Nos Mester Resa na Angel pa Yudansa?

TA CORECTO pa resa na angel den tempo di angustia? Hopi hende ta pensa cu si. De echo, e New Catholic Encyclopedia ta bisa: “Un hende por resa na . . . angel . . . pero solamente den e sentido cu nan por roga Dios pa nos.” Nos mester pidi angel pa intermedia pa nos?

E Palabra di Dios ta duna e nomber di solamente dos angel fiel, Miguel cu Gabriel. (Daniel 8:16; 12:1; Lucas 1:26; Hudas 9) Como cu Bijbel ta menciona e nombernan aki, nos por compronde cu cada angel ta un persona spiritual individual cu un nomber, y no simplemente un forsa of energia impersonal. Sinembargo, tawatin otro angelnan cu a nenga di revela nan nomber. Por ehempel, ora Yacob a puntra un angel cu a bishit’e con yam’e, e angel a nenga di bis’e. (Genesis 32:29; Huesnan 13:17, 18) Bijbel no ta duna nos un lista di nomber di angel, y asina ta evita cu hende lo a duna nan demasiado atencion.

Un di e tareanan di e angelnan ta pa hiba mensahe for di Dios pa hende. De echo, e palabra na Hebreo y na Griego original cu ta ser traduci como “angel”, literalmente ta nifica “mensahero.” Sinembargo, angel no ta sirbi como mediado cu ta hiba oracion di hende na e trono di e Haltisimo. Dios a dicidi cu oracion mester ta dirigi na dje den nomber di su Yiu Hesucristo, kende a bisa: “Tur loke boso pidi e Tata den mi nomber, [lo] e duna boso.”—Huan 15:16; 1 Timoteo 2:5.

Yehova Dios nunca ta mucho ocupa pa scucha nos, si nos acerc’e na e manera corecto. Bijbel ta sigura nos: “[Yehova] ta serca di tur esnan cu ta sclama na dje, serca di tur esnan cu ta sclama na dje den berdad.”—Salmo 145:18.