E Cena di Señor​—Con E Ta Wordo Celebra?

APOSTEL Pablo a duna un splicacion detaya di e Cena di Señor, ora el a skirbi: “Mi a ricibi di Señor loke mi a entrega na boso tambe, cu Señor Hesus, riba e anochi cu el a wordo traiciona, a cohe pan; y ora cu el a caba di duna gradicimento, el a kibr’e, y a bisa: ‘Esaki ta mi curpa cu ta wordo kibra pa boso; haci esaki na mi recuerdo.’ Di e mesun manera el a cohe e copa tambe, despues di a caba di cena, bisando: ‘E copa aki ta e aliansa nobo den mi sanger; haci esaki, cada bes cu boso beb’e, na mi recuerdo.’ Pasobra cada bes cu boso come e pan aki y bebe e copa aki, boso ta proclama e morto di Señor te ora cu e bin.”—1 Corintionan 11:23-26.

Manera Pablo a bisa, Hesus a institui e Cena di Señor “riba e anochi cu el a wordo traiciona” pa Hudas Iscariot y entrega na e lidernan religioso Hudiu. Esakinan a pone presion riba e Romanonan pa claba Cristo na staca. E cena ei a tuma luga diahuebs anochi laat, 31 di maart di aña 33 di nos era. Hesus a muri riba un staca di tormento riba diabierna traimerdia, 1 di april. Pa motibo cu un dia riba e kalender Hudiu tawata cuminsa ora anochi sera y dura te su siguiente dia ora anochi sera atrobe, tanto e Cena di Señor como e morto di Hesucristo a tuma luga riba e mesun dia, esta, 14 di nisan di aña 33 di nos era.

E personanan cu ta tuma di e pan y e biña mester a “[“sigui”, NW] haci esaki” na recuerdo di Hesus. Segun un otro traduccion, Hesus a bisa: “Haci esaki na memoria di mi.” (1 Corintionan 11:24, The Jerusalem Bible) Pesei, e Cena di Señor ta ser yama tambe e Memorial di e morto di Cristo.

Pakico Conmemora e Morto di Hesus?

Pa contesta e pregunta ei bo tin cu compronde kico e morto ei ta nifica. Hesus a muri como e defensor principal di e soberania di Yehova. Den e manera ei el a duna prueba cu ta gaña Satanas a gaña ora el a acusa hende cu nan ta sirbi Dios puramente pa motibonan egoista. (Job 2:1-5; Proverbionan 27:11) Tambe, door di muri como un hende perfecto, Hesus a “duna su bida como prijs di rescate pa hopi.” (Mateo 20:28) Ora Adam a peca contra Dios, el a perde bida humano perfecto y e posibilidad di biba pa semper. Pero “Dios a stima mundo [di humanidad] asina tanto, cu el a  duna su Yiu unigenito, pa ken cu kere den dje no bai perdi, ma tin bida eterno.” (Huan 3:16) Si, “e pago di pica ta morto, ma e don di gracia di Dios ta bida eterno den Cristo Hesus, nos Señor.”—Romanonan 6:23.

Pues, e morto di Hesucristo ta liga cu e dos mayor expresionnan di amor: e gran amor cu Yehova a demostra pa humanidad ora el a duna su Yiu y e amor sin egoismo cu Hesus a demostra pa humanidad door di entrega su bida humano boluntariamente. E Memorial di e morto di Hesus ta engrandece e dos expresionnan di amor aki. Unabes cu nos a ricibi e amor aki, nos no mester mustra cu nos ta gradicido p’e? Un manera pa demostra esei ta door di ta presente na e celebracion di e Cena di Señor.

Nificacion di e Pan y e Biña

Ora Hesus a institui e Cena di Señor, el a uza pan y un copa di biña cora como emblema, of simbolo. Hesus a tuma un pan, y “ora cu el a caba di duna gradicimento, el a kibr’e, y a bisa: ‘[E pan aki] ta mi curpa cu ta wordo kibra pa boso.’” (1 Corintionan 11:24) Pa por a reparti e pan y laga e apostelnan come for di dje, mester a kibr’e pasobra e tawata un pan relativamente bros traha di hariña y awa, sin zuurdeeg of yeast. Den e Scritura, zuurdeeg ta simbolisa pica. (Mateo 16:11, 12; 1 Corintionan 5:6, 7) Hesus no tawatin pica. Pesei su curpa humano perfecto a sirbi apropiadamente como un sacrificio di rescate pa humanidad. (1 Huan 2:1, 2) Ta na su luga anto cu e pan cu ta ser uza pa representa e curpa sin pica di Cristo, ta un pan sin zuurdeeg!

Tambe Hesus a duna gradicimento pa e copa di biña cora puro y a bisa: “E copa aki ta e aliansa nobo den mi sanger.” (1 Corintionan 11:25) E biña cora den e copa ta representa e sanger di Hesus. Mescos cu pa medio di e sanger di toro y cabrito sacrifica e aliansa of pacto di Lei entre Dios y e nacion di Israel a drenta na vigor na 1513 prome cu nos era, asina, pa medio di Hesus su sanger drama den morto, e aliansa nobo a drenta na vigor.

Ken Tin Cu Tuma di e Emblemanan?

Pa haya sa ken tin mag di tuma di e emblemanan di e Conmemoracion, nos tin cu compronde kico e aliansa nobo ta encera y ken ta esnan cu ta participa den dje. Bijbel ta bisa: “‘Ata, e dianan ta bin’, SEÑOR ta declara, ‘cu lo mi sera un aliansa nobo cu e cas di Israel y cu e cas di Huda . . . Lo mi pone mi lei den nan y lo mi skirbie riba nan curason; y ami lo ta nan Dios y nan lo ta mi pueblo. . . . Lo mi pordona nan inikidad, y nan pica lo mi no corda mas.’”—Yeremias 31:31-34.

E aliansa nobo ta permiti hende drenta den un relacion special cu Yehova Dios. Pa medio di e aliansa aki, un cierto grupo di persona ta bira su pueblo y e ta bira nan Dios. E lei di Yehova ta skirbi den nan, den nan curason, y asta esnan cu no ta Hudiu sircuncida por drenta den un relacion cu Dios basa riba e aliansa nobo aki. (Romanonan 2:29) Lucas, escritor di Bijbel, ta skirbi di e proposito di Dios pa “bishita e paganonan, pa tuma for di nan un pueblo pa su nomber.” (Echonan 15:14) Segun 1 Pedro 2:10, ‘un tempo nan no tawata un pueblo, ma awor nan ta e pueblo di Dios.’ E Scritura ta referi na nan como “e Israel di Dios”, esta, Israel spiritual. (Galationan 6:16; 2 Corintionan 1:21) Pues anto, e aliansa nobo ta un aliansa entre Yehova Dios y Israel spiritual.

 Riba e ultimo anochi cu Hesus a pasa cu su disipelnan, e mes tambe a sera un otro aliansa cu nan. El a bisa nan: “Mi ta sera un pacto cu boso, mescos cu mi Tata a sera un pacto cu mi, pa un reino.” (Lucas 22:29, NW) Esaki ta e pacto, of aliansa, di Reino. E cantidad di hende imperfecto cu ta wordo introduci den e aliansa di e Reino ta 144.000. Despues cu nan ser resusita pa bai shelo, nan lo goberna cu Cristo como rei y sacerdote. (Revelacion 5:9, 10; 14:1-4) Pues, esnan cu ta den e aliansa nobo cu Yehova Dios ta den e aliansa di Reino hunto cu Hesucristo tambe. Nan ta e uniconan cu tin derecho di tuma di e emblemanan di e Cena di Señor.

Con esnan cu tin derecho di tuma di e emblemanan di e Conmemoracion por sa cu nan tin un relacion unico cu Dios y cu nan ta coheredero cu Cristo? Pablo ta splica: “E spirito [santo] mes ta duna testimonio hunto cu nos spirito [nos disposicion mental] cu nos ta yiu di Dios, y si nos ta yiu, nos ta heredero tambe, heredero di Dios y coheredero cu Cristo, si di berdad nos ta sufri hunto cu ne, pa nos wordo glorifica tambe hunto cu ne.”—Romanonan 8:16, 17.

Pa medio di su spirito santo, of forsa activo, Dios ta ungi e coherederonan cu Cristo. Esaki ta duna nan e siguransa cu nan ta heredero di Reino. E ta crea den cristiannan ungi un speransa celestial. Nan ta mira tur loke Bijbel ta bisa tocante bida celestial como dirigi na nan personalmente. Ademas, nan ta dispuesto pa sacrifica tur loke tin di aber cu e mundo aki, incluso bida riba tera y tur relacion humano. Aunke cristiannan ungi cu spirito ta realisa cu bida den e Paradijs aki riba tera lo ta algo maraviyoso, nan no ta carga e speransa pa biba den dje. (Lucas 23:43, NW) Nan tin un speransa celestial incambiabel, no pa motibo di un siñansa religioso incorecto, sino pa motibo cu e spirito di Dios a actua riba nan, y pesei nan tin derecho di tuma di e emblemanan di Conmemoracion.

Supone cu un persona no ta completamente sigur cu e ta den e aliansa nobo y e aliansa di Reino. Kico lo para di dje si e no tin ni e testimonio di e spirito di Dios cu e ta un coheredero cu Cristo? E ora ei lo ta incorecto pa e tuma di e emblemanan di Conmemoracion. Si, Dios lo no keda contento cu un persona cu sa mucho bon cu e no tin un yamada celestial, anto toch kier laga parce cu el a wordo yama pa ta un rei y sacerdote celestial.—Romanonan 9:16; Revelacion 22:5.

Cu Ki Frecuencia Mester Celebr’e?

Mester conmemora e morto di Hesus tur siman of asta tur dia mes? Wel, Cristo a institui e Cena di Señor y a ser mata inhustamente riba e dia di Pasco Hudiu. Ta un biaha pa aña so, riba 14 di nisan, dia di Pasco Hudiu, e Israelitanan tawata conmemora e liberacion di nan nacion for di sclabitud na Egipto. (Exodo 12:6, 14; Levitico 23:5) Pues, ta un biaha pa aña so mester conmemora e morto di “Cristo, nos pasco”, y no tur siman of tur dia. (1 Corintionan 5:7) Y ora cristiannan ta celebra e Cena di Señor, nan ta sigui e mesun procedura cu Hesus a sigui ora el a institui esaki.

Pero kico Pablo tawata kiermen ora el a bisa: “Pasobra cada bes cu boso come e pan aki y bebe e copa aki, boso ta proclama e morto di Señor te ora cu e bin”? (1 Corintionan 11:26) Den e texto aki Pablo a uza un palabra cu ta nifica “tur biaha cu”, of “ki ora cu.”  Pues, Pablo tawata kiermen cu ki ora cu cristiannan ungi tuma di e emblemanan, nan ta proclama nan fe den Hesus su sacrificio di rescate.

Cristiannan ungi lo conmemora e morto di Cristo “te ora cu e bin.” E celebracion aki lo sigui te ora Hesus bini pa ricibi su siguidonan ungi den shelo pa medio di un resureccion pa bida spiritual durante su “binida”, of presencia. (1 Tesalonicensenan 4:14-17) Esaki ta na harmonia cu loke Cristo a bisa e 11 apostelnan leal: “Ora mi bai y prepara un luga pa boso, lo mi bin atrobe y ricibi boso serca mi, pa caminda ami ta, boso tambe por ta.”—Huan 14:3.

Kico E Ta Nifica pa Bo?

Nos mester tuma di e emblemanan di Conmemoracion pa nos por beneficia di Hesus su sacrificio y haya bida eterno riba tera? No. Bijbel no ta duna ningun indicacion cu un dia personanan temeroso di Dios manera Noe, Abraham, Sara, Isaak, Rebeca, Yosef, Moises y David lo bai tuma di e emblemanan despues cu nan resusita riba tera. Pero, tanto nan como tur otro hende cu ta desea di haya bida eterno riba tera lo tin cu eherce fe den Dios y Cristo y den e sacrificio di rescate cu Yehova a percura pa medio di Hesus. (Huan 3:36; 14:1) Pa bo haya bida eterno, bo tambe tin cu eherce e fe ei. Bo presencia na e celebracion anual di e morto di Cristo lo recorda bo di e gran sacrificio ei y mester profundisa bo gratitud p’e.

Apostel Huan a enfatisa e importancia di Hesus su sacrificio ora el a bisa: “Mi ta skirbi boso [rumannan ungi] e cosnan aki pa boso no haci pica. Y si un hende haci pica, nos tin un abogado serca e Tata, Hesucristo, e husto; y e mes ta e propiciacion pa nos picanan, y no pa di nos so, ma tambe pa esnan di henter mundo.” (1 Huan 2:1, 2) E unginan por bisa cu e sacrificio di Hesus ta un propiciacion, esta un sacrificio di pordon, pa nan picanan. Pero e ta un sacrificio pa e picanan di henter mundo tambe, y esei ta habri e caminda di bida eterno pa humanidad obediente!

Lo bo ta presente dia 4 di april 2004 pa conmemora Hesus su morto? Rond mundo, Testigonan di Yehova lo tene e celebracion aki na nan luganan di reunion. Si bo asisti, lo bo beneficia di un discurso biblico hopi importante. E informacion lo recorda bo riba cuanto cos Yehova Dios y Hesucristo a haci pa nos. Ademas, e reunion aki hunto cu otro personanan cu tin un respet profundo pa Dios y Cristo y pa Hesus su sacrificio di rescate lo stimula nos spiritualmente. Sin duda e ocasion lo fortalece bo deseo pa bo tambe ricibi e bondad inmereci di Dios, loke ta hiba na bida eterno. No laga nada stroba bo. Wak pa bo no perde e celebracion conmovedor aki na honor di nos Tata celestial, Yehova Dios.

[Plachi na pagina 5]

E morto di Hesus ta liga cu e dos mayor expresionnan di amor

[Plachi na pagina 6]

E pan sin zuurdeeg y e biña ta simbolonan apropiado di Hesus su curpa sin pica y su sanger drama