Con pa Identifica e Bestia Salbahe y Su Marca

ABO ta gusta resolve charada? Pa bo haci esei, bo ta busca un indicacion cu por yuda bo saca afo kico un cierto charada ta nifica. Den su Palabra inspira, Dios ta duna e indicacionnan necesario relaciona cu e number 666, e nomber, of marca, di e bestia salbahe di Revelacion capitulo 13.

Den e articulo aki, nos lo analisa cuater punto principal—indicacionnan clave—cu lo revela e nificacion di e marca di e bestia. Nos lo analisa (1) con sa scohe nombernan di Bijbel, (2) e identidad di e bestia salbahe, (3) kico ta nifica e echo cu e number 666 ta “number di un hende”, y (4) e nificacion di e cifra 6 y pakico e ta ser menciona tres biaha tras di otro, esta 666.—Revelacion 13:18.

Nombernan di Bijbel—Mas cu Djis un Etiket

Hopi bes nombernan di Bijbel tin un nificacion special, specialmente ora cu nan a bini di Dios. Por ehempel, pa motibo cu Abram lo a bira tata di hopi nacion, Dios a cambia nomber di e patriarca pa Abraham, cu ta nifica “Tata di un Multitud.” (Genesis 17:5) Un otro ehempel ta cu Dios a manda Hose cu Maria yama e futuro yiu di Maria, Hesus, locual ta nifica “Yehova Ta Salbacion.” (Mateo 1:21; Lucas 1:31) Na harmonia cu e nomber significativo ei, pa medio di Hesus su ministerio y morto sacrificial, Yehova a haci posibel pa nos haya salbacion.—Huan 3:16.

Pesei, e nomber 666 cu Dios a duna e bestia mester ta representa e caracteristicanan cu Dios ta mira den dje. Claro cu pa compronde e caracteristicanan ei, nos tin cu identifica e bestia mes y haya sa kico e ta haci.

Identidad di e Bestia Revela

E buki biblico di Daniel ta duna hopi informacion cu ta clarifica e nificacion di bestianan simbolico. Capitulo 7 ta contene un descripcion bibo di “cuater bestia grandi”—un leon, un beer, un leopardo y un bestia spantoso cu djente grandi di hero. (Daniel 7:2-7) Daniel ta conta nos cu e bestianan aki ta representa ‘reinan’, of reinonan politico, cu ta goberna un tras di otro riba imperionan extenso.—Daniel 7:17, 23.

Relaciona cu e bestia di Revelacion 13:1 y 2, The Interpreter’s Dictionary of the Bible ta splica cu e ta un “combinacion di tur e caracteristicanan di e cuater bestianan di e vision di Daniel ... Consecuentemente, e prome bestia aki [di Revelacion] ta representa e forsanan combina di tur gobierno politico na mundo cu ta contra Dios.” Revelacion 13:7 ta confirma e remarca aki, pasobra e ta bisa di e bestia: “Autoridad riba tur tribu y pueblo y lenga y nacion a wordo duna na dje.” *

Pakico Bijbel ta uza bestia como simbolo di gobernacion humano? Tin por lo menos dos motibo. Na prome luga, pa motibo di e cantidad enorme di sanger cu gobiernonan semehante na bestia salbahe a drama den transcurso  di siglonan. E historiadonan Will y Ariel Durant a skirbi cu “guera ta un di e rasgonan constante di historia, y [cu] e no a mengua ni cu civilisacion ni cu democracia.” Ta un echo estableci anto cu ‘hende a eherce autoridad riba otro hende pa su daño’! (Eclesiastes 8:9) E di dos motibo ta cu “e dragon [Satanas] a dun’e [e bestia] su poder y su trono y gran autoridad.” (Revelacion 12:9; 13:2) Consecuentemente, gobernacion humano ta un invento di Diabel, cu ta refleha su cualidadnan bestial, manera di un dragon.—Huan 8:44; Efesionan 6:12.

Sinembargo, esaki no ta nifica si cu delaster un gobernante humano ta un instrumento direct di Satanas. Por cierto, den un sentido, gobiernonan humano ta “sirbido di Dios” door cu nan ta percura pa cierto stabilidad den e sosiedad humano; sin esei lo reina caos. Y algun gobernante a proteha derechonan fundamental di hende, incluso e derecho di participa den adoracion berdadero—algo cu ta bai contra e deseo di Satanas. (Romanonan 13:3, 4; Esdras 7:11-27; Echonan 13:7) Toch, pa motibo di e influencia di Diabel, ningun hende ni institucion humano por a logra trece pas y siguridad duradero pa pueblo. *—Huan 12:31.

“Number di un Hende”

Un di tres indicacion pa compronde e nificacion di 666 ta sinta den e echo cu e ta “number di un hende”, of manera The Amplified Bible ta yam’e, “un number humano.” E expresion aki no por ta referiendo na un cierto hende, pasobra ta Satanas tin autoridad riba e bestia, y no hende. (Lucas 4:5, 6; 1 Huan 5:19; Revelacion 13:2, 18) Mas bien, e echo cu e bestia tin un ‘number [of marca] di hende’, ta indica cu e ta un entidad humano—no un spirito of demoño—y pesei e ta manifesta cierto caracteristicanan humano. Ta di ki caracteristica nos ta papia aki? Bijbel ta contesta bisando: “Tur [ser humano] a peca y ta falta e gloria di Dios.” (Romanonan 3:23) Pesei, e echo cu e bestia tin un “un number humano”, ta indica cu gobiernonan ta refleha e condicion degrada di hende, e marca di pica y imperfeccion.

Historia ta duna evidencia di esaki. Na un ocasion, Henry Kissinger, exsecretario di estado di Merca, a bisa: “Cu tempo, tur civilisacion cu a yega di existi a basha den otro. Historia ta un relato di esfuersonan cu a fracasa, di aspiracionnan cu no a materialisa ... Pues, como historiado, bo tin cu biba cu e sintimento cu tragedia ta inevitabel.” Kissinger su evaluacion franco ta confirma e berdad biblico fundamental aki: “Mi sa cu e caminda di hende no ta di dje mes; tampoco no ta keda na hende pa dirigi su pasonan.”—Yeremias 10:23.

 Awor cu nos a identifica e bestia y haya sa con Dios ta mir’e, nos por analisa e parti final di nos enigma—e cifra seis y pakico e ta ser skirbi tres biaha tras di otro, esta 666.

Pakico Tres Biaha Seis?

Den e Scritura, cierto cifranan tin nificacion simbolico. Tuma como ehempel e cifra shete. Hopi bes e cifra aki ta ser uza pa simbolisa loke ta completo, of perfecto, den bista di Dios. Por ehempel, Dios su siman di creacion ta consisti di shete ‘dia’—cada uno representando un periodo di tempo hopi largo—durante cua Dios a cumpli cabalmente cu e proposito pa cua el a crea tera. (Genesis 1:3–2:3) Otro ehempel: E “palabranan” di Dios ta manera plata cu a ser “purifica shete biaha”, pues perfectamente refina. (Salmo 12:6; Proverbionan 30:5, 6) Tambe nos ta haya e caso di e leproso Naaman, cu a ser manda pa bai baña shete biaha den Riu Yordan, despues di cua el a cura completamente.—2 Reinan 5:10, 14.

Seis ta uno menos cu shete. Lo e no ta un simbolo apropiado di algo imperfecto, of deficiente, den bista di Dios? Indudablemente! (1 Cronicanan 20:6, 7) Ademas, tres biaha seis, of 666, ta enfatisa e imperfeccion ei fuertemente. Y e echo cu 666 ta “un number humano”, manera nos a mira caba, ta confirma pa nos cu esei ta e punto di bista corecto. Pues, tanto e historia di e bestia, su “number humano”, como e cifra 666 riba su mes, ta laga nos yega na un conclusion inekibocabel: deficiencia y fracaso total den bista di Yehova.

E descripcion di e deficiencianan di e bestia ta pone nos corda loke Dios a bisa di Rei Belsasar di Babilonia di antiguedad. Pa medio di Daniel, Yehova a bisa e gobernante ei: “Bo a wordo pisa den balansa y bo ta pisa mucho poco.” E mes anochi ei Belsasar a wordo mata y e poderoso Imperio di Babilonia a cai. (Daniel 5:27, 30) Mescos tambe, e huicio di Dios contra e bestia politico y contra esnan cu tin su marca ta nifica fin di e entidad ei y tambe di su apoyadonan. Pero den e caso aki Dios lo elimina no solamente un sistema politico sino tur rastro di gobernacion humano. (Daniel 2:44; Revelacion 19:19, 20) Pesei, ta masha importante anto pa nos evita di tin e marca mortal di e bestia!

E Marca Identifica

Inmediatamente despues cu e buki di Revelacion a menciona e cifra 666, e ta papia di 144.000 siguido di e Lamchi, Hesucristo, cu tin su nomber y nomber di su Tata, Yehova, skirbi riba nan frenta. E personanan cu tin e nombernan aki ta pertenece na Yehova y na su Yiu, di kendenan nan ta duna testimonio cu orguyo. Mescos tambe, esnan cu tin e marca di e bestia ta mustrando publicamente cu nan ta sirbiendo  e bestia. Pues, e marca, sea riba man drechi of riba frenta, na moda di papia, ta un simbolo cu ta identifica esnan cu tin e como personanan cu ta venera y apoya e sistemanan politico semehante na bestia di e mundo aki. Esnan cu tin e marca ta duna “Cesar” loke en realidad ta pertenece na Dios. (Lucas 20:25; Revelacion 13:4, 8; 14:1) Con asina? Nan ta haci esaki door di honra y venera estado y su politica, su simbolonan y su potencia militar, esta, cosnan cu nan ta mira como nan speransa y salbacion. Cualkier adoracion cu nan rindi na e Dios berdadero no ta nada mas cu sirbishi di lip.

Na contraste, Bijbel ta haci un apelacion fuerte na nos pa “no confia den prinsnan, den yiu di hende, den kende no tin salbacion. Su spirito ta sali, e ta bolbe na tera; e mes dia ei su pensamentonan ta perece.” (Salmo 146:3, 4) Esnan cu ta sigui e conseho sabi ei no ta keda desilusiona ora gobiernonan keda sin cumpli cu nan promesanan of ora lidernan carismatico perde nan prominencia.—Proverbionan 1:33.

Esaki no ta nifica cu cristiannan berdadero ta sinta wak sin haci nada pa alivia e miseria di humanidad. Al contrario, nan ta hopi activo den e obra di proclama e unico gobierno cu lo resolve e problemanan di humanidad—e Reino di Dios, cu nan ta representa.—Mateo 24:14.

E Reino di Dios —E Unico Speransa di Humanidad

Tempo cu Hesus tawata riba tera, el a haci e Reino di Dios e tema principal di su predicacion. (Lucas 4:43) Den su oracion modelo, conoci tambe como e oracion di Nos Tata, Hesus a siña su siguidonan pidi pa e Reino ei bini y pa e boluntad di Dios sosode aki riba tera. (Mateo 6:9, 10) E Reino ta un gobierno cu lo goberna riba henter e tera, no for di un cierto capital aki riba tera, sino for di shelo. Pesei Hesus a yam’e “e reino di shelo.”—Mateo 11:12.

Ken ta den un miho posicion pa ta Rei di e Reino ei cu Hesucristo, esun cu a muri pa su futuro subditonan? (Isaias 9:6, 7; Huan 3:16) Pronto e Gobernante perfecto aki, awor un criatura spiritual poderoso, lo tira e bestia, su reinan y su ehersitonan den “e lago di candela cu ta kima cu suafel”, un simbolo di destruccion completo. Pero esei no ta tur cos. Hesus lo elimina Satanas tambe, algo cu hende lo no ta capas di haci nunca.—Revelacion 11:15; 19:16, 19-21; 20:2, 10.

E Reino di Dios lo trece pas pa tur su subditonan obediente. (Salmo 37:11, 29; 46:8, 9) Ni tristesa, ni dolor ni morto lo no existi mas. Esaki si ta un speransa glorioso pa esnan cu keda liber di e marca di e bestia!—Revelacion 21:3, 4.

[Nota]

[Cuadro na pagina 5]

Indicacionnan pa Haya Sa Nificacion di 666

1. Hopi bes nombernan di Bijbel ta bisa algo di e caracteristicanan of bida di e personanan cu tawatin e nombernan ei, manera den e caso di Abraham, Hesus y hopi otro hende. Mescos tambe, e nomber di e bestia, cu ta mas bien un number, ta representa su caracteristicanan.

2. Den e buki biblico di Daniel, e varios bestianan ta representa reinonan of imperionan humano cu a sigui un tras di otro. E bestia di Revelacion 13:1 y 2, cu ta consisti di diferente animal, ta simbolisa e sistema politico mundial cu ta funciona cu poder y bou di control di Satanas.

3. E echo cu e bestia tin “number di un hende”, of “un number humano”, ta indica cu e ta un entidad humano, y no un demoño. Pesei, e ta refleha e fayonan humano causa pa pica y imperfeccion.

4. Den bista di Dios, e cifra seis, uno menos cu shete—cu ta biblicamente completo of perfecto—ta indica imperfeccion. E marca 666 ta enfatisa e deficiencia ei door di ripiti e cifra tres biaha.

[Plachinan na pagina 6]

Gobernacion humano a resulta di ta un fracaso; e number 666 ta un simbolo apropiado di esei

[Reconocemento]

Mucha hambra: UNITED NATIONS/Potret di F. GRIFFING

[Plachinan na pagina 7]

Hesucristo lo percura pa un gobernacion perfecto riba tera