Liberia Prosperidad Spiritual Apesar di Guera

PA MAS cu un decada, guera civil ta asota Liberia. Meimei di aña 2003, rebeldenan a bringa te drenta Monrovia, e ciudad capital. Hopi Testigo di Yehova a haya nan obliga ta hui for di nan cas, tin biaha na varios ocasion. Bes tras bes hende tawata plunder nan pertenencianan.

Lamentablemente, miles di hende a ser mata durante di e bringamento den e capital. Entre nan tawatin dos Testigo di Yehova, un ruman homber y un ruman mohe. Con e otro rumannan a trata cu e situacion dificil aki, y kico a ser haci pa yuda nan?

Yudansa pa Esnan den Necesidad

Durante di henter e periodo di crisis, e sucursal di Testigonan di Yehova na Liberia a organisa yudansa pa esnan den necesidad. Nan a percura cuminda, articulonan necesario di cas y productonan medico. Durante e tempo cu e rebeldenan tawatin e haf den nan poder, cuminda a bira scars. Como cu sucursal a premira e desaroyo aki, nan tawatin un stock di articulonan basico pa e dos mil Testigonan cu a hui bai keda na e Salonnan di Reino den tur skina di e stad. E rumannan a parti e cuminda tiki tiki di manera cu el a dura te ora cu haf a bolbe habri. E sucursalnan di Belgica y Sierra Leone a manda productonan medico cu avion, y e sucursalnan di Gran Bretania y Francia a manda cargamento di paña.

Apesar di e situacion desesperante, nos rumannan a keda positivo y alegre. E comentario di un di nan cu a hay’e ta hui tres biaha for di su cas, ta un comentario tipico di hopi ruman. El a bisa: “Esakinan ta e condicionnan cu nos ta predica di dje; nos ta bibando den e ultimo dianan.”

Reaccion Riba e Bon Nobo

Apesar cu disturbionan ta tuma luga den henter e nacion, e Testigonan ta sigui haya resultadonan excelente den sirbishi di veld. Tawatin un maximo di tur tempo di 3.879 publicado di Reino na januari 2003, y na februari nan a conduci 15.227 studio di Bijbel.

Hende ta reacciona lihe riba e bon nobo. Un ehempel di esaki ta na un pueblito den e parti suitost di e pais. Un congregacion a plania pa tene e Memorial of Conmemoracion di e morto di Cristo na Bewahn, un pueblito grandi cu ta keda na un distancia di cinco ora cana for di caminda nan normalmente ta reuni. Prome cu e rumannan a bai invita e hendenan di e pueblito pa e Conmemoracion, nan a duna e alcalde di Bewahn un invitacion. Ora el a hay’e, el a cohe su Bijbel, bai serca e habitantenan di e pueblito y lesa un texto cu tawatin riba e invitacion, animando nan pa asisti na e Conmemoracion. Pues ora e publicadonan a yega, nan a ripara cu el a haci nan trabou caba! E alcalde, hunto cu su yiunan y dos casa, a bin Memorial. En total, 27 hende a asisti. Entretanto, e alcalde a bandona Iglesia Metodista, cuminsa  studia cu e Testigonan y a ofrece un tereno pa traha un Salon di Reino.

Un Cambio di Actitud

E comportacion di nos rumannan tambe a resulta masha efectivo den cambia algun opositor su punto di bista pa cu e berdad. Tuma por ehempel e caso di un homber cu yama Opoku. Un predicado pionero special a top’e den sirbishi di veld y a ofrec’e un revista Toren di Vigilancia. Opoku tawata interesa den un articulo den e revista pero e no tawatin cen. E pionero a splic’e cu nos no ta cobra pa e revista y a laga e revista cu ne y a haci areglo pa bishit’e atrobe. Ora el a bolbe bishit’e, Opoku a puntra e pionero: “Bo no conoce mi? Mayoria di boso hendenan den e stad di Harper conoce mi. Antes mi tawata kita tur boso yiunan for di scol!” Anto el a splica cu e tawata cabes di un scol secundario den e stad y cu el a persigui e yiunan di Testigonan di Yehova pasobra nan no ta saluda bandera.

Sinembargo, tres ehempel di amor cristian cu Testigonan di Yehova a desplega a pone Opoku reexamina su actitud. Na prome luga, el a mira con e Testigonan a cuida un ruman spiritual cu tawata hopi malo. Asta nan a haci areglo pa e haya tratamento den un pais biciña. Opoku a kere cu e ruman malo tawata un “big shot” den e Testigonan pero despues a haya sa cu e tawata un Testigo comun y coriente. Na di dos luga, durante decada di 1990, Opoku tawata un refugiado na Côte d’Ivoire. Un dia cu e tawatin sed, el a bai cumpra awa serca un yoncuman. Opoku tawatin solamente cen pega, y e yoncuman no tawatin cen larga, pesei el a duna Opoku e awa sin cobr’e. Segun cu e yoncuman ta pasa e awa p’e, e yoncuman a puntr’e: “Bo ta kere cu lo yega un dia cu hende manera ami cu bo lo duna otro cos sin cobra otro?” Opoku a rei cu e tawata un Testigo di Yehova, y e yoncuman a confirma cu ta asina. E generosidad y bondad di e ruman homber aki a impresion’e. Por ultimo, e echo cu e pionero special tawata dispuesto pa lag’e haya un revista pornada a combence Opoku cu su punto di bista di e Testigonan tawata robes y cu e mester cambia su actitud. El a haci progreso spiritual y awor e ta un publicado no batisa.

Aunke e rumannan na Liberia ta sigui confronta condicionnan sumamente dificil, nan ta deposita nan confiansa den Dios y fielmente ta proclama e bon noticia cu lo bin temponan mas miho bou di e gobernacion husto di e Reino di Dios. Yehova nunca lo lubida nan trabou duro y e amor cu nan ta mustra pa su nomber.—Hebreonan 11:6.

[Mapanan na pagina 30]

(Pa e texto den su formato completo , wak e publicacion)

MONROVIA

[Plachinan na pagina 31]

Durante tempo di crisis, e pueblo di Yehova ta duna yudansa spiritual y material na esnan den necesidad