E Splendor di Yehova Su Creacion

‘Bo Ta Mas Mahestuoso cu e Seronan’

E BISTA di salimento di solo for di riba top di Sero Fuji ta un experencia inolvidabel. Un solo oraño ta manda su rayonan riba horizonte, iluminando e sneu blanco y barancanan di lava shinishi. Segun cu un dia nobo ta cuminsa, e sombra cla di e sero ta plama rapidamente kilometernan leu riba seronan y vayenan.

Mescos cu Sero Fuji—skirbi un tempo cu signonan cu ta nifica “sin igual”—seronan mahestuoso semper a fasina nos. Nan tamaño enorme por asta duna nos e sintimento cu nos ta insignificante! E seronan aki ta asina mahestuoso cu un tempo hopi hende tawata kere cu riba e topnan di mas halto—hopi bes tapa pa nubia y neblina—tin diosnan ta biba.

Pero e unico Dios cu seronan halto ta alaba realmente ta nan Creador magistral, Yehova. E ta ‘Esun cu a forma seronan’, su so. (Amos 4:13) Casi un cuart di tera ta consisti di sero, y ora Dios a crea nos planeta, el a establece e forsanan cu finalmente a produci rij di sero espectacular (cordiyeranan) cu nan topnan na halto. (Salmo 95:4) Por ehempel, tin hende ta pensa cu ta un combinacion di forsanan enorme den profundidad di tera cu ta pusha bini ariba, hunto cu movemento di seccionnan di e capa di tera, a forma e cordiyeranan di Himalaya y Andes.

Como hende nos no por caba di compronde con ni pakico e seronan a wordo crea. En berdad, nos no por contesta e preguntanan aki cu Dios a haci husto Job: “Na unda bo tawata tempo cu mi [Yehova] a pone fundeshi di mundo? . . . Riba kico su fundeshinan a wordo wanta?”—Job 38:4-6.

Loke si nos sa ta cu nos bida ta depende di e seronan. Nan a yega di ser yama e torennan di awa den naturalesa, ya cu tur riu principal ta haya nan awa for di fuentenan den sero, y mita di e cantidad di hende cu tin riba tera ta depende di sero pa haya awa. (Salmo 104:13) Segun e revista New Scientist, “seis di e 20 matanan principal di cuminda ta origina den sero.” Ora e condicionnan ecologico ta den balansa atrobe den e mundo nobo cu Dios a priminti, “lo tin abundancia di maishi den e tera, riba cabes di e seronan.”—Salmo 72:16; 2 Pedro 3:13.

Ora ta trata di sero, hopi hende ta pensa riba e cordiyera di Alpen di Europa. E seronan aki, entre cua Sero Civetta cu bo por mira akibanda, ta duna testimonio maraviyoso di nan Creador. (Salmo 98:8) Nan ta alaba Yehova, esun cu “ta establece e seronan pa medio di su forsa.”—Salmo 65:6. *

E splendor di e seronan di Alpen en berdad ta algo asombroso. Y esei ta debi na su topnan cubri cu ijs, bahada di sero tur na sneu, nan vayenan y lagonan, y nan sabananan y murasnan. Rei David a identifica Yehova como esun “kende ta haci yerba crece riba e seronan.”—Salmo 147:8.

Kisas seronan menos halto—manera esnan aki na Guilin, China—por parce menos espectacular cu e seronan di Alpen, pero nan tin un bunitesa  unico. A lo largo di Riu Li, e tantisimo rijnan di sero di calki cu nan cabesnan cu ta punta na halto ta impresiona bishitantenan cu nan bunitesa. Ora bo wak awa cristalino pasa door di e seronan yen di neblina aki, esei por pone bo corda e palabranan di e salmista: “E [Yehova] ta manda fuentenan den e vayenan; nan ta core meimei di e seronan.”—Salmo 104:10.

Seronan mester impresiona nos en berdad pasobra nos ta reconoce nan como un parti mahestuoso di e Creador su provision amoroso pa e bienestar y goso di humanidad. Pero pa asombroso cu seronan por ta, nan no ta nada na comparacion cu e mahestad di Yehova. E ta sin duda “mas mahestuoso cu e seronan.”—Salmo 76:4.

[Nota]

[Cuadro/​Plachi na pagina 9]

Dies porshento di e poblacion di mundo ta biba den areanan di sero. Pero esei no ta un obstaculo insuperabel pa esnan cu ta declara e bon nobo di e Reino di Dios. E sirbidonan cristian aki ta bastante ocupa den hopi regionnan halto. Y “ki bunita riba e seronan ta e pianan di esun cu ta trece bon nobo, cu ta anuncia pas y ta trece bon nobo di felicidad, cu ta anuncia salbacion!”—Isaias 52:7.

E salmista a canta: “E seronan halto ta pa cabrito di mondi [“sero”, NW].” (Salmo 104:18) Cabrito di sero, manera e ibex di Nubia cu su bunita cachonan, ta un di e miho habitantenan di sero. E ta risca cana na rand di baranca asina smal cu bo no ta kere cu e lo por pasa. E ibex ta bon ekipa pa biba den luganan inaccesibel. Esaki ta debi parcialmente na e forma di su patanan. E peso di e cabrito por pone e split meimei di su patanan span, loke ta duna e animal un gara firme ora e ta para of ora e ta cana riba e parti smal di un baranca. Berdaderamente, e ibex ta un obra maestra di diseño!

[Plachi na pagina 9]

Sero Fuji, Honshu, Japon