Aod Ta Kibra e Yugo di e Opresor

ESAKI ta un historia real di curashi y tactica. El a tuma luga un 3.000 aña pasa. E relato biblico ta cuminsa cu e palabranan: “Awor e yiunan di Israel a bolbe haci maldad den bista di SEÑOR. Pesei SEÑOR a duna Eglon, rei di Moab, forsa contra Israel, pasobra nan a haci maldad den bista di SEÑOR. Y el a reuni e yiu hombernan di Amon y di Amalek serca dje; y el a bai y a derota Israel, y nan a podera di e stad di palma. Y e yiunan di Israel a sirbi Eglon, rei di Moab, diesocho aña.”—Huesnan 3:12-14.

E teritorio di Moab tawata keda pariba di Riu Yordan y Lama Morto. Pero e Moabitanan a crusa e riu y a ocupa e area rond di Yerico, “e stad di palma”, y asina a logra domina e Israelitanan. (Deuteronomio 34:3) E Rei Moabita, Eglon, “un homber masha gordo mes”, ya pa casi dos decada tawata exigi un tributo masha pisa y humiliante for di Israel. (Huesnan 3:17) Sinembargo, ta su demanda pa tributo a habri un caminda pa elimina e tirano.

E registro ta bisa: “Ora e yiunan di Israel a sclama na SEÑOR, SEÑOR a lanta un libertado pa nan, esta, Aod [of, Ehud], yiu homber di Gera e Benjaminita, un homber robesou [zurdo]. Y e yiunan di Israel a mand’e cu tributo serca Eglon, rei di Moab.” (Huesnan 3:15) Ta Yehova lo a percura pa nan scohe Aod pa presenta e tributo. Bijbel no ta bisa si el a yega di haci esei un biaha caba. Sinembargo, e manera cu Aod a prepara cuidadosamente pa e encuentro cu Eglon y e tacticanan cu el a uza ta indica cu kisas e tawata un poco familiarisa cu e palacio di Eglon y tawata sa kico pa spera einan. Den henter e asunto aki, e echo cu e tawata robesou tawata importante.

Un Homber cu un Incapasidad of un Guerero?

Na Hebreo e expresion pa un persona robesou ta nifica literalmente ‘sera, lam of mara na man drechi.’ Acaso esaki ta nifica cu Aod tawatin un incapasidad, cu podise su man drechi tawata mancaron? Considera loke Bijbel ta bisa di e ‘sheteshen hombernan scohi’ di e tribu di Benjamin cu tawata robesou. Huesnan 20:16 ta declara: “Cada un di nan por a slinger un piedra tira riba un cabei, sin hera.” Muy probablemente a scohe nan pa nan habilidad extraordinario den bataya. Segun algun erudito biblico, e palabra pa hende robesou tawata indica un persona “cu a uza tanto su man robes como su man drechi.”—Huesnan 3:15, The Douay Version.

De echo, e tribu di Benjamin tawata famoso pa su hombernan robesou. Prome Cronicanan 12:1 y 2 ta conta di Benjaminitanan kendenan “tawata entre e hombernan  poderoso cu a yuda [David] den guera. Nan tawata arma cu boog y tawata uza tanto man drechi como man robes pa tira piedra cu slinger y pa tira flecha cu boog.” Segun un buki di referencia, nan lo por a logra e habilidad aki “door di mara e brasa drechi di muchanan chikito—djeinan ta bin e expresion ‘mara na su man drechi’—y entrena nan pa bira habil cu nan man robes.” E enemigonan di Israel normalmente tawata hombernan entrena pa bringa contra guereronan cu ta uza man drechi. Pesei un gran parti di un enemigo su entrenamento por a resulta en vano si inesperadamente e topa un solda robesou.

“Un Mensahe Secreto” pa Rei

Aod su prome paso tawata pa prepara “pa su mes un spada”, un spada di dos filo cu tawata suficiente cortico cu e por a scond’e bou di su paña. Podise el a spera cu nan lo ristr’e. Normalmente hende tawata carga spada na e banda robes di nan curpa, caminda un hende cu ta uza su man drechi lo por a sac’e lihe. Como cu Aod tawata robesou, el a sconde su arma “na su bil di pia drechi, bou di su mantel”, caminda lo tawatin menos chens cu e guardianan di Rei ta ristr’e. Pesei sin problema, “el a presenta e tributo na Eglon, rei di Moab.”—Huesnan 3:16, 17.

Bijbel no ta duna detaye di e susesonan inicial den e palacio di Eglon. Simplemente e ta bisa: “Y a sosode cu ora [Aod] a caba di presenta e tributo, el a bisa e hendenan cu a carga e tributo pa nan bai.” (Huesnan 3:18) Aod a presenta e tributo, despues el a compaña e hendenan cu a carga e tributo na un distancia safe for di e residencia di Eglon, caba el a manda nan bai y e mes a bai bek na e residencia. Dicon? E hendenan ei tawata hunto cu ne como proteccion, pa protocol of podise djis pa carga e tributo? Y acaso e tawata kier pa nan bai for di eibanda pa nan propio siguridad prome cu el a ehecuta su plan? Sea cual sea su motibo, cu curashi Aod a regresa su so na e residencia di Eglon.

“[Aod] mes a bira bin bek for di e idolonan cu tawata na Gilgal, y a bisa: ‘Mi tin un mensahe secreto pa bo, o Rei.’” E Scritura no ta splica con el a haci pa e bolbe haya chens di bai serca Eglon. Acaso e guardianan no mester a sospecha algo? Of nan a pensa cu un solo Israelita no por forma un peliger pa nan señor? E echo cu Aod a regresa su so lo a crea e impresion cu e tawata traiciona su paisanonan? Sea cual sea e caso, Aod a purba p’e ta su so cu Rei, y esei a sosode.—Huesnan 3:19.

E relato inspira ta sigui conta: “Aod a bin serca [Eglon] ora cu e tawata sinta su so den su camber ariba, un camber fresco. Y Aod a bisa: ‘Mi tin un mensahe di Dios pa bo.’” Aod no tawata referi na un mensahe verbal di Dios. Aod tawatin pensa di uza su spada. Pero e Rei podise a spera di tende un mensahe di su dios Kemos, y “el a lanta for di su asiento.” Lihe manera lamper, Aod a cohe su arma y a hinc’e den Eglon su bariga. “E cabo tambe a drenta tras di e filo, y e vet a tapa e filo, . . . y su sushi tawata sali afo”, sea via e herida of imboluntariamente Eglon su tripanan a cuminsa saca sushi di patras.—Huesnan 3:20-22.

Un Escape sin Problema

Sin perde tempo pa saca su spada, “Aod a sali bai den e coredor, y su tras el a grendel e portanan di e camber ariba. Ora cu el a sali bai, e sirbidonan di Eglon a bin wak; y mira, e portanan di e camber ariba tawata na grendel; y nan a bisa: ‘Ta su necesidad e lo ta haci den e camber paden di e cas.’”—Huesnan 3:23, 24.

Kico tawata “e coredor” via cua Aod a sali? Segun un buki di referencia, “e nificacion exacto [di e palabra Hebreo] no ta conoci.”  Probablemente e tawata un sorto di buraco pa aire pasa. Acaso Aod a grendel e portanan di paden anto sali di un otro caminda? Of el a lok e portanan di pafo cu un yabi cu el a coi di e Rei morto? El a cana pasa trankil banda di e guardianan como si fuera nada no a sosode? E Scritura no ta bisa. Sinembargo, sea cual sea e metodo cu Aod a uza, e sirbidonan di Eglon no a sospecha mesora cu algo no ta bon ora nan a haya e portanan na grendel. Simplemente nan a pensa cu “ta su necesidad” Rei lo ta haci.

Mientras cu e sirbidonan di rei tawata tarda, Aod a scapa. Anto el a manda yama su paisanonan y a bisa: “Persigui nan, pasobra SEÑOR a entrega boso enemigonan, e Moabitanan, den boso man.” Door di apodera di e luganan strategico caminda por a crusa Riu Yordan, Aod su hombernan a sera e ruta via cua e Moabitanan sin lider lo por a scapa bai nan pais. Pues, “e tempo ei [e Israelitanan] a mata como dies mil Moabita, tur, hombernan robusto y balente, y ningun no a scapa. Asina Moab a wordo someti e dia ei bou di man di Israel. Y e tera tawatin sosiego pa ochenta aña.”—Huesnan 3:25-30.

Lesnan Cu Nos Por Saca Afo

Loke a sosode den tempo di Aod ta siña nos cu ora nos ta haci loke ta malo den bista di Yehova esei ta trece consecuencianan teribel. Di otro banda, Yehova ta yuda esnan cu repenti y acudi na dje.

Aod su plan tawatin exito, no debi na su astucia of debi na incompetencia di e enemigo. E cumplimento di Dios su proposito no ta depende di factornan humano. E motibo principal di Aod su exito tawata e echo cu Dios a apoy’e segun cu el a actua na harmonia cu Su boluntad invencibel pa libra Su pueblo. Ta Yehova a lanta Aod “y ora SEÑOR a lanta huesnan pa [su pueblo], SEÑOR tawata cu e hues.”—Huesnan 2:18; 3:15.