristiannan ungi cu fielmente tawata parti cuminda na e debido tempo? Sigur cu si. E grupo aki por a wordo identifica claramente debi na e bon fruta cu e tawata produci. (Mateo 7:20) Entretanto, historia a proba cu e identificacion aki tawata corecto.
17 Tempo cu Hesus a yega, tawatin rond di 5.000 cria cu tawata ocupa plamando berdadnan biblico. E trahadonan tawata poco, pero e esclabo a uza varios metodo ingenioso pa plama e bon nobo. (Mateo 9:38) Por ehempel, nan a haci areglo pa publica sermonnan riba temanan biblico den mas cu 2.000 corant. Di e manera aki, e berdad di e Palabra di Dios a alcansa miles di lector den un solo biaha. Ademas, nan a prepara un programa di ocho ora cu a combina slides di colo cu pelicula. Gracias na e presentacion inovativo aki, nan por a transmiti e mensahe di Bijbel—for di principio di Creacion te na fin di e Reinado di Mil Aña di Cristo—na auditorionan cu a suma en total mas cu nuebe miyon hende riba tres continente. Literatura imprimi tawata un otro medio cu e esclabo a uza. Por ehempel, na 1914 nan a publica rond di 50.000 ehemplar di e revista aki, E Toren di Vigilancia.
18. Na ki tempo Hesus a nombra e esclabo riba tur su propiedadnan, y dicon?
18 Si, ora e Shon a yega, el a haya su esclabo fiel ta alimenta e otro crianan di cas diligentemente y tambe ta predica e bon nobo. Awor responsabilidadnan mas grandi tawata spera e esclabo ei. Hesus a bisa: “Di berdad mi ta bisa boso cu e lo lag’e keda na encargo di tur su propiedadnan.” (Mateo 24:47) Hesus a haci esaki na 1919, despues cu e esclabo a pasa door di un periodo di test. Pero dicon “e esclabo fiel y prudente” a ricibi responsabilidadnan mas grandi? Pasobra e propiedadnan di e Shon a aumenta. Hesus a ricibi e puesto di rei na 1914.
19. Splica con e necesidadnan spiritual di e “multitud grandi” a wordo satisface.
19 Kico ta e propiedadnan cu e Shon resien corona a encarga na su esclabo fiel? Tur e cosnan spiritual riba tera cu ta pertenece na e Shon. Por ehempel, dos decada despues di Hesus su entronisacion na 1914, “un multitud grandi” di ‘otro carne’ a keda identifica. (Revelacion 7:9; Huan 10:16) Esakinan no tawata miembronan ungi di “e Israel di Dios”, sino hende homber y mohe sinsero cu tawatin e speransa di biba riba tera, kendenan a stima Yehova y kier a sirbie mescos cu e unginan. De echo, nan a bisa “e esclabo fiel y prudente”: “Laga nos bai cu boso, pasobra nos a tende cu Dios ta cu boso.” (Zacarias 8:23) E cristiannan resien batisa aki a come di e mesun cuminda spiritual nutritivo cu e crianan ungi, y e dos gruponan aki di e tempo ei padilanti a sigui come na e mesun mesa spiritual. Esaki tawata un bendicion grandi pa miembronan di e “multitud grandi”!
20. Ki papel e “multitud grandi” a hunga den aumenta e propiedadnan di Señor?
20 E miembronan di e “multitud grandi” gustosamente a join e grupo di esclabo ungi como predicadonan di e bon nobo. Segun cu nan a predica, e Shon su propiedadnan riba tera a aumenta, y esei a pone cu “e esclabo fiel y prudente” a haya mas responsabilidad. Como cu e cantidad di hende cu tawata kier siña e berdad a aumenta, a bira necesario pa expande e facilidadnan di imprenta pa por satisface e demanda pa literatura biblico. Sucursalnan di Testigonan di Yehova a keda estableci den un pais tras di otro. Nan a manda misionero “te na e parti mas aleha di mundo.” (Echonan 1:8) Di aproximadamente cinco mil cristian ungi na 1914, e fila di alabadonan di Dios a aumenta na mas cu seis miyon awe, y mayoria ta di e “multitud grandi.” Si, e propiedadnan di e Rei a aumenta masha hopi mes desde su coronacion na 1914!
21. Cua ta e dos parabolanan cu nos lo considera den nos siguiente studio?
21 Tur esaki ta mustra cu e esclabo tawata “fiel y prudente.” Un poco despues cu Hesus a papia di “e esclabo fiel y prudente”, el a duna dos comparacion of parabola cu a resalta e cualidadnan ei: e parabola di e birgennan sabi (of, prudente) y esnan bobo y e parabola di e talentonan. (Mateo 25:1-30) Esei ta interesante! Ki nificacion e parabolanan ei tin pa nos awe? Nos lo considera e pregunta aki den e siguiente articulo.
Kico Bo Ta Pensa?
• Ken ta forma “e esclabo fiel y prudente”?
• Ken ta e “otro crianan” di e cas?
• Na ki tempo e esclabo fiel a keda encarga cu tur e propiedadnan di Señor, y dicon ta na e tempo ei?
• Ken a yuda aumenta e propiedadnan di Señor den decadanan resien, y den ki manera?
[Preguntanan di Estudio]
[Plachinan na pagina 10]
E grupo di esclabo di prome siglo a cumpli fielmente cu su tarea