Informe di Proclamadonan di Reino

Hayando Hende na Nan Trabou

KICO e apostelnan Mateo, Pedro, Andres, Santiago y Huan tawatin en comun? Nan tur tawata na nan trabou ora Hesus a yama nan. Pedro, Andres, Santiago y Huan tawata sea piscando of preparando pa bai pisca ora Hesus a invita nan, bisando: “Sigui mi!” Mateo tawata den oficina di belasting ora Hesus a invit’e pa bira su disipel.—Mateo 4:18-21; 9:9.

Dunamento di testimonio na hende na nan trabou por duna bon resultado. Testigonan di Yehova na Japon a ripara esaki y pesei resientemente nan a haci un esfuerso special pa participa den e aspecto aki di sirbishi. Kico tawata e resultadonan? Den un par di luna, nan a haci miles di rebishita, y a cuminsa rond di 250 studio di Bijbel. Lesa e siguiente experencianan.

Un predicado di tempo completo na Tokio a topa manager di un restaurant cu a yega di papia cu un Testigo mas o menos 30 aña pasa na scol. Aunke e manager no a compronde mucho bon loke nan a bis’e e tempo ei, el a interesa den Bijbel. Awor cu el a bolbe haya interes, mesora el a acepta un studio di Bijbel den e buki Conocimentu cu Ta Hiba na Bida Eterno. * Ademas, el a cuminsa un programa personal di lesa Bijbel tur anochi prome cu e bai drumi.

Un predicado cu ta sirbi como pionero special a bishita un oficina y a pidi pa e manager. Aunke e manager no tawata disponibel, e señora hoben cu a contesta e telefon di e manager a puntr’e: “Bo kier papia cu mi?” Despues di un combersacion cortico na telefon, e señora a sali bini pafo y a bisa cu e ta interesa pa lesa Bijbel. E pionero special a haci areglo pa bolbe bek cu un Bijbel y a cuminsa un studio di Bijbel cu e señora. Nan tawata tene e studio den un parke den bicindario, mainta tempran prome cu e señora bai trabou.

Na un otro oficina, un homber a mira con un colega di trabou a tuma e revistanan Toren di Vigilancia y Spierta!, y tira nan afo asina cu e Testigo a bai. Ora e homber a yega cas, el a conta su esposa, kende tambe ta un Testigo, di e incidente y a bisa cu si ta serca dje e Testigo a bini, por lo menos lo el a scucha un rato. Yiu mohe di e homber cu a tende loke su tata a bisa, a bai conta un Testigo cu ta traha teritorio di negoshi. Mesora e Testigo a bishita e esposo na su oficina y a cuminsa un studio di Bijbel cu ne. No a tarda mucho cu e homber a cuminsa asisti na e reunionnan di diadomingo regularmente.

Dunamento di testimonio caminda e hendenan ta traha a trece mas beneficio. Hopi publicado na Japon a bira hopi capas den hacimento di rebishita den centronan comercial, fabricanan y oficinanan. Ademas, pa via di e medio aki di duna testimonio, a haya contacto cu hopi persona cu den transcurso di añanan a bira inactivo, y por a cuminsa studia cu nan. E resultadonan tawata excepcional. Resientemente, un congregacion den centro di Tokio a informa 108 studio di Bijbel, mas cu dobel e cantidad cu nan a informa aña pasa.

[Nota]