666 No Djis un Misterio

“Ningun hende no por cumpra ni bende, cu excepcion di esun cu tin e marca: e nomber di e bestia of e number di su nomber. Ata sabiduria aki. Laga esun cu tin comprondemento calcula e number di e bestia, pasobra e number ta number di un hende; y su number ta 666.”—Revelacion 13:17, 18.

POCO tema di Bijbel a yega di lanta asina tanto interes y precupacion manera e profecia tocante e marca, of nomber, misterioso di “e bestia [“salbahe”, NW]”—e number 666. Na television, riba Internet, y tambe den pelicula, buki y revista, tin masha hopi speculacion tocante e marca di e bestia.

Algun hende ta kere cu e number 666 ta e marca di e anticristo cu Bijbel ta papia di dje. Otronan ta bisa cu e ta nifica un forma di identificacion obligatorio, manera un tatu of un chip implanta den curpa di un persona cu un codigo digital cu ta identifica e persona ei como un sirbido di e bestia. Un otro grupo di hende ta kere cu 666 ta e marca di e papa catolico. Door di substitui e letternan di un di e titulonan oficial di papa, Vicarius Filii Dei (Vicario di e Yiu di Dios), cu cifranan Romano y bolter nan un poco, nan ta yega na 666. Ademas, tin hende ta pretende cu bo por yega na e mesun cifra aki door di hunga cu e letternan di e nomber Latin di Emperado Romano Diocleciano y tambe cu e version Hebreo di e nomber Nero Cesar. *

Sinembargo, e interpretacionnan aki, sea imagina of inventa, ta hopi diferente for di loke Bijbel mes ta bisa tocante e marca di e bestia, manera nos lo mira den e siguiente articulo. Bijbel en berdad ta revela cu esnan cu tin e marca lo experencia e rabia di Dios ora e pone fin na e sistema di cosnan aki. (Revelacion 14:9-11; 19:20) Pesei ta mucho mas importante pa nos compronde e nificacion di 666 cu djis resolve un misterio interesante. Nos ta contento cu Yehova Dios, e ehempel di mas grandi di amor y e Fuente di lus spiritual, no a laga e asunto importante aki keda un misterio pa su sirbidonan.—2 Timoteo 3:16; 1 Huan 1:5; 4:8.

[Nota]