Bo Ta Corda?

Bo a disfruta di e edicionnan resien di E Toren di Vigilancia? Wel, wak si bo por contesta e siguiente preguntanan:

• Kico ta indica cu Hesus tawatin mas ruman homber y ruman mohe?

Bijbel ta bisa esei na Mateo 13:55 y 56 y na Marco 6:3. E palabra Griego (adelphos) cu nos ta haya einan ta sirbi pa indica “un tipo di relacion carnal of legal, [y] e ta nifica solamente un ruman di e mesun tata y mama of un mita ruman.” (The Catholic Biblical Quarterly di januari 1992)—15/12, pagina 3.

• Ki diferencia cla tin entre e gueranan djawe y esnan di antes, y hopi bes kico tawata e causanan basico?

Den añanan resien e gueranan cu a tormenta humanidad tawata principalmente gueranan civil, esta, gueranan entre gruponan di ciudadano di e mesun pais. Loke a contribui na esakinan ta odio etnico y odio entre tribu cu tribu, diferencianan religioso, inhusticia y disturbio politico. Un otro factor ta golosidad pa poder y pa placa.—1/1, pagina 3-4.

• Con nos por sa cu e intencion di Hesus no tawata pa cristiannan ripiti e palabranan di e oracion modelo for di cabes?

Hesus a duna e modelo aki di oracion den su Sermon Riba Sero. Rond di 18 luna despues, el a ripiti e esencia di su instruccion anterior tocante oracion. (Mateo 6:9-13; Lucas 11:1-4) Ta bon pa nota cu ni e mes no a ripitie palabra pa palabra. Esei ta indica cu e oracion cu Hesus a duna como modelo no tawata un rito pa cita for di cabes.—1/2, pagina 8.

• Despues di e Dilubio, unda e paloma a haya e taki di oleifi cu el a trece na e arca?

Nos no sa ki nivel di salo of temperatura e awanan di e Dilubio tawatin. Pero loke si nos sa ta cu palo di oleifi ta spruit asta despues cu e wordo gekap completamente. Pues algun palo di oleifi lo por a sobrevivi e awanan di e Dilubio y saca blachi despues.—15/2, pagina 31.

• Cu e blokeo di Biafra durante e guera civil di Nigeria, con Testigonan di Yehova den e area ei a ricibi alimento spiritual?

Gobierno a pone un ambtenaar na un post na Europa y un otro tawata traha na e pista di aterisahe na Biafra. Tur dos tawata Testigo. Nan a acepta e tarea peligroso di introduci alimento spiritual na Biafra. Esei a beneficia hopi ruman te dia e guera a caba na 1970.—1/3, pagina 27.

• Kico a ser logra cu e Tratado di Pas di Westfalia, y con religion tawata meti den dje?

E Reformacion a dividi e Imperio Romano Santo den tres religion: catolico, luterano y calvinista. E Union Protestant y e Liga Catolico a ser forma na cuminsamento di siglo 17. Despues, un conflicto religioso a cuminsa na Bohemia y a escala den un lucha internacional pa poder. Gobernantenan catolico y protestant a uza intriga pa haya supremacia politico y ganashi comercial. Finalmente, combersacionnan di pas a tuma luga den e provincia Aleman di Westfalia. Despues di casi cinco aña, nan a firma e Tratado di Westfalia na 1648, poniendo fin na e Guera di Trinta Aña y marca e nacemento di un Europa moderno como un continente di estadonan soberano.—15/3, pagina 20-3.

• Kico ta e nificacion di e marca, of nomber, di “e bestia salbahe”—e number 666?

E marca aki ta ser menciona na Revelacion 13:16-18. E bestia ta referi na gobernacion humano, y e echo cu e bestia tin “number di un hende” ta indica cu gobiernonan ta refleha e condicion humano imperfecto. Tres biaha seis ta mustra cu e ta completamente deficiente den bista di Dios. Esnan cu tin e marca aki ta duna adoracion y honor na Estado politico, of nan ta acudi na dje pa salbacion.—1/4, pagina 4-7.