Dunamento di Testimonio Informal den e Teritorio Ingles na Mexico

TANTEN cu apostel Pablo tawatin cu warda su compañeronan di biahe na Atenas, el a probecha di e tempo pa duna testimonio informal. Segun e relato di Bijbel: “E tawata rasona . . . riba plasa tur dia cu esnan cu pa casualidad tawata presente einan.” (Echonan 17:17) Hesus a duna testimonio informal na un mohe Samaritano banda di un pos durante su biahe for di Hudea pa Galilea. (Huan 4:3-26) Abo ta probecha di tur oportunidad pa papia tocante e bon nobo di e Reino di Dios?

E teritorio di abla Ingles na Mexico ta un tereno fertil pa duna testimonio informal. Turistanan cu ta bishita resort, studiantenan di universidad cu ta bini y bai, y stranheronan pensiona cu ta biba na Mexico, tur ta frecuenta e parke- y restaurantnan. Hopi Testigo di Yehova cu sa Ingles a bira experto den cuminsa combersacionnan cu e personanan aki. De echo, nan ta busca oportunidad pa papia cu ken cu ta parce stranhero of cu ta papia Ingles. Laga nos mira con nan ta hacie.

Hopi bes e Testigonan aki, procedente di otro paisnan cu ta sirbiendo den e teritorio Ingles, simplemente ta introduci nan mes na hende cu nan ta reconoce mesora como stranhero y ta puntra nan di unda nan ta. Esaki logicamente ta hiba na e pregunta ta kico e Testigonan mes ta haciendo na Mexico y esaki ta duna nan e oportunidad pa papia tocante creencianan cristian. Por ehempel, Gloria, kende ta sirbiendo caminda e necesidad ta grandi den e teritorio Ingles di Oaxaca, ta haya cu ta masha facil pa cuminsa combersacion den e manera ei. Ora e tawata bayendo cas bek despues cu el a duna testimonio informal riba un plenchi, un pareha di Inglatera a par’e. E señora a bisa asombra: “Mi no por kere cu mi ta mirando un hende colo scur ta cana den e cayanan di Oaxaca!” En bes di sinti su mes ofendi, Gloria a hari, y nan a cuminsa combersa tocante kico e ta haci na Mexico. E señora a invita Gloria bin dal un cop’i cofi na su cas. Despues cu nan a traha un cita, Gloria a ofrec’e e Toren di Vigilancia y Spierta!, pero e señora a nenga di tuma nan, bisando cu e ta un ateo. Gloria a contest’e cu e gusta papia cu ateonan y cu lo e tin deseo di tende su opinion riba e articulo “Nos Tin Mester di Luga pa Adora Dios?” E señora a acepta y bis’e: “Si bo por combence mi, bo a yega hopi leu cu mi.” A sigui varios combersacion interesante. Mas despues e pareha a bai Inglatera bek, pero e combersacionnan a sigui via E-mail.

 Un otro persona cu Gloria a acerca tawata Saron, un studiante di Washington, D.C., kende a bai Oaxaca pa haci trabou boluntario cu mohenan nativo pa completa su estudio avansa. Despues cu Gloria a elogia Saron pa su esfuersonan, el a splic’e pakico e mes tawata na Mexico. Esaki a hiba na un excelente combersacion tocante Bijbel y loke Dios lo haci, no pa hende pober so, sino pa tur hende. Pa Saron tawata un ironia cu na Merca nunca el a yega di papia cu un Testigo, siendo cu un di e prome hendenan cu el a topa na Mexico tawata un Testigo di Yehova! Saron a acepta un studio di Bijbel y a cuminsa asisti mesora na reunionnan cristian.

Hopi stranhero a muda bai na e resortnan canto di beach na Mexico, en busca di un ambiente di paraiso. Laurel ta uza e punto aki pa cuminsa combersacion na Acapulco. E ta puntra e hendenan si Acapulco ta parce mas un paraiso cu nan luga di origen y kico nan ta gusta di dje. Despues e ta splica nan cu pronto henter tera lo ta un berdadero paraiso. Ora el a uza e metodo aki cu un señora Canades cu el a topa den consultorio di un veterinario, esei a hiba na un studio di Bijbel. Un metodo similar lo ta mes eficas caminda bo ta biba?

‘Den Caya y Riba Plenchi Publico’

Hopi bes e rumannan ta cuminsa un combersacion den caya y riba plenchi publico door di puntra: “Bo ta papia Ingles?” Hopi Mexicano ta papia Ingles debi na nan profesion of pa motibo cu nan a yega di biba na Merca.

Un pareha Testigo a acerca un señora di edad kende tawata den un rolstul cu un verpleegster tawata pusha. Nan a puntra e señora si e ta papia Ingles. E señora a contesta cu si, pasobra el a biba hopi aña na Merca. El a acepta E Toren di Vigilancia y Spierta! Prome cu esei, nunca el a yega di lesa e revistanan aki. El a duna e Testigonan su nomber, Consuelo, y su adres. Ora e Testigonan a bai na e adres cuater dia despues, nan a bin haya nan cu un cas di cuido dirigi door di monhanan catolico. Na prome instante tawata dificil pa haya contacto cu Consuelo pasobra e monhanan tawata desconfia, y nan a bisa cu Consuelo no por a ricibi nan. E pareha a insisti pa e monhanan laga Consuelo sa cu nan tawat’ei y cu nan kier a cumind’e. Mesora Consuelo a laga e pareha drenta. Di e dia ei padilanti, e señora aki di 86 aña di edad ta hayando un studio regular di Bijbel, apesar di e comentarionan negativo di e monhanan. El a asisti na algun reunion cristian tambe.

Proverbionan 1:20 ta bisa: “Sabiduria ta sclama den caya, e ta halsa su bos riba plenchi.” Ripara con esei a tuma luga riba e plenchi di San Miguel de Allende. Un mainta tempran, Ralph a acerca un homber sinta riba un banki. E homber ta den su 50 y picu aña. El a keda masha sorprendi cu a ofrec’e E Toren di Vigilancia y Spierta! y el a conta Ralph su historia.

E ta un veterano di e guera di Vietnam. E stress emocional cu el a haya despues di a mira asina tanto morto a caus’e un atake di  nervio durante su servicio militar. Nan a sac’e for di e gruponan den bataya y a mand’e na un base militar. Ei el a haya e tarea di baña cadaver di solda y prepara nan pa manda nan Merca bek. Awor, 30 aña despues, ainda constantemente e ta sufri di pesadiya y miedo. E mainta ei, sinta riba e plenchi, haciendo oracion den su mes e tawata pidi Dios pa yud’e.

E exmilitar aki a acepta e literatura y tambe un invitacion pa bai e Salon di Reino. Despues cu el a asisti na e reunion, el a bisa cu durante e dos oranan ei na Salon di Reino, pa prome bes den 30 aña el a sinti un pas. E homber aki tawata na San Miguel de Allende pa solamente un par di siman, pero el a ricibi varios studio di Bijbel y a asisti na tur e reunionnan te dia el a regresa su luga. E rumannan a haci areglo pa e sigui cu su studio.

Testimonio Informal na Trabou y na Scol

Abo ta duna di conoce na bo trabou cu bo ta un Testigo di Yehova? Adrián, kende ta bende time-share na Cape San Lucas, si ta haci esei. Como resultado, Judy, su colega di trabou ta conta: “Si ta tres aña pasa bo a bisa mi pa mi bira Testigo di Yehova, lo mi a bisa bo, ‘Nunca di mi bida!’ Pero mi a dicidi cu mi kier a lesa Bijbel. Mi a pensa, ‘Siendo cu mi ta gusta lesa, esei lo no ta masha dificil, toch?’ Wel, mi no ta kere cu mi a pasa mas cu seis pagina prome cu mi a realisa cu mi tawatin mester di yudansa. E unico persona cu mi por a cai ariba tawata un colega di trabou cu yama Adrián. Mi tawata gusta papia cu ne pasobra e tawata e unico persona realmente decente einan.” Mesora Adrián a ofrece Judy pa, hunto cu su enamorada Katie, bin yud’e y contesta tur su preguntanan. Katie a cuminsa studia Bijbel cu ne, y poco tempo despues, Judy a batisa como Testigo di Yehova.

Con bo por duna testimonio informal na scol? Dos Testigo tawata haya les di Spaño na un universidad pero tawata ausente un dia pa asisti na un asamblea cristian. Ora nan a regresa na e les, e maestra a pidi nan pa conta na Spaño kico nan a bai haci. Nan a probecha di e oportunidad pa duna un testimonio mas miho posibel na Spaño. E maestra, Silvia, tawatin hopi interes den profecia di Bijbel. El a acepta un studio di Bijbel na Ingles y awor e ta un publicado di e bon nobo. Varios miembro di su famia tambe ta studiando. Silvia ta bisa: “Mi a haya loke mi tawata busca henter mi bida.” Si, testimonio informal por duna bon resultado.

Probechando di Otro Oportunidadnan

Muestra di hospitalidad por habri caminda pa duna testimonio. Jim y Gail, cu ta sirbiendo na San Carlos, Sonora, a realisa esei. Un señora cu tawata cana cu su cachonan 6 or di mainta a para un rato pa admira nan hardin. Jim y Gail a invit’e pa e drenta y dal un cop’i  cofi. Pa prome biaha den 60 aña el a tende tocante Yehova y e speransa di bida eterno. Nan a cuminsa un studio di Bijbel.

Adrienne tambe ta trata stranhero cu bondad. E tawata comiendo den un restaurant na Cancún ora un mucha homber a acerc’e y puntr’e si e ta di Canada. Ora el a contesta cu si, e hobensito a splic’e cu e cu su mama tawata purba yuda su ruman mohe cu un relato di scol cu e mester a traha tocante Canadesnan. E mama, kende ta papia Ingles, tambe a yega serca. Despues cu Adrienne a contesta cu pasenshi su preguntanan tocante e Canadesnan, Adrienne a bisa: “Pero tin un motibo realmente importante pakico mi a bini aki for di Canada—pa yuda hende siña tocante Bijbel. Señora ta interesa den esei?” E señora a contesta cu si. El a bandona su iglesia dies aña prome y el a purba studia Bijbel riba su mes. El a duna Adrienne su adres y number di telefon, y nan a cuminsa un dushi studio di Bijbel.

‘Tira Bo Pan Riba Awa’

Ora bo ta papia tocante e berdad di Bijbel na tur ocasion, hopi bes bo ta haya chens di duna testimonio na hende cu sea no tin of cu tin masha poco oportunidad pa tende e mensahe di Reino. Den un cafetaria druk den e stad portuario di Zihuatanejo, un Testigo a invita dos stranhero pa sinta cu ne na su mesa, ya cu e cafetaria tawata yen yen. Pa shete aña caba e pareha aki a nabega di un luga pa otro. Nan no a papia mucho bon di Testigonan di Yehova. Despues di e encuentro den e cafetaria, e Testigo a bishita e pareha riba nan boto y a invita nan na su cas. Nan a acepta mas cu 20 revista y 5 buki y a priminti di tuma contacto cu e Testigonan ora nan yega na e siguiente haf.

Jeff y Deb a mira un famia cu un baby masha lief na un sitio yen di restaurant den un centro comercial na Cancún. Ora nan a comenta algo tocante e baby, e mayornan di e criatura a invita nan pa come un pizza hunto cu nan. A resulta cu e famia aki tawata di India. Nunca nan a yega di tende di Testigonan di Yehova, ni mira nos literatura. Nan a keda cu algun di nos publicacionnan.

Algo similar a sosode riba un isla pafo di e costa di Yucatán. Un pareha Chines resien casa a pidi Jeff saca nan potret, loke Jeff a haci gustosamente. Despues Jeff a haya sa cu aunke e pareha aki a biba e ultimo 12 añanan na Merca, nunca nan a yega di mira of tende di Testigonan di Yehova! A sigui un combersacion agradabel. Jeff a anima nan pa tuma contacto cu e Testigonan ora nan regresa cas.

Kisas tin un evenemento special den bo area cu lo por duna bo un bon oportunidad pa duna testimonio informal. Ora e presidente di Merca a bin bishita e presidente di Mexico na su rancho banda di Guanajuato, reporteronan di tur parti di mundo a bin cubri e evenemento. Un famia Testigo a dicidi di probecha di e oportunidad aki pa predica na Ingles. E reaccion tawata faborabel. Por ehempel, un reportero a cubri varios guera, manera esnan na Kosovo y Kuwait. Un colega di dje a muri den su brasanan na man di francotirado. Ora e reportero a tende tocante e resureccion, cu awa na wowo el a gradici Dios pa a lag’e sa cu bida tin un proposito. El a bisa cu aunke lo e no mira e pareha Testigo mas, lo e warda e bon noticia biblico aki den su curason.

Manera e experencianan anterior ta mustra, hopi bes nos no sa kico lo ta resultado di e testimonionan aki. Sinembargo, e sabi Rei Salomon a bisa: “Tira bo pan riba superficie di e awanan, pasobra lo bo hay’e despues di hopi dia.” Tambe el a bisa: “Sembra bo simiña mainta, y no keda sin haci nada atardi; pasobra bo no sa si sembramento di mainta of di atardi lo tin exito, of si nan tur dos lo ta bon.” (Eclesiastes 11:1, 6) Si, “tira bo pan” celosamente riba hopi awa y “sembra bo simiña” generosamente, mescos cu Pablo y Hesus y e Testigonan di tempo moderno ta haciendo den e teritorio Ingles na Mexico.