Storia di Bida

Sacrificionan Chikito A Duna Nos Bendicionnan Grandi

SEGUN E RELATO DI GEORGE Y ANN ALJIAN

Ami cu mi casa nunca a imagina cu un dia nos lo a bruha entre e palabra “maestro” cu “raton.” Nunca nos a pensa cu ora nos tin 60 y pico aña nos lo ta kibra cabes riba letternan straño den un intento pa comunica cu hende for di Lehano Oriente. Sinembargo, ta esei ta loke ami cu Ann a haci na final di decada di 1980. Laga nos conta bo con e sacrificionan chikito cu nos a haci atrabes di añanan a hiba na hopi bendicion.

MI FAMIA su antepasadonan tawata di Armenia y nos tawata pertenece na Iglesia di Armenia. Ann tawata catolico. Nos tur dos a haci ahuste den nos creencianan religioso ora nos a casa na 1950. Ami tawatin 27 aña, y Ann tawatin 24. Nos a bai biba den un apartamento riba mi negoshi di dry-cleaning na Jersey City (New Jersey, Merca). Ora cu mi a casa mi tawatin e negoshi aki pa cuater aña caba.

Na 1955 nos a cumpra un bunita cas di tres camber na Middletown, New Jersey. E cas ei tawata keda un 60 kilometer for di mi negoshi di dry-cleaning, caminda mi tawata traha seis dia pa siman. Tur anochi mi tawata yega cas laat. E unico contacto cu mi tawatin cu Testigonan di Yehova tawata ora cu tempo tempo nan tawata pasa na mi negoshi y laga literatura biblico cu mi. Mi tawata lesa e literatura cu gran interes. Aunke mi negoshi tawata tuma e mayor parti di mi tempo y atencion, mi a cultiva un respet profundo pa Bijbel.

Poco despues mi a haya sa cu e radio emisora di Watchtower, WBBR, tawata transmiti charlanan biblico durante e ora cu mi tawata  den auto ta bai of bini di mi negoshi. Mi a scucha e charlanan ei bon, y mi interes a crece te cu mi a pidi e Testigonan pa nan bishita mi. Na november 1957, George Blanton a bishita mi na mi cas y a cuminsa studia Bijbel cu mi.

Nos Famia Ta Bira Uni den Adoracion Puro

Kico Ann a pensa di tur esaki? Laga e mes conta bo.

“Na cuminsamento mi tawata masha contra mes. Mi tawata interumpi George su studio di Bijbel asina hopi cu el a dicidi di bai studia na un otro sitio, y el a haci esei pa ocho luna. Durante e tempo ei, George a cuminsa asisti na reunion na Salon di Reino riba diadomingo. Mi a realisa e ora ei cu e tawata serio tocante su studio di Bijbel pasobra esaki tawata su unico dia liber. Sinembargo, el a keda un bon casa y tata—y asta a bira mas miho—y mi actitud a cuminsa cambia. De echo, tawatin biaha cu ora mi ta limpia e mesa di den sala y no tin ni un hende ta wak, mi tawata cohe e revista Spierta! cu semper George tawata laga einan, y les’e. Na otro ocasionnan, George tawata lesa articulonan di Spierta! pa mi cu no tawata trata directamente cu doctrina pero cu semper tawata hala atencion na e Creador.

Un anochi cu George a sali pa bai haya su studio serca Ruman Blanton, mi a cohe un publicacion cu nos yiu homber George di dos aña a pone riba e mesa chikito canto di mi cama. E tawata trata tocante e speransa pa e mortonan. Aunke mi tawata cansa, mi a cuminsa les’e pasobra mi wela a caba di muri y mi tawata hopi deprimi. Mesora mi a mira y compronde e berdad biblico cu hende morto no ta sufriendo un caminda y cu nan lo bolbe na bida den un resureccion den futuro. No a tarda hopi cu mi a lanta sinta stret riba cama, lesando cu smak y halando strepi bou di puntonan cu mi kier a mustra George ora e yega cas for di su studio.

Mi casa casi no por a kere cu mi tawata e mesun persona. Ora el a sali cas, mi tawata masha contra, y awor mi tawata tur emociona cu e berdadnan maraviyoso di Bijbel cu mi a siña! Nos a keda lanta te den marduga, papiando tocante Bijbel. George a splica mi kico ta Dios su proposito pa e tera. E anochi ei mes mi a pidie pa e tene su studio na cas ya asina mi tambe por a participa den dje.

Ruman Blanton a recomenda nos pa laga e muchanan tambe sinta durante nos studio. Nos a pensa cu nan tawata mucho chikito, ya cu un tawatin dos aña y e otro solamente cuater aña. Sinembargo, Ruman Blanton a mustra nos Deuteronomio 31:12, cu ta bisa: ‘Reuni e pueblo, homber, mohe y mucha, . . . pa nan tende y siña.’ Nos a aprecia e sugerencia ei y asta a haci areglo pa e muchanan comenta durante e studio di Bijbel. Nos tawata prepara nos  comentarionan hunto, pero nunca nos no a bisa nan kico nan mester bisa. Nos ta sinti cu ta esaki a yuda dirigi nos yiunan pa haci e berdad di nan mes. Semper nos lo ta gradicido pa e guia cu Ruman Blanton a duna nos pa yuda nos famia crece spiritualmente.”

Desafionan Cu Ta Rekeri Sacrificio

Awor cu nos tawata studia Bijbel como famia, tawatin desafionan nobo cu nos mester a confronta. Siendo cu mi negoshi tawata keda asina leu, normalmente mi no tawata yega cas prome cu 9’or djanochi. Debi na esaki, mi no por a asisti na e reunionnan den siman, aunke mi tawata bai diadomingo si. Ann si tawata asisti na tur reunion y tawata progresa lihe. Mi tambe kier a asisti na tur reunion y conduci un studio di famia productivo. Mi a realisa cu mi mester haci algun sacrificio. Pesei mi a dicidi di sera mi negoshi mas tempran, aunke mi a core e riesgo di perde algun cliente.

Esaki a resulta di ta un bon decision. Nos a considera e studio di famia mesun serio cu e otro cinco reunionnan semanal na Salon di Reino. Nos tawata yam’e nos di seis reunion. Esei a nifica cu nos tawatin un dia y ora fiho p’e, tur diaranson 8’or djanochi. Tawatin biaha despues di come anochi, ora cu nos caba di laba coi kibra un di nos ta bisa: “Ta casi ora pa nos ‘reunion’!” Si mi ta laat, Ann tawata cuminsa cu e studio, y mi ta sigui cu ne asina cu mi yega.

Un otro cos cu a mantene nos fuerte y uni como famia tawata cu nos a lesa e texto di dia hunto mainta. Sinembargo, tawata un problema pa por hacie. Tur hende tawata lanta na un otro ora. Nos a papia riba esaki y a dicidi cu nos tur ta lanta na e mesun ora, desayuna seis or y mei di mainta, anto considera e texto di dia hunto. Esaki a resulta masha bon pa nos. Ora nos yiunan a bira grandi, nan a scohe pa bai sirbi na Betel. Nos ta kere cu ta e consideracionnan diario aki a contribui na nan spiritualidad.

Privilegionan Despues di Bautismo Ta Rekeri Sacrificio Mas Grandi

Mi a batisa na 1962, y despues di tawatin mi negoshi pa 21 aña, mi a bend’e y busca un trabou caminda mi ta biba pa mi por ta mas serca di mi famia ya nos por a sirbi Yehova hunto. Esaki a habri caminda pa hopi bendicion. Nos a pone e meta pa nos tur drenta den sirbishi di tempo completo. Y nos a cuminsa alcansa e meta ei na principio di decada di 1970 ora cu nos yiu homber mayo, Edward, a bira un predicado di tempo completo, of pionero regular, asina cu el a caba scol secundario. Un poco despues, nos yiu homber George a cuminsa traha pionero, y un poco despues Ann tambe a cuminsa. Nan tur tres a anima mi masha hopi, pasobra nan tawata conta mi e experencianan cu nan tawatin den sirbishi di veld. Nos a considera como famia con nos lo por a simplifica nos bida di manera cu nos tur por ta den sirbishi di tempo completo. Nos a dicidi di bende e cas. Nos a biba den e cas ei pa 18 aña, y a lanta nos famia den dje. Nos tawata echt stima nos cas masha hopi, pero Yehova a bendiciona nos decision pa bend’e.

Na 1972, Edward a haya invitacion pa sirbi na Betel, y George na 1974. Aunke ami cu Ann a sinti nan falta, nos no a keda pensa riba con dushi lo tawata si nan a keda biba den nos bario, casa y haya yiu. Mas bien, nos tawata contento cu nos yiunan tawata sirbi Yehova na Betel. * Nos ta eens cu Proverbionan 23:15, cu  ta bisa: “Mi yiu, si bo curason ta sabi, e ora ei mi curason tambe lo keda contento.”

Nos Ta Drenta Sirbishi di Pionero Special

Ora nos dos yiunan a bai Betel, nos a sigui traha pionero. Anto un dia na 1975, nos a ricibi un carta cu e invitacion pa bai traha como pionero special den teritorio no asigna na Clinton County, Illinois. Esei si tawata un sorpresa! Esaki a nifica cu nos mester a bandona New Jersey, caminda nos tawata serca di nos yiunan na New York y caminda nos tawatin nos amigo- y famianan. Sinembargo, nos a considera cu e asignacion aki a bini di Yehova y nos a haci e sacrificio, y esei a hiba na bendicionnan nobo.

Despues cu nos tawatin varios luna ta predica den e teritorio no asigna, nos a cuminsa tene reunion den un centro di bario na Carlyle, Illinois. Pero nos tawata kier un luga permanente pa reuni. Un ruman homber local hunto cu su casa a haya un tereno cu un casita cu nos por a huur. Nos a limpi’e completo—incluso e w.c. pafo—y a combirtie den un luga masha chikito di tene reunion. Nos tin grato recuerdo di un cabai cu tawata curioso pa sa ta kico nos ta haci. Hopi bes e tawata hinca su cabes den bentana pa wak ta kico tawata pasando na e reunion!

Cu tempo, Congregacion Carlyle a keda forma, y nos tawata felis di por tawatin un parti den esaki. Tawatin un pareha pionero jong cu a yuda nos, Steve cu Karil Thompson, kendenan tambe a bin pa traha den teritorio no asigna. E pareha Thompson a keda einan pa varios aña y despues nan a asisti na e Scol Biblico di Galad di Watchtower y a wordo asigna na Oost Africa pa traha como misionero, caminda nan ta sirbi awor den e trabou biahero.

No a tarda hopi cu nos luga chikito di tene reunion a bira mucho preta, y nos tawatin mester di un salon mas grandi. E mesun ruman local cu su casa a bolbe resolve e problema, y nan a cumpra un propiedad cu tawata mas apropiado pa un Salon di Reino. Nos a keda masha felis ora cu un par di aña despues, nos a haya invitacion pa e dedicacion di un Salon di Reino nobo nobo na Carlyle! Mi tawatin e honor di duna e discurso di dedicacion. Nos asignacion einan tawata un experencia maraviyoso pa nos, un bendicion di Yehova.

Un Teritorio Nobo Ta Habri pa Nos

Na 1979 nos a haya un asignacion nobo, na Harrison, New Jersey. Nos a sirbi einan pa mas o menos 12 aña. Durante e tempo ei nos a cuminsa un studio di Bijbel cu un señora Chines, y esaki a hiba na hopi studio mas cu personanan Chines. Mientrastanto nos a haya sa cu tawatin miles di famia y tambe studiante Chines cu ta bai universidad, ta biba den nos area. Debi na esaki nos a ser anima pa siña e idioma  Chines. Aunke esaki a nifica cu nos mester a dedica tempo tur dia na siña e idioma, el a resulta den hopi studio di Bijbel cu personanan Chines den nos area; studionan cu a duna nos goso.

Durante e añanan ei, nos a experencia hopi situacion pret, specialmente ora nos tawata purba papia Chines. Un dia Ann a introduci su mes como un “raton” di Bijbel en bes di un “maestro” di Bijbel. E dos palabranan ei ta casi mescos. E doño di cas a smile y a bisa: “Por fabor drenta. Nunca mi no a yega di papia cu un raton di Bijbel.” Te ainda nos ta lucha cu e idioma.

Despues nos a wordo asigna na un otro luga na New Jersey caminda nos por a sigui traha den teritorio Chines. Mas despues nos a haya invitacion pa muda pa Boston, Massachusetts, caminda ya pa tres aña tawatin un grupo Chines ta desaroya. Nos tawatin e privilegio di apoya e grupo aki durante e ultimo shete añanan y tambe e goso di mir’e bira un congregacion dia prome di januari 2003.

E Bendicionnan di un Bida di Sacrificio Propio

Na Malakias 3:10, nos ta lesa caminda Yehova ta invita su pueblo pa trece nan ofrenda y sacrificio pa asina e por basha su bendicion te ora cu no tin mas necesidad. Nos a renuncia un negoshi cu mi tawata hopi interesa den dje. Nos a bende nos cas, cu nos tawata stima masha hopi. Y nos a sacrifica otro cosnan mas. Sinembargo, compara cu e bendicionnan cu nos a haya, e sacrificionan tawata chikito.

Yehova en berdad a basha bendicionnan grandi riba nos! Nos tawatin e satisfaccion di mira nos yiunan reacciona positivo riba e berdad, nos tawatin e goso di participa tempo completo den un sirbishi cu ta salbabida, y nos a mira con Yehova a percura pa nos necesidadnan. En berdad, nos sacrificionan chikito a duna nos bendicionnan grandi!

[Nota]

[Plachi na pagina 25]

Louise cu George Blanton hunto cu Ann, 1991

[Plachi na pagina 26]

E Salon di Reino na Carlyle, dedica dia 4 di juni 1983

[Plachi na pagina 27]

Nos hunto cu e Congregacion Boston Chines resien forma

[Plachi na pagina 28]

Nos hunto cu Edward, Connie, George y Grace