“Cumpli Cu Bo Sirbishi Henteramente”

“Cumpli cu bo sirbishi henteramente.”—2 TIMOTEO 4:5, TN.

1, 2. Aunke tur cristian ta un predicado di Evangelio, kico Bijbel ta rekeri di ancianonan?

BO TA un proclamado di Reino? Si ta asina, gradici Yehova Dios pa e privilegio maraviyoso aki. Bo ta un anciano den congregacion? Esei ta un privilegio extra di Yehova. Pero nos no mester lubida nunca cu no ta nos educacion ni nos habilidad di papia bon ta loke ta haci nos competente pa sirbishi of pa sirbi como superintendente den congregacion. Ta Yehova ta haci nos competente pa sirbishi, y ta pasobra algun hende homber entre nos ta cumpli cu rekisitonan biblico spesifico, nan tin e privilegio di sirbi como superintendente.—2 Corintionan 3:5, 6; 1 Timoteo 3:1-7.

² Tur cristian dedica ta haci e trabou di predica e Evangelio, pero specialmente superintendentenan, of ancianonan, mester pone un bon ehempel den sirbishi. Dios y Cristo, y tambe otro Testigonan di Yehova, ta tuma nota di ancianonan “cu ta traha duro den predicamento y siñamento.” (1 Timoteo 5:17; Efesionan 5:23; Hebreonan 6:10-12) Den tur circunstancia, e siñansa di un anciano mester promove e salu spiritual di su oyentenan, pasobra apostel Pablo a bisa e superintendente Timoteo: “E tempo lo bin cu nan lo no soporta doctrina sano mas; ma al contrario, pa satisface nan mes deseonan, nan lo acumula pa nan mes siñadonan pa bisa nan loke nan horea cu ta kishiki kier tende, y lo bira nan horea for di e berdad, y lo bolbe na fabula. Ma abo, sea sobrio den tur cos, soporta afliccion, haci e trabou di un [predicado di Evangelio], cumpli cu bo ministerio.”—2 Timoteo 4:3-5.

3. Kico ancianonan mester haci pa doctrinanan falso no forma un peliger pa e spiritualidad di e congregacion?

³ Pa un anciano haci sigur cu doctrinanan falso no ta forma un peliger pa e spiritualidad di e congregacion, e tin cu cumpli cu e conseho di Pablo: “Sea spierta den tur cos, . . . cumpli cu bo sirbishi henteramente.” (2 Timoteo 4:5, TN) Si, un anciano tin cu ‘cumpli cu su sirbishi henteramente.’ E tin cu hacie den un manera completo y cabal. Un anciano cu ta efectua su sirbishi plenamente ta duna e debido atencion na tur su responsabilidadnan, sin neglisha nada y sin laga nada mita haci. Un homber asina ta fiel asta den cosnan chikito.—Lucas 12:48; 16:10.

4. Kico por yuda nos cumpli cu nos sirbishi henteramente?

⁴ Pa nos cumpli cu nos sirbishi henteramente no ta semper nos tin mester di mas tempo, loke si nos mester haci ta uza nos tempo bon. Un ritmo di actividad balansa y regular por yuda tur cristian logra cosnan den sirbishi. Pa un anciano por pasa mas tempo den sirbishi di veld, su asuntonan personal mester ta bon organisa pa asina e por balansa su programa y sa kico e mester delega na otro hende y con pa haci esei. (Hebreonan 13:17) Naturalmente, un anciano respeta tambe ta haci su parti, mescos cu Nehemias, kende a participa personalmente den reconstruccion di e murayanan di Herusalem. (Nehemias 5:16) Y tur sirbido di Yehova mester participa cu regularidad den e trabou di predica e Reino.—1 Corintionan 9:16-18.

5. Con nos mester mira sirbishi?

⁵ Como proclamadonan di e Reino celestial estableci, nos tin un tarea hopi gososo. Nos sigur tin masha aprecio pa e privilegio di por participa den predicacion di e bon nobo den henter mundo prome cu e fin yega. (Mateo 24:14) Aunke nos ta imperfecto, nos por cobra  animo for di e palabranan di Pablo: “Nos tin e tesoro aki [di sirbishi] den pochi di klei, pa e excelencia di e poder por ta di Dios y no di nos mes.” (2 Corintionan 4:7) Si, nos por rindi sirbishi aceptabel, pero solamente cu e poder y sabiduria cu Dios ta duna.—1 Corintionan 1:26-31.

Refleha Dios Su Gloria

6. Ki contraste a desaroya entre Israel natural y Israel spiritual?

⁶ Referiendo na cristiannan ungi, Pablo a bisa cu Dios “a haci nos competente pa ta sirbidonan di un aliansa nobo.” E apostel ta haci un contraste entre e aliansa nobo cu Dios a sera cu Israel spiritual mediante Hesucristo, y e aliansa bieu di e Lei cu el a sera cu Israel natural mediante Moises. Pablo ta agrega cu ora Moises a baha for di Sero Sinai cu e tablanan cu tawatin e Dies Mandamentonan, su cara tawata asina briyante cu e Israelitanan no por a keda wak e stret den su cara. Pero cu tempo, algo hopi mas serio a tuma luga pasobra “nan facultad mental a bira stompi” y un velo a bin riba nan curason. Sinembargo, ora un hende bira bek na Yehova den debocion sinsero, e velo ei ta ser kita. Referiendo na e sirbishi cu Dios a duna esnan den e aliansa nobo, Pablo ta bisa: “Nos tur, . . . cu cara sin velo ta refleha manera spiel e gloria di Yehova.” (2 Corintionan 3:6-8, 14-18, NW; Exodo 34:29-35) E “otro carnenan” di Hesus djawe tambe tin e privilegio di refleha e gloria di Yehova.—Huan 10:16.

7. Con hende por refleha Dios su gloria?

⁷ Con hende pecaminoso por refleha Dios su gloria, siendo cu ningun hende por mira su cara y keda na bida? (Exodo 33:20) Wel, fuera di Yehova su gloria personal, e tin tambe su proposito glorioso di vindica su soberania mediante su Reino. Berdadnan relaciona cu e Reino ei ta forma parti di “e cosnan magnifico di Dios” cu a cuminsa wordo proclama door di e personanan cu a ricibi spirito santo na Pentecoste di aña 33. (Echonan 2:11, NW) Cu guia di e spirito, nan por a cumpli henteramente cu e sirbishi confia na nan.—Echonan 1:8.

8. Relaciona cu e ministerio, kico Pablo tawata determina pa haci?

⁸ Pablo tawata determina pa no laga nada strob’e di cumpli cu su ministerio plenamente. El a skirbi: “Como cu nos tin e ministerio aki, segun e misericordia cu nos a ricibi, nos no ta perde animo, ma nos a renuncia e cosnan scondi pa motibo di berguensa y no ta cana cu astucia ni ta uza e palabra di Dios cu engaño, ma pa medio di e manifestacion di berdad nos ta recomenda nos mes na e consenshi di tur hende den bista di Dios.” (2 Corintionan 4:1, 2) Pa medio di loke Pablo ta yama “e ministerio aki”, of sirbishi, e berdad ta ser manifesta y lus spiritual ta plama tur caminda.

9, 10. Con ta posibel pa nos refleha e gloria di Yehova?

⁹ Pablo a skirbi tocante e Fuente di lus fisico y spiritual: “Dios, kende a bisa: ‘Lus lo resplandece for di scuridad’, ta esun cu a resplandece den nos curason pa duna e lus di e conocemento di e gloria di Dios den cara di Cristo.” (2 Corintionan 4:6; Genesis 1:2-5) Ya cu nos a ricibi e privilegio incalculabel di ta sirbidonan di Dios, laga nos mantene nos mes limpi di manera cu  mescos cu un spiel nos por refleha Yehova su gloria.

¹⁰ Personanan den scuridad spiritual no por mira e gloria di Yehova ni su refleho for di Hesucristo, e Moises Mayor. Pero como sirbidonan di Yehova, nos ta ricibi e lus glorioso for di e Scritura y ta refleh’e na otro hende. Pa e hendenan cu awor ta den scuridad por scapa destruccion, nan tin mester di lus for di Dios. Pesei cu gran goso y celo, nos ta obedece e mandamento dibino pa laga nos lus briya meimei di e scuridad cu ta reina, y esei pa e gloria di Yehova.

Laga Bo Lus Briya na Studionan di Bijbel na Cas

11. Kico Hesus a bisa tocante laga nos lus briya, y cua ta un manera pa haci esaki den nos sirbishi?

¹¹ Hesus a bisa su siguidonan: “Boso ta e lus di mundo. Un stad situa riba un sero no por keda scondi. Tampoco hende no ta sende lampi pon’e bou di un caha di midi trigo, ma riba un [candelaria], y e ta lusa pa tur cu ta den cas. Laga boso lus briya dilanti di hende di tal manera cu nan por mira boso bon obranan y glorifica boso Tata cu ta den shelo.” (Mateo 5:14-16) Nos bon conducta por pone otro hende duna gloria na Dios. (1 Pedro 2:12) Y e varios rasgonan di nos trabou di predica e Evangelio ta duna nos hopi oportunidad pa laga nos lus briya. Un di nos metanan principal ta pa refleha lus spiritual for di e Palabra di Dios door di conduci studionan di Bijbel efectivo cu hende. Esaki ta un manera hopi importante pa cumpli cu nos sirbishi henteramente. Cua ta algun sugerencia cu por yuda nos conduci studionan di Bijbel cu ta motiva curason di e hendenan cu ta en busca di e berdad?

12. Con oracion ta liga cu e trabou di conduci studio di Bijbel cu hende?

¹² Ora nos ta haci oracion na Yehova relaciona cu esaki nos ta demostra cu nos tin e deseo intenso di conduci studionan di Bijbel. Tambe esei ta mustra cu nos ta mira e importancia di yuda otro hende gana e conocemento di Dios. (Ezekiel 33:7-9) Yehova siguramente lo contesta nos oracion y bendiciona nos esfuersonan sinsero den sirbishi. (1 Huan 5:14, 15) Pero nos no ta haci oracion solamente pa haya un hende pa studia Bijbel cu ne. Unabes nos tin e studio, nos lo por conduci cada sesion di e studio den un manera efectivo door di haci oracion y medita riba e necesidadnan spesifico di e studiante di Bijbel.—Romanonan 12:12.

13. Kico lo por yuda nos conduci studio di Bijbel efectivo cu hende?

¹³ Pa nos por conduci studionan di Bijbel efectivo, nos tin cu prepara bon pa cada sesion di studio. Si nos ta sinti nos mes un poco incompetente, lo ta bon pa nos observa e manera cu e superintendente di Studio di Buki di Congregacion ta cubri e les di tur siman. De bes en cuando nos lo por compaña publicadonan di Reino cu tawatin bon resultado den conduci studio di Bijbel cu hende. Claro cu nos mester considera specialmente e actitud di Hesucristo y e metodonan cu el a uza pa siña hende.

14. Con nos por yega na curason di un studiante di Bijbel?

¹⁴ Hesus tawatin delicia den haci e boluntad di su Tata celestial y den papia cu otro hende tocante Dios. (Salmo 40:8) Tambe Hesus tawata di genio suave y a logra yega na curason di esnan cu a scuch’e. (Mateo 11:28-30) Pesei laga nos haci esfuerso pa yega na curason di nos studiantenan di Bijbel. Pa nos logra esei, nos tin cu prepara pa cada studio teniendo na mente e circunstancianan en particular di e studiante. Por ehempel, si e persona ta bin di un cultura cu no ta familiarisa cu Bijbel, podise nos tin cu combenc’e cu Bijbel ta e berdad. Den tal caso, ta bisto cu nos lo tin cu lesa hopi texto biblico y splica nan.

Yuda Studiantenan Compronde Ilustracionnan

15, 16. (a) Con nos lo por yuda un studiante cu no ta compronde un ilustracion cu Bijbel ta uza? (b) Kico nos por haci si un di nos publicacionnan ta uza un ilustracion cu ta dificil pa un cierto studiante di Bijbel compronde?

¹⁵ Un studiante di Bijbel kisas no ta  familiarisa cu un cierto ilustracion cu ta ser uza den e Scritura. Por ehempel, kisas e no ta compronde kico Hesus tawata kiermen ora el a papia tocante pone un lampi riba un candelaria. (Marco 4:21, 22) Hesus tawata referi na un lampi di azeta di antiguedad cu ta uza mecha. Hende tawata pone un lampi asina riba un stand special y di e manera ei el a lusa henter un area di un cas. Podise pa bo por clarifica e ilustracion di Hesus lo bo tin cu haci investigacion riba e tema “Lampi” y “Candelaria” (na Spaño, “lámpara” y “candelabro”) den un publicacion manera Perspicasia pa Compronde e Scritura. * Anto lo bo sinti un gran satisfaccion si bo por bai e studio di Bijbel cu un splicacion cu e studiante ta compronde y aprecia.

¹⁶ Un buki pa yuda hende studia Bijbel kisas ta uza un ilustracion cu ta dificil pa un cierto studiante compronde. Tuma bo tempo pa splic’e, of uza un otro ilustracion cu ta presenta e mesun punto. Podise un publicacion ta enfatisa e punto cu den un matrimonio ta importante pa bo tin un bon partner y pa boso coopera cu otro. Pa ilustra esaki, kisas e publicacion ta referi na un homber cu ta move bai bin den laira na un trapecio den circo, y cu ora e laga los, e ta depende di un otro acrobat pa gar’e. Un otro opcion ta di compara e necesidad di un bon partner y e cooperacion cu mester tin entre nan, cu e manera cu trahadonan ta coopera pa pasa caha di un man pa otro ora nan ta descarga un barco.

17. Kico nos por siña for di Hesus tocante ilustracion?

¹⁷ Pa bo por uza un otro ilustracion bo mester a prepara di antemano. Sinembargo, esei ta un manera pa demostra nos interes personal den un studiante di Bijbel. Hesus a uza ilustracionnan simpel pa clarifica topiconan dificil. Den su Sermon Riba Sero nos ta haya algun ehempel di esaki, y Bijbel ta mustra cu su siñansa tawatin un bon efecto riba su oyentenan. (Mateo 5:1–7:29) Hesus a splica hende cu pasenshi pasobra e tawata profundamente interesa den nan.—Mateo 16:5-12.

18. Kico ta recomendabel pa haci ora cu den nos publicacionnan tin textonan biblico cu ta ser menciona pero no cita?

¹⁸ Nos interes den otro hende lo motiva nos pa “rasona cu nan for di e Scrituranan.” (Echonan 17:2, 3) Pa esaki ta posibel nos mester haci uzo sabi di e publicacionnan cu ‘e mayordomo fiel’ ta percura, y studia nan cu sinseridad y cu oracion. (Lucas 12:42-44) Por ehempel, e buki Conocimentu cu Ta Hiba na Bida Eterno ta cita hopi texto biblico. * Pero debi na e espacio limita, algun di e textonan simplemente ta ser menciona pero no cita. Durante un studio di Bijbel, ta importante pa nos lesa y splica por lo menos algun di e textonan menciona aki cu no ta cita. Al fin y al cabo, nos siñansa ta basa riba e Palabra di Dios, y e ta poderoso. (Hebreo 4:12) Durante cada studio, referi cu frecuencia na e Bijbel y uza e textonan cu tin den e paragrafnan. Yuda e studiante mira kico Bijbel ta bisa di un cierto topico of proceder. Haci esfuerso pa mustr’e con lo e beneficia si e obedece Dios.—Isaias 48:17, 18.

 Haci Preguntanan Cu Ta Stimula Pensamento

19, 20. (a) Dicon nos mester uza preguntanan di punto di bista ora nos ta conduci un studio di Bijbel cu un hende? (b) Kico nos por haci si nos mester considera un cierto topico mas a fondo?

¹⁹ Hesus su uzo habil di pregunta a yuda hende rasona. (Mateo 17:24-27) Si nos ta haci preguntanan di punto di bista cu no ta brongosa un studiante di Bijbel, su contesta lo por revela kico e ta pensa tocante un cierto topico. Kisas nos ta descubri cu ainda e tin puntonan di bista cu no ta cuadra cu Bijbel. Por ehempel, podise e ta kere den Trinidad. E buki Conocimentu, den capitulo 3, ta indica cu e palabra “Trinidad” no ta aparece den Bijbel. E buki ta cita y menciona textonan biblico cu ta mustra cu Yehova ta un persona separa di Hesus y cu spirito santo ta Dios su forsa activo, y no un persona. Kisas ta suficiente si nos lesa y trata e textonan di Bijbel aki. Pero kico si mas splicacion ta necesario? Podise despues di e siguiente sesion di studio, nos lo por dedica poco tempo na un consideracion probechoso di e topico aki manera e ta ser trata den un otro publicacion di Testigonan di Yehova, manera por ehempel den e foyeto Bo Mester Kere den Trinidad? Despues di esei nos por reanuda e studio uzando e buki Conocimentu.

²⁰ Pero supone cu e contesta di e studiante riba un pregunta di punto di bista ta sorprende nos of asta decepciona nos. Si ta trata di humamento, of cualkier otro tema delicado, nos lo por sugeri pa sigui cu e studio y papia di e asunto un otro dia. Pero awor cu nos sa cu e studiante ta huma ainda, nos tin chens di busca informacion publica cu lo por yud’e haci progreso spiritual. Segun cu nos ta haci esfuerso pa yega na curason di e studiante, nos por pidi Yehova den oracion pa yud’e crece spiritualmente.

21. Kico lo por sosode si nos adapta nos metodonan di siña hende na e necesidadnan spesifico di un studiante di Bijbel?

²¹ Cu bon preparacion y cu e yudansa di Yehova, sin duda nos lo por adapta nos metodonan di siña hende pa cuadra cu e necesidadnan spesifico di e studiante. Segun cu tempo ta pasa, nos lo por yud’e desaroya un amor profundo pa Dios. Tambe nos lo por logra cultiva respet y aprecio pa Yehova su organisacion. Y nos lo sinti un gran satisfaccion ora cu studiantenan di Bijbel reconoce cu ‘sigur-sigur Dios ta meimei di nos.’ (1 Corintionan 14:24, 25) Pesei laga nos tur conduci studionan di Bijbel efectivo y haci tur loke nos por pa yuda otro hende bira disipel di Hesus.

Un Tesoro Cu Nos Mester Aprecia

22, 23. Kico nos mester pa nos por cumpli cu nos sirbishi henteramente?

²² Pa cumpli cu nos sirbishi henteramente, nos tin cu depende riba e fortalesa cu Dios ta duna. Papiando di e ministerio of sirbishi, Pablo a skirbi su rumannan cristian ungi: “Nos tin e tesoro aki den pochi di klei, pa e excelencia di e poder por ta di Dios y no di nos mes.”—2 Corintionan 4:7.

²³ Sea cu nos ta un ungi of di e “otro carnenan”, nos ta manera pochi di klei delicado. (Huan 10:16) Sinembargo, Yehova por duna nos e fortalesa necesario pa cumpli cu nos asignacionnan sin importa e presionnan cu ta bin riba nos. (Huan 16:13; Filipensenan 4:13, NW) Pesei laga nos confia totalmente den Yehova, aprecia nos tesoro di sirbishi y cumpli cu nos ministerio henteramente.

[Nota]

Con Lo Bo Contesta?

• Kico ancianonan por haci pa cumpli cu nan sirbishi henteramente?

• Con nos por haci nos studionan di Bijbel cu hende mas efectivo?

• Kico lo bo haci si un studiante di Bijbel no a compronde un ilustracion of tin mester di mas informacion riba un cierto topico?

[Preguntanan di Estudio]

[Plachi na pagina 16]

Ancianonan cristian ta siña hende den e congregacion y ta yuda entrena nan rumannan den sirbishi

[Plachi na pagina 18]

Un manera pa laga nos lus briya ta door di conduci studionan di Bijbel efectivo cu hende