E Tratado di Pas di Westfalia—Un Tempo di Cambio Desisivo na Europa

“TA ALGO excepcional cu nos por tin asina tanto hefe di Estado di Europa hunto manera nos tin reuni akinan awe.” Esaki ta loke Roman Herzog, expresidente di Republica Federal di Alemania, a declara na october 1998. Na momento cu el a bisa esei su auditorio tawata consisti di entre otro, cuater rei, cuater reina, dos prins, un gran duke y varios presidente. E evento, patrocina pa Conseho di Europa, tawata uno sumamente importante den e ultimo 50 añanan di historia di e estado moderno di Alemania. Ta ki ocasion special esaki tawata?

October 1998 tawata e di 350 aniversario di e Tratado di Pas di Westfalia. Hopi bes seramento di acuerdonan di pas ta ocasionnan decisivo caminda curso di historia ta cambia di rumbo, y den e aspecto aki e Tratado di Westfalia tawata algo special. Na aña 1648 ora cu nan a firma e acuerdo aki, esei a pone un fin na e Guera di Trinta Aña y a marca e nacemento di Europa moderno como un continente di estadonan soberano.

Un Orden Estableci Ta Wordo Sagudi

Durante Edad Medio, e institucionnan mas poderoso na Europa tawata Iglesia Catolico Romano y e Imperio Romano Santo. E imperio a consisti di centenares di estado di varios tamaño y a abarca e area cu awor ta ser ocupa door di Austria, Republica Checo, parti oost di Francia, Alemania, Suisa, Hulanda, Belgica, Luxemburg y partinan di Italia. Siendo cu e estadonan Aleman tawata forma e parti mas grandi di e imperio, el a bira conoci como e Imperio Romano Santo di e Nacion Aleman. Cada estado tawatin un gobernacion semiautonomo den man di un prins. E emperado mes tawata un catolico di e dinastia di famia Habsburg di Austria. Pesei cu e papado y imperio na poder, Europa tawata firmemente bou di control catolico.

Sinembargo, den siglonan 16 y 17, e orden estableci a wordo sagudi. Rond Europa hende tawata malcontento cu e comportacion desenfrena di Iglesia Catolico Romano. Reformadonan religioso manera Martin Luther y Johannes Calvijn a papia di bolbe bek na e normanan di Bijbel. Luther cu Calvijn a haya sosten amplio, y for di e movemento aki a sali e Reformacion y religionnan protestant. E Reformacion a dividi e imperio den tres religion: catolico, luterano y calvinista.

Catoliconan tawata desconfia protestantnan, y protestantnan tawata desprecia nan rivalnan catolico. E ambiente aki a hiba na formacion di e Union Protestant y e Liga Catolico na principio di siglo 17. Algun prins di e imperio a join e Union, y otronan a join e Liga. Europa—y specialmente e imperio—tawata manera un bari di polvo di desconfiansa y tawatin mester di djis un chispa pa henter e situacion explota den conflicto. Ora cu finalmente e chispa ei a surgi, el a causa un conflicto cu a dura pa e siguiente 30 añanan.

Un Chispa Mortal Ta Pega Europa na Candela

Gobernantenan protestant a purba influencia e dinastia catolico Habsburg pa duna mas  libertad di adoracion. Y nan a duna cierto concesionnan pero di mala gana, anto na 1617 pa 1618, dos misa Luterano na Bohemia (Republica Checo) a wordo obliga pa sera. Esaki a ofende protestantnan aristocrat, kendenan a invadi un palacio na Praga, captura tres funcionario catolico y tira nan for di un bentana di segundo piso. E acto aki tawata e chispa cu a pega Europa na candela.

Aunke e miembronan di religionnan enemigo di otro tawata supuestamente siguidonan di e Prins di Pas, Hesucristo, awor nan tawata bringa contra otro. (Isaias 9:6) Den e Bataya di Sero Blanco, e Union Protestant a sufri un derota aplastante na man di e Liga Catolico y a caba na nada. Nan a ehecuta protestantnan di aristocracia riba plasa publico di Praga. Rond Bohemia, nan a cuminsa confisca propiedad di protestantnan cu no kier a renuncia nan fe, y nan a parti e propiedadnan entre catoliconan. Relaciona cu e confiscamento di propiedad aki, e buki 1648—Krieg und Frieden in Europa (1648—Guera y Pas na Europa) a bisa cu ‘hamas asina hopi propiedad a cambia di doño den Europa central.’

Loke a cuminsa como un conflicto religioso na Bohemia a escala den un lucha internacional pa poder. Durante e siguiente 30 añanan, Dinamarca, Francia, Hulanda, Spaña y Suecia a drenta den e guera. Gobernantenan catolico y protestant—hopi bes motiva pa golosidad y sed pa poder—tawata lucha pa obtene supremacia politico y ganashi comercial. E Guera di Trinta Aña a keda dividi den varios etapa, y cada etapa tawata carga nomber di e oponente principal di e emperado. Varios buki di referencia ta cita cuater etapa asina: e Guera Bohemio y Palatino, e Guera Danes-Nedersaksen, e Guera Sueco y e Guera Frances-Sueco. Mayoria bringamento a tuma luga riba teritorio di e Imperio Romano Santo.

Armanan di e tempo ei tawata entre otro pistol, scopet, mortero y cañon, anto Suecia tawata e suministrado principal di arma. Catolico y protestant tawata envolvi den un conflicto cu otro. Soldanan tawata bai den bataya gritando sea e lema catolico “Santa Maria” of e lema protestant “Dios ta cu nos.” Tropanan tawata pasa door di e pais ta plunder y sakea tur estado Aleman, tratando nan oponentenan y hende civil manera bestia. E guera a para bira un guera salbahe y cruel. Ki un contraste grandi cu e profecia biblico: “Nacion lo no lanta spada contra nacion, y nunca mas nan lo no train pa guera”!—Mikeas 4:3.

Un generacion di Aleman a lanta sin conoce nada otro cu no ta guera, y e poblacion cansa tawata anhela pas. Aparentemente, pas lo por tawata posibel, pero debi cu e gobernantenan tawatin interesnan politico cu tawata na conflicto cu otro esei no a wordo realisa. E guera a bira mas y mas un asunto politico segun cu el a perde su caracter di un conflicto religioso entre catolico y protestant. Ta un ironia cu e homber  cu a promove e cambio aki tawata un alto funcionario di Iglesia Catolico.

Cardinal Richelieu Ta Eherce Su Autoridad

E titulo oficial di Armand-Jean du Plessis tawata Cardinal de Richelieu. Tambe e tawata prome ministro di Francia di aña 1624 pa 1642. Richelieu kier a haci Francia e potencia mas grandi di Europa. Pa logra esei, el a purba caba cu e poder di su compañeronan catolico, e dinastia di Habsburg. Con el a haci esei? Door di financia e ehersitonan protestant di e estadonan Aleman, di Dinamarca, Hulanda y Suecia, ya cu nan tur tawata bringa contra e dinastia di Habsburg.

Na 1635, Richelieu a manda pa prome bes tropanan Frances den e guera. E buki vivat pax—Es lebe der Friede! (Biba Pas!) ta splica cu den su etapa final “e Guera di Trinta Aña ya no tawata un conflicto entre partidonan religioso. . . . E guera a bira un lucha pa supremacia politico di Europa.” Loke a cuminsa como un conflicto religioso entre catolico cu protestant a termina cu catolico luchando hunto cu protestant contra otro catolico. E Liga Catolico, cu a debilita for di principio di decada di 1630, a keda disolve na 1635.

Conferencia di Pas na Westfalia

Sakeo, asesinato, violacion y malesa tawata destrosa Europa. Pocopoco, e anhelo pa pas a bira mas intenso segun cu hende a realisa cu ningun banda lo por a gana e guera aki. E buki vivat pax—Es lebe der Friede! ta comenta cu “na fin di decada di 1630, e prinsnan na mando finalmente a reconoce cu poder militar ya lo no por a yuda nan alcansa nan meta.” Pero si ta pas tur hende tawata kier, con nan lo por a logr’e?

Emperado Ferdinand III di e Imperio Romano Santo, Rei Louis XIII di Francia, y Reina Christina di Suecia a bai di acuerdo cu mester tene un conferencia caminda tur partido den e guera mester sinta hunto y negosha e condicionnan di pas. Nan a scohe dos sitio pa e combersacionnan: Osnabrück y Münster den e provincia Aleman di Westfalia. Nan a scohe e stadnan ei pasobra nan tawata na mita di e distancia entre Suecia y Francia. Cuminsando na aña 1643, rond di 150 delegacion—algun di nan cu teamnan grandi di consehero—a baha riba e dos stadnan. Representantenan catolico a reuni na Münster, y delegadonan protestant na Osnabrück.

Na prome luga, nan a formula asuntonan di protocol, manera titulo y rango di e representantenan, orden di asiento y proceduranan. Caba e combersacionnan di pas a cuminsa, caminda e delegacionnan tawata manda proposicion pa otro via mediadonan. Despues di casi cinco aña—mientras cu e guera a sigui keto bai—nan a yega na un acuerdo riba e condicionnan di pas. E Tratado di Westfalia tawata consisti di mas cu un documento. Un acuerdo a keda firma entre Emperado Ferdinand III y Suecia, y un otro acuerdo entre e emperado y Francia.

Segun cu noticia di e tratado a plama, e hendenan a cuminsa celebra. Loke a cuminsa cu un chispa mortal a termina cu vuurwerk di berdad. Vuurwerk a ilumina e shelo di varios stad. Cloknan di misa tawata bati, cañonnan tawata saluda, y hende tawata canta riba caya. Europa por a spera awor un pas duradero?

Pas Duradero Ta Posibel?

E Tratado di Westfalia a reconoce e principio di soberania. Esaki a nifica cu cada partido di e tratado a bai di acuerdo pa respeta e derechonan teritorial di tur otro partido y pa no interferi den nan asuntonan interno. Asina Europa moderno como un continente di estadonan soberano a nace. Entre e estadonan ei, algun a saca mas probecho di e tratado cu otronan.

 Francia a keda estableci como un potencia grandi, y Hulanda y Suisa a haya independencia. Pa e estadonan Aleman, di cua hopi a keda ruina door di e guera, e tratado tawatin su desbentahanan. Te na cierto grado e destino di Alemania lo a ser determina pa e otro nacionnan. The New Encyclopædia Britannica ta informa: “E potencianan principal—Francia, Suecia y Austria—a determina kico lo tawata e ganashi y perdida di e prinsnan Aleman.” En bes di join hunto y bira un solo nacion, e estadonan Aleman a keda dividi mescos cu prome. Ademas, nan a entrega algun parti di Alemania den man di gobernantenan stranhero y tambe algun seccion di e riunan principal di Alemania: Rijn, Elbe y Oder.

Religionnan catolico, luterano y calvinista a haya e mesun grado di reconocemento. No ta tur hende a keda contento cu esaki. Papa Inocencio X tawata masha contra di e tratado, y a declar’e nulo y invalido. No obstante, durante e tres siglonan cu a sigui e fronteranan religioso cu nan a establece a keda asina casi sin cambio. Aunke ainda no tawata tempo pa libertad religioso pa cada persona individual, esei a yega un stap mas serca.

E tratado a pone fin na e Guera di Trinta Aña, y cu esei mayoria di e hostilidadnan a termina. Esaki tawata e ultimo guera religioso grandi na Europa. Gueranan no a stop, pero nan causa fundamental a cambia di religion pa politica of comercio. Esei no kiermen cu religion a perde tur influencia den conflictonan Europeo. Den Prome cu Segundo Guera Mundial, soldanan Aleman tawatin riba nan faha un inscripcion cu e palabranan conoci: “Dios Ta cu Nos.” Durante e conflictonan horibel ei, catolico cu protestant un biaha mas a bolbe uni forsa na un banda pa bringa contra catolico y protestant di e contrapartida.

Ta bisto anto cu e Tratado di Westfalia no a trece pas duradero. Sinembargo, pronto humanidad lo experencia e pas ei. Yehova Dios lo trece pas eterno pa humanidad mediante e Reino Mesianico di su Yiu Hesucristo. Bou di e gobierno ei, e unico religion berdadero lo ta un forsa pa trece union, no desunion. Ningun hende lo bai guera, ni pa motibo religioso ni pa ningun otro motibo. Lo ta un gran alivio ora cu e gobernacion di Reino lo tin dominio riba e tera y ‘lo no tin fin na pas’!—Isaias 9:6, 7.

[Plachi na pagina 21]

Loke a cuminsa como un conflicto religioso entre catolico cu protestant a termina cu catolico luchando hunto cu protestant contra otro catolico

[Plachi na pagina 22]

Soldanan tawata bai den bataya gritando sea “Santa Maria” of “Dios ta cu nos”

[Plachi na pagina 21]

Cardinal Richelieu

[Plachi na pagina 23]

Un pintura di siglo 16 cu ta representa e lucha entre Luther, Calvijn y papa

[Plachi na pagina 20]

For di e buki Spamers Illustrierte Weltgeschichte VI

[Plachi na pagina 23]

Lidernan religioso den lucha: For di e buki Wider die Pfaffenherrschaft; mapa: The Complete Encyclopedia of Illustration/J. G. Heck