Un Celebracion Cu Tin di Aber cu Bo

TEMPO cu Hesucristo tawata riba tera, el a institui un celebracion na honor di Dios. Tawata e unico ceremonia religioso cu el a manda directamente pa su siguidonan celebra. Esaki ta e Cena di Señor, conoci tambe como e Ultimo Cena.

Imagina bo cu bo tawata un testigo di e susesonan cu a hiba na e ocasion ei. Ningun hende no a mira bo, pero abo si a mira Hesus y su apostelnan bini hunto den un sala na segundo piso den Herusalem pa celebra e Pasco Hudiu. Nan a caba di come e cena di Pasco manera tawata e custumber cu a consisti di lamchi geroast, yerba marga, pan sin zuurdeeg y biña cora. Hesus a manda e apostel desleal Hudas Iscariot bai, y un rato despues e lo a traiciona su Señor. (Mateo 26:17-25; Huan 13:21, 26-30) Hesus tawata su so cu su 11 fiel apostelnan. Mateo tawata un di nan.

Segun e relato di e testigo Mateo, Hesus a institui e Cena di Señor den e siguiente forma: “Hesus a cohe pan [sin zuurdeeg], y despues di a bendicion’e, el a kibr’e y a duna su disipelnan y a bisa: ‘Tuma, come; esaki ta mi curpa.’ Y despues cu el a cohe un copa [di biña] y a duna gradicimento, el a duna nan esei, bisando: ‘Boso tur bebe for di dje; pasobra esaki ta mi sanger di e aliansa, cu ta wordo drama pa hopi pa pordon di pica.’”—Mateo 26:26-28.

Pakico Hesus a institui e Cena di Señor? Ora el a haci esei, pakico el a uza pan sin zuurdeeg y biña cora? Ta tur siguido di Cristo mester a tuma for di e emblemanan aki, esta, e pan y e biña? Cu ki frecuencia nan mester a celebra e cena aki? Y e ta nifica algo pa bo realmente?