Cu Yudansa di Bijbel El A Resisti Tentacion

Den e mundo djawe tin hopi tentacion. No ta facil pa pega na e normanan di Bijbel. Por ehempel, kisas ta un reto pa obedece e conseho biblico pa “hui for di inmoralidad.”—1 Corintionan 6:18.

Un Testigo di Yehova cu nos lo yama Sebastian tawata traha pa un compania Scandinavo na Polonia. E tawatin cu lucha duro pa mantene su integridad.

Na trabou tur hende tawata sa cu Sebastian ta un Testigo di Yehova. Su hefenan, cu a gusta su diligencia y bon caracter, a dun’e varios privilegio. Sinembargo, a resulta cu e privilegionan aki lo a oblig’e bai reunionnan di negoshi cu tawatin di aber cu entretenimento cuestionabel.

No a dura mucho cu Sebastian a cuminsa haya duda. “Mi doño di trabou sa cu mi ta un Testigo di Yehova. Ta pesei e ta confia mi y ta conta cu mi. Si mi nenga di participa, mi ta perde e trabou cu tawata asina dificil pa haya. Ke tal si mi no participa den e entretenimento, sino observa so?”

Entretanto Sebastian a haya sa mas di loke a ser spera di dje. Lo e tawatin cu duna clientenan djafo un bon trato door di percura pa nan haya “mucha mohe” pa compaña nan parti anochi pa propositonan inmoral. Kico e tawatin cu haci awor?

Sebastian a dicidi di recorda su doño di trabou tocante su punto di bista biblico pa cu inmoralidad. Pronto a keda bisto cu e trabou aki no tawata p’e, y cu tardi of tempran lo e tawatin cu kita. El a haya un trabou nobo cu un salario mas abou pero sin e tentacionnan ei. Awor e tin un consenshi limpi.

Si hende pone presion riba bo pa bo practica of tolera cosnan inmoral, kico abo lo haci? Lo bo ta dispuesto pa haci un cambio drastico? Esei ta loke Yosef (Hose) di antiguedad a haci, manera Genesis 39:7-12 ta mustra nos.