Depende Riba Dios Su Spirito pa Trata cu Cambionan den Bida

“Haci tur bo esfuerso pa presenta bo mes aproba dilanti di Dios.”—2 TIMOTEO 2:15.

1. Ki cambionan ta forma un reto pa nos bienestar spiritual?

E MUNDO rond di nos ta cambia continuamente. Nos ta mira progresonan cientifico y tecnologico impresionante, compaña pa un deterioro drastico di normanan moral. Manera nos a trata den e articulo anterior, cristiannan tin cu resisti e spirito di mundo aki cu ta anti Dios. Sinembargo, segun cu mundo ta cambia, nos tambe ta cambia den hopi manera. Nos ta cambia di mucha bira adulto. Podise nos ta gana of perde rikesa, nos salu y sernan keri. Hopi di e cambionan ei ta fuera di nos control, y nan por forma retonan nobo y formidabel pa nos bienestar spiritual.

2. Ki cambionan David a experencia den su bida?

² Masha poco hende a experencia cambionan asina radical den nan bida manera David, yiu di Yese (Isai). David su bida a cambia rapidamente for di un wardado di carne desconoci pa un bida di fama como heroe nacional. Despues el a bira un fugitivo, y a ser persigui manera  un bestia pa un rei yalurs. Caba David a bira rei y conkistado. El a soporta e consecuencianan doloroso di pica serio. El a sufri tragedia y desunion den su famia. El a bira rico, bira bieu y a sufri di e malesanan di biehes. Sinembargo, apesar di e tantisimo cambionan den su bida, David durante henter su bida a desplega un confiansa den Yehova y den Su spirito. David a haci tur su esfuerso pa presenta su mes “aproba dilanti di Dios”, y Dios a bendicion’e. (2 Timoteo 2:15) Aunke nos circunstancianan no ta mescos cu di David, nos por siña algo for di e manera cu el a maneha e asuntonan den su bida. Su ehempel por yuda nos compronde con nos por sigui haya e yudansa di Dios su spirito segun cu nos ta confronta cambionan den nos bida.

David Su Humildad Ta un Bon Ehempel

3, 4. Con David su bida a cambia di un wardado di carne desconoci, pa un persona cu a gosa di fama nacional?

³ Na mucha, David no tawata prominente ni sikiera den su mes famia. Ora cu profeta Samuel a bin Betlehem, David su tata a presenta shete di su ocho yiu hombernan na dje. David, esun mas jong, nan a laga ta cuida e carnenan. Sinembargo, Yehova a scohe David pa ta e futuro rei di Israel. Nan a manda yama David for di den cunucu. Anto, segun e relato di Bijbel: “Samuel a cohe e cacho di azeta y a ungie den presencia di su rumannan; y e spirito di SEÑOR a bin cu poder riba David for di e dia ei padilanti.” (1 Samuel 16:12, 13) David a depende riba e spirito ei durante henter su bida.

⁴ Poco despues, e mucha wardado di carne aki ta bira famoso den su pais. Nan a manda busc’e pa e sirbi rei y toca muziek pa rei. El a mata e guerero Goliat, un gigante asina feros cu asta e soldanan experto di Israel tawatin miedo di confront’e. David a keda nombra como lider di e hombernan di guera, y el a bataya cu exito contra e Filisteonan. E pueblo a stim’e. Nan a compone cantica cu tawata elogi’e. Mas prome cu esei, un consehero di Rei Saul a describi e hoben David no solamente como “un bon musico” cu tawata toca harpa bon, sino tambe como “un homber poderoso y balente, un guerero, un homber cu ta prudente den su palabranan, y un nechi homber.”—1 Samuel 16:18; 17:23, 24, 45-51; 18:5-7.

5. Kico lo por a haci David arogante, y con nos sa cu e no a bira arogante?

⁵ Fama, bon tipo, hubentud, bon habilidad di papia, bon musico, aptitud militar, aprobacion di Dios—parce cu David tawatin tur loke un hende por a desea. Cualkier un di e habilidadnan aki lo por a hacie arogante, sinembargo e no a bira arogante. Tuma nota kico David a contesta Rei Saul, ora esaki a duna David e oportunidad pa casa cu su yiu mohe. Cu berdadero humildad, David a bisa: “Ta ken mi ta, y ta kico mi bida of mi tata su famia ta den Israel, pa mi ta rei su yerno?” (1 Samuel 18:18) Comentando riba e versiculo aki un comentarista biblico a skirbi: “David tawata kiermen cu ni a base di meritonan personal, ni debi na su posicion social, ni debi na su liña di desendencia, e no por a pretende di ta digno di ricibi e honor di bira yerno di rei.”

6. Dicon nos tin cu cultiva humildad?

⁶ David su humildad tawata basa riba e echo cu el a reconoce cu den tur sentido Yehova ta inmensamente mas superior cu hende imperfecto. David tawata keda straño mes cu Dios asta ta tuma nota di hende. (Salmo 144:3)  Tambe David tawata sa cu cualkier grandesa cu lo e por tawatin, tawata solamente pasobra Yehova a demostra humildad y a rebaha su mes pa sostene David, proteh’e y cuid’e. David a canta: “Bo mes humildad lo haci mi grandi.” (Salmo 18:35, NW) Esaki ta un bunita les pa nos! Nos talentonan, nos logronan y nos privilegionan teocratico nunca mester haci nos orguyoso. Apostel Pablo a skirbi: “Kico bo tin cu bo no a ricibi? Ma si bo a ricibie, pakico bo ta gaba como si fuera bo no a ricibie?” (1 Corintionan 4:7) Pa nos por tin Dios su spirito santo y pa gosa di su aprobacion, nos tin cu cultiva y mantene humildad.—Santiago 4:6.

“No Venga Boso Mes”

7. David a haya ki oportunidad pa mata Rei Saul?

⁷ Mientras cu David su fama no a pon’e bira orguyoso, su fama a haci Rei Saul (for di ken Dios a kita su spirito) asina yalurs cu e kier a mata David. Aunke David no a haci nada malo, e tawatin cu hui pa su bida y a bai biba den desierto. Na un ocasion, durante cu Rei Saul tawata persigui David persistentemente, Rei Saul a drenta den un cueba sin sa cu David y su compañeronan tawata scondi eiden. David su hombernan a urgie pa probecha di e oportunidad—aparentemente manda pa Dios—pa mata Saul. Nos por imagina nan den scuridad ta fluister bisa David: “Mira, esaki ta e dia di cual SEÑOR a bisa bo: ‘Mira, mi ta bai entrega bo enemigo den bo man, y lo bo haci cu ne manera bo ta haya ta bon.’”—1 Samuel 24:2-6.

8. Dicon David a frena su mes di tuma vengansa?

⁸ Pero David a nenga di haci Saul daño. Demostrando fe y pasenshi, el a keda satisfecho cu djis laga e asunto den man di Yehova. Despues cu e Rei a sali for di e cueba, David a yam’e y a bisa: “Cu SEÑOR husga entre abo y ami, y cu SEÑOR tuma vengansa pa mi contra bo, ma mi man lo no ta contra bo.” (1 Samuel 24:12) Aunke David tawata sa cu ta Saul ta robes, e no a venga su mes; tampoco e no a papia malo cu Saul ni papia malo di Saul. Na varios ocasion mas, David a frena su mes di tuma lei den su mes man. Mas bien, el a depende riba Yehova como esun cu lo rectifica e asunto.—1 Samuel 25:32-34; 26:10, 11.

9. Dicon nos no mester paga malo cu malo si nos ta experencia oposicion of persecucion?

⁹ Mescos cu David, kisas bo ta haya bo den situacionnan dificil. Podise compañeronan di scol, coleganan di trabou, miembronan di famia of otro hende cu no ta comparti bo fe ta opone bo of persigui bo. No paga malo cu  malo. Spera riba Yehova, y pidie laga su spirito santo yuda bo. Kisas e personanan incredulo ei lo keda impresiona cu bo bon conducta y bira creyente. (1 Pedro 3:1) En todo caso, bo por ta sigur cu Yehova ta mira bo situacion y na su debido tempo lo haci algo al respecto. Apostel Pablo a skirbi: “Nunca no venga boso mes, stimanan, ma laga luga pa e furia di Dios, pasobra ta para skirbi: ‘“Ta di mi vengansa ta, ami lo paga bek”, Señor ta bisa.’”—Romanonan 12:19.

“Scucha Disiplina”

10. Con David a cai den pica, y con el a purba sconde e pica?

¹⁰ Añanan a pasa. David a bira un Rei stima y masha prominente mes. Su bida di fieldad extraordinario, hunto cu e salmonan bunita cu el a skirbi como alabansa na Yehova, facilmente por a duna e impresion cu esaki tawata un homber cu nunca lo cai den pica serio. Sinembargo, ta net esei a sosode. Un dia, Rei David a observa for di riba su dak con un mohe bunita tawata baña. El a bai aberigua ta ken e mohe tawata. Ora el a haya sa cu e mohe tawata Betsabe y cu su casa Urias tawata afo ta bringa den guera, David a manda busca Betsabe y a tene relacion cu ne. Despues, el a haya sa cu Betsabe a sali na estado. Si e asunto sali na cla esei lo a forma un gran escandalo! Bou di e Lei di Moises, adulterio tawata un crimen pa cua bo ta haya pena di morto. E Rei evidentemente a pensa cu lo e por a sconde e pica. Pesei el a manda un mensahe na e ehersito y a ordena Urias pa regresa Herusalem. David a kere cu Urias lo a pasa nochi serca Betsabe, pero esei no a sosode. Desespera, David a manda Urias bek den e guera hunto cu un carta pa Joab, e comandante militar. Den e carta tawatin instruccion pa durante bataya e pone Urias den un situacion cu lo a causa su morto. Joab a obedece, y Urias a wordo mata. Despues cu Betsabe a tene e periodo custumbra di rou, David a tum’e como su esposa.—2 Samuel 11:1-27.

11. Ki storia Natan a conta David, y con el a reacciona?

¹¹ A parce manera cos cu e complot a funciona, aunke David lo mester tawata sa cu Yehova a mira henter e asunto. (Hebreonan 4:13) Lunanan a pasa, y e yiu a nace. Anto riba instruccion di Dios, profeta Natan a bai serca David. E profeta a conta Rei un storia di un homber rico cu tawatin hopi carne, pero cu a coi y mata e unico carne masha stima di un homber pober. E storia a traha riba David su sentido di husticia, pero ni un ora so e no a sospecha cu e tawatin un nificacion scondi. David a condena e homber rico mesora. Furioso el a bisa Natan: “E homber cu a haci esaki ta merece morto”!—2 Samuel 12:1-6.

12. Ki huicio Yehova a dicta contra David?

¹² E profeta a contesta: “Ta abo ta e homber!” David a condena su mes. Sin duda, David su indignacion a cambia rapidamente den berguensa y tristesa profundo. Babuca el a para scucha Natan dicta Yehova su huicio inevitabel. No tawatin palabranan di consuelo. David a desprecia e palabra di Yehova door di  haci loke ta malo. Acaso e no a mata Urias pa medio di e spada di enemigo? Awel, spada lo no aparta for di e cas di David. E no a tuma Urias su casa den secreto? Mesun cos malo lo pasa cu ne, pero no den secreto sino publicamente.—2 Samuel 12:7-12.

13. Con David a reacciona riba e disiplina di Yehova?

¹³ Un cos bon di David tawata cu e no a nenga di ta culpabel. E no a lanta contra profeta Natan. E no a tira falta riba otro hende ni a bin cu excuse pa loke el a haci. Ora Natan a confronta David cu su picanan, el a acepta responsabilidad y a bisa: “Mi a peca contra SEÑOR.” (2 Samuel 12:13) Salmo 51 ta mustra e angustia cu su culpa a caus’e y con profundo el a repenti. El a roga Yehova: “No tira mi for di bo presencia, y no kita bo spirito santo for di mi.” David a kere firmemente cu Yehova den su misericordia, lo no a desprecia “un curason repenti y kibra” debi na pica. (Salmo 51:11, 17) David a sigui depende riba Dios su spirito. Aunke Yehova no a proteha David di e consecuencianan amargo di su pica, el a pordon’e.

14. Con nos mester reacciona riba e disiplina di Yehova?

¹⁴ Nos tur ta imperfecto, y nos tur ta peca. (Romanonan 3:23) Tin biaha nos por comete pica serio, manera David. Mescos cu un tata amoroso ta disiplina su yiunan, asina Yehova ta corigi esnan cu ta purba sirbie. Sinembargo, aunke disiplina ta probechoso, e no ta facil pa acepta. De echo, tin biaha e ta haci “dolor.” (Hebreonan 12:6, 11) Sinembargo, si nos “scucha disiplina”, nos por drecha nos relacion cu Yehova atrobe. (Proverbionan 8:33, NW) Pa nos sigui disfruta di e bendicion di tin Yehova su spirito, nos tin cu acepta coreccion y traha pa haya Dios su aprobacion.

No Confia den Rikesa Insigur

15. (a) Con algun hende ta uza nan rikesa? (b) Con David kier a uza su rikesa?

¹⁵ No tin ningun indicacion cu David tawatin un posicion social prominente ni cu su famia tawata rico. Sinembargo, durante su reinado David a acumula rikesa enorme. Manera bo sa, hopi hende ta cohe nan rikesa warda, of na un manera golos nan ta trata di aument’e of nan ta gast’e na un manera egoista. Otronan ta uza nan placa pa glorifica nan mes. (Mateo 6:2) David a uza su rikesa na un otro manera. Su anhelo tawata pa honra Yehova. David a conta Natan cu su deseo ta pa traha un tempel pa Yehova pa pone e arca di aliansa aden, ya cu e tempo ei e arca tawata na Herusalem “meimei di cortinanan di tent.” Yehova tawata contento cu David su intencion pero mediante profeta Natan el a bis’e cu ta David su yiu homber Salomon lo traha e tempel.—2 Samuel 7:1, 2, 12, 13.

16. Ki preparacionnan David a haci pa construccion di e tempel?

¹⁶ David a reuni e materialnan pa uza den e gran proyecto di construccion aki. Anto el a bisa Salomon: “Mi a prepara pa e cas di SEÑOR  shen mil talento di oro y un miyon talento di plata, y brons y hero cu no por wordo pisa, pasobra nan ta na cantidad grandi; tambe mi a prepara palo y piedra, y abo mag añadi na nan.” For di su fortuna personal el a contribui 3.000 talento di oro y 7.000 talento di plata. * (1 Cronicanan 22:14; 29:3, 4) David su dunamento generoso no tawata pa impresiona hende, sino un manifestacion di fe y debocion na Yehova Dios. Reconociendo e Fuente di su rikesa, el a bisa Yehova: “Tur cos ta bin for di bo y ta for di bo man nos a duna bo.” (1 Cronicanan 29:14) David su curason generoso a motiv’e pa haci tur loke e tawata por pa promove adoracion puro.

17. Con e conseho na 1 Timoteo 6:17-19 ta aplica tanto pa hende rico como hende pober?

¹⁷ Laga nos tambe uza nos pocesionnan material pa haci bon. En bes di core tras di un estilo di bida materialista, ta miho pa nos busca e aprobacion di Dios, esei ta e proceder di berdadero sabiduria y felicidad. Pablo a skirbi: “Instrui esnan cu ta rico den e mundo actual pa nan no ta soberbe y pa nan no fiha nan speransa riba e insiguridad di rikesa, ma riba Dios, kende ta provee pa nos tur cos na abundancia pa nos disfruta di nan. Instrui nan pa haci bon, pa nan ta rico den bon obra, pa nan ta generoso y dispuesto pa comparti, pa nan montona pa nan mes e tesoro di un bon fundeshi pa futuro, pa nan gara loke ta bida berdadero.” (1 Timoteo 6:17-19) Sea cual sea nos situacion economico, laga nos depende riba Dios su spirito y sigui un curso di bida cu lo haci nos “rico pa cu Dios.” (Lucas 12:21) No tin nada mas balioso cu un posicion aproba serca nos amoroso Tata celestial.

Presenta Bo Mes Aproba Dilanti di Dios

18. Den ki manera David a pone un bon ehempel pa cristiannan?

¹⁸ Durante henter su bida David a busca e aprobacion di Yehova. Den cantica el a declara: “Tene misericordia di mi, o Dios, tene misericordia di mi, pasobra den bo mi alma ta tuma refugio.” (Salmo 57:1) David su confiansa den Yehova no tawata en vano. David a bira bieu, y a yega “na un edad hopi avansa.” (1 Cronicanan 29:28) Aunke David a comete picanan serio, e ta ser recorda como un di e tantisimo testigonan di Dios cu a desplega fe extraordinario.—Hebreonan 11:32.

19. Con nos por presenta nos mes aproba dilanti di Dios?

¹⁹ Segun cu abo ta confronta situacionnan cu ta cambia den bida, corda cu mescos cu Yehova a sostene, fortalece y corigi David, asina Yehova por haci pa bo tambe. Apostel Pablo, mescos cu David, a confronta hopi cambio den bida. Sinembargo, e tambe a keda fiel door di depende riba Dios su spirito. El a skirbi: “Pa tur cos mi tin e forsa den birtud di esun cu ta duna mi poder.” (Filipensenan 4:12, 13, NW) Si nos depende riba Yehova, lo e yuda nos pa nos tin exito. E kier pa nos tin exito. Si nos scuch’e y hala serca dje, lo e duna nos e fortalesa pa haci su boluntad. Y si nos sigui depende riba e spirito di Dios, nos lo por ‘presenta nos mes aproba dilanti di Dios’ awor y pa eternidad.—2 Timoteo 2:15.

[Nota]

Con Lo Bo A Contesta?

• Con nos por proteha nos mes contra orguyo?

• Dicon nos no mester venga nos mes?

• Con nos mester mira disiplina?

• Dicon nos mester confia den Dios y no den rikesa?

[Preguntanan di Estudio]

[Plachi na pagina 16, 17]

David a depende riba Dios su spirito y a busca pa haya Dios su aprobacion. Abo tambe ta haci mescos?

[Plachi na pagina 18]

“Tur cos ta bin for di bo y ta for di bo man nos a duna bo”