Pregunta di Lector

Kico a sosode den e incidente registra na Exodo 4:24-26, y ken su bida tawata na peliger?

Moises tawata riba caminda pa Egipto hunto cu su casa, Sefora, y su yiunan Gerson y Eliezer, ora e siguiente incidente a tuma luga: “A sosode cu na caminda, na e posada, SEÑOR a contra cu ne y a busc’e pa mata. E ora ei Sefora a cohe un cuchiu di piedra y a corta prepucio di su yiu homber kita afo, y a tir’e na pia di Moises [“su pia”, NW] y a bisa: ‘Di berdad, bo ta un bruidegom di sanger pa mi.’ Y el a lag’e bai. E ora ei Sefora a bisa: ‘Bo ta un bruidegom di sanger’—pa motibo di e sircuncision.” (Exodo 4:20, 24-26) Aunke e pasashi aki no ta mucho cla, y ta imposibel pa bisa cu tur siguransa kico a pasa exactamente, esei no ta kita si cu e Scritura ta yuda clarifica e versiculonan aki.

E relato no ta bisa spesificamente ken su bida tawata na peliger. Pero, basa riba logica, nos por conclui cu esei no tawata e bida di Moises, pasobra Dios a caba di dun’e e tarea pa saca e Israelitanan for di Egipto. (Exodo 3:10) No ta parce probabel cu riba caminda pa bai cumpli cu e mision ei, e angel di Dios lo a pone Moises su bida na peliger. Pesei, lo mester tawata trata aki di e bida di un di su yiunan. E lei cu a wordo duna mas prome na Abraham relaciona cu sircuncision a declara: “Un persona masculino insircuncida, cu no ta sircuncida na e carni di su prepucio, e persona ei mester wordo corta kita for di su pueblo; el a kibra mi aliansa.” (Genesis 17:14) Aparentemente, Moises a neglisha di sircuncida su yiu, y door di esei e yiu su bida tawata na peliger na man di e angel di Yehova.

Ta na pia di Moises, Sefora a tira e prepucio cu el a corta di su yiu ora el a trata na corigi e eror aki? Ta e angel di Yehova tawatin poder pa mata e yiu insircuncida. Logicamente anto, ta na pia di e angel, Sefora a tira e prepucio, presentand’e na dje como evidencia cu el a cumpli cu e aliansa.

E expresion di Sefora “bo ta un bruidegom di sanger pa mi” ta uno extraordinario. Kico esei ta bisa di Sefora? Door di cumpli cu e rekisitonan di e aliansa di sircuncision, Sefora a reconoce cu e tawata den un relacion cu Yehova, basa riba un aliansa. E aliansa di Lei cu Yehova a sera cu e Israelitanan despues a mustra cu den un relacion basa riba un aliansa, Yehova ta manera un esposo y e otro partido manera su casa. (Yeremias 31:32) Pesei, ora Sefora a dirigi su mes na Yehova (pa medio di e angel cu a represent’e) como “un bruidegom di sanger”, aparentemente e tawata reconociendo su mes sumision na e condicionnan di e aliansa ei. Tawata como si fuera Sefora a acepta un posicion como esposa den e aliansa di sircuncision, cu Yehova Dios como e esposo. Sea cual sea e caso, pa motibo di su acto decisivo di obediencia na e rekisito di Dios, e bida di su yiu no tawata na peliger mas.